TOBITƐ 11
11
Tobi dɛa zɛlɛ tandu li baa a, nɛ ma ia
1Wa nɛa we kɔlɔ do le Kaserinɛ, kɛ ma dɛ kɛ zã le Ninivɛ ni, nɛ anzɛ Rafaɛlɛ tɔ̃ hã Tobi na: 2“Mɔ ĩ ti ngamɛ kɛ baa mɔ zi do ma, 'da fala kɛ lɛ la zi do a ni. 3Kɔ ma wia na, lɛ la dati, hã lɛ 'dafa kɔ tɔa vɛ̃ 'bɔ do 'da hɔa 'da wuke 'da mɔ do ogele wanɔ vɛ̃.”
4Nɛ wa la dati zu wa bɔa. Nɛ Rafaɛlɛ tɔ̃ hã Tobi na, a ba faliã kɔyɛ dɛ kɔ̃ a. Nɛ tole 'da Tobi kpia dɛ 'do wa ni tɛ la do wa. 5Do kpo 'da fala ni, nɛ nde Ana dungu nù dɛ kɛ zã wala kɛ be 'da a wia sɔ we si do ma ni, kɔ a tɛ soko mɔ nyɛlɛ ndũu. 6Nɛ 'da kala be sĩ, kɔ a nɛ 'dafa li a, nɛ a zɔ be 'da a tɛ tɛ ma, nɛ a sa mɔ hã wili a na: “Tobitɛ, mɔ zɔ́, be 'da lɛ tɛ si ma! Wa do yali ngba a.”
7Nɛ dati kɛ na Tobi kpa ngba a do baa a ni, nɛ anzɛ Rafaɛlɛ tɔ̃ hã a na: “Mi tɔ̃ hã mɔ do gbãlã we na, baa mɔ a ma sɛ di ngɔ zɔ mɔ. 8Mɔ kɔ́ faliã kɔyɛ ngɔ gbali a. Ina ni ma 'bili sɛ sanga fɛ̃a mɛnɔ ngɔ li a ni, nɛ ma fo sɛ ma vɛ̃, nɛ baa mɔ a zɔ sɛ 'bɔ mɔ do dia nɛ.”
9Nɛ Ana ma yu dati be 'da a, nɛ a kpa a, nɛ a ba a dɛ tɛ̃ a, nɛ a ufu zala a, nɛ a na: “Mi zɔa tɛ mɔ be 'daa ia, ngangga ni mi wia we fe ma do gɛ̃a sila!” A tɔ́a ni do'do, nɛ a ma ngɔ he do yangga. 10Nɛ Tobitɛ kulu ngɔ, nɛ a ma ngɔ tamba wala nu ngboe do nyanga a. 11Nɛ Tobi gɔnɔ dati a do faliã kɔyɛ dɛ kɔ̃ a ni, nɛ kpa a, nɛ a 'be tɛ̃ a, nɛ a ufu ngɔ li a, nɛ a na: “Aa baa, mɔ tɛ dɛ̀ kili gɔ!” Nɛ a kɔ faliã kɔyɛ ngɔ li a. Nɛ a 'bɔ 'do nɛ be sĩ, 12nɛ a ma ngɔ fo fɛ̃a mɛnɔ ma tulu dɛ kɛ zã li baa a ni. 13Nɛ Tobitɛ ba a dɛ tɛ̃ ɛ, nɛ a ma ngɔ he nɛ, nɛ a na: “Mi zɔa mɔ do gbali mi be 'daa. Mɔ hɔa nyɛa we 'da mi.” 14Nɛ a tɔ̃a 'bɔ na: “E kɔ lɛ dɔnggɔ Gale! E kɔ lɛ dɔnggɔ dɔ̃lɔ̃ li 'da a! E kɔ lɛ dɔnggɔ oanzɛ santonɔ 'da a vɛ̃. E kɔ Gale wele dɔ̃lɔ̃ li, a fɔmɔ lɛ fai! E kɔ lɛ dɔnggɔ oanzɛ santonɔ 'da a kɔ sabɛlɛ do sabɛlɛ! Mba gɔ, NWA hã zi ngamɔ hã mi, nɛ nde ngangga ni a ĩ 'bako hã mi, ma kɛ mi zɔa 'bɔ be 'da mi Tobi do gbali mi!”
15Nɛ Tobi lia dɛ kɔ tɔa i do yangga, nɛ a dɔnggɔ NWA do nga gɛlɛ. A tɔ́a tɛlɛ tɛ kɛ gɛnɛ 'da a la nɛ ni hã baa a na: “Ɛ si do mbili, nɛ ɛ ba 'bɔ Sara, be zɔnga be 'da Raguɛlɛ do kɛnɛ ɛ. A a li wala ni, a kɔlɔ do nu ngbo le Ninivɛ ia.”
16Kɔ Tobitɛ nɛa we zele ni, nɛ a dɛ yangga wena, nɛ a dɔnggɔ Gale. A kulu ngɔ, nɛ a gɔnɔ dati konduka 'da a dɛ nu ngbo Ninivɛ i. Kɔ Owi kɔ le Ninivɛ wa zɔa a tɛ la do dia nɛ, nɛ fo wi ba te ti a bina ni, nɛ wa ɔngbɔ wena. Nɛ Tobitɛ tɔ́a hã winɔ vɛ̃ na, Gale ĩ 'bako hã ɛ, nɛ a kpasa ɛ. 17A nɛa we kɔlɔ do Sara, kɛnɛ be 'da a Tobi, nɛ a fana a na: “Mi do yangga we zɔ mɔ, boko be 'daa! E kɔ lɛ dɔnggɔ Gale kɛ a kã mɔ dɛ 'da lɛ gɛ! E kɔ Gale wele nu a tɛ baa mɔ, do wili mɔ Tobi, do mɔ boko be 'daa! Mɔ lé dɛ kɔ tɔa 'da mɔ! E kɔ mɔ kpa yangga, do dia dungu kɔ tɔa gɛ!”
18Do kɔ̃ tũi ni, Oyudanɔ vɛ̃ kɛ wa ɔ zi Ninivɛ ni wa zi do yangga wena. 19Nɛ Ahikarɛ do Nadabɛ, benɔ 'da nya Tobitɛ wa tɛa, nɛ wa dɛa yangga do a fala nɛ kpo.
अहिले सेलेक्ट गरिएको:
TOBITƐ 11: NGB
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Ngbaka DC Bible (We Nu Gale) Version © Bible Society of the Democratic Republic of Congo, 1995.