EFETIKILO 1
1
1Poku fetika Suku wa sovola ilu losi. 2Osi ya kala ño upolokoso, ka mua kaile cimue. Owelema wa sikilĩlĩle ocipala cokalunga. Espiritu lia Suku lia endela kilu liovava.
3Suku yu wa linga hati, Ku iye ocinyi kuenje ocinyi ceya. 4Suku wa mõla ocinyi okuti ca posoka. Suku wa tepisa ocinyi lowelema. 5Suku wa luka ocinyi hati, Utanya. Owelema wo luka hati, Uteke. Kuenje kua kala oñolõsi, kua kalavo omẽle, eteke liaco olio mosi.
6Suku yu wa linga hati, Pokati kovava pa kale epuluvi, li tepise ovava lovava. 7Suku yu wa lulika epuluvi li tepisa ovava a kala vemẽhĩ liepuluvi liaco, lovava akuavo a kala kilu liepuluvi. Haico ca lingiwa. 8Suku yu wa luka epuluvi liaco hati, Ilu. Kuenje kua kala oñolõsi, kua kalavo omẽle, eteke liaco olio vali.
9Suku yu wa linga hati, Ovava a kasi vemẽhi lilu a likongele pamosi, ongongo yi mõlẽhe. Haico ca lingiwa. 10Suku wa luka ongongo hati, Osi. Oku kua likongela ovava wa lukako hati, Okalunga. Suku yu wa ci mõla okuti ca posoka. 11Suku wa linga hati, Osi yi tunde owangu, lovikũla vimaime olombuto, loviti viapako yimaime apako ndapata avio, omo muli ombuto yaco, vilu lieve. Haico ca lingiwa. 12Osi ya tunda owangu, lovikũla via imaima olombuto ndapata avio, oviti viapako vi kuete ombuto yaco ndapata ao. Suku wa ci mõla okuti ca posoka. 13Kuenje kua kala oñolõsi, kua kalavo omẽle, eteke liaco olio tatu. 14Suku yu wa linga hati, Ku kale ovinyi kepuluvi liokilu oku tepisa utanya luteke; vi linge olondimbukiso violotembo loloneke lanyamo; 15vi linge ovinyi kepuluvi liokilu, hã ha vi taimĩla kilu lieve. Haico ca lingiwa. 16Suku yu wa lulika ovinyi vivali vinene, ocinyi ca velapo ci viala kutanya, ci sule ci viala kuteke, wa lulikavo olombungululu. 17Suku wa vi kapa kupuluvi liokilu oku tuila kilu lieve, 18loku viala kutanya lokuteke hã ha vi tepisa utanya lowelema. Suku yu wa ci mõla okuti ca posoka. 19Kuenje kua kala oñolõsi, kua kalavo omẽle, eteke liaco olio kuãla.
20Suku yu wa linga hati, Vovava mu siate ovitundo vioviendalomuenyo, olonjila vi palãlaile vilu vepuluvi li kasi pokati kilu loposi. 21Oco Suku wa sovola ovimuandu vinene viovokalunga loviendalomuenyo viosi vi litevateva, viosi via siata vovava ndapata avio; lolonjila viosi vi pãlala, ndapata avio. Suku wa ci mõla okuti ca posoka. 22Suku yu wa vi sumũluĩsa hati, Liciti, siati, yuki vovava okalunga, lolonjila le vi siate kilu lieve. 23Kuenje kua kala oñolosi, kua kalavo omẽle, eteke liaco olio tãlo.
24Suku yu wa linga hati, Kilu lieve kuiye ovinyama ndapata avio, ovinyama viovimbo, lovipuka, lovinyama viovusenge ndapata avio. Haico ca lingiwa. 25Suku yu wa lulika ovinyama viovusenge ndapata avio, lovinyama viovimbo ndapata avio, lovipuka viosi vi likoka posi ndapata avio. Suku wa ci mõla okuti ca posoka.
26Suku wa linga hati, Tu luliki omunu ukuacilelembia cetu, ukuesetahãlo lietu hã ha viala kolõsi viovokalunga, lokolonjila viovusenge, lokovinyama viovimbo, lokoluali luosi kuenda kovipuka viosi vi likoka posi. 27Suku yu wa sovola omunu ukuacilelembia caye, ukuacilelembia caye muẽle Suku a sovola, ulume lukãi wa va sovola. 28Suku wa va sumũlũĩsa. Suku wa va sapuila hati, Liciti, siati, yukisi oluali, lu yuli, viali kolõsi viovokalunga, lokolonjila viovusenge, lokovinyama viosi vi ñuala ñuala kilu lieve. 29Suku yu wa linga hati, Tali, ndo wihi ovikũla viosi vi kasi vongongo yosi yokilu lieve, vina vimaima olombuto, loviti viosi vimaima apako a kuete ombuto; vi linge okulia kuene. 30Ovinyama viosi kilu lieve, lolonjila viosi viovusenge, lovipuka viosi vi likoka posi, vi kuete ofela yomuenyo, okulia kuavio ovikũla viosi vi talala. Haico ca lingiwa. 31Suku yu wa ci mõla okuti ovina viosi a lulika via posoka. Kuenje kua kala oñolosi, kua kalavo omẽle, eteke liaco olio epandu.
अहिले सेलेक्ट गरिएको:
EFETIKILO 1: EMB63
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Umbundu Bible © United Bible Societies, 1963.