Lûqa 24
24
Ganebiyayişê Îsayî
(Metta 28:1-10; Marqos 16:1-8; Yûhena 20:1-10)
1Cînîyan, roja yewşemeyî serê sibayî zaf rew, beharato ke amade kerdbi girewt û şiyî mezel. 2Înan dî ke, kerraya ke fekê mezelî de bî, gindirîyaya kîşte. 3Dekewtî zere, labelê cesedê Wayirê ma Îsayî nêdî. 4Gama ke ena rewşe rê şaş mendbî, di mêrikî bi kincanê xwu yê ke sey virsoyî beriqîyayne, verê înan de peyda biyî. 5Cînîyan bi ters sereyê xwu kerd xwu ver. La mêrikan înan ra va: “Şima çira miyanê merdeyan de ganeyî geyrenê? 6O tiya nîyo, bi gane. Hema ke Celîle de bi, şima ra vatbi se, biyarê xwu vîr. 7Vatbi ‘Gereka Benîademo Semawî teslîmê destê gunekaran bibo, bidiyo çarmix ro û roja hîrêyine bibo gane.’” 8O wext cînîyan vateyê Îsayî ardî xwu vîr.
9Mezel ra ageyrayî û enê heme biyenî yewendes hewarîyan û şagirdanê bînan rê vatî. 10Înanê ke enê biyenî hewarîyan rê vatî, Meryema Mejdelije, Yohena, Meryema dadîya Yaqûbî û cînîyê bînî ke înan dir biyî. 11Labelê enê vateyî hewarîyan rê sey qala venge ameyî; înan cînîyan ra bawer nêkerd. 12Ancî zî, Petrûs wurişt û bi vazdayiş şi mezel. Gama ke xwu çewt kerd û ewnîya zere ra, paço keten ra teber çiyêk nêdî. Vera ena biyene de bi heyret mezel ra dûr kewt.
Rayirê Emwasî de
(Marqos 16:12-13)
13Eynî roje şagirdanê Îsayî ra di kesî Yeruşalîm ra kewtbî rayir şiyêne Emwas. Ena dewe teqrîben qasê yewendes kîlometreyî dûrî bî. 14Gama ke rayir de şiyêne, enê heme qewimîyayişê ke biyê, mabeynê xwu de qisey kerdêne. 15Gama ke înan qisey kerdêne û kewtbî minaqeşe, Îsa ame înan het û înan dir rayir şi. 16Feqet seba ke Ey nêşinasnê, çimê enê şagirdanê ci ameybî girewtiş. 17Îsayî înan ra va: “Rayir de şima yewbînan dir çi minaqeşe kerdêne?”
Mêrikî vindertî; zaf xemgîn aseyne.
18O ke nameyê ci Kileyopas bi, Îsayî ra wina va: “Kesê ke enê rojan de Yeruşalîm de misafir bî û biyenê ke enê rojan de qewimîyayê ra bêxeber tenya ti yê herhal!”
19Îsayî înan ra persa va: “Kamcîn biyenê ke qewimîyayê?”
Înan Ey ra va: “Biyenê derheqê Îsayê Nasirayijî de. O, nezerê Homayî û şarî de yew pêxember bi, ke bi vatişan û kerdişanê xwu qudretê xwu nîşan da. 20Serkahînan û sermiyananê ma O teslîmê Romayijan kerd ke cezaya mergî bidê ci; înan zî O da çarmix ro. 21La ma hêvî kerdbi, keso ke şarê Îsraîlî do bixelisno, O bo. Labelê tenya eno nîyo, biyî hîrê rojî ke enê biyenî qewimîyayê 22û mabeynê ma ra tayê cînîyan yew xebera ke ma heyret de verda arde. Ewro serê sibayî rew şiyê mezel. 23Neaş mezel de nêdî û ageyrayî ma het. Înan va ‘Ma melekî dîyî.’ Melekê ke înan ra asayê, vato ‘Îsa heyat de yo.’ 24Hevalanê ma ra zî tayê kesî şiyê û tam seke cînîyan vatbi, mezel o qeyde dîyo; neaşê Îsayî nêdîyo.”
25Enê ser o, Îsayî înan ra wina va: “Ey bêaqilên! Şimayê ke heme vateyanê pêxemberan ra bawerkerdiş de giran ê! 26Qey hewce nêbi ke Mesîh enê dejî bianco û bireso berzîya xwu?” 27Dima, Mûsayî ra dest pê kerd, bi pêxemberanê bînan dewam kerd, heme nuşteyê miqedesî ke behsê ci kenê, îzeh kerdî.
28Gama ke resayî nizdîyê dewa ke şiyêne, Îsa seke rayirê xwu ra dewam keno, wina hereket kerd. 29La înan israr kerd va: “Ha roj şino awan, şan o, ma dir bimane.” Îsa zî înan dir piya şi keye.
30Gama ke Îsa înan dir sifre de ronişte bi, nane girewte û şukir kerd. Dima nane kerde leteyî û da înan. 31O wext çimê înan abiyî û Îsa şinasna. La O verê çimê înan ra bi vindî. 32Înan yewbînan ra va “Rayir de gama ke ma dir qisey kerdêne û nuşteyê miqedesî ma rê îzeh kerdêne, zerrîya ma senî veşayne, wina nêbi?”
33Her di şagirdî wuriştî û tavilî ageyrayî Yeruşalîm. Înan dî ke yewendes hewarî û êyê ke înan dir ê, ameyê pêser. 34Hewarîyan û înanê bînan va: “Wayirê ma Îsa heqîqeten biyo gane, xwu nîşanê Şîmûnî dayo.” 35Her di şagirdan zî biyenê ke rayir de qewimîyayê û wexto ke Îsayî nane kerda leteyî, înan senî O şinasnayo, qal kerd.
Îsa xwu nîşanê şagirdanê xwu dano
(Metta 28:16-20; Marqos 16:14-18; Yûhena 20:19-23; Karê Resûlan 1:6-8)
36Gama ke înan enê çî qisey kerdêne, Îsa bi xwu ame û miyanê înan de vindert. Înan ra va: “Silamet şima ser o bo.” 37Zerrîya şagirdan lerza; va qey sipîla vînenê û tersayî. 38Îsayî înan ra wina va: “Şima çira telaşe kenê? Çira şibhe dekeweno qelbê şima? 39Biewnîyê destanê mi ra, linganê mi ra; ez Îsa ya. Destê xwu bisawê mi ra û bivînê. Sipîlayan de goşt û este çinê yê, la seke şima vînenê, yê mi estê.”
40Badê ke eno va, dest û lingê xwu nîşanê înan dayî. 41Şagirdî keyfan ra hende şaş mendbî ke, çiyo ke dîyêne ra bi zor bawer kerd. Îsayî înan ra persa va: “Şima dir çiyê werdişî esto?” 42Înan yew parçe maseyo sûrkerde da Ey. 43Îsayî mase girewt û verê înan de werd.
44Dima, înan ra wina va: “Gama ke ez hema şima dir biya, mi enê şima rê vatbî. Mi vatbi, her çiyo ke derheqê mi de Tewrato ke diyayo Mûsayî, nuşteyanê pêxemberan û Zebûr de ameyo nuştiş, gereka bêro ca.”
45Îsayî, seba ke bieşkê nuşteyanê miqedesan fam bikerê, zêhnê telebeyanê xwu akerd. 46Û înan ra wina va: “Ameyo nuştiş ke Mesîh do dej bianco û roja hîrêyine merg ra bibo gane. 47Seba ke guneyî bêrê efûkerdiş, dawetkerdişê tewbeyî zî Yeruşalîm ra dest pê keno û heme şaran rê bi nameyê Ey diyeno zanayiş. 48Şima şahidê enê biyenan ê. 49Ez zî, Ruho Miqedes ke Babîyê min ê Semawî wehd kerdo, do şima rê bişirawî. Labelê şima, qudreto ke berzîyaran ra yeno heta ke şima bidê xwu ra, Yeruşalîm de bimanê.”
Îsa gêrîyeno asmîn
(Marqos 16:19-20; Karê Resûlan 1:9-11)
50Dima, Îsayî şagirdê xwu berdî teberê şaristanî, heta nizdîyê Beytanya. Destê xwu ver bi asmîn akerdî û ê teqdîs kerdî. 51Gama ke Îsayî ê teqdîs kerdêne, înan het ra aqitîya û gêrîya asmîn. 52Şagirdan Îsayî rê secde kerd û bi yew keyfweşîya pîle ageyrayî Yeruşalîm. 53Şagirdî tim mabed de mendêne û Homayî rê hemd kerdêne.
अहिले सेलेक्ट गरिएको:
Lûqa 24: diqSZZ
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© (Active), Wycliffe Bible Translators, Inc. All rights reserved.