路加 21
21
寡婦个奉獻
(馬可 12:41-44)
1耶穌昂頭，看到一兜有錢人將佢等个獻金放落聖殿个奉獻箱。 2佢也看到一個窮苦个寡婦放兩隻細銅錢落去。 3然後，佢講：「𠊎實在㧯你等講，這窮苦个寡婦所放落奉獻箱个比其他个人較多。 4因為別人係奉獻佢等用賸个一部份；總係姖係在無罅用个當中，將全部个生活費獻出來。」
預言聖殿个毀滅
(馬太 24:1-2；馬可 13:1-2)
5有兜人在談論聖殿係用盡靚个石頭㧯還願个禮物所裝飾个；耶穌就講： 6「論到你等這下所看个這兜東西：日仔會到，該時，這所在个每一垤石頭全部會被人拆下來，無一垤石頭會疊在另外一垤个頂高。」
災難㧯迫害
(馬太 24:3-14；馬可 13:3-13)
7佢等就問講：「先生，這個事幾時會發生呢？這一切發生个時節會有麼介兆頭？」
8耶穌講：「你等愛細膩，毋好被人迷惑；因為有盡多人會假冒𠊎个名來，講：『𠊎就係基督！』又講：『時機近了！』你等毋好跈佢等去。 9你等聽到戰爭㧯暴動个風聲，該時節毋使驚。這兜事定著會先發生；總係這毋係講末日黏時會到了。」
10接等，耶穌又講：「民族會㧯民族相㓾，國家會㧯國家戰爭； 11逐所在會有大地動、飢荒㧯發瘟；天頂也會有得人驚个奇事㧯異象出現。 12總係，在這一切事情發生以前，你等會被人捉去，也受迫害；人會將你等送去會堂受審問，害你等坐監牢。為到𠊎个緣故，你等會被人帶到君王㧯統治者个面前受審判。 13這就係你等做見證个機會。 14所以，你等个心愛堅定，毋使先想愛樣般為自家辯護； 15因為𠊎會賜你等口才㧯智慧，使你等个敵人無一個有法度好反對抑係辯駁。 16連你等个爺𡟓、兄弟姊妹、親戚、朋友，也會出賣你等；你等中間有兜人還會被佢等害死。 17為到𠊎个名，大家會怨恨你等； 18總係，你等个頭那毛連一條也毋會無掉去。 19你等愛忍耐，就會救到自家个生命。
預言耶路撒冷个毀滅
(馬太 24:15-21；馬可 13:14-19)
20「你等看到耶路撒冷被敵人个軍隊圍困个時，你等就知它被人毀滅个時節到了。 21該時，住在猶太地區个，愛走去山頂避難；住在城肚个，愛出來；住在鄉下个，毋好入城。 22因為這係『報應个日仔』，愛使聖經所有个話得到應驗。 23在該兜日仔，懷胎个婦人家㧯給孲𤘅仔食乳个阿姆就慘了！大災難會臨到這地方，上帝个怒氣會臨到這人民个身上。 24佢等會死在刀劍之下，抑係被人捉去多多个國家。耶路撒冷會被外邦人踐踏，直到外邦人个期限滿了。
人子个再臨
(馬太 24:29-31；馬可 13:24-27)
25「該時，日頭、月光，㧯星仔攏總會出現奇怪个兆頭。地上个萬國全部會因為大海个吼聲㧯波浪个翻騰，驚到無葛無煞。 26太空个系統也會搖動，人類就驚到會死，又因為等候所愛發生在世間个事昏昏掉去。 27該時，佢等會看到人子大有能力㧯榮耀坐雲降臨。 28這兜事發生个時節，你等愛挺胸、頭那擎起來，因為你等得救个時節緊來緊近了！」
無花果樹个教訓
(馬太 24:32-35；馬可 13:28-31)
29耶穌又㧯佢等講一個比喻：「你等看無花果樹㧯其他各種个樹仔。 30它兜一生出新葉，你等看就知熱天會到了。 31共樣，你等看到這一切个現象，就愛知上帝个國會實現了。
32「𠊎實在㧯你等講，這代人還吂攏總過身以前，這一切个事就會發生。 33天㧯地會無掉，總係𠊎个話永遠毋會無掉。
愛警醒
34「你等自家愛謹慎！你等个心毋好俾酒肉㧯生活个操心打亂掉去，驚怕該日仔忽然臨到你等； 35因為該日仔會像網仔一樣，落在全世界所有个人身上。 36你等愛隨時警醒，常常祈禱，使你等有能力好渡過這一切愛發生个事，有好企在人子个面前。」
37日時頭，耶穌在聖殿教示人；暗晡時，佢就出城，去橄欖山過夜。 38眾人打早就去聖殿尋耶穌，愛聽佢講道。
अहिले सेलेक्ट गरिएको:
路加 21: THV12Hdb
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© The Bible Society in Taiwan, 2012
All rights reserved
© 台灣聖經公會版權所有 2012