Matìyò 9
9
Yesù ə zəŋi taw kə wù lìy ù kə pfə doʼò bə̂dkə̀bə̂d
(Mâk 2.1-12; Lukâs 5.17-26)
1Yesù ə nyi kə anə kəmfə̀n, dàŋ dzwoŋi yə̀ anə inaʼ yə ù kə muə nəniy ate. 2Aghê ə bòʼò bù nə̀ wù lìy anə kəmbuŋ nə̀ ù mə pfə dòʼò bə̂dkə̀bə̂d. Abù Yesù kòʼ tsə ndzòʼò ìbɛmə yə ghu kwu nəniy, u dzày yə̀ â wù ù ghè wə̀ a we nə, “Kəli tsə fòŋ, a wa nam, Mə mə nìyzə̀ ìbɛb yiə̀ yìy.”
3Anə yiə yə Yesù dzày tsə ghii, aghê àtyi dee ulàŋ àliy yiy kaʼ ani ŋwuŋi dzə̀ŋì anə iwè i ghu dzìy nə̀, “À yù də̀ ani nyàʼì Kə̀zə̀. Wù wə̀ dzìy nə̀ ghe də Kəzə̀?”
4Yesù kə kwu ŋwô àyiə yə ghu kə moʼò nəniy, u bəb yə̀ a ghu nə̀, “Ghà moʼò nə̀ìndiə ndzòʼò àyiə yiy ə? 5À bva ìghaa yiy? Ani dzày tsə nə̀ ‘Ghu mə nìyzə̀ ibɛb yiə̀ yìy’, moo à də ani dzày tsə nə̀ ‘Nǐy kə mbuŋ kiə̀ kìy wò kaʼ yə̂ ani bwìy ə?’ 6Mə kî dè bə̀ ŋwò â ghà nə̀ Wà Wù kwu ŋwô daʼa kiy ani nìyzə̀ bɛb tə ghù fə ambvə̀dintsə.” U dyaŋi dzày yə̀ â wù wə̀ ù kə pfə doʼò bə̂dkə̀bə̂d a we nə, “Nǐy kə mbuŋ kiə̀ kìy wò ŋwô.”
7Wù wə̀ ə dyaŋi ŋwò təmi kə idoŋ, ŋwò zù a ndaw. 8Abù aghê kôʼ àyiə yə ghii, ghu tsəŋ, nyìə̀ ùkali awò Zə̀kə̀ kə nyiə̀ nəniy dzòʼò daʼa kə awò aghě mbyi yiy.
Yesù ə twoŋə kə Matìyò
(Mâk 2.13-17; Lukâs 5.27-32)
9Abù Yesù ŋwò tsə a wote, zè, u kòʼ tsə wù ù khii ŋwàʼà kə tsuw kiy, ghu twoŋə nə̀ à də̀ Matìyò ù kə də nəniy a ndàw ì khî ŋwàʼà kə̀ tsuw kiy.
Yesù ə dzày yə̀ a we nə, “Dzwùmi bə̀ miə.” Matìyò ə ghàʼ ŋwò kə idoŋ, dzwùmì yə̀ Yesù.
10Abù soŋə fə Yesù nyiə nəniy nə̀ tsə̀təndii tə we tiy a ndàw Matìyò, ndə̀mə̀ àghê à khi ŋwàʼà kə̀ tsuw kiy nə̀ àghè àbɛbə àliy də̀ sòʼò awote. 11Aghee Falàsî àliy yiy kòʼ tsə ghi, kaʼ ani bəb awò tsə̀təndii tə we tiy a ghu nə, “À də̌ kìə̀ àtyi dè ghi nyiə fwumə nə̀ àghè khi ŋwàʼà kə̀ tsuw kiy nə̀ àghè àbɛbə ə?”
12Yesù ə zuw àyiə yə ghu kə dzîy nəniy, u bə̀li yə̀ a ghu nə̀ “À kwu dzə̀ way aghê à taw yiy ani zù tə̀ wù ùtyiə byaŋi ghu, à kwuni kwu aghê dzaŋə ani zù tə̀ wù ùtyiə byaŋi ghu. 13Ghà zû kaw fyi kə nə̀ iyiə yə i twâ doʼò nəniy anə ŋwàʼà k-a-zə̀ nə̀ i myiŋə̀ kìə̀, anə yəə i dzîy nəniy nə̀, ‘Fyiə kə mə liə nəniy â ghà à də̌ nə̀ ghà ki dee yəə mwuli kə̀ kwoʼo kiy awò àghè liy yiy à wày dzə ufyiə ghi wə gha sâ nəniy.’ Mə kə̀ bû dzə̂ ani bù toŋə aghû yə̀ ghu də nəniy tsitsi anə sə k-a-zə̀, mə kwuni bù ani bù toŋə aghê àbɛbə yiy nə̀ ghu kyemì ŋwô fyi bə̂ anə bɛb tə ghu.”
Ibəb kwùmə̀ yə̀ nə̀ ayiə à bamə idzwə
(Mâk 2.18-22; Lukâs 5.33-39)
14Tsə̀təndii tə Dzwan tiy zù bù kaʼ anə bəb â Yesù nə̀, “À də kìə̀ tsə̀təndii tiə̀ tìy də bamə way idzwə yiy, ghě bamə nəniy nə̀ àghě Falàsî yìy ə?”
15Yesù ə bəb yə̀ a ghu nə, “Ghà moʼò nə̀ afələ wìŋəmə̀ wə̀ u dzîy nîy wiy bû mwe doʼò bə̂ a lòʼo kə inyi kə̀ niy kə iwè kìy ə̀? Hǎy, ghu way ani zù mwe dòʼò yə̀ dzə̀. Tsuk fiy kwuni bè ŋwò ghu ni nîy ŋwô kə nə̀ wìŋəmə̀ wə̀ ù dzîy niy wiy â ghu, ghu ni bamə yəə idzwə yiy a soŋə fə ghà fə̀.”
16Wù lìy wày dzə ani nìy kə dzə̀ bə̀d kə ndzwu kə̀ fyiə kiy ù tàŋì fè tsə kəbwôʼ anə ndzwu tə̀ wiy tiy. Abu ù zəŋi ghii, bə̂d kə ndzwu kə̀ fyiə kə̀ kî dzwə̀nì ŋwò fyi bə̀, bwôʼ kə ghà kə̀ ki bây dûw fyi yə̂. 17Moo wù ùlìy wày dzə ani nìy kə dzə̀ nlwù mə̀ fyiə̀ mìy, ù kwe tsə anə tsəd kə gùw nyàm kə̀ wiy kiy ù fè na tsə.#9.17 Anə inaʼ yə, ghu kə kwe tsə̀ mə̀nlwù anə kə tsəd ghu kə zəŋi anə gùw tə tə nyàm. Wò kə wày dzə ani nìy kə tsəd kə̀ wiy kiy wò nîy kwe tsə nlwù mə̀ fyiə mìy ate. Abu ù kwe tsə nəniy, tsəd kə gùw nyàm kə ghà kə̀ ki sa kə, nlwù mə̀ kî fə̀lì kə, à ki də nə̀ tsəd kə gùw nyàm kə ghà kə̀ mə bɛb. Ghu kwe tsə̀ nlwù mə̀ fyiə̀ mìy anə tsəd kə gùw nyàm kə̀ fyiə̀ kiy soʼo tə̀ nlwù mìy ki də dzwab nə̀ tsəd kiy.
Yesù ə zəŋi taw kə ànìsə̀ ùyəŋi ù pfə wìy nə̀ wiyəŋi u kə dzaŋə̀
(Mâk 5.21-43; Lukâs 8.40-56)
18Yəə Yesù namə dzîy nəniy ayiə yə ghi, Wù kə̀tuw ù lìy wìy awote a ndàw dzəŋə kə ghě Dzû, izəd i we yiy kə də nə̀ à də̀ Dzalùs ə zù bù awote, nyaʼa tswi tsə a təŋə̀ we, dzìy a we nə, “Wa nam uyəŋi mə pfə kə̀lə â wò, bù gaʼ tsə awo yiə̀ azoŋə̀ we, tə̀ ù taw dzwoŋi bə̀.”
19Yesù ə ŋwò dzəŋi yə̀ nə̀ tsə̀təndii tə we tiy, ghu nə̀ wù ə̀ kətuw wə̀.
20Wìyəŋi ù lìy wǐy də̀ anə ŋwàâ kə̀ nə̀ ù kə tsə̀ŋə̀ fyiə tsə̀ kə ŋwò anə təŋə̀mə̀ ìvəm nə̀ ghe tiy ìbè, u bù adzəmə̀ Yesù, mwàm tsə ndzwu tə we. 21Nə̀ ù mə dzày tsə anə fôŋə̀ we nə̀, “Abu mə də ani mwàm tsə kə we anə təndzwu, mə kî taw ŋwò.”
22Yesù ə kyèmì tsìy yə̀, kòʼ yə̀ we dzày tsə nə̀, “Kəli tsə kə fòŋ a wa nam, ibɛmə yiə̀ yìy mə zəŋi nə̀ wò taw.” Yəə ù kə fyiə tsə̂ nəniy i dyaŋi mày.
23Abù Yesù zù nəniy a ndàw wù kə̀tuw wə, u kòʼ yə̀ àghù yə̀ ghu zɛmə nəniy ayiə yiy anə lòʼo kə ipfə, nə̀ àghù yə̀ ghu dîy nəniy ipfə yiy, 24u dzày tsə a ghu nə, ghà zû a bee, wà ùyəŋi wə̀ kamə pfə dzə̂, ù màŋə̀ bvunə ŋwò. Ghu dzə̀m ə kaʼ yə̀ ani tsoʼ we. 25A yəə aghê tsîy fyi yə̂ a bee, Yesù ə tsìy nyi yə̀ anə idzwə i ndaw yə wà ùyəŋi wə̀ kə nəŋ nəniy ate. U zù kwi tsə we anə ukwe, wà ùyəŋi wə ghàʼ ŋwò kə idoŋ. 26Iyiə i ghà yə bwìy tsìy yə̀ bə̀d kə inaʼ kə ghà kə̀ kə̀dzə̀m.
Yesù ə zəŋi taw kə aghê à fɛbə yiy àbè
27Yəə Yesù ə ŋwò tsə nəniy a wote, aghê à fɛbə àbè ghu bù adzəmə̀ we, bwoʼo mə̀mbòŋ dzìy nə̀, “A Wà tuu kə Devìd, kwoʼ nə̀ mwuli kiy azoŋə̀ ghə̀d!”
28Abù Yesù zù nyi kwoʼ yə̂ a ndaw, aghê àfɛbə yə bù akə̀lə̀ we. U bəbə a ghu nə, “Ghà bɛmə ŋwô nə̀ mə də ŋwô ani zəŋi taw gha ə̀?”
Ghu bɛmə kə nə̀, “Ìny, A Mwe ə̀ mbyi.”
29Yesù ə mwàm tsə asə ə ghu dzày tsə nə̀, “I doʼò kə anə yiə yə ibɛmə ghi dzîy nəniy.” 30Ghu dyaŋi kaʼ yə̀ ani kòʼ tə̀loʼo. Yesù ə sə̀ŋì fyi yə̀ kə̀tswuŋi a ghu nə, “Kəə ghǎ nə̀ dzîy â wù lìy.”
31Ghu kwuni ŋwò zù nàʼà yə̀ àyiə yə Yesù zəŋi nəniy anə mbwòʼ ì ghà yə̀ ìdzə̀m.
Yesù ə zəŋi taw kə wù ù lìy ù kə də dzə̀ŋə̀ wày
32Yəə Yesù nə̀ tsə̀təndii tə we tiy zê nəniy anə dzəd, aghee bòʼò bù nə̀ wù ù lìy ù kə də dzə̀ŋə̀ wày bòʼ usîy ùbɛbə wiy u kə də azoŋə̀ we. 33Yəə Yesù dzwùm fyi tsə nəniy usîy ùbɛbə wə, wù ù ghè wə kaʼ tsə ani dzə̀ŋì, adzwə zwum ŋwàâ kə aghù kə̀, ghu dzìy nə̀, “Ndzòʼò àyiə yə̀ kamə kə̀ fyi kôʼ kôʼ dzə̂ fə anə inaʼ i Islàel!”
34Aghee Falàsî yìy kə kwunə dzìy nə̀, “Dòŋ kə nsìy mə̀bɛbə̀ mìy də azoŋə̀ we zəŋə we nə̀ ù ki kwu daʼa kiy ani dzwùm fyi nsìy mə̀bɛbə̀ mìy.”
Yesù kwu mwuli kə̀ kwoʼo kiy azoŋə̀ àghù yìy
35Yesù ə bwìy mà tsə naʼà tə̀ nê tə̀ nə̀ nàʼà mə̀ sə̀ə̀ mə̀ ìndzə̀m, naʼà tsə àyiə kwùmə̀ yə̀ nə̀ yəə Zə̀kìy saʼa nəniy muə̀ tə aghù tìy ate, anə ndaw tə udzəŋə tə aghě Dzû. U zəŋi taw sòʼò aghù anə le tə tədzàŋə̀ tə̀dzə̀m tə kə də nəniy azoŋə̀ ghu. 36Abù Yesù kòʼ tsə yəə ŋwàâ kə̀ də nəniy ate mwuli kiy ŋge kwoʼ we azoŋə̀ ghu. Ayiə kə ŋge fyimə ghu anə təfòŋ. Ghu kə də sòʼo kwu way wù wə̀ ù də ani fày ghu. Ghu kə də̀ yəə à də̌ ndzù tə̀ tə də kwu way wù ù baʼà wìy. 37U dzày yə̀ awò tsə̀təndii tə we tiy nə̀, “Ndə̀mə̀ ufyiə wiy biy dòʼò anə uswum, aghê kə fàʼ yìy dûw wày ani kpìy. 38Ghà bwoʼ yə̂ kə̀wo awò Mwe ə̀ mbyi à də nəniy we mwe ə̀ ùswum tə̀ ù twum fyi yə̀ aghee kəfàʼ ghu nyi kpîy bə̂.”
अहिले सेलेक्ट गरिएको:
Matìyò 9: isu
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© CABTAL 2023