Joawh 5
5
Jesus makniwa pahavwi awayg ahumwa awkepket
1Ariwnteke ini ig Kiyavwiye Jesus diyuhe avitit paytwempu Jerusalém ku kiney hiyeg judeyenevwi kehne fet adahan kiyene Kiyavwiye Uhokri.
2Ayge Jerusalém paha awkepket kennesa ahumwa pahatra ahin ku kiw igkis paraksa muwtoh avitit paytwempu. Ini awkepket kewye Betesda giwnavrikkis judeyenevwi. Ayge pohowku akebi xam aranwa ini awkepket.
3Ayge ariku ini xam ka aynsima hiyeg kakahribdavye dukugibdihpikis. Gaytakis motavye. Gaytakisme dathuvye. Gaytakisme miyavuvye.
4Igkis ayge wahepnes un kasawkahwa. Inparinekwa pahavwi ahj dax un atere. Avim ini pahavwi ku pariyekit awke atere, ig makniw ariw madikte gikahri.
5Ayge pahavwi awayg kakahriye. Ig kakahrip adahan ka aynsima kamukri, mpana madikwa akebi akak ntewnehkerbu akak pahak arawna (38).
6Ig Kiyavwiye Jesus danuh atere. Ig hiyap ner awayg dukugi ayge. Ig hiyakni ku ig ayge ka aynsima kamukri gaw. Ig hiyapni hene, ig ayavgi:
— Ba pis makniwkere?
7Igme awayg kaytwa giwn:
— Ihi, Kiyavwiye, nah muwaka makniw. Heneme yuma hiyeg nayavetni adahan ig tubuksan ahakwat un ku aysaw un kasawkahwa. Avit nah danuh atere, ayipa nawenyekit hiyeg danuh nuwhu.
8Igme Kiyavwiye Jesus hiyapni hene, ig awna git:
— Kannikaw kuri. Kidis pisivamna. Hiyawa pis wew.
9Aynewa ig awayg makniw. Ig kannikaw ig kidise gisivamna. Ig wew. Ig keh ini abet samdi.
10Gaytakis judeyenevwi giwewkistenkis igkis hiyapni hene, igkis awna git ner awayg:
— Pis ka hiya pisma hiyuh pisivamna. Ku avim inin samdi. Amekene Moís gikumadukan ka isaksa adahan wixwiy keh ariknawnema annivwit abet samdi.
11Igme awayg kaytwa giwnkis:
— Ner ku pariye makniwevun, igi awna nutuh adahan nah kidis nusivamna adahan nah wew.
12Igkisme ayavgi:
— Pariye hiyeg awna pit inakni?
13Heneme ner awayg ka hiyakgi ku pariye ig. Mmanawa kuwis ig Kiyavwiye Jesus parekwehe hiyeg ku pariye kabubuknene ayge.
14Ariwnteke ini ig Kiyavwiye Jesus patipteke gikak ner awayg akiw ay ariku ini leglis kewye Uhokri Givin. Ig awna git:
— Kuwis pis makniw. Ka ba taraksa akiw. Ku pis taraksa, nawenetke pis uti mbeyne mbayte ariw inin akiw.
15Ig ner awayg hiyapni hene, ig tivik gitkis neras judeyenevwi giwewkistenkis. Ig danuh atere, ig awna gitkis:
— Ner ku pariye makniwevun, giw Jesus.
Jesus akkaw ku ignewa Uhokri
Jo 10.30; Ap 1.17
16Igkis judeyenevwi giwewkistenkis timapni hene ku Kiyavwiye Jesus piyih hiyeg abet samdi, igkis awna:
— Aa, ig kannivanene abet samdi.
Ayteke nikwe igkis kavusa sigimwihpig awaku gitkis ig ka kiyatha samdi.
17Igme Kiyavwiye Jesus kaytwa giwnkis:
— Niguh kannivwiye avanenekwa. Ig ka mayakti ariw gikehni kabayka. Nah hawata nah keh ke igbe.
18Neras judeyenevwi giwewkistenkis hiyapni hene, igkis ka aynsima aharit giwmasepten akiw. Igkis giwmasepten ka ininewatma awaku gitkis ig ka kiyatha samdi, heneme hawata awaku gitkis ig kinisekevutne. Mmanawa ig kighaw git Kiyavwiye Uhokri. Amun ini nikwe ig ekkewne ku igwata Uhokri. Gitkis ka henema.
19Igme Kiyavwiye Jesus awna gitkis:
— Nah ka keh ariknawnema nuwnteknewatma. Nah keh ininewa ku pariye nah hiyap Niguh keh. Ku pariye Niguh keh, nah gikamkayh, keh hawata. Ihanabay inakni nuwnuh. Henewatbaki in.
20Igi Niguh bateke nukakuh, nah gikamkayh. Ig akki nutuh madikte kabayka ku pariye ig keh adahan nahme keh hawata ke igbe. Aysawnemenek ig keh nah keh annut pi kiyeste ariw inin akiw adahan yis wakaymni nudahan akiw.
21Niguh kadahan gidatni adahan ig kannikasene miyaravye adahan ig ikene dehetniki givititkis. Nah gikamkayh, nah kadahanata nudatni adahan nah ikene dehetniki givititkis neras ku pariye numawkan.
22Niguh ka humaw adahan gihivetnikisma hiyeg ba ignes kibeynewatma. Ig ike nuwakuwit, nah gikamkayh, adahan nahnewa gihivetnikis ba igkis kibeynewatma.
23Ig keh hene marihwa madikte hiyeg kiyathan nah gikamkayh hawata ku samah igkis kiyatha Niguh. Ku pahavwi ka kiyathan, amun ini nikwe ig kawnata kiyatha Niguh ku pariye nawahkisten atan.
24Ku pahavwi timap nuwnuh, ku ig iha giwn nawahkisten, ignewa kuwis kadeheten adahan avanenekwa. Ig ka ivukakanti hanpa arimkanit biyukwiki. Kawa. Ig kuwis pese abetitak miyaka tahan abetit dehetniki adahan ig aymuhwa gimun Kiyavwiye Uhokri adahan avanenekwa. Ihanabay inakni nuwnuh. Henewatbaki in.
25Aysawnemenek, hawata ku akak inin kuri, hiyeg ku pariye yuma dehetniki ay givitkis igkis timap nuwnuhnek, nah Uhokri gikamkayh. Gaytakis iha inakni nuwnuhnek, nikwe igkis kadeheten. Henewatbaki igkis kadehetenek.
26Niguh ignewa dehetniki akivara. Ig hawata ike nutuh, nah gikamkayh, adahan nah humaw dehetnikiwata akivara.
27Ig hawata ike nutuh nukiytani adahan nah aysawnemenek nah gihivetnikis hiyeg ba ignes kibeynevwiwatma. Ig ike nutuh mmanawa nah hawata hiyeg amadgayawata inin ke igkisbe.
28Ka yi muwaka wakaymni amin inakni nuwnuh. Mmanawa aysawnemenek madikte miyaravye avuhnenevwi timap nuwnuhnek.
29Avim ini igkis pes ayteke avuhekettak. Gaytakis ku pariye kibeynevwi igkis kannikaw adahan igkis aymuhwa gimun Kiyavwiye Uhokri adahan avanenekwa. Gaytakisme ku pariye kane kibeynevwima igkis kannikaw adahan igkis ivukepka hanpa arimkanit biyukwiki.
30Avim ini nahnewa kaniy ku pariye hiyeg ivukepka hanpa arimkanit biyukwiki. Nah ka keh hene nuwnteknewatma. Nah keh ku samah Niguh gakkan nutuh adahan nah keh. Ayge nah gihivetnikisnek hiyeg ba ignes kibeynevwiwatma, avigkutavrik ku samah Niguh gibetki. Nah gihivetnikisnek wadit nah ka taraksanek. Mmanawa nah ka keh nudahan nubetkima. Nah kehne ku pariye ignewa nawahkisten gibetki.
Ay ka aynsima arakak ku Jesus igyewa Uhokri
Jo 8.18; 1Jo 5.6
31— Wake nah pahavonabe awna inakni hene numinuh, nikwekam ik adahan yis iki he waditnevyenenkam.
32Henneme Niguh hawata akkan ku pariyene nah. Nah hiyakni ku inakni giwn inyewa ku pariye ig awna numinuh.
33 Yisme he aharitnen hiyeg giwnkis amadgayavu inin. Inneki keh yis awahkis hiyeg gimin Joawh Batista adahan timepne ginetni. Hawata ig awna inyewa iwit numinuh.
34Henneme ka sam nutuh ku pariye iwit hiyeg amadgayavu inin awna numinuh. Hiyeg amadgayavu inin giwnkis in ka ariknawnema nutuh. Ininewa Uhokri giwn kibeyne nutuh. Heneme nah kinetihwa amin Joawh Batista giwn awaku in kibeyne ta yit. Nawenetke yis timapni, yis kamaxwa nivitit, yis isahptaw nikwe ariw yitaraksan.
35Ig Joawh Batista ig kewa paha abukribe adahan uguhne yihiyekemni. Yisme ayta ganwat ke yube kabubuk aharitne gibutni. Heneme yis ka iha giwn madiktema.
36Ig Joawh Batista akkan huwewe ku pariyene nah. Heneme ay pahat arikna akiw ku pariye akkan huwewete amin ku pariyene nah. Ini nannuh ku pariye Niguh iki nutuh, in nannuh areketni ku Niguh igi nawahkisten.
37Hawata akiw igwa Niguh nawahkisten ignewa akkan ku pariyene nah. Ig kuwis awna inuriktak ku nah gikamkayh. Heneme yis ka timapti inakni giwn. Yis kawnata hiyap gihivak ku aysaw ig kahayaksaw.
38Hawata akiw ku aysaw ig awna yit abet yihiyekemni yis ka timepkere giwn. Wake yis ataybiswabe arit giwn, nikwekam yis ihakam nuwnuh mmanawa nahnewa gawahkisni. Heneme yis ka iha nuwnuh.
39 Uhokri gannasan hawata akkan ku pariyene nah. Yis yibetki ivegboha inakni Uhokri gannasan mmanawa yivewkan ku yis ivegbohin kabayntiwa, nikwe yis aymuhwanek gimun Uhokri adahan avanenekwa. Ka ba yis hiyapk ku nahnewa ku pariye Uhokri gannasan kinetihwa numinuh?
40Yisme ka kamaxwekere nuvitit kahadbe nah keh yis aymuhwa gimun Uhokri.
41Hiyawa hiyeg amadgayavu inin ka batek nukakuh, heneme in ka sam nutuh. Numawkan ignewa Uhokri batek nukakuh.
42Henneme nah hiyak ku yis ka batek gikak Uhokri avititakma yiyakni.
43Nah ayta yit giwntak Niguh. Hiyaksa yis ka amavan. Heneme wake pahavwi ay yibet amadgaya inin wake ig ayta yit giwnteknewatbe, nikwekam yis amavigkam kabayntiwatkam.
44Yis timepkere hiyeg amadgayavu inin adahan ignes kinetihwa yimin ku yis kibeynevwi hiyeg. Yis ka timepkere igwa Uhokri awna ku yis kibeynevwi hiyeg. Nikwe ka hiya yisma kamaxwa nuvitit.
45Mmah yivewkan nah kamiyevyinek git Uhokri? Kawa. Ka nahma. Igwa amekene Moís kamiyevyinek, ig ner ku pariye yis kamaxwene avitit gikumadukan.
46 Yis yivewkan yis ihpatrune amekene Moís gannasan bawa kawa. Wake yis ihpatrunebe giwn, yis hawata ihpakam nuwnuh. Mmanawa ig kinetihwa numinuh.
47Ku samah yis ka iha inakni giwn amekene Moís yis kawnata iha nudahan nuwnuh.
अहिले सेलेक्ट गरिएको:
Joawh 5: pluPB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2018, Wycliffe Bible Translators, Inc. All rights reserved.