မာကု 15

အီးတေဲႇယိုင်းဟာဝ်း စံဝ်ယေဆု ပါ့်တားကညျားပိလတ်

မတဲ ၂၇း၁-၂၊ ၁၁-၁၄၊ လုကာ ၂၃း၁-၅၊ ယောဟာန် ၁၈း၂၈-၃၈

1ႎါည်းဒီးအူဆငည်း ဇိုညျှေးဇေဝ်းဇေဝ်း တားစော်င်းဒါင်း ကဲ စီဟာဝ်းကအုပ်ကမိုန်လာ် တာ့်တူအီးဒါင်းကဲ၊ တားဆြာကံတ်ကျာမ်းကဲ ကာည်း တူအီးအံက်တံင်လုမ်းတြားကဲပါ်ပည်မေဲႈ ဘည်ဘာည်းနံင်တင်ချင် တာ့်စံဝ်ယေဆု။ ႎါည်းဒီး ကဲစီဘက်ယိုင်းဟာဝ်းလာ် စံဝ်ယေဆု၊ စီအာပ်ဒဲႈ တာ့်တားကညျားပိလတ်။

2တားကညျားပိလတ်မာ် စီမှောႇစံဝ်ယေဆု ဒါ်ႈ “မည်းမိုႈလာ့်၊ တားကညျားဒါင်းယုဒကဲ။”

စံဝ်ယေဆု စီႎီးဒါ်ႈ “မိုႈလိူည်မည်း ဒါ်ႈဘာည်းဇေဲန်း။”

3အီးမိုႈတားစော်င်းဒါင်းကဲ စီကလာင်းခလံဝ်း ဆံက်ဆေအီးဘူမိုႈဘူမှာန် လော်င်စံဝ်ယေဆု ဂီုန်းပေါႇအခည်းဟာ့်။ 4ဘိူန်ဇေဲန်း တားကညျားပိလတ် စီမှောႇဒါ်ႈ တာ့်စံဝ်ယေဆု “မည်းဘူႎီးဒါ်ႈ ဆိ ဟီုဝ်။ တိူဝ်ႈဟံင်း၊ ကဲကလာင်းဒါ်ႈ ပံင်ကလူည်ႇမည်း ကံပ်ဘာည်းထန်ဇေဲန်း။”

5ဘည်ဘာည်းမာ် စံဝ်ယေဆု ဂီဂေါ်ည်းဘူကျောႈဘူကျဲန်းဆိ၊ ဂေါႇဘာည်းဇေဲန်း တားကညျားပိလတ်မာ် အာမ်းပေါႇအခည်း။

ဘည်ဘာည်းဒဲႈအီးတာ် တံမ်ယာ်မ်း တာ့်စံဝ်ယေဆု

မတဲ ၂၇း၁၅-၂၆၊ လုကာ ၂၃း၁၃-၂၅၊ ယောဟာန် ၁၈း၃၉-၁၉း၁၆

6ယာမ်းစာ်မ်းဒေဲႈပ္လေါ်ည်းပတခါ ဘော်က်မှေဲ့မာ် တားကညျားဒါင်း ကျင်းအူန်းလာ်ပ္လေႈဒဲႈ တူအီးဇောႈကဘေဲမ်းအူချှေႈ ပံင်မှာန်းတူအီးကဲ။ 7ခည်ဇူင်ဒီး စီမေဲႈလာ် တူအီးအူချှေႈ အန်းအီးဇီုဝ် ဘာရဘ၊ အန်းမာ် ကတူႈဇောႈခေဲင်းကဘေဲမ်း တောႇတူအီးစားကဲအီးရေဲန်းကခံတ် တာ့်ကဲအီးကမ်းဇိုင်းကီုင်း ဂေါႇလီုင်အန်း ပတတ်ယာ်မ်းတူအီး ခည်မိုႈတာ် အီးရေဲန်းကခံတ်တာ်လော်င်ကီုင်း။ 8ဘိူန်ဇေဲန်း တူအီးဂီုန်းကဲမာ် စီဒေဲႈ ပါ့်တားကညျားပိလတ် စီမှာန်းတာ့်အန်း နှာင်းအန်း ရေဲန်းဒဲႈ တောႇတာ်ဘည်ဘာည်း ကျင်းရေဲန်းအန်း။ 9ဘိူန်ဇေဲန်း တားကညျားပိလတ် စီမှောႇတာ့်ကဲ ဒါ်ႈ “ပဲဆီင်ဒဲႈလာ် အံဝ်းပ္လေႈလေႈ တားကညျားဒါင်းယုဒကဲ။” 10ဆီမ်ဘာည်းဆံမ်မှောႇဒါ်ႈလာ်ဘာည်းဇေဲန်း ဂေါႇမိုႈအန်းနာ်ႇအူန်းတာ် တားစော်င်းဒါင်းကဲဒီး နောႈဆကေဲႈ တာ့်စံဝ်ယေဆု၊ စီဒေဲႈအာပ်ဒဲႈ တံင်တည်းအန်း။

11ဘည်ဘာည်းမာ် တားစော်င်းဒါင်း ကဲ စီဆူႈ တူအီးဂီုန်းကဲ စာနံင်မှာန်း တာ့်ပိလတ် နှာင်းအန်းပ္လေႈလေႈ ဘာရဘဒီး၊ နှာင်းဘူပ္လေႈလေႈစံဝ်ယေဆု။ 12တားကညျားပိလတ် စီႎီးမှောႇ တာ့်ကဲဒါ်ႈ “ဆာ်ဘာည်းဇေဲန်း မှေဲအံဝ်းနံင်ဘာည်း တာ့်ချှေႈနီး ပံင်တေဲႇဒါ်ႈပဲ တားကညျားဒါင်းယုဒကဲ။”

13ဘိူန်ဇေဲန်း ကဲစီႎီးအောင်းဒါ်ႈ “တော်က်ကတံက် ပယာ်မ်းႎီုန် ချှေႈဒီး တီင်ရံင်းတာ်ႇတည်း။”

14တားကညျားပိလတ် စီႎီးမှောႇဘိုး တာ့်ကဲ ဒါ်ႈ “ပံင်ကလူည်ႇမျိုးမှေဲ အန်းရေဲန်းကလူည်ႇကလေဲပ်ဒေဲႈ။”

ဘိူန်ဇေဲန်း တူအီးကဲဒီး ချဲန်းအာ်ရိုင်းအောင်းဒါ်ႈ ဒါင်းဒါင်း “တော်က်ကတံက် ပယာ်မ်းႎီုန် ချှေႈဒီး တီင်ရံင်းတာ်ႇတည်း။”

15ဂေါႇမိုႈ တားကညျားပိ စီဆီင်ဒဲႈ တူအီးဂီုန်းကဲ နောႈပျော်ခိုည်း၊ စီပ္လေႈလေႈလာ် ဘာရဘ ချှေႈပံင်မှာန်းကဲ။ အီးမိုႈ စံဝ်ယေဆုမာ် အန်းစီဟည်ဒဲႈ အီးကယာင်ငါ်ႈဖာ်ႈ၊ စီအာပ်ဒဲႈလာ် အီးတော်က်ကတံက် ပယာ်မ်းႎီုန် တီင်ရံင်းတာ်ႇတည်းဟာ့်။

တူအီးကဲ ရေဲန်းပျိူဝ့် တာ့်စံဝ်ယေဆု

မတဲ ၂၇း၂၇-၃၁၊ ယောဟာန် ၁၉း၂-၃

16ဘိူန်ဇေဲန်း ကော်န်းနာန်းကဲမာ် တေဲႇယိုင်းဟာဝ်းလာ် စံဝ်ယေဆု ပါ့်လုမ်းခလေဲပ် တားကညားဒါင်း၊ ကဲစီတေဲႇကစုဒို့ ပါ်တံပ် ပါ့်ဒီး။ 17ႎါည်းဒီး ကဲစီ ရေဲန်းပျိူဝ့်ဖာ်ႈ စီချှေဲပ်ဒဲႈ စံဝ်ယေဆု ဟေဲပ်တဆီးကံမ်၊ ချှို့ဒဲႈဘိုး မှိုက်ႏပန်ကိုမ်း အီးတာန်းဒါးပအေဲႇ၊ 18ကဲမာ် စီကျောႈရိုဆေ ရေဲန်းထင်ဒါ်ႈ “တားကညျားဒါင်းယုဒကဲ၊ ဒဲႈမည်းစံဝ် မေဲႈမင်ကလာချှီႇနာ်ႏ။” 19ကဲစီဒါး ကဆားတင်းဆအျိူဝ်ႈ ငါ်ႈဟပ်ကေဲန်းအန်းစံဝ်၊ စီဘတ်ဟပ်ဘိုး အေဲမ်းဘတ် တာ့်အန်းစံဝ်။ ကဲစီအံက်တကေဲပ်ကေဲန်းဂျိုင်း လအာည်ႇအန်း စီရေဲန်းထင်ဂျေဲပ်ဘိုးအန်းစံဝ်ဟာ့်။ 20ႎါည်းလီလာရေဲန်းပျိူဝ့်ဟာဝ်းကဲ တာ့်အန်းစံဝ်ဘာည်းဇေဲန်း၊ ကဲစီပူည်ႇလာ် တဆီးကံမ်ဒီး စီႎီးဟေပ်ဒဲႈလာ်ဘိုး တဆီးအန်းစံဝ်။ ႎါည်းဒီး ကဲစီတေဲႇယိုင်းဟာဝ်းလာ် စံဝ်ယေဆု စာနံင်တော်က်ကတံက် ပယာ်မ်းႎီုန် အန်း တီင်တေဲင်းရံင်းတာ်ႇတည်း။

ဘည်ဘာည်း အီးပယာ်မ်းႎီုန် စံဝ်ယေဆု တံင်ရံင်းတာ်ႇတည်း

မတဲ ၂၇း၃၂-၄၄၊ လုကာ ၂၃း၂၆-၄၃၊ ယောဟာန် ၁၉း၁၇-၂၇

21ခည်ဇူင်ဒီး စီမေဲႈလာ် တူအီးအူချှေႈ အီးဇီုဝ် ဆိမိုန်၊ အန်းမိုႈ တူအီးလှံင်းကုရေနေ အီးမိုႈကူန်းအာလေဆာန်ဒု ကာည်း ရုဖု၊ အန်းစီယာ်ည်ႇဒေဲႈ ညျှာအီုင်ဇူႈ။ ဘိူန်ဇေဲန်း ကော်န်းနာန်းကဲ စီကမ်းဆူည်ႇ ဒဲႈအန်းကောႇလာ် ရံင်းတာ်ႇတည်း စံဝ်ယေဆုဟာ့်။ 22ႎါည်းဒီး ကဲမာ် ယိုင်းဟာဝ်းစံဝ်ယေဆု ပါ့်အရာပ်ဒီဒါ်ႈအီးတာ် ဂေါလဂေါတ။ ပံင်ဆီင်ဒါ်ႈအန်း မိုႈ ဂေါင်းကအာင်းက္လောက်ကေဲန်း။ 23ယာမ်းဇေဲန်း ကဲစီဒဲႈ စံဝ်ယေဆု စိုင်းအေဲမ်းဆပျီတ် ပံင်ကဆူးကယံဝ်တာ့်မုရာန်#၁၅:၂၃ ဆာ်တေဲႈမုရာန် ကယံဝ်ကဆူး အေဲမ်းဆပျီတ်ဒီး အန်းပေန်ဆနမ်း နှာင်းဒီဆဲဝ်းဂဲန်း။။ ဘည်ဘာည်းမာ် စံဝ်ယေဆု စီအာဝ်စိုင်းမ။ 24ဘိူန်ဇေဲန်း ကဲစီတော်က်ကတံက်ပယာ်မ်းႎီုန် စံဝ်ယေဆု တံင်ရံင်းတာ်ႇတည်း။ ကဲစီႎီးကယာ်ႈဖာ်ႈတဆီးဟေပ်အန်းစံဝ် စာနံင်တဟော်ည်ႇဇီုင်း ချှေႈမှေဲ့ နံင်ဘိူန်း လှေမှေဲ၊ ကဲစီညျှောႈစေကော်က်။ 25ခည်ဇူင်ကဲ တော်က်ကတံက် ပယာ်မ်းႎီုန် စံဝ်ယေဆု တံင်ရံင်းတာ်ႇတည်းဒီး မိုႈခည်ညျှေး တီမ်းအီုင်ဂည်း။ 26ကဲစီကိက်လာ်ဘေဲႇနှဲ လော်င်ပံင်ကလူည်ႇစံဝ်ယေဆု ပံင်ဒါ်ႈတာ် “တားကညျားဒါင်းယုဒကဲ၊” စီတော်က်ကတံက် တံင်ကေဲန်းရံင်းတာ်ႇတည်း။ 27ကဲစီတော်က်ကတံက် အီးမိုႈတူအီးစိုန်အယ်ချှေႈ ပယာ်မ်းႎီုန် တောႇစံဝ်ယေဆု ညျှာအကအန်းအူချှေႈ၊ ညျှာအအေဲႈအန်းအူချှေႈ။ 28(တောႇတာ့်ဘာည်းဇေဲန်း၊ ဘာည်းကိက်ဒေဲႈ ခေဲင်းဘေဲႇကျာမ်း ဟေဆာယ ပံင်ဒါ်ႈတာ် အန်းစံဝ်နံင်လေဲပ်တောႇ တံင်စရာင်းခေဲင်းတူအီးဇေဝ်တူအီးဟာည်း ဟည်မိုႈဒေဲႈပေါႇအခည်း ကဆီုဝ်နီး။)#၁၅:၂၈ တီင်ဘေဲႇကျာမ်းအီးပျီမ်းမာင်ကလံက် အာဝ်တောႇမ ဘေဲႇထဲဝ်လှေနီး။

29ကဲအီးႎီးႎီးဟာဝ်းဟာဝ်း တောႇအီုန်ဒါ်န်းကဲမာ် တိူဝ်ႈဆပ္လါည်းဖာ်ႈ စီလီလာပျိူဝ့်ဒါ်ႈ “အိူဝ် ချှေႈအီးဒါ်ႈ နံင်ယာ်ႈႎီုန်ဖာ်ႈစော်င်းစံဝ်ဖြား စီဒါ်ႈနံင်ႎီးရေဲန်းတဟော်ည်ႇဘိုး တံင်ခေဲင်းအိုည်းဆငည်း၊ 30မည်းလည်လေႈဒေဲႈလာ် ဒတေဲင်းရံင်းတာ်ႇတည်းဒီး၊ ႎီးချော်တ်လာည်းဟံင်း တိုးမည်း။” 31တံန်နှေးတာ့်ဘာည်းဇေဲန်း၊ အီးမိုႈတားစော်င်းဒါင်း ကဲ ကာည်း တားဆြာကံတ်ကျာမ်းကဲမာ် စီဒေဲႈလီလာပျိူဝ့်ဒါ်ႈဘိုး တာ့်အန်းစံဝ်၊ စီဒါ်ႈ “အီးမိုႈအီး အန်းစီချော်တ်လာည်း။ ဘိူဝ်မိုႈတာ်တိုးအန်းအခည်း အန်းဆံမ်ဘူဘယ်လာ် ချော်တ်လာည်းမ။ 32အိူဝ် တားကညျားဒါင်းအိတရေလ အီးမိုႈမေဆိယ#၁၅:၃၂ စံဝ်ခရီတ် မည်းလေႈဒေဲႈပေါႇ စံင်နည် ဒတေဲင်းရံင်းတာ်ႇတည်းဒီး။ ဆာ်ယေးယေဲဝ်း မည်းလေႈဒေဲႈ ဒတေဲင်းရံင်းတာ်ႇတည်းဒီး၊ ယေးစီ နံင်ညျှေဲမ်လာ် ပေါႇမည်း။”

တူအီးကဲအီးကညား တော်က်ကတံက် ပယာ်မ်းႎီုန် တံန်တောႇ တံင်ရံင်းတာ်ႇတည်း တောႇစံဝ်ယေဆု ကဲမာ် လီလာပျိူဝ့်ဒါ်ႈဘိုး တာ့်စံဝ်ယေဆု။

ဘည်ဘာည်း ယာ်မ်းဟာဝ်း စံဝ်ယေဆု

မတဲ ၂၇း၄၅-၅၆၊ လုကာ ၂၃း၄၄-၄၉၊ ယောဟာန် ၁၉း၂၈-၃၀

33ႎါည်းဒီး ဘိူဝ်စာ်မ်းတာ် ကဒည်ဆငည်း အူကိူဝ်းလေႈအယ်အီုင်ဂည်း၊ ဘျည်းမာ် ဟည်အာ်ႇဘံင်ဘံင်ဟာဝ်း ပါ်ကတည်း၊ တော်ကံပ်စာ်မ်းဘာ်န်းဟိုမ်း အိုည်းအီုင်ဂည်း။ 34ဇိုဘာ်န်းဟိုမ်း အိုည်းအီုင်ဂည်းဒီး စံဝ်ယေဆု စီရိုင်းအောင်းပါဝ်ဒါ်ႈ “အေလိ၊ အေလိ၊ လာမဆာဘခတာနိ၊” ပံင်ဆီင်ဒါ်ႈအန်းမိုႈ “စံဝ်ဖြားအံဝ်း၊ စံဝ်ဖြားအံဝ်း၊ ဆီမ်ဘာည်း မည်းဆံမ်အူန်းႎီုန်လာ် အံဝ်း။”

35ကဲအီးဂေါ်ည်းရီမ်းအန်းစံဝ်ကဲဒီး ဘိူဝ်ယေဲဝ်းတညာဝ်းကဲတာ် ကျောႈအန်း၊ ကဲစီဒါ်ႈ “တိူဝ်ႈဟံင်း အန်းဂီတေဲႇလာ် အေးလိယ။” 36ဇိုယာမ်းဇေဲန်း စီမေဲႈလာ် တူအီးအူချှေႈ တဘုဟာဝ်းတေဲႈလာ် အီးဘာည်းနှုန် ဇယ်ဟပ်ဖာ်ႈ တံင်အေဲမ်းဆပျီတ်ဘျာင်း စားအီးချာ်ည်းအန်း စီဘက်ကတံက်တံင်ကဆားဆအျိူဝ်ႈ၊ ဒဲႈဟိုက်လာ် အန်းစံဝ်စိုင်း။ ႎါည်းဒီး အန်းစီဒါ်ႈ “ပ္လေႈအူန်းဘာည်းဆီင်ဘာည်းအန်း၊ အဲပည်တိူဝ်ႈဟံင်း အေးလိယ နံင်ဒေဲႈ အာဝ်ဒေဲႈ စာနံင်ပ္လေႈလေႈအန်းတာ် ခီချေဲမ်း။”

37ႎါည်းဒီး စံဝ်ယေဆု စီရိုင်းအောင်းပါဝ်ဒါ်ႈ ဒါင်းဒါင်းဖာ်ႈ အဆာက်အန်းမာ် ဟည်ဒို့ဟာဝ်းပေါႇ။ 38ဇိုယာမ်းဘာည်းတာ့်ဇေဲန်းဒီး တံက်အန်းအီးဖျာင်အူန်း ပါ့်စော်င်းစံဝ်ဖြားမာ် ဇူႈပေါႇကတေဲင်း တဘျဲႈပေန်ဟာဝ်းပေါႇ အယ်ဖာက် တော်ကံပ်စာ်မ်းခီချေဲမ်း။ 39ဘိူဝ်ယေဲဝ်း ချှေႈအီးအောကော်န်းနာန်းအူပယာ်ႈ အီးဇံင်းဂေါ်ည်း ပါ့်လအာည်ႇစံဝ်ယေဆု တာ်ဘည်ဘာည်းယာ်မ်းဟာဝ်းအန်းစံဝ်၊ စီဒါ်ႈလာ် “ချှေႈနီး ဟည်မိုႈပေါႇ ကော်န်းစံဝ်ဖြား အခည်းဟာ့်။”

40ဘိူန်ဇေဲန်း စီမေဲႈလာ် အီးပဲန့်ကဲ ဂေါ်ည်းဒါးဒိုင်းဒိုင်း ဇံင်းတိူဝ်ႈအူန်း။ ခေဲင်းကဲဒီး စီမိုႈလာ် မာရိတူအီးလှံင်းမာဂဒလ၊ စံမ့်ဆာလိုင် ကာည်း မာရိ အီးမိုႈမာရာကိုပ်ဒဲ့ ကာည်း ယောတေ။ 41ကဲဒီး မိုႈ ကဲအီးတောႇဒေဲႈအန်းစံဝ် ကဲအီးရေဲန်းချှိုင်းတိူဝ်ႈမေန်းအန်းစံဝ်၊ ခည်မိုႈတာ် အန်းစံဝ်ဂေါ်ည်း ပါ့်အရာပ်ဂါလိလဲဟာ့်။ ဘိူန်ဒကဲဒီး အာဝ်ႎါ်န်း စီတောႇစံမ့်ဘိုး အီးပဲန့်ကဲအီးဟည်း ကဲအီးတောႇဒေဲႈအန်းစံဝ် အီးဟိုက်ဒေဲႈစာ်မ်း ပါ့်လှံင်းယေရုဆလိင်၊ ကဲမာ်ဂေါ်ည်းဒို့ ပါ့်ဒီး။

ဘည်ဘာည်းတီႇအီးတာ်တိုးချာပ်ယာ်မ်း စံဝ်ယေဆု

မတဲ ၂၇း၅၇-၆၁၊ လုကာ ၂၃း၅၀-၅၆၊ ယောဟာန် ၁၉း၃၈-၄၂

42ဂေါႇမိုႈ ဆငည်းဒီးမိုႈ ဆငည်းအဖီတ် အီးမိုႈဆငည်းရဲန်းအီးတာ် စာဆငည်းဆတာင်း၊ ဘိူဝ်စာမ်းဒေဲႈ ဇိုအာ်ႇ၊ 43ယောတဲတ် တူအီးလှံင်းအရိမတ်တဲမာ် ဟည်စာ်မ်းဒေဲႈယာမ်းဇေဲန်း။ အန်းမိုႈ တူအီးပံင်ရိုဆေအီးအူချှေႈ ခေဲင်းလုမ်းတြား။ အန်းစီမိုႈလာ် ချှေႈအီးပည်နှံက်အူန်း ဘိူန်နံင်ပေန်ဒေဲႈ ကီုင်းစံဝ်ဖြား။ အန်းမာ် စီလေဲပ်ဟာဝ်းဇူး ပါ့်တားကညျားပိလတ် အာဝ်ယံဝ်းအာဝ်ဆိ၊ စီမှာန်းလာ် စာနံင်ဟာဝ်းလာည်းတာ် တိုးချာပ်ယာ်မ်း စံဝ်ယေဆု။ 44ဘိူဝ်နာ်ႇ တားကညျားပိလတ်ဒီးတာ် စံဝ်ယေဆု ဟည်ယာ်မ်းဟာဝ်း၊ အန်းစီ အာမ်းပေါႇအခည်း။ အန်းစီတေဲႇမှောႇလာ် တားအီးအော ကော်န်းနာန်းအူပယာ်ႈဒီး စီဒါ်ႈ “အန်းယာ်မ်းဟာဝ်း လှာ်န်းဟာ့်။” 45တားအောကော်န်းနာန်းအူပယာ်ႈဒီးမာ် ႎီးဒါ်ႈ “မိုႈအိူဝ်၊ အန်းဟည်ယာ်မ်းဟော်ည်ႇ အခည်း၊” ဘိူန်ဇေဲန်း တားကညျားပိလတ်စီဒဲႈလာ် အခွါင်းတာ့်ယောတဲတ် စာနံင်ဟာဝ်းလာည်း တိုးချာပ်ယာ်မ်း စံဝ်ယေဆု။ 46ဘိူန်ဇေဲန်း ယောတဲတ် စီဇိူဝ်ႈလာ် တံက်ချှီႇ စီပ္လိုတ်လာည်းလေႈလာ် တိုးချာပ်ယာ်မ်း စံဝ်ယေဆု၊ စီဒါးတံက်ဒီး ပည်းလာ် တိုးချာပ်အန်းစံဝ်။ ႎါည်းဒီး အန်းစီ ဟာဝ်းတီႇဟပ်အူန်းလာ် တိုးချာပ်ဒီး ပါ့်ထံမ်ဖေဝ်း ပံင်တော်က်အီးတာ် မာဝ်းဒါင်းရေဲန်းပေန်ကတဲဝ်းထံမ်၊ ဒါးဘိုး က္လိုန်းမာဝ်းဒါင်း ဂ္လီင်ဘိႎီုန်အူန်း မိုည်ႇထံမ်ဒီး။ 47မာရိတူအီးလှံင်းမာဂဒလ ကာည်း မာရိ အီးမိုႈမာယောတေ ကာည်းစီတိူဝ်ႈလာ် ဒီတီႇႎီုန်အူန်းအီးတာ် တိုးချာပ်စံဝ်ယေဆု။

अहिले सेलेक्ट गरिएको:

မာကု 15: RMT

हाइलाइट

शेयर गर्नुहोस्

कपी गर्नुहोस्

तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्

ဘေဲႇကျာမ်းတမာည်းညျှာရူမာည်း बारे थप जान्नुहोस्