Matìyò 1
1
Nə̀ tě Yesù
1À wə̀ də̌ ŋwàʼà kə̀ kə dê nəniy azəd ə nə̀ tě Yesù Kə̀litò yìy, wà tu kə Devìd wə̀ ù kə də nəniy wà tu kə Ablàhâm kìy. 2Ablàhâm kə də̌ tè Ayzìk, Ayzìk ə də̌ tè Dzàkôb, Dzàkôb ə də̌ tè Dzudà nə̀ awizə̂ ə we yiy. 3Dzudà kə də̌ tè Pelèz nə̀ Zelàh. Zə̂ ghu kə də̌ Tamàl. Pelèz kə də̌ tè Hezlòn. Hezlòn ə də̌ tè Lâm. 4Lâm kə də̌ tè Àminadàb. Àminadàb kə də̌ tè Nasòn, Nasòn kə də̌ tè Samùn, 5Samùn kə də̌ tè Bowàs, Zə̂ Bowàs kə də̀ Lahàb. Bowàs ə də̌ tè Obèd, Zə̂ Obèd kə də̀ Lût. Obèt ə də̌ tè Dzesì. 6Dzesì ə də̌ tè Devìd wə̀ ù kə də nəniy dòŋ kìy. Devìd ə də̌ tè Solomùn. Zə̂ Solomùn kə də̌ wìy Yulìyà.
7Solomùn kə də̌ tè Lèhobwàm, Lèhobwàm ə də̌ tè Abidzà, Abidzà ə də̌ tè Asàf. 8Asàf ə də̌ tè Dzèhosafàt, Dzèhosafàt ə də̌ tè Dzulàm, Dzulàm ə də̌ tè Yuzìyà. 9Yuzìyà ə də̌ tè Dzotàm, Dzotàm ə də̌ tè Ahàz, Ahàz ə də̌ tè Hèzèkayà. 10Hèzèkayà ə də̌ tè Mànasè Manasè ə də̌ tè Amòn, Amòn ə də̌ tè Dzòsiyà. 11Dzòsiyà ə də̌ tè Dzèkonayà nə̀ àwizə̂ we a sòŋə fə ghu kə dzûm na nəniy ghu a Babilòn.
12Abù aghee Islàel dzwoŋi ŋwô bə̂ nəniy a Babilòn, bù kwùm tsə anə sòŋə fə ghu kə byi nəniy Yesù ate, Dzèkònayà ə byi bə̀ Shiltìyèl, Shiltìyèl ə byi bə̀ Zèlubabèl, 13Zèlubabèl ə byi bə̀ Abiyùd, Abiyùd ə byi bə̀ Eliakìm, Eliakìm ə byi bə̀ Azòl, 14Azòl ə byi bə̀ Zadòk, Zadòk ə byi bə̀ Akìm, Akìm ə byi bə̀ Elwìd. 15Elwìd ə byi bə̀ Èliyazà, Èliyazà ə byi bə̀ Matàn, Matàn ə byi bə̀ Dzàkôb. 16Dzàkôb kə də̌ tè Yùsə̂f, ŋə̀m ə̀ Mə̀li wə ù kə byi nəniy Yesù wə̀ ghu kə tyoŋə we nə̀ à də̌ Kə̀litò.
17I dê tsə nə̀ nə̀ təli kə də̀ àvəm nə̀ ghè kyàʼì ani ŋwò tsə anə̀ tu kə Ablàhâm bù tswi kwùm tsə azòŋə̀ Devìd. Utu ivəm nə̀ ùghe wiy soʼo ù kyàʼì ani nìy ŋwò tsə a sòŋə fə Devìd, bù kwùm tsə anə sòŋə fə ghu kə nîy zù nəniy nə̀ àghě Islàel a Babilòn. À nam də̀ sòʼo utu ùvəm nə̀ à ùghe wiy ùkyàʼì ani nìy ŋwò tsə soŋə fə ghu kə də a Babilòn bù kwùm tsə anə sòŋə fə ghu kə byi Kə̀litò ate.
Ghu byi bə̀ Yesù
18À yù də̀ ayiə yə ghu kə byi nəniy Yesù Kə̀litò ate. Mə̀li kə də̌ nə̀ Yùsə̂f mə nyi na we anə wiy. Awò ghu ani bù nìy ìwee, a də̌ nə̀ Mə̀li mə wa boŋ sə nə̀ à zəŋi Zwàykə̀zwekiy. 19Yùsə̂f kə liə way ani də̀d màʼà tuw kə Mə̀li, u nùw təŋ yə̀ kə idzwə ate, aŋwòə ù kə də̌ wè tsitsi. U khu tsə̀ dzəd ani màŋ twe màʼà təŋ kə we nə̀ aghee kə̀ kəli nə way. 20Abù Yùsə̂f namə myiŋə̀ nəniy ghii, tsə̀ndii ə̀ Kə̀zə̀ ə zù bù â we anə u dzə̀mə̀ dzày yə̀ a we nə, “A Yùsə̂f, wà Devìd, kə̀ tsəŋ dzə̀ ani nìy Mə̀li anə wiy, aŋwòə à zəŋi Zwàykə̀zwekiy nə̀ ù boŋ. 21Ù kì byikə bə̀ wà ùŋəmə̀, wò kî kwe tsə izəd i we nə̀ à də̀ Yesù, aŋwòə ù nì bii fyiə àghě we anə bɛb tə ghu.” 22Ayiə yə àdzə̀m kə bvami fyi kpe kə anə yiə yə Mwe ə̀ Mbyi, Kə̀zə̀ kə tɛb na zî bə̂ abidzəmə̀ wè ntwùm ə̀ Kə̀zə̀ nə̀, 23“Wà fə̀ghàŋ ùyəŋi nə̀ ù kamə nəŋì kôʼ nə̀ wìŋəmə̀, ù nì boŋə byikə bə̀ wà ùŋəmə̀ ghu ni tyoŋə we nə̀ à də̌ ‘Ìmanwèl’ i myiŋə̀ nəniy nə̀, ‘Zə̀kìy də nə̀ ŋgàŋ.’ ” 24Abù Yùsə̂f zɛ̀mə̀ kə nəniy, u bvami nìy yə̀ sòʼò Mə̀li anə yiə yə tsə̀ndii ə̀ Kə̀zə̀ kə dzây nəniy â we. 25Â Mə̀li ani byi bə̀ wà ùŋəmə̀ anə unìə̀ ughè wə̀, Yùsə̂f kə kə̀ nəŋì kôʼ dzə̂ nə̀ we. Abù yiə ù byi tsə nəniy, Yùsə̂f ə bvami kwe tsə sòʼò ìzəd i we nə̀ à də̀ Yesù.
अहिले सेलेक्ट गरिएको:
Matìyò 1: isu
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© CABTAL 2023