От Матфея 7
7
Нанқихтиснанилъық
1Иисусым апыҳтӯсяни нагныӷуткӣ: «Нанқихтихпынаси иляхпысиның ынка̄м Кияӷныӷым нанқихныӷилъиси, 2қаюҳлъяк Кияӷныӷым нанқихлъықӣси таўатыңўа̄қ нанқихтилъыҳпысистун иляхпысиның. Атуқылъықӣлъю лъпысинун ата̄сит тама̄кут пикаси иляхпысинун. 3Сяңан ысҳаҳсигу юлгутыхпык ӣсқуӷутңа, лъпык катам ӣсқуӷутын унаҳсиҳлъяк авылӷаӷлюку? 4Сялӷӣмың юлгутын пизигу: “Ынта̄а ӣсқуӷутңиқаӷлякын”, лъпык паниның ӣсқуӷутылгулютын унаҳсиҳлъягмың? 5Уюқ пинӣюгнық! Сивуклъюку унаҳсиҳлъяк ийыхпының нусюглюку ынңа̄талъ хўатыҳлъюўа̄қ ысҳаӷлюку юлгутын ӣсқуӷутңиӷнакын».
Лыгасӣӷўаҳтынун Апыҳтӯсяқыхпынаки Кияӷныӷым Акузитаңи
6Та̄хкын Иисусым пикӣ: «Лыгасӣӷўаҳтынун апыҳтӯсяқыхпынаки Кияӷныӷым Акузитаңи, қаюҳлъяк қикмистунлъю, куругаӷыстунлъю аюқут. Сяңўа̄т аглыӷналӷӣт тӯныхпынаки қикминун лю̄рақ сюӷугнаюкаңиси. Акитуқат сюңа̄т милю̄тыхпынаки куругаӷнун, лю̄рақ тутма̄сҳақнаюкатки».
А̄птылъық, Иваӷилъық, Тыңлюхтулъық
7«А̄птык, алъхыӷулъықуси; иваӷитык, на̄лъкулъықуси; тыңлюхтуҳтык амихкун, қылъпыӷулъықӣси. 8Қаюҳлъяк кина алңунак а̄плъыҳӣ, алъхыӷусяҳқа̄гуқ; кина алңунак иваӷилӷӣ, на̄лъкусяҳқа̄гуқ, кина алңунак тыңлюхтулӷӣ амихкун, қылъпыӷулъықа̄. 9Китум югым иӷныни туңсиқан нықыкшаңлъямың, тӯнылъықагӯ уйӷагмың? 10Налиӷмың туңсиқан иқалъюгмың, тӯнылъықагӯ нымыӷьямың? 11Сыӷлыӷуӷңа̄ҳпыси, авақутаси тӯньяҳқақаси пинилӷӣмың тунусямың. Атази қилягмылңуқ тӯниюгатаӷаӷлюни аюқуқ пинилӷӣмың тунусямың тама̄кунун а̄плъыҳинун лъңанун.
12Ынка̄м юлгутыхпысинун пинитун пистысюкуфси, лъпысилъю пинитун пӣқитыки. Таўатын апыҳтуӷиңӯт Моисейем Лӣлиҳтӯсӣлъю, ӯкналиқистытлъю игақыхкӣт».
Кахпыста̄ҳақ Амик
13Та̄хкын Иисусым пикӣ: «Итыҳтык кахпыста̄ҳаҳқун амихкун. Амик геенамун аюқылӷӣ нуқутӯқ, тӯмкыхтуқлъю ынка̄м угляқ та̄кўагун иглыҳтақуқ. 14Иўырңа амик уңувалъыӷмун аюқылӷӣ кахпыста̄ҳа̄гуқ, тӯмлъюгмытуқлъю ынка̄м қафсинкӯраҳа̄м на̄лъкақӣ тумыт уңувалъыӷмун аюқылӷӣт».
Натын Лӣгикылъыҳқӣ Ӯкналиқистысиӷўа̄ӷыт
15«Кылыңалюси ӯкналиқистысиӷўа̄ӷның. Такулъықӣси пынъӣҳсюгниҳқылъютың, та̄ўаңинақ угиҳсялӷӣстун ама̄стун аюқут. 16Лӣгикылъықаси наңаӷныӷитхун лӣгикылъыҳпысистун уқфигыт сямың пӣтыстилъҳитхун. Сикуҳлъюгыт пӣтыстиңигатут виноградымың налиӷмың смоквамың, таўатыҳпигақ сыӷлыӷыт югыт пинитун пиңигатут. 17Уқфик пинилӷӣ пӣтыстияҳқа̄гуқ пинилӷӣмың, та̄ўаңинақ уқфик сыӷлық пӣтыстияҳқа̄гуқ сыӷлыӷмың. 18Уқфик пинилӷӣ пӣтыстина̄нӷитуқ сыӷлыӷмың, уқфик сыӷлық пӣтыстина̄нӷитуқ пинилӷӣмың. 19Ынка̄м алңунак уқфик пӣтыстинӷилңуқ пинилӷӣмың кыплъюни кумаҳсяҳқа̄гуқ. 20Ынка̄ңам таўатытылъҳитхун лӣгикылъықаси ӯкналиқистысиӷўа̄ӷутаңи».
Итыӷьяҳқат Атаныҳпагулъҳанун Қилягым
21Иисусым апыҳтӯсяни нагныӷуткӣ: «Иляңи югым хўаңамнун малихся̄ҳтыкнӣқут ынка̄м пӣқа̄тңа: “Атанқамкын” иўырңа итыӷна̄нӷитут Атаныҳпагулъҳанун Қилягым. Тама̄куңина̄т атуқилӷӣт пиюкылъҳаның Атама қилягмылңӯм итыӷьяҳқа̄гут Атаныҳпагулъҳанун Қилягым. 22Нанқихтилъҳым Аӷныӷани, углям пияҳқақа̄ңа хўатын: “Атанық, Атанық! Атыҳпыгун Кияӷныӷым уңипа̄ а̄пқақаҳпут. Атыҳпыгун а̄нысқуқақапут туӷныӷа̄т углялӷӣның югның. Атыҳпыгун алъя̄ҳлъюхўаҳтӣӷа̄тақа̄гукут угляӷңа̄н!” 23Иўырңа хўатын пилъықанка: “Налъюкңўа̄ӷамси, иқитык хўаңамның, сыӷлытун пистыни”».
Аюгилңуқ Тунымақ
24«Кина алңунак нагалъҳӣ апыҳтуӷилъымнун, қа̄ткыхкумики пыҳқинылӷӣтун юхтун аюқуқ мыңтыӷаңлъяқақ уйӷагым қа̄йңакун. 25Ыслъялъюгуҳтыҳлъягьялӷӣми, кӣўыт улывумаӷмың, ануқлъиҳлъягьялӷӣмилъю, таўалъӣма мыңтыӷақ ӯлъҳумаңилңуқ қаюҳлъяк уйӷахкун ныкыфтыка̄лӷӣ.
26Иўырңа кина алңунак нагатыӷңа̄ӷми апыҳтуӷилъымнун, қа̄ткынӷилъкумики, налъюқатун юхтун аюқуқ мыңтыӷаңлъяқақ қына̄ҳлъюхкун. 27Ыслъялъюгуҳтыҳлъягьялӷӣми, кӣўыт улывумаӷмың, ануқлъиҳлъягьялӷӣмилъю, ага мыңтыӷақ ӯлъқақ на̄вңўа̄ӷлюни».
Иисус Апыҳтуӷилӷӣ Аҳтуӷьяҳқа̄нӷилъылиӷлюни
28Иисус тама̄кын апыҳтуӷиныӷмың та̄қсян, юлӷутыҳлъягыт сяӷӣӷаюкат, 29қаюҳлъяк апыҳтуӷикақ аҳтуӷьяҳқа̄нӷилъылиӷлюни, апыҳтуӷикаюгыстун Лӣлиҳтӯсямың пихпынани.
अहिले सेलेक्ट गरिएको:
От Матфея 7: ess2
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2022, Wycliffe Bible Translators, Inc. All rights reserved.