यशैया 56
56
सबै राष्ट्रहरूलाई आशिष्
1याहवेह यसो भन्नुहुन्छ:
“न्याय पालना गर,
जे ठिक छ, त्यही गर;
किनकि मेरो उद्धार नजिकै छ,
र मेरो धार्मिकता चाँडै प्रकट गरिनेछ।
2त्यो मानिस धन्यको हो, जसले यो गर्छ;
त्यो मानिस, जसले यसलाई स्थिर राख्छ;
जसले शब्बाथलाई अपवित्र नपारी पालन गर्छ,
र आफ्नो हातलाई दुष्ट काम गर्नबाट रोकिराक्छ।”
3याहवेहमा समर्पित भएको कुनै परदेशीले यसो नभनोस्,
“याहवेहले मलाई निश्चय उहाँका मानिसहरूबाट अलग गर्नुहुनेछ।”
कुनै नपुंसकले यस्तो नभनोस्,
“म त एउटा सुकेको रूख मात्र हुँ!”
4किनकि याहवेह यसो भन्नुहुन्छ:
“मेरा शब्बाथहरू पालन गर्ने,
मैले मन पराएका कुराहरू चुन्ने,
र मेरो करारमा स्थिर बस्ने नपुंसकहरूका निम्ति—
5तिनीहरूलाई मेरो मन्दिर र त्यसका पर्खालहरूभित्र
छोराछोरीहरूभन्दा पनि अझ उत्तम स्मारक तुल्याउनेछु;
र तिनीहरूलाई अझ असल नाम दिनेछु।
म तिनीहरूलाई कहिल्यै नमेटिने
अनन्तको नाम दिनेछु।
6आफूलाई याहवेहमा समर्पित गरेका परदेशीहरू,
जसले उहाँको सेवा गर्ने,
याहवेहको नामलाई प्रेम गर्ने
र उहाँलाई आराधना गर्ने;
शब्बाथलाई अपवित्र नगरी पालन गर्ने,
र मेरो करारमा स्थिर रहनेहरू—
7तिनीहरूलाई म आफ्नो पवित्र पर्वतमा ल्याउनेछु।
म तिनीहरूलाई मेरो प्रार्थनाको घरमा आनन्द दिनेछु।
तिनीहरूले मेरो वेदीमा चढाएका
होमबलि र बलिदानहरू म ग्रहण गर्नेछु;
किनकि मेरो घर सबै जातिहरूका लागि
प्रार्थनाको घर हुनेछ।”
8इस्राएलका निर्वासितहरूलाई बटुल्नुहुने
प्रभु याहवेह घोषणा गर्नुहुन्छ:
“भेला गरिएकाहरूबाहेक म अझ अरूलाई
तिनीहरूमा भेला गर्नेछु।”
दुष्टहरूको विरुद्ध परमेश्वरको अभियोग
9हे मैदानका सबै पशुहरू हो, आओ!
हे वनका सबै पशुहरू हो, खानलाई आओ!
10इस्राएलका पहरेदारहरू अन्धा छन्;
तिनीहरू सबैमा ज्ञानको अभाव छ;
तिनीहरू सबै भुक्न नसक्ने
लाटा कुकुरहरूजस्ता छन्;
जो पल्टिरहने र सपना देख्नेहरू हुन्,
र तिनीहरू सुत्न मात्र रुचाउँछन्।
11तिनीहरू असाध्यै भोकाएका कुकुरहरू हुन्;
तिनीहरू कहिल्यै अघाउँदैनन्।
तिनीहरू समझ नै नभएका गोठालाहरू हुन्;
सबै आफ्नै बाटो लाग्ने
र आफ्नै लाभ खोज्नेहरू हुन्।
12प्रत्येक यसो भनेर कराउँछन्, “आओ, मलाई मद्य देओ!
हामी लट्ठ हुने गरी मद्यपान गरौँ!
अनि भोलि आजको दिनजस्तै हुनेछ,
झन् राम्रो हुनेछ।”
अहिले सेलेक्ट गरिएको:
यशैया 56: NCV
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
पवित्र बाइबल, नेपाली समकालीन संस्करण
प्रतिलिपि अधिकार © 1998, 2006, 2021, 2024 Biblica, Inc.
अनुमतिसहित प्रयोग गरिएको छ।
सम्पूर्ण अधिकार विश्वव्यापी रूपमा सुरक्षित रहनेछ।
Holy Bible, Nepali Contemporary Version
Copyright © 1998, 2006, 2021, 2024 by Biblica, Inc.
Used with permission. All rights reserved worldwide.