မာကု 14
14
ကဲကျာမ်ပယာ်မ်း စံဝ်ယေဆု
မတဲ ၂၆း၁-၅၊ လုကာ ၂၂း၁-၂၊ ယောဟာန် ၁၁း၄၅-၅၃
1ႎါည်းဒီး နံင်လိုဖာ်ႈ အယ်ဆငည်း နံင်စာ်မ်း ပ္လေါ်ည်းပတခါ#၁၄:၁ ပ္လေါ်ည်းပတခါ မိုႈပ္လေါ်ည်းနလှူႈ ခည်မိုႈတာ် စံဝ်ဖြားချော်တ်လာည်းဒေဲႈ ကူန်းတားကဲ ခည်ဒုင်ကီန်းဒည်းကဲ ပါ့်ကီုင်းအီဇီပ်။ ကာည်း ပ္လေါ်ည်းဟိုမ်းခမူန်းလော်တ်ပဲင်ႏ၊ တားစော်င်းဒါင်းကဲ ကာည်း တားဆြာကံတ်ကျာမ်းကဲ စီဟြာ်ည်ႇလာ် အီုန်ဒါ်န်း စာနံင်ယဲမ်လာ်ကမ်း၊ ပယာ်မ်းႎီုန် စံဝ်ယေဆု။ 2ဘည်ဘာည်းမာ် ကဲစီလည်ကလာင်းဒါ်ႈ “အဲ ညျံမ်ဘိူန်းမ ကမ်းပယာ်မ်းႎီုန်အန်း ဇိုလူးပ္လေါ်ည်းနီး၊ ယံဝ်းတူအီးဂီုန်းကဲ နံင်ႎီးကခံတ်ဒို့ တာ့်အဲ။”
အီးပဲန့် အီးဒေဲႈဟေကျည်း အေဲမ်းပျိုင်းအူႈညျှူး တာ့်စံဝ်ယေဆု
မတဲ ၂၆း၆-၁၃၊ ယောဟာန် ၁၂း၁-၈
3ဇိုစံဝ်ယေဆု ဂီဟိုမ်းပံင်ဟိုမ်း ပါ့်ခလေဲပ်ဆိမိုန် အီးမိုႈချှေႈအီးပေန်ဒေဲႈ တူတ်ႇအာည်ႇနီး ပါ့်ကဇိုင်းဘေတနိဒီး၊ ယာမ်းဇေဲန်း စီမေဲႈလာ် အီးပဲန့်အူချှေႈ ကိုင်ဒေဲႈကဘဲဝ်မာဝ်းလီုည်း အီးဟပ်အူန်း အေဲမ်းပျိုင်းစေဲတ်အူႈညျှူး ပံင်ဒါးအီးတာ် နာဒု ရေဲန်းအူန်း၊ အန်းအီးမေဲႈငေါႈဒါင်း၊ စီဒေါ်ည်ႎိူဝ်ႈဖာ်ႈ အီုမ်ဘိအန်း စီဟေကျည်းလာ် တီင်ကေဲန်းစံဝ်ယေဆု စာနံင်ရိုဆေဇိုက်ဖိုက်တာ် အန်းစံဝ်။ 4တူအီးကဲအီးဂေါ်ည်းပါ့်ဒီး ကလံက်မာ် ဆီင်ဇာဝ်းဖာ်ႈ စီလည်ဒါ်ႈ “ဆီမ်ဘာည်း ဆံမ်ဟေတလူႈတလာည်းႎီုန်လာ် အေဲမ်းပျိုင်းအူႈညျှူးဒီး ဘာည်းဇေဲန်း။ 5ဆာ်စီယံင်းလာ်အေဲမ်းပျိုင်းအူႈညျှူးဒီး ကံပ်နံင်ဘိူန်းပေါႇ ရိူန်းဒေနာရိ အိုည်းပယာ်ႈလေႈ၊ ကံပ်ချှင်တော်လာ် ကဆာင်းဒဲႈ တာ့်တူအီးဖ္လာန်းကဲ။” ကဲဂီမအေဲႈဆူးဒါ်ႈလာ် တာ့်အီးပဲန့်ချှေႈဒီး။
6ဘိူန်ဇေဲန်း စံဝ်ယေဆု စီႎီးကလာင်းဒါ်ႈ “ဒဲႈ အန်းရေဲန်း ဘာည်းဆီင်ရေဲန်းအန်း။ ဆီမ်ဘာည်း ပဲဆံမ်ဆီင်ကံဝ်း လာ်အန်း။ ပံင်ရေဲန်းဒဲႈအန်း တာ့်အံဝ်းနီး ဟည်မိုႈ ဇီုင်းအီးပေန်အီးပဲန့်ဟာ့်။ 7ဆီမ်ဘာည်းဆံမ်ဒါ်ႈလာ်ဘာည်းဇေဲန်း အီးမိုႈတူအီးဖ္လာန်းကဲအခည်း ကဲဂေါ်ည်းအူန်းတောႇပဲ တော်န်းချီုင်။ ဆာ်ပဲမေဲႈနောႈ ဆီင်ကဇော်ည်ဒဲႈတာ့်ကဲ ယာမ်းမှေဲ့မာ်၊ ဘိူန်းအူန်းကဇော်ည်ဒဲႈနာ်ႏ။ အီးမိုႈအံဝ်းအခည်း အံဝ်းနံင်အာဝ်ဂေါ်ည်းတောႇမ တောႇပဲတော်န်းချီုင်။ 8အီးပဲန့်နီး ထန်ဘယ်အန်းတာ်လာ်ရေဲန်းဒဲႈ တာ့်အံဝ်းမာ် အန်းဟည်ရေဲန်းဒဲႈဟာ့်။ အန်းမာ် ဟည်ကျည်း အေဲမ်းပျိုင်းအူႈညျှူး ရဲန်းအူန်း စာနံင်တီႇႎီုန် တိုးချာပ်အံဝ်းနီး။ 9အံဝ်းနံင်ဒါ်ႈတာ့်ပဲ အီးမိုႈအီးမှာန်အန်း၊ ဆာ်အီးဟောကလာင်း ခါဝ်ဆတာင်းအီးမှေဲမ်ခိုည်း ပါ်ကံမ်ဖာ တော်န်းဒီတော်န်းဒဲန် ပါ့်မှေဲ့မာ်၊ အီးစီနံင်ဟောကလာင်း လော်င်ဘည်ဘာည်းရေဲန်းအူန်းအီးပဲန့်ချှေႈနီး စာနံင်နလှူႈတာ့်အန်း။”
ယုဒဆကာရိုတ်စင်ချင် စာနံင်အာပ်ဒဲႈ စံဝ်ယေဆု
မတဲ ၂၆း၁၄-၁၆၊ လုကာ ၂၂း၃-၆
10ႎါည်းဒီး ခေဲင်းတပဲအန်းစံဝ်ကဲ အူကိူဝ်းလေႈအယ်ချှေႈ အီးမိုႈ ယုဒဆကာရိုတ်ဒီး စီဟာဝ်းလာ် ပါ့်တားစော်င်းဒါင်း စာနံင်အာပ်ဒဲႈ စံဝ်ယေဆု တီင်တည်းယာန်ဆူကဲ။ 11ဘိူဝ်ယေဲဝ်းကဲတာ့်တညာဝ်း ဘည်ဘာည်းစင်ချင်အန်း၊ ကဲစီခိုည်း စီဒဲႈကတိ နံင်ဒဲႈရိူန်းတာ့်အန်းဟာ့်။ ဂေါႇဘာည်းဇေဲန်း ယုဒဆကာရိုတ်မာ် စီဟည်ဟြာ်ည်ႇ အီုန်ဒါ်န်းဒီနံင်ချှင်တော် စာနံင်အာပ်ဒဲႈ စံဝ်ယေဆု တံင်တည်းယာန်ဆူကဲ။
စံဝ်ယေဆုကာည်းတပဲအန်းကဲ ဟိုမ်းပ္လေါ်ည်းပတခါ
မတဲ ၂၆း၁၇-၂၅၊ လုကာ ၂၂း၇-၁၄၊ ၂၁-၂၃၊ ယောဟာန် ၁၃း၂၁-၃၀
12ဟည်စာ်မ်းဒေဲႈ ဆငည်းတဇူႈ ပ္လေါ်ည်းဟိုမ်းခမူန်းလော်တ်ပဲင်ႏ အီးမိုႈဆငည်း ပတတ်ယာ်မ်းအီးတာ် ကော်န်းပူးပတခါ စာနံင်လှူ၊ တပဲအန်းစံဝ်ကဲ စီဒေဲႈမှောႇ တာ့်စံဝ်ယေဆု ဒါ်ႈ “စာမည်းစံဝ် နံင်ဟိုမ်းပ္လေါ်ည်းပတခါနီး ပါ့်မှေဲ မည်းဆီင်ဒဲႈယေး ရဲန်းပ္လေႈ။”
13ဘိူန်ဇေဲန်း အန်းစံဝ် စီဆူည်ႇလာ် တပဲအန်းအယ်ချှေႈဟာဝ်း စီဒါ်ႈ “ပါည်းလည်လေႈဟာဝ်း ပါ့်ခေဲင်းလှံင်းနာ်ႏ။ ပါည်း စီနံင်ဟာဝ်းကညား အီးမာည်း အန်းအီးကောႇဒေဲႈကလိုက်အေဲမ်း အူချှေႈဟာ့်။ 14ပါည်းစီတောႇဟာဝ်းလာ် လဘာ်န်း ချှေႈဒီးနာ်ႏ။ ဆာ်အန်းလေဲပ်ဟာဝ်းခလေဲပ်မှေဲ့မာ်၊ ပါည်းစီ မှောႇကညျားခလေဲပ်ဒီး ဒါ်ႈ ‘ဆြာယေးမှောႇဒါ်ႈ စာအန်းစံဝ်ကာည်း တပဲအန်းကဲ နံင်ဟိုမ်းပ္လေါ်ည်းပတခါ မိုႈ ဟော်င်ဒီမှေဲ။’ 15ဘိူန်ဇေဲန်း ချှေႈဒီး စီနံင်နှဲပါည်း ဟော်င်ဒါင်း ပါ့်ထာပ်တေဲင်း ပံင်ဟည်ရဲန်းပ္လေႈအူန်းဟော်ည်ႇ။ ပါည်းမာ် စီချံဝ်ရဲန်းပ္လေႈအူန်းလာ် ပံင်ဟိုမ်း စာအဲနံင်ဟိုမ်း ပါ့်ဒီးနာ်ႏ။”
16ႎါည်းဒီး တပဲအန်းစံဝ်ကာည်းဒီးမာ် စီလည်လေႈဟာဝ်းဖာ်ႈ စီဟာဝ်းလေဲပ် ခေဲင်းလှံင်းဒီး။ ကာည်းစီယေဲဝ်း လာ် ဘာည်းဒါ်ႈအူန်းဒို့အန်းစံဝ် တာ့်ကာည်း၊ ကာည်းမာ် စီ ချံဝ်ရဲန်းပ္လေႈလာ် ပံင်ဟိုမ်း စာပ္လေါ်ည်းပတခါ၊ စီႎီးဒေဲႈ ပါ့်စံဝ်ယေဆု ကာည်း တပဲအန်းကဲချှေႈဟည်း။
17ဘိူဝ်စာ်မ်းဒေဲႈတာ်ဇိုအာ်ႇ စံဝ်ယေဆုကာည်း တပဲအန်း အူကိူဝ်းလေႈအယ်ချှေႈ စီတံန်တောႇဒေဲႈစာ်မ်းလာ် ပါ့်ဒီး။ 18ဇိုကဲဂီ အံက်ဟိုမ်းတံန်တောႇ တံင်ပဒေန်းဒီးအူဒီ၊ အန်းစံဝ် စီကလာင်းဒါ်ႈတာ့်ကဲ “အံဝ်နံင်ဒါ်ႈ အီမိုႈအီးမှာန်အန်း၊ ခေဲင်းပဲကဲဒီးအူချှေႈ အန်းအီးအံက်ဟိုမ်း တောႇအံဝ်း နံင်အာပ်ဒဲႈ အံဝ်း တံင်တည်းယာန်ဆူကဲ။”
19ဘိူန်ဇေဲန်း တပဲအန်းကဲမာ် ပေန်ဒို့နောႈဘူပျော်၊ ကဲအူချှေႈဟော်ည်ႇအူချှေႈ ႎီးမှောႇအန်းစံဝ်ဒါ်ႈ “ချှေႈဒီး နံင်အာဝ်မိုႈယေဝ်း အံဝ်း။”
20အန်းစံဝ် စီႎီးကလာင်းဒါ်ႈ “ချှေႈဒီး မိုႈ ခေဲင်းအူကိူဝ်းလေႈအယ်ချှေႈနီးဟာ့်။ အန်းမိုႈပေါႇ ချှေႈအီးဂီညျှောႈဟိုမ်း တောႇအံဝ်း အူဆလေဲႇနီးဟာ့်။ 21ကော်န်းတူအီးနီး နံင်ကညားအိူဝ်ယာ်မ်း ဘာည်းကိက်ဒေဲႈအူန်း ခေဲင်းဘေဲႇကျာမ်း။ မိုႈလိူည် ချှေႈအီးအာပ်ဒဲႈ ကော်န်းတူအီးနီး တံင်တည်းယာန်ဆူကဲဒီး၊ မှေဲမ်ပေန်အူန်း နောႈအီုင်ဂီႈစာအန်း။ ချှေႈဒီး တဆာ်အန်းစီဘူကိူတ်ႏဒေဲႈ နံင်ဟည်ချဲမ်းအူန်း တာ့်အန်း။”
ခည်တဇူႈ ပါင်ဟိုမ်းပ္လေါ်ည်းစံဝ်
မတဲ ၂၆း၂၆-၃၀၊ လုကာ ၂၂း၁၄-၂၀၊ ၁ကော ၁၁း၂၃-၂၅
22ဇိုစံဝ်ယေဆုကာည်း တပဲအန်းကဲ ဂီဟိုမ်းတံန်တောႇ ဘာည်းဇေဲန်း၊ အန်းစံဝ် စီတေဲႈလာ်ခမူန်း စီခိုည်းတာင်ကေးစူးစံဝ်ဖြား၊ စီကဘျဲႈဖာ်ႈ ခမူန်းဒီး စီဒါ်ႈ “ခမူန်းနီးမိုႈ တိုးပိုင်းအံဝ်း။ တေဲႈဟိုမ်းနာ်ႏ။” ႎါည်းဒီး အန်းစံဝ် စီကဆာင်းဒဲႈ တာ့်တပဲအန်းကဲ။
23ႎါည်းဒီး အန်းစံဝ် စီတေဲႈဘိုး ကလော်က်အေဲမ်းဆပျီတ် ခိုည်းတာင်ကေးစူးစံဝ်ဖြား စီကဆာင်းဒဲႈဘိုး တာ့်ကဲ၊ ကဲမာ်ဘိူန်းလာ်စိုင်းဒို့ တော်န်းချှေႈ။ 24အန်းစံဝ် စီဒါ်ႈ “အေဲမ်းဆပျီတ်နီး မိုႈနှာမ်းအံဝ်း အီးလှာည်လေႈ စာတူအီးပါ်ပည်မေဲႈ၊ အန်းမိုႈပေါႇ ကတိဆေတ်စာ ပံင်ရေဲန်းအူန်းစံဝ်ဖြား တာ့်တူအီး။ 25အံဝ်းနံင်ဒါ်ႈ အီးမိုႈအီးမှာန်အန်း၊ အံဝ်းဘူစိုင်းမ အေဲမ်းဆပျီတ်ဒါ်ႈအီး ခံဝ်ဘော်က် ဂါညျံမ်စာ်မ်းတာ် ဆငည်း နံင်စိုင်း အေဲမ်းဆပျီတ်အီးတမာည်း ပါ့်ကီုင်းစံဝ်ဖြား။”
26ႎါည်းဒီး စံဝ်ယေဆုကာည်းတပဲအန်းကဲ စီဒါ်ႈဟော်ည်ႇဖာ်ႈ ဆကျင်းဇိုက်ဖိုက်စံဝ်ဖြား၊ စီလည်လေႈဟိုက်ဟာဝ်းလာ် ပါ့်နောဆာန်လူန်ဟာ့်။
စံဝ်ယေဆု ကလာင်းဒါ်ႈအူန်း ဘည်ဘာည်းပေတရု နံင်ထဲင်းႎီုန်အန်းစံဝ်
မတဲ ၂၆း၃၁-၃၅၊ လုကာ ၂၂း၃၁-၃၄၊ ယောဟာန် ၁၃း၃၆-၃၈
27ဘိူန်ဇေဲန်း စံဝ်ယေဆု စီကလာင်းတာ့်တပဲအန်းကဲ ဒါ်ႈ “ဘာည်းကိက်ဒေဲႈအူန်း ခေဲင်းဘေဲႇကျာမ်း အီးဒါ်ႈ ‘အံဝ်းနံင်ကယာင်ပယာ်မ်းႎီုန် အီးချှိုင်းတိူဝ်ႈမေန်းပူး၊ ပူးမာ် နံင်ကယာ်ႈကကာ်ႈဟာဝ်းဒို့၊’ အီးမိုႈပဲကဲဒီးပါ်ပည်မေဲႈမာ် နံင်ဒဲဝ်းႎီုန်ဒို့အံဝ်း။ 28ဘည်ဘာည်းစံမ့်ဇေဲန်းမာ် ႎါည်းယာ်ည်ႇအီမ်းဒေဲႈအံဝ်း ဒယာ်မ်း၊ အံဝ်းနံင်ဟာဝ်းနှံက် ပါ့်အရာပ်ဂါလိလဲ လအာည်ႇပဲ၊ အဲစီလည်ကညားပါ့်ဒီး။”
29ပေတရု စီႎီးဒါ်ႈတာ့်အန်းစံဝ် “တပဲစံဝ်ကဲအီးဟည်းပါ်ပည်မေဲႈ ဆံမ်ဘည်ဒဲဝ်းႎီုန်စံမ့်မည်းစံဝ်မာ် အီးမိုႈအံဝ်းခည်း နံင်အာဝ်ဒဲဝ်းႎီုန်မ မည်းစံဝ်။”
30ဘိူန်ဇေဲန်း စံဝ်ယေဆု စီႎီးဒါ်ႈ တာ့်ပေတရု “အံဝ်းနံင်ဒါ်ႈ အီးမိုႈအီးမှာန်အန်း၊ ဆေဲမ်းအီုန်ဒီႈပေါႇ အာည်ႇကဒိုးအျိူဝ်း အယ်ဘော်က်၊ မည်းနံင်ထဲင်းႎီုန် ဒါ်ႈ ‘အံဝ်းအာဝ်နာ်ႇမ စံဝ်ယေဆု’ ကံပ်မိုႈပေါႇ အိုည်းဘော်က်။”
31ဘည်ဘာည်းမာ် ပေတရု စီနာ်ႇလိူည် ကလာင်းဒါ်ႈ “အံဝ်းနီး နှာင်းကံပ်ယာ်မ်းတံန်တောႇ တာ့်မည်းစံဝ်မာ် အံဝ်းနံင်အာဝ်ထဲင်းမ။”
ယာမ်းဇေဲန်း အီးမိုႈတပဲစံဝ် ကဲအီးဟည်းပါ်ပည်မေဲႈမာ် စီကလာင်းဒါ်ႈဒို့ဘာည်းဇေဲန်း။
စံဝ်ယေဆု မှာန်းဆူး ပါ့်ဂေတဆေမာန်
မတဲ ၂၆း၃၆-၄၆၊ လုကာ ၂၂း၃၉-၄၆
32ႎါည်းဒီး စံဝ်ယေဆုကာည်း တပဲအန်းကဲ ဟာဝ်းစာ်မ်း ပါ့်ဒီ ဒါ်ႈအီးတာ်ဂေတဆေမာန်။ အန်းစံဝ်မာ် စီဒါ်ႈ တာ့်တပဲအန်းကဲကလံက် “ဇိုဂီမှာန်းအံဝ်းတာ်ဆူး၊ ပဲစီအံက်နှံက်အူန်း ပါ့်နီးနာ်ႏ။” 33အန်းစံဝ် စီတေဲႇလာ် အန်းအီးမိုႈ ပေတရု၊ ရာကိုပ်ကာည်းယောဟာန် တောႇအန်း။ ဘိူန်ဇေဲန်း အန်းစံဝ် စီပေန်နောႈဒဲ့ နောႈနူန်းနောႈညျှာပ်ပေါႇခည်း။ 34အန်းစံဝ် စီတာ်မ်းအူန်း တာ့်ကဲအိုည်းချှေႈ ဒါ်ႈ “အံဝ်းပေန်ယာဝ်း နောႈနူန်း ကံပ်နှေးနံင်ယာ်မ်း။ ပဲစီဂေါ်ည်းချဲတ်နောႈ နှံက်အူန်းပါ့်နီးနာ်ႏ။”
35ႎါည်းဒီး အန်းစံဝ် စီဟာဝ်းဖာ်ႈလအာည်ႇချှီုက်ဒဲ့ စီအံက်ဆကျူႇမူႇကေဲန်း စီမှာန်းဆူး နှာင်းအန်းဘူကညား ကီန်းဒည်းပံင်နံင်ညားဒေဲႈနီး ဆာ်နှေးနံင်ဘိူန်းႎဲႈမာ် နှာင်းအန်းႎဲႈ၊ အန်းစီဒါ်ႈ 36“အိူဝ် ကူန်စံဝ်၊ မည်းစံဝ် ဘယ်အူန်းရေဲန်းဒို့ ပါ်ပည်မေဲႈ။ အီးမိုႈကလော်က်ကီန်းဒည်းနီးမာ် မည်းစံဝ် လာည်းႎဲႈ နံင်ဘိူန်ဒအံဝ်း။ ဘည်ဘာည်းမာ် ခူဒဲႈအန်းမိုႈ ဘာည်းလိုနောႈအံဝ်း။ ဒဲႈနှာင်းမိုႈလိူည် ဘာည်းလိုနောႈမည်းစံဝ်နာ်ႏ။”
37ႎါည်းဒီး အန်းစံဝ်စီႎီးဒေဲႈဇူး ပါ့်တပဲအန်းကဲအိုည်းချှေႈဒီး၊ အန်းစံဝ် စီဒေဲႈယေဲဝ်းလာ် ကဲဂီအိငါမ်းအူန်း။ ဘိူန်ဇေဲန်း အန်းစံဝ် စီဒါ်ႈ တာ့်ဆိမိုန်ပေတရု “ဆိမိုန်၊ မှေဲမ်ဘာည်း မည်းဆံမ်ဂီအိငါမ်းလာ်ဒါး။ ဘံင်ခံဝ်အူနရီလိူည်မာ် မည်းအာဝ် ဘိူန်းဟီုဝ် က္လိူန်အိ ပည်နှံက်အူန်း။” 38ႎါည်းဒီး အန်းစံဝ် စီကလာင်းဘိုး တာ့်ကဲ ဒါ်ႈ “ပဲစီမှာန်းဆူး ချဲတ်နောႈနှံက်အူန်း စာနံင်ဘူကညားတောႇဟာဝ်းတာ် ခူန်ဆိုင် ကံဝ်းယော်ခလံဝ်းပဲ။ ပဲဆံမ်မေဲႈနောႈစံမ့်မာ် အီးမိုႈတိုးပိုင်းပဲ ဘ္လော်မ်းစီဘျာ်ည်ႇပေါႇခည်း။”
39အန်းစံဝ် စီႎီးဟာဝ်းဘိုးအူဘော်က် စီမှာန်းဆူး ဘာည်းခည်ဒိူဝ်း။ 40ႎါည်းဒီး အန်းစံဝ် စီႎီးဒေဲႈဘိုး ပါ့်တပဲအန်းအိုည်းချှေႈကဲဒီး၊ အန်းစံဝ်စီယေဲဝ်းလာ် ကဲဂီအိငါမ်းလာ်ဘိုး။ ကဲဂီပေန်ငါည်းဇာ်န်း ဆီင်အိ ဘာည်းဇေဲန်း။ ဘိူန်ဇေဲန်း ကဲမာ် ဟည်ဘူနာ်ႇမ ပံင်နံင်ႎီးကလာင်းဒါ်ႈဆိ တာ့်အန်းစံဝ်။
41ဘိူဝ်ႎီးဒေဲႈအန်းစံဝ် ပါ့်တပဲအန်းကဲ ဟည်နိုက်အိုည်းဘော်က်ဒီး၊ အန်းစံဝ်စီဟည်ဒါ်ႈ တာ့်ကဲ “ပဲတီုက်ဂီအိငါမ်းဒါးအူန်းဟီုဝ်၊ တီုက်ဂီအီုင်လှဲဝ်းဒါးဟီုဝ်။ ဟည်ဘိူန်းယေဝ်း။ အချီုင်အန်းဟည်စာ်မ်း။ တိူဝ်ႈဟံင်း၊ အီးနံင်အာပ်ဒဲႈ ကော်န်းတူအီးနီး တာ့်တူအီးမိူက်ႏဟာည်းကဲဟာ့်။ 42ယာ်ည်ႇလာ့်၊ ဟာႈ အဲဟာဝ်း။ တိူဝ်ႈဟံင်း၊ ချှေႈအန်းအီးနံင်အာပ်ဒဲႈအံဝ်း တံင်တည်းယာန်ဆူကဲဒီး အန်းဟည်ဒေဲႈစာ်မ်းဟော်ည်ႇ။”
ဘည်ဘာည်းအီးဒေဲႈကမ်း စံဝ်ယေဆု
မတဲ ၂၆း၄၇-၅၆၊ လုကာ ၂၂း၄၇-၅၃၊ ယောဟာန် ၁၈း၃-၁၂
43ဇိုဂီကလာင်းဒါ်ႈစံဝ်ယေဆုတာ် ဘာည်းဇေဲန်း၊ ယုဒဆကာရိုတ် အီးမိုႈခေဲင်းတပဲစံဝ် အူကိူဝ်းလေႈအယ်ချှေႈဒီး အန်းဟည်ဒေဲႈစာ်မ်းပေါႇ။ ကဲအီးဒိူည်းဘိုႇ၊ ဒိူည်းထုင်ဟာ်ည်းထုင်ဟြင်း တောႇဒေဲႈအန်းမာ် ဂီုန်းပေါႇအခည်း။ အီးပ္လေႈဟာဝ်းကဲဒီးမာ် မိုႈတားစော်င်းဒါင်းကဲ၊ တားဆြာကံတ်ကျာမ်းကဲ ကာည်း တူအီးဒါင်းကဲဟာ့်။ 44ချှေႈအီးနံင်အာပ်ႎီုန် စံဝ်ယေဆု တံင်တည်းယာန်ဆူမာ် ဟည်ကလာင်းဒါ်ႈအူန်း ပံင်နံင်ဘျားနှဲဒဲႈအန်း နှာင်းကဲနာ်ႇဒီး မိုႈ ယေဆု၊ အန်းစီဒါ်ႈလာ် “ချှေႈပံင်အူႈညျှော်ည်ႇအံဝ်းဟာ့် မိုႈ ချှေႈပံင်ဆီင်ကမ်းပဲ။ ကမ်းအန်း၊ ယိုင်းဟာဝ်း ပည်တိူဝ်ႈ ကရီးကတီး။”
45ဘိူဝ်ဒေဲႈစာ်မ်းအန်း၊ စီဒေဲႈဇူးပေါႇ ပါ့်အန်းစံဝ် အူစာ်န်း၊ စီဒါ်ႈလာ် “အိူဝ် ဆြာ”၊ စီအူႈညျှော်ည်ႇလာ် စံဝ်ယေဆု။ 46ဘိူန်ဇေဲန်း တူအီးကဲဒီးမာ် ဟည်ဒေဲႈကမ်းပေါႇ အန်းစံဝ်။ 47ဇိုယာမ်းဇေဲန်း အန်းအီးဂေါ်ည်းပါ့်ရီမ်းဒီး အူချှေႈမာ် တိုႈဘိုႇအန်း စီကိုႈဟပ်လှားချှိုက် မှာည်းပံင်ဆူည်ႇ တားအောဒါင်းတားစော်င်း အူချှေႈ၊ ချှိုက်ချှေႈဒီးမာ် ဘုတ်ဟာဝ်းပေါႇ။ 48စံဝ်ယေဆုမာ် ဒါ်ႈတာ့်ကဲ “ဆီမ်ဘာည်း ပဲဒေဲႈကမ်းအံဝ်း ဘာည်းလာ် အီးကမ်းတူအီးစိုန် ဒိူည်းဘိုႇ ဒိူည်းထုင်ဟာ်ည်းထုင်ဟြင်း။ 49ခည်မိုႈတာ် အံဝ်းဟောပနံဝ်းဒေဲႈ ပါ့်စော်င်းစံဝ်ဖြား တော်န်းဆငည်းလအာည်ႇပဲ၊ ဆီမ်ဘာည်း ပဲဆံမ်ဘူကမ်းလာ်အံဝ်း။ ဘည်ဘာည်းမာ် နံင်လိုပေန်ဒေဲႈ ဘာည်းကိက်ဒါ်ႈအူန်းခေဲင်းဘေဲႇကျာမ်း။”
50ဘိူန်ဇေဲန်း တပဲအန်းကဲပါ်ပည်မေဲႈမာ် ဟည်ဒဲဝ်းႎီုန်ဒို့ အန်းစံဝ်။
51စီမေဲႈလာ် ကော်န်းဆနာဝ်းအူချှေႈ အီးပည်းတံက်ချှီႇတံင်တိုးအန်း၊ အန်းစီဂီတောႇဟာဝ်းလာ်လဘာ်န်း အန်းစံဝ်။ တူအီးကလံက်ကဲ စီကမ်းအန်း၊ 52အန်းမာ် ႎဲႎီုန်ဖာ်ႈ တံက်ဒီး စီတဘုဒဲဝ်း ဘူချှေဲပ်မတဆီးဆိ တံင်တိုးအန်း။
ဘည်ဘာည်းစေဲတ်မှောႇအီးတာ် စံဝ်ယေဆု ပါ့်လုမ်းတြား
မတဲ ၂၆း၅၇-၆၈၊ လုကာ ၂၂း၅၄-၅၅၊ ၆၃-၇၁၊ ယောဟာန် ၁၈း၁၃-၁၄၊ ၁၉-၂၄
53ႎါည်းဒီး ကဲစီတေဲႇယိုင်းဟာဝ်း စံဝ်ယေဆု ပါ့်တားအောဒါင်းတားစော်င်း။ အီးမိုႈ တားစော်င်းဒါင်းကဲ၊ တူအီးဒါင်းကဲ ကာည်း တားဆြာကံတ်ကျာမ်းကဲမာ် စီဒေဲႈကစုခမို ပါ့်ဒီး။ 54ပေတရုမာ် ဂေါ်ည်းဒါးဒိုင်းဒိုင်း တောႇဟာဝ်းစံဝ်ယေဆု တော်ကံပ်ဟာဝ်းစာ်မ်းပါ့်ႎါင်းခလေဲပ် တားအောဒါင်းတားစော်င်း။ အန်းစီအံက်လာ်ဒါးႎါႇငည်း တောႇတူအီးပည်စော်င်းစံဝ်ဖြားကဲ။ 55ဇိုယာမ်းဘာည်းတာ့်ဇေဲန်း တားစော်င်းဒါင်း ကဲ ကာည်း တူအီးအံက်ပါ့်လုမ်းတြားကဲပါ်ပည်မေဲႈ ဂီဟြာ်ည်ႇဆံက်ဆေ စာနံင်ကံပ်ဘိူန်းဒဲႈ တံမ်ယာ်မ်း တာ့်စံဝ်ယေဆုမာ် ကဲအာဝ်ယေဲဝ်းမ။ 56ဆီမ်ဘာည်းဆံမ်ဒါ်ႈလာ်ဘာည်းဇေဲန်း တူအီးဂီုန်းကဲ စီကလာင်းခလံဝ်း ဆံက်ဆေအီးဘူမိုႈဘူမှာန် လော်င်အန်း၊ ဘည်ဘာည်းမာ် ဘည်ဘာည်းကလာင်းလေႈကဲဒီး စီအာဝ်လည်ကညား အာဝ်လည်တံန်နှေးမ။
57တူအီးကဲကလံက်မာ် ယာ်ည်ႇဖာ်ႈ စီကလာင်းခလံဝ်း ဆံက်ဆေအီးဘူမိုႈဘူမှာန် တာ့်အန်း ဒါ်ႈ 58“ယေး ဟည်ယေဲဝ်းတညာဝ်းအူန်းလာ် အန်းဒါ်ႈ ‘အံဝ်းနံင်ယာ်ႈလှဲဝ်ႎီုန် စော်င်းစံဝ်ဖြား ပံင်ရေဲန်းတူအီး၊ ခေဲင်းအိုည်းဆငည်း နံင်ႎီးရေဲန်းဘိုး စော်င်းစံဝ်ဖြားအူကဒူႇ အီးအာဝ်မိုႈပံင်ရေဲန်းတူအီး’။” 59ကံပ်ဘာည်းဇေဲန်းမာ် ပံင်ကလာင်းလေႈကဲဒီး ညျံမ်လည်ကညား ညျံမ်လည်တံန်နှေးမ။
60ဘိူန်ဇေဲန်း တားအောဒါင်းတားစော်င်းဒီး စီယာ်ည်ႇဇံင်းလာ် လအာည်ႇတူအီးဂီုန်းကဲ စီမှောႇစံဝ်ယေဆု ဒါ်ႈ “ကဲဂီကလာင်းဒါ်ႈ တာ့်မည်း ကံပ်ဘာည်းထန်ညျေဲန်းမာ် ကျောႈဆိမာ် မည်းဘူႎီးဒါ်ႈ ဟီုဝ်။”
61ဘည်ဘာည်းစံမ့်ဇေဲန်းမာ် စံဝ်ယေဆု စီဂီဂေါ်ည်းဘူကျောႈဘူကျဲန်း။ ကျောႈအူခေါ်မာ် အန်းအာဝ်ႎီးဒါ်ႈမဆိ။ တားအောဒါင်းတားစော်င်းဒီးမာ် ႎီးမှောႇဘိုးအန်း အူဘော်က်ဒါ်ႈ “မည်းမိုႈလာ် မေဆိယ#၁၄:၆၁ စံဝ်ခရီတ် အီးမိုႈကော်န်း စံဝ်အီးမေဲႈမင်ကလာချှီႇ။”
62ဘိူန်ဇေဲန်း စံဝ်ယေဆု စီဒါ်ႈ “မိုႈအိူဝ်။ ႎါည်းနီး ပဲမာ် နံင်ယေဲဝ်းလာ် ကော်န်းတူအီးနီး အံက်အူန်းလာ်ဒါး ပါ့်ညျှာတည်းအေဲႈ စံဝ်အီးတာန်ခိုးဒါင်း၊ စီနံင် တံန်တောႇ လေႈဒေဲႈ တောႇအုင်အုပါ့်ပ္လါ်န်းဟာ့်။”
63ဘိူန်ဇေဲန်း တားအောဒါင်းတားစော်င်းဒီးမာ် ဟည်ဆီင်ဇာဝ်းပေါႇ စီတီုတ်ႏကဘျဲႈႎီုန်ဖာ်ႈ တဆီးအန်း စီဒါ်ႈ “ဆံက်ဆေမျိုးမှေဲ အဲနံင်ဂီလိုဘိုး။ 64ပဲမာ် ဟည်ယေဲဝ်းဟော်ည်ႇဒို့တညာဝ်း ကျောႈပံင်ဒါ်ႈကလူည်ႇ အန်း တာ့်စံဝ်ဖြား။ မှေဲအဲ နံင်လိုဘာည်းတာ့်အန်း။”
တူအီးကဲပါ်ပည်မေဲႈမာ် ဒါ်ႈ “အဲ ဟည်ယေဲဝ်း ပံင်ကလူည်ႇအန်း၊ ဟည်ကီုင်ဒဲႈလာ် တံမ်ယာ်မ်းတာ့်အန်း။”
65ဘိူန်ဇေဲန်း တူအီးကဲကလံက်မာ် ဘတ်ဟပ်အေဲမ်းဘတ် တံင်စံဝ်ယေဆု၊ စီဘိဖာ်ႈငါည်းအန်း စီထူည်းဟပ်အန်းစံဝ်၊ ကဲစီမှောႇအန်းစံဝ် ဒါ်ႈ “ဟောနှဲဟံင်း ချှေႈမှေဲ ထူည်းမည်း။” တူအီးပည်စော်င်းစံဝ်ဖြားကဲမာ် စီယိုင်းဟာဝ်းဖာ်ႈ စီငါ်ႈအန်းစံဝ်ဟာ့်။
ဘည်ဘာည်းပေတရု ထဲင်းႎီုန် စံဝ်ယေဆု
မတဲ ၂၆း၆၉-၇၅၊ လုကာ ၂၂း၅၆-၆၂၊ ယောဟာန် ၁၈း၁၅-၁၈၊ ၂၅-၂၇
66ဇိုဘာည်းတာ့်ဇေဲန်း၊ ဘိူဝ်ဂေါ်ည်းပေတရု ပါ့်ခေဲင်းႎါင်းဒီး၊ အီးပဲန့်ပံင်ဆူည်ႇ တားအောဒါင်းတားစော်င်း အူချှေႈ ဟည်ဒေဲႈစာ်မ်း ပါ့်ဒီး။ 67ဘိူဝ်ယေဲဝ်းအန်းတာ် ပေတရု ဂီအံက်ႎါႇငည်း၊ အန်း စီတိူဝ်ႈစေးစေးလာ်ဒါး စီဒါ်ႈ “မည်းမာ် မိုႈပေါႇ ချှေႈအီးဂေါ်ည်းတောႇ ယေဆု အီးမိုႈတူအီးလှံင်းနာဆရဲတ်။”
68ဘိူန်ဇေဲန်း ပေတရုမာ် ႎီးထဲင်းအန်း စီဒါ်ႈ “ပံင်ဒါ်ႈမည်းဒီး အံဝ်းအာဝ်နာ်ႇ အာဝ်ကဘ္လူႈမ။” ႎါည်းဒီး ပေတရု စီလေႈဟာဝ်းဇူး ပါ့်ကိူန်ႎါင်း။ ခည်ယာမ်းဇေဲန်း အျိူဝ်းမာ် ဟည်ကဒိုး။
69ဘိူဝ်ဒေဲႈယေဲဝ်း အီးပဲန့်ပံင်ဆူည်ႇဒီးတာ် ပေတရုဘိုးအူဘော်က် ပါ့်ဒီး၊ အန်းစီ ကလာင်းလာ် တာ့်တူအီးဂေါ်ည်းရီမ်းအန်းကဲဒီး စီဒါ်ႈဘိုး “ချှေႈနီး မိုႈပေါႇ ခေဲင်းကဲအီးဂေါ်ည်းတောႇစံဝ်ယေဆု အူချှေႈဟာ့်။” 70ပေတရုမာ် ႎီးထဲင်းဘိုးအန်း ဒါ်ႈ “အာဝ်မိုႈမ။”
ႎါည်းဒီးအူတည် တူအီးကဲ အီးဂေါ်ည်းရီမ်းကဲဒီးမာ် ဒါ်ႈ တာ့်ပေတရု “ဂေါႇမိုႈ မည်းမိုႈ တူအီးအရာပ်ဂါလိလဲ၊ မည်းမာ် မိုႈပေါႇ ချှေႈခေဲင်းကဲအီးဂေါ်ည်း တောႇစံဝ်ယေဆု အခည်းဟာ့်။”
71ဘိူန်ဇေဲန်း ပေတရု စီဒါ်ႈ “အံဝ်းခံမ် စမ်းတိူင်ကျောႈ လအာည်ႇစံဝ်ဖြား၊ အီးမိုႈ ချှေႈပံင်ကလာင်းပဲဒီး အံဝ်းကံပ်ဘူနာ်ႇဟံင်း။”
72ယာမ်းဇေဲန်းပေါႇ အျိူဝ်းမာ် ဟည်ကဒိုး အယ်ဘော်က်။ ပေတရုမာ် ဟည်ႎီးနလှူႈ ကျောႈပံင်တာ်မ်းအူန်း စံဝ်ယေဆုတာ့်အန်း အီးဒါ်ႈ “အာည်ႇကဒိုးအျိူဝ်း အယ်ဘော်က်၊ မည်းနံင်ထဲင်းႎီုန် ဒါ်ႈ ‘အံဝ်းအာဝ်နာ်ႇမ စံဝ်ယေဆု’ ကံပ်မိုႈအိုည်းဘော်က်။” ဘိူန်ဇေဲန်း ပေတရုမာ် စီပေန်ယာဝ်းနိုက်နောႈ ဟည်အူးယာမ်းပေါႇဟာ့်။
अहिले सेलेक्ट गरिएको:
မာကု 14: RMT
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© (Active), Wycliffe Bible Translators, Inc. All rights reserved.