ഓഗന്നാ് 8
8
ണഡാത്തകെ്ട്ട ഒരുത്തിന പ്‌ഡിക്കാര്
1ആന ഏസു ഒലിവ് ഗുഡ്ഡേക്കെ പോനാ്. 2മറ് ണാള് ബെ്ഡ്യാക്കാലാത്തിലി താനെ ഏസു സാമികൂരേക്കെ തിലിമ്പി ബന്താ്. അക്കുളെ ആള്‌ഗ ഒട്ടുക്ക് അവാ് പട്ട്‌ക്കെ ബന്താര്. അദിലി ഏസു കുക്കാന്ത് അവാര്‌ണ പഡിസ്യ പ്‌ഡിത്താ്. 3അക്കുളെ ബേദ ബാത്ത്യലാമ് പരിസലാമ് ബേസ്യാഡി ണഡാന്തിര്‌ന്ത ഒരുത്തിന പ്‌ഡിത്ത് ബന്ത് ആള്‌ഗാദ് മുന്തുക്ക് ണില്ലിസിനാര്. 4എന്തിര്‌ന്ത് അവാര് ഏസുണ ഇച്ചെ കേ്ട്ടാര്: <<ഗുരുവെ, ഒരുത്താനോഡെ ഉറാങ്കികൊണ്ടിര്‌ന്ത കുറ്റണാലെ എമ്മ ഇവാണ പ്‌ഡിത്ത് ബന്തിര്‌ക്കേര്. 5ഇച്ച്‌ളവാര്‌ണ കല്ല് എ്റിന്ത് കൊല്ലുഡൊ എന്ത് മോസെ ബെത്ത സാമി സട്ടാത്തിലി എമാക്ക് സൊല്ലിര്‌ക്ക്‌ദ്. ആന ഇദ്‌ണ പറ്റി ണീ എന്ത സൊല്ലുറെ?>> 6ഏസുണ പറ്റി കുറ്റ സൊല്ല്യ ബേ്ണ്ടി എന്താറ്റ് കെ്ഡേസ്യാത്തെ അവാര് ഇച്ചെ അവാന കേ്ട്ടാദ്.
ആന ഏസു ബഗ്ഗി ബിരാലിലി മണ്ണ്‌ക്കെ എ്ള്‌ദി കൊണ്ടിര്‌ന്താ്. 7ആന അവാര് പിന്നേമ് പിന്നേമ് കേ്ട്ട്‌കൊണ്ടെ ഇര്‌ക്കാട്ടി ഏസു തലേന ഉജാത്തി അവാര്‌ക്കെ: <<ണിമ്മ് കൂട്ടാത്തിലി പാവ സെയ്യാത്തവാര് ആരാറ്റ് ഇര്‌ക്കേര? അച്ചെ ആരാറ്റ് ഇര്‌ന്താക്കി അവാള്‌ക്ക് മുദ എ്റിര കല്ല് അവാ് എ്റിഡൊ>> എന്ത് സൊന്നാ്. 8പ്‌റ ഏസു പിന്നേമ് ബഗ്ഗി ബിരാലിലി മണ്ണ്‌ക്കെ എ്ള്‌ദി കൊണ്ടെ ഇര്‌ന്താ്.
9ഇദ്‌ണ കേ്ട്ടാദ്‌മ് ബെല്ല്യവാരിലിര്‌ന്ത് ഒരൊരു ആളായി അദിലിര്‌ന്ത് പോനാര്. കഡേസി ഏസുമ് അദ്‌ക്ക് എ്ഡ്‌ത്ത് ബന്ത് ണില്ലിസിനവാമ് മാട്ട് മിച്ച ആനാര്. 10ഏസു തലേന ഉജാത്തി ണോഡി: <<പൊമ്പുളെ, അവാരൊട്ടുക്ക് ഏദിലി? ആര്‌മ് ണിനാണ കുറ്റക്കാറി എന്ത് ദണ്ടണെ ബിദിക്കാലേഗ?>> എന്ത് അവാണ കേ്ട്ടാ്.
11അക്കുളെ അവ: <<ഇല്ലെല ആണ്ടവാനെ>> എന്ത് ബദ്‌ള് സൊന്ന.
അക്കുളെ ഏസു: <<ണാന്‌മ് ണിനാണ ദണ്ടണെ ബിദിക്കാദില്ലെ. ണീ പോ, ഇനി പാവ സെയ്യാദെ>> എന്ത് അവാള്‌ക്കെ സൊന്നാ്.]
ഏസുത്തെ ഉലഗാദ് ബെ്ള്‌സ
12പ്‌റ ഏസു പിന്നേമ് ആള്‌ഗാക്കെ: <<ണാന്‌ത്തെ ഉലഗാദ് ബെ്ള്‌സ, എന്ന് പിന്ന്‌ക്ക് ബരവാ് ഇ്റ്‌ട്ടിലി ണഡാക്കാഗെ മാട്ടാ്. അവാന്‌ക്ക് ഉജുറു കൊഡുക്ക ബെ്ള്‌സ കെ്ഡേക്കു>> എന്ത് സൊന്നാ്.
13അദ്‌ക്ക് പരിസല: <<ണീ ആരെന്ത് ണീ താനെ ണിനാണ പറ്റി സൊല്ലുറെ, അദ്‌ണാലെ ണീ സൊല്ലുറാദ് ണേരല്ല>> എന്ത് സൊന്നാര്.
14അക്കുളെ ഏസു ഇച്ചെ സൊന്നാ്: <<എനാണ പറ്റി സൊല്ലുറ കാര്യഗ ണാന് താനെ സൊന്നാല്‌മ് അയ്യി കാര്യഗ ണേര്‌ത്തെ. എന്ത്‌ക്കെന്റ ണാന് ഏദിലിര്‌ന്ത് ബന്തെ എന്ത്‌മ്, ണാന് ഏദ്‌ക്കെ പോരെ എന്ത്‌മ് എനാക്ക് തെര്യു. ആന ണാന് ഏദിലിര്‌ന്ത് ബന്തെ എന്ത്‌മ്, ഏദ്‌ക്കെ പോരെ എന്ത്‌മ് ണിമാക്ക് തെര്യ. 15ണിമ്മ മന്‌സാര്, അഡ്‌ത്തവാന കുറ്റ ബിദിക്ക പാസെ ബിദിക്കേര്, ണാന് ആര്‌ണാമ് കുറ്റ ബിദിക്കാദില്ലെ. 16ആന ണാന് കുറ്റ ബിദിത്താല്‌മ് ണാന് ബിദിത്ത ബിദി ണേര്‌ത്തെ. എന്ത്‌ക്കെന്റ ണാന് കുറ്റ ബിദിക്കാട്ടി ണാന് ഒരുത്താ് താനെ അല്ല ബിദിക്കാദ്, എനാണ സൊല്ലിബ്‌ട്ട അപ്പനാന സാമിമ് എന്ന്‌ദ് ഒപ്പ ഇര്‌ക്കാ്. 17റണ്ട് ആള്‌മ് ഒരേ കാര്യണ സൊല്ലുറദാനാക്കി അദ് ണേര് എന്ത് ണിമാക്ക് മോസെ ബെത്ത സാമി സട്ടാത്തിലി എ്ള്‌ദാലേഗ? 18ണാന് ആര് എന്ത് എനാണ പറ്റി ണാന് താനെ സൊല്ലുറെ. എനാണ സൊല്ലിബ്‌ട്ട അപ്പനാന സാമിമ് ണാന് ആര് എന്ത് എനാണ പറ്റി സൊല്ലുറാ്>>.
19അക്കുളെ അവാര്: <<ണിന്ന്‌ദ് അപ്പാ് ഏദിലി?>> എന്ത് കേ്ട്ടാര്.
അദ്‌ക്ക് ഏസു: <<ണാന് ആര് എന്ത്‌മ് എന്ന്‌ദ് അപ്പാ് ആര് എന്ത്‌മ് ണിമാക്ക് തെര്യ. ണാന് ആര് എന്ത് ണിമാക്ക് തെരിന്തിര്‌ന്താക്കി എന്ന്‌ദ് അപ്പാ് ആരെന്ത്‌മ് ണിമാക്ക് തെര്യുവായിര്‌ന്ത്‌ദ്>> എന്ത് സൊന്നാ്. 20സാമികൂരേലി ഉണ്ട്യെ പെ്ട്ടി ബെത്തിര്‌ക്ക പട്ടിലി ആള്‌ഗണ പഡിസി കൊണ്ട് ഇര്‌ക്കാട്ടിത്തെ ഏസു ഈ കാര്യഗണ സൊന്നാദ്. എന്ത്‌ട്ട്‌മ് ആര്‌മ് അവാന പ്‌ഡിക്കാലെ. എന്ത്‌ക്കെന്റ അന്നാരമാട്ട്‌മ് അവാന്‌ക്കുള്ള ണേര ബരാലെ.
ഏസു ഈ ഉലഗാത്തില്യവാനല്ല
21ഏസു പിന്നേമ് അവാര്‌ക്കെ: <<ണാന് പോരെ, ണിമ്മ എനാണ പരാക്കുവേര്. ണിമ്മ ണിമ്മ് പാവണാലെ താനെ സാവേര്. ണാന് പോര പട്ട്‌ക്ക് ണിമാക്ക് ബര്യ മുഡ്യാമ് മാട്ട>> എന്ത് സൊന്നാ്.
22അദ്‌ണാലെ എഗുദാര് തലെവല: << <ണാന് പോര പട്ട്‌ക്ക് ണിമാക്ക് ബര്യ മുഡ്യമാട്ട> എന്ത് ഇവാ് സൊല്ലുറാ്. അച്ചാനാക്കി ഇവാ് താന്‌താനെ സായ പോരാനൊ?>> എന്ത് സൊന്നാര്.
23ഏസു അവാര്‌ക്ക്: <<ണിമ്മ അഡി ബൂലോഗത്തില്യവാര് ണാന് മേലിര്‌ന്ത് ബന്തവാ്. ണിമ്മ ഈ ഉലഗാക്ക് പട്ടവാര്. ണാന് ഈ ഉലഗാക്ക് പട്ടവാനല്ല. 24അദ്‌ണാലെ ണിമ്മ ണിമ്മ് പാവണാലെ താനെ സാവേര് എന്ത് ണാന് ണിമാക്കെ സൊല്ലാലേഗ? ണാന് ആര് എന്ത് സൊന്നെനൊ അവാ്ത്തെ ണാന് എന്ത് ണിമ്മ ണമ്പാദെ പോന ണിമ്മ ണിമ്മ് പാവണാലെ താനെത്തെ സാവേര്>> എന്ത് സൊന്നാ്.
25അക്കുളെ അവാര്: <<ണീ ആര്?>> എന്ത് ഏസുണ കേ്ട്ടാര്.
അദ്‌ക്ക് ഏസു: <<ണാന് ആരെന്ത് ണിമാക്കെ മുദ ഇര്‌ന്തെ സൊന്നെനൊ അദേ ആള്‌ത്തെ ണാന്. 26ണിമാണ പറ്റി എനാക്ക് എത്തിന്യൊ കാര്യഗ സൊല്ല്യാമ് ഇര്‌ക്ക്‌ദ്. ണിമാണ പറ്റി കുറ്റ ബിദിക്ക്യാമ് ഇര്‌ക്ക്‌ദ്. എന്താല്‌മ് എനാണ സൊല്ലിബ്‌ട്ടാവാനോഡെ ഇര്‌ന്ത് കേ്ട്ടാദ്‌ണാത്തെ ണാന് ആള്‌ഗാക്കെ സൊല്ലുറെ. എന്ത്‌ക്കെന്റ അവാ് സത്ത്യമുള്ളവാ്ത്തെ>> എന്ത് സൊന്നാ്.
27തന്ന് അപ്പനാന സാമിന പറ്റിത്തെ ഏസു സൊന്നാദ് എന്ത് അവാര്‌ക്ക് തെര്യാലെ. 28അദ്‌ക്ക് ഏസു പിന്നേമ്: <<മന്‌സാനായി പ്‌റാന്തവാന ണിമ്മ ഉജാത്തിന പ്‌റ ണാന് ആര് എന്ത് സൊന്നെനൊ അവാ്ത്തെ ണാന് എന്ത് ണിമാക്ക് തെര്യു. ണാന് എന്ന് അദിഗാരത്തിലി ഒന്റുമ് സെയ്യാദെ എന്ന് അപ്പനാന സാമി എനാക്ക് പഡിസിനാദ്‌ണാത്തെ സൊല്ലുറെ എന്ത്‌മ് ണിമാക്ക് തെര്യു. 29എനാണ സൊല്ലിബ്‌ട്ടവാ് എന്ന്‌ദൊപ്പ ഇര്‌ക്കാ്. അവാന്‌ക്ക് പ്‌ഡിത്താദ്‌ണ ണാന് സെയ്‌രാദ്‌ണാലെ എനാണ കയ്യി ബ്‌ഡാലെ>> എന്ത് സൊന്നാ്. 30ഏസു സൊന്ന ഈ കാര്യഗണ കേ്ട്ട് എത്തിന്യൊ ആള്‌ഗ ഏസുണ ണമ്പിനാര്.
സത്ത്യ ണിമാണ അഡിമേലിര്‌ന്ത് ബ്‌ഡ്‌സു
31തനാണ ണമ്പിന എഗുദാര്‌ക്കെ ഏസു: <<ണാന് പഡ്‌സ്‌റ കാര്യഗണ കേ്ട്ട് ണഡാക്കദാനാക്കി ണിമ്മ ണേര്‌മായിമ് എന്ന് സൊല്ലുപഡി ണഡാക്കവാരാവേര്. 32അച്ചെ ണിമാക്ക് സത്ത്യ എന്തായെന്റ് തെര്യു. അയ്യി സത്ത്യ ണിമാണ അഡിമേലിര്‌ന്ത് ബ്‌ഡ്‌സു>> എന്ത് സൊന്നാ്.
33അവാര് ഏസുക്കെ: <<എമ്മ അവുറഗാമ്‌ദ് കാല്‌ക്ക് പട്ടവാര്‌ത്തെ, എമ്മ ഒരു ണാള്‌മ് ആര്‌ക്ക്‌മ് അഡിമെ ആയിര്‌ക്കാലെ. പിന്നെ എമാണ അഡിമേലിര്‌ന്ത് ബ്‌ഡ്‌സുവെ എന്ത് ണിനാക്ക് എച്ചെ സൊല്ല്യ മുഡ്യു?>> എന്ത് കേ്ട്ടാര്.
34അദ്‌ക്ക് ഏസു ഇച്ചെ സൊന്നാ്: <<ണേര്‌മായിമ് ണാന് ണിമാക്കെ സൊല്ലുറെ, പാവ സെയ്‌രവാരെല്ല പാവാക്ക് അഡിമെത്തെ. 35അഡിമെ ഒരു കൂരേലി എപ്പേക്ക്‌മ് ഇര്‌ക്കാദില്ലെ. ആന മഗാ്ത്തെ എപ്പേക്ക്‌മ് ഇര്‌ക്കുവാ്. 36അദ്‌ണാലെ ണിമാണ അഡിമേലിര്‌ന്ത് മഗാ് ബ്‌ഡ്‌സിനാക്കി, ണിമ്മ ണേര്‌മായിമ് അദിലിര്‌ന്ത് ബ്‌ഡ്‌സി ബ്‌ട്ടവാര് ആവേര്. 37ണിമ്മ അവുറഗാമ്‌ദ് കാല്‌ക്കെ പട്ടവാര്‌ത്തെ എന്ത് എനാക്ക് തെര്യു. ആന ണാന് സൊല്ലുറ ണായണ കേ്ക്ക്യ ണിമ്മ മനേസ്സില്ലാത്തവാര് ആനാദ്‌ണാലെ ണിമ്മ എനാണ കൊല്ല്യ ണോഡുറേര്. 38എന്ന്‌ദ് അപ്പാ് പട്ടിലി കണ്ടാദ്‌ണ ണാന് ണിമാക്കെ സൊല്ലുറെ. ആന ണിമ്മാഗൊ ണിമ്മ് അപ്പാനോഡെ ഇര്‌ന്ത് കേ്ട്ടിര്‌ക്കാദ്‌ണ സെയ്‌രേര്.>>
39അക്കുളെ അവാര്: <<എമ്മ്‌ദ് പാട്ടാ് അവുറഗാമ്‌ത്തെ>> എന്ത് സൊന്നാര്.
അദ്‌ക്ക് ഏസു: <<ണിമ്മ അവുറഗാമ്‌ദ് കാല്‌കെ്ളെഗ ആയിര്‌ന്ത അവുറഗാമ് സെയ്‌ദ അദേ കാര്യണ സെയ്‌ദിര്‌ക്കുവേര്. 40ആന സാമിലിര്‌ന്ത് കേ്ട്ട സത്ത്യണ ണിമാക്ക് സൊല്ലി തന്തിര്‌ക്ക മന്‌സാത്തെ ണാന്. എന്ത്‌ട്ട്‌മ് ണിമ്മ എനാണ കൊല്ല്യ ണോഡുറേര്. ആന അവുറഗാമ് അച്ച്‌ള കാര്യഗെല്ല സെയ്യാലെ അല്ല. 41ണിമ്മ ണിമ്മ് അപ്പാ് സെയ്‌ദ കാര്യഗണ സെയ്‌രേര്>> എന്ത് സൊന്നാ്.
അക്കുളെ അവാര്: <<എമ്മ ബീ്ണ്‌ക്ക് പ്‌റാന്തവാരല്ല. എമാക്ക് അപ്പാ് ഒന്റുത്തെ, അദ് സാമിത്തെ>> എന്ത് സൊന്നാര്.
42അദ്‌ക്ക് ഏസു അവാര്‌ക്കെ ഇച്ചെ സൊന്നാ്: <<സാമി ണിമ്മ്‌ദ് അപ്പാനായിര്‌ന്ത എന്നോഡെ ണിമാക്ക് സീവാ് ഇര്‌ന്തിര്‌ക്കു. എന്ത്‌ക്കെന്റ ണാന് സാമി പട്ടലിര്‌ന്ത്‌ത്തെ ബന്താദ്. ണാന് എന്ന് പിര്യാക്ക് ബന്താദല്ല, സാമിത്തെ എനാണ സൊല്ലിബ്‌ട്ടാദ്. 43ണാന് സൊല്ലുറാദ്‌ണ കേ്ക്ക്യ ണിമാക്ക് മനേസ്സില്ലാത്താദ്‌ണാലെ ണാന് സൊല്ലുറാദ് ണിമാക്ക് ണെപ്പ്‌കെ്ഡേക്കാദില്ലെ. 44ണിമ്മ ണിമ്മ്‌ദ് അപ്പാ് സെയിത്ത്യാ് എങ്കവാന്‌ദ് പ്‌ള്ളെഗാത്തെ. അദ്‌ണാലെ അവാ് ആസെപഡ്‌റ കാര്യഗണാത്തെ ണിമ്മ സെയ്‌രേര്. അവാ് മുദ ഇര്‌ന്തെ കൊലെക്കാറാന്‌മ് സത്ത്യാക്ക് എ്ണേഗാത്തവാന്‌മ്‌ത്തെ ആയിര്‌ന്താ്. എന്ത്‌ക്കെന്റ അവാനോഡെ സത്ത്യ ഇല്ലെ. അവാ് ഉറുട്ടു സൊല്ലുഗാട്ടി തനാക്കിര്‌ക്ക ഉറുട്ടു സൊല്ലുറ പളാക്കാത്തിലിര്‌ന്ത് സൊല്ലുറാ്. എന്ത്‌ക്കെന്റ അവാ് ഉറുട്ടു സൊല്ലുറവാന്‌മ് എല്ല ഉറുട്ട്‌മ് ബരാദ് അവാനോഡെ ഇര്‌ന്ത്‌ത്തെ. 45ആന ണാന് സത്ത്യണ സൊല്ലുറാദ്‌ണാലെ ണിമ്മ എനാണ ണമ്പ്‌റാദില്ലെ. 46ണാന് പാവ സെയ്‌ദെ എങ്ക കുറ്റ എന്നോഡിര്‌ന്ത് ണിമാക്ക് ആരാറ്റ്‌ക്ക് കാട്ട്യ മുഡ്യുമ? ണാന് സൊല്ലുറാദ് സത്ത്യാത്തെ ആയിര്‌ന്ത ണിമ്മ എന്ത്‌ക്ക് എനാണ ണമ്പ്‌റാദില്ലെ? 47സാമിക്ക് പട്ടവാര് സാമി സൊല്ലുറാദ്‌ണ കേ്ക്കാര്. ആന ണിമ്മ സാമിക്ക് പട്ടവാര് അല്ലാത്താദ്‌ണാലെ സാമി സൊല്ലുറാദ്‌ണ കേ്ക്കാദില്ലെ.>>
ഏസുമ് അവുറഗാമ്‌മ്
48<<ണീ ഒരു സമര്യക്കാറാ്. ണിനാണ കെ്ട്ടജാദി ണമ്പിര്‌ക്ക്‌ദ് എന്ത് എമ്മ സൊല്ലുറാദ് സെരി അല്ലാഗ?>> എന്ത് എഗുദാര് കേ്ട്ടാര്.
49അക്കുളെ ഏസു: <<എനാണ കെ്ട്ടജാദി ണമ്പാലെ. ണാന് എന്ന് അപ്പാ് സാമിനാത്തെ മദ്‌സ്‌റെ. ആന ണിമ്മാഗൊ എനാണ മദ്‌സ്‌റാദ്‌മില്ലെ. 50എനാക്ക് മദ്‌പ്പ് കെ്ഡേക്ക്യ ണാനായി ഓരാഡ്‌റാദില്ലെ. ആന എനാക്ക് മദ്‌പ്പ് കെ്ഡേക്ക്യ ബേ്ണ്ടി ആസെപഡ്‌റ ഒരുത്താ് ഇര്‌ക്കാ്. അവാ് ബിദിക്കവാന്‌മ്‌ത്തെ. 51ണേര്‌മായിമ് ണാന് ണിമാക്കെ സൊല്ലുറെ, എന്ന് ണായണ കേ്ട്ട് ണഡാക്കവാര്‌ക്ക് എപ്പേക്ക്‌മ് സാവു ബരമാട്ട>> എന്ത് സൊന്നാ്.
52അക്കുളെ എഗുദാര്: <<ണിനാണ ഒരു കെ്ട്ടജാദി ണമ്പിര്‌ക്ക്‌ദ് എന്ത് എമാക്ക് ഇപ്പ് തെരിന്ത്‌ദ്. അവുറഗാമ്‌മ് സാമിദാസ്‌ഗാമ് സത്താര്. ആന ണീയൊ എന്ന് ണായണ കേ്ട്ട് ണഡാക്കവാര്‌ക്ക് എപ്പേക്ക്‌മ് സാവു ബരമാട്ട എന്ത് സൊല്ലുറെ. 53അപ്പ് ണീ എമ്മ്‌ദ് പാട്ടാ് അവുറഗാമ്‌ണ ബ്‌ഡ ബെല്ല്യവാന? അവുറഗാമ്‌മ് സാമിദാസ്‌ഗാമ് സത്താര്. ആന ണിനാണ ണീ ആരെന്ത് ണെനേക്കെ?>> എന്ത് ഏസുണ കേ്ട്ടാര്.
54അക്കുളെ ഏസു ഇച്ചെ സൊന്നാ്: <<ണാന് എനാണ താനെ മദ്‌പ്പുള്ളവാ് ആക്കിന അയ്യി മദ്‌പ്പ്‌ക്ക് ഒരു ബെലേമ് ഇല്ലെ. എനാണ മദ്‌പ്പുള്ളവാ് ആക്ക്‌റാദ് എന്ന്‌ദ് അപ്പാ്ത്തെ. അവാന ണിമ്മ് സാമി എന്ത് ണിമ്മ സൊല്ലുറേര്. 55ആനാല്‌മ് അവാന ണിമാക്ക് തെരിരാദില്ലെ. എനാക്ക് അവാന തെര്യു. അവാന തെര്യ എന്ത് ണാന് സൊന്നാക്കി ണിമാണ പാസെ ണാന്‌മ് ഉറുട്ടു സൊല്ലുറവാ്ത്തെ. ആന എനാക്ക് അവാന തെര്യുമ് ണാന് അവാന്‌ദ് ണായണ കേ്ട്ട് ണഡാക്കാമ് സെയ്‌രെ. 56ണാന് ബര ണാള്‌ണ കാണ്യ എന്ത് ണെനേത്ത് ണിമ്മ്‌ദ് പാട്ടനാന അവുറഗാമ് പിര്യപട്ടിര്‌ന്താ്. അവാ് അയ്യി ണാള്‌ണ കണ്ട് പിര്യപട്ട്‌മ് ഇര്‌ക്കാ്.>>
57അയ്യി എഗുദല ഏസുണ: <<ണിനാക്ക് അമ്പദ് ബയ്യിസ് ഗൂഡി ആഗാലെ. ണീ അവുറഗാമ്‌ണ കണ്ടിര്‌ക്കേന>> എന്ത് കേ്ട്ടാര്.
58അക്കുളെ ഏസു: <<ണേര്‌മായിമ് ണാന് ണിമാക്കെ സൊല്ലുറെ, അവുറഗാമ് പ്‌റാക്കാത്ത മുദാഗെ ണാന്‌ത്തെ അവാ്#8:58 ണാന്‌ത്തെ അവാ് ഗ്‌റീക്ക് ണായാത്തിലി ണാന്‌ത്തെ എന്ത്‌ത്തെ ഇര്‌ക്കാദ്. പള്യ ഒപ്പ്‌കെ്ട്ടിലി സാമിക്കുള്ള പേര്‌ത്തെ ഇദ്. >> എന്ത് അവാര്‌ക്കെ സൊന്നാ്. 59അക്കുളെ അവാര് ഏസുണ എ്റ്യ കല്ല് എ്ഡ്‌ത്താര്. ആന ഏസു മറേന്ത് സാമികൂരേന ബ്‌ട്ട് പോനാ്.
अहिले सेलेक्ट गरिएको:
ഓഗന്നാ് 8: സാമിദ് സേദി
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
New Life Literature