matai 17
17
aezuhu 'o mi'a'ausna
(maluko 9:2-13; luka 9:28-36)
1ataveisi no minmʉhi. isi hafa to iesu 'o petelo. ho i'o nat'ohaesa ci yakovu ho yohane auc'oc'ou bohsifou tomo coni ci pepe ci hcuyu. 2yonto tuhcuhe, mo aezuhu 'o mi'a'ausna to iesu: 'o mi'ausnasi mo totiski to hie ho psoetiskou, 'o yʉsʉsi mo maezo mais'a tiskova ho tofsi'i. 3aemo'au, ihe aiti tomo tuyu ci tesi 'o moose ho 'iliya mo yupepeahngʉyʉ 'o iesu. 4mi'usnu to iesu 'o petelo ho yainca: <nooe'oca, a'ʉmtʉ ʉmnʉ ho mito yontan'e! hociko ʉmnʉa, te'o yontan'e ho ehnou note tuyu ci hnou, faeni suu namo coni, faeni to moose namo coni, faeni to 'iliya na mo coni.>
5ne mon'a seolʉa no aomotʉ'ʉ 'o petelo, yaa tofsi'i ci cmʉcmʉ isi tofeʉ'si 'omo tuyu; panto fihngau cimo i'mi to cmʉcmʉ, yainca: <zou songohia ci oko'u eni, la'u ʉm'ʉmnʉa. temula taayaezoi!>
6ne ihe talʉi to tesi 'e fihngau eni, mo na'no ngoheʉngeʉ, acʉhʉ m'ocnguyu ta ceoa. 7mo emo'usnu 'o iesu ho eubobaka, yainca: <yʉc'ʉ, 'ote ngoheʉngeʉ!> 8micu mʉengʉcʉ 'o tesi, i'oc'o iesu 'o ihen'a aiti, 'anaihe aiti 'o mocmo ci cou.
9ne micu toyovcu to hcuyu, isi eutotaveiya to iesu 'o tesi: <auyusi no o'amocu te i'mi to mcoi ho smoevovei 'o okocou, teav'as'a ake'a eʉsvʉta no mocmo ci cou 'e imu aiti ci mavolosi.>
10ihecu tuocosi to tesi 'o iesu: <mo mainenu ci ihe yainca to lema'cohio seiso te ahtuo'te auyu cmʉ'ho 'o 'iliya?>
11yut'inga to iesu: <'uatee auyu cmʉ'ho 'o 'iliya ho aueva ae'ayoca 'e acʉcʉhʉ. 12at'inghi te'o eʉsvʉta muu, 'amicu cmʉ'ho 'o 'iliya, at'inghi o'aihe honga ta cou, ihe apuya na'na 'oha aʉlʉlʉa. totiski, 'e okocou. tena maezo tiou no tahe akuzkuzoa.>
13ihecueno ta'hongi to tesi 'e e'e to iesu ho isi e'usna to letoonono yohane.
aotothoma 'o isi cʉnghi no hicu ci oko
(maluko 9:14-29; luka 9:37-43)
14ne micu yuovei to ihe yoni to botngonʉ, panto mo uso cimo cihi ci cou, pop'up'ungu to tuhcu to iesu, 15mainca: <nooe'oca, teko'so coveoza 'o oko'u! mo tma'congo no smoefeosʉ ho na'no 'atutumio. la siho suceu'su ho sunghucu. 16o'u hafa uhto tesisu ho poa aitneni. at'inghi o'aihe peelʉi aotothoma.>
17yainca to iesu: <'e yatatiskova ta hpʉhpʉngʉ maitan'e mo mainenu na hia uk'a singkoo, mainenu na hia tokuzo! mate'o noa'a'vi muu? mate mainenu na hia noana'o ho te'o uveica muu? hafa uhtan'e na oko!> 18isicu t'ʉtei to iesu 'o hicu; ne micu yuyafo 'o hicu, cu osni yov'o 'o tma'congo to oko.
19ataveisi ta hi'hioa tan'e, ihe auc'oc'ova tuocosi to tesi 'o iesu: <mainci imza o'te peelʉi petoyafa 'o hicu ic'o?>
20isi yut'inga to iesu: <mo maica homo o'te amso na singkoomu. te'o a'ʉmta eʉsvʉta muu, hocimu yaa mako mais'a 'o conci tutu no chae enghova na hia meoisi no singkoo, upena hoci mi'usnu ta hcuyu tan'e ho yainca: <<i'mi tan'e ho noezuhu ta'e!>> 'ate ahtuo'te mimho noezuhu. uk'a ci temu o'te peihcʉ'hi ci hi'hioa.#panto piyo ci tposʉ noana'o isi topuhngi ta 21 secu <'emo maica ci hicu, tec'o noe'ocʉ no tanzi, ho 'inoli niante popeov'oha peteoyafa.>>
i'vaha eyoca to iesu na iachisi mcoi
(maluko 9:30-32; luka 9:43-45)
22ne moso acʉhʉ yu'eteuyunu ne ngalilaya 'o tesi, isi mi'usni to iesu ho yainca: <tena toveineni ta emucu ta cou 'e okocou, 23tehe opcoza, at'inghi. te smoevovei ho tac'u miteuhi.>
mo na'no nac'o 'o tesi ne ihe talʉi.
tuyafo to tmuhnoa to seiten
24ne micu sʉc'ʉhʉ to kapenong 'o iesu ho i'o tesi, panto piyo cila ateuyunu to tmuhnoa to seiten ci cou mo uhto petelo, tuocosi: <teenana tuyafo no tmuhnoa ta seiten si senseimu?>
25yut'inga to petelo: <ahtuo'te tuyafo.>
nemo yʉmeʉmʉ to emoo 'o petelo, isi aueva tuocosi to iesu: <saimong, zou siya nate mi'usnu ta honte ta hpʉhpʉngʉ ho tuyafo no tmuhnoa no pa'momʉtʉ ho ino tmuhnoa no hahocngʉ? nenusi no 'e cou ta iachi hpʉhpʉngʉ? hocieno o'te na cou h'unano hpʉhpʉngʉ? mo mainenu na 'tohʉngʉsu?>
26yut'ingi 'o petelo: <'a couh'unasi hpʉhpʉngʉ.> yainca to iesu: <ma o'anteno 'ahʉyʉ tuyafo no tmuhnoa 'e cou ta iachi hpʉhpʉngʉ. 27at'inghi o'ateto 'ahʉya yuszozʉ tamo maica ci cou. teko uhto aaskiti to etʉpʉ ho toalungu, yaa 'o teko ahoza tolʉi ci yoskʉ, paavi 'o ngayosi, teko aiti 'omo coni ci peisu; 'e peisu eni 'ate amso tuyafa no teto tmuhnoa ta seiten, 'atakoeno hafa ho faeni hin'i.>
अहिले सेलेक्ट गरिएको:
matai 17: bsnfe
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
The Bible Society in Taiwan © 台灣聖經公會版權所有 2014