Matta 25
25
Misali tazwa na̱neyang swak
1Yesu a̱ bo hywa da̱ mba, “Ka̱tuk iya Dityok Tazwa ti ni ryi di na̱neyang swak a a̱ yin sook fitila mba a̱ nat ka̱myim ba̱ a̱ntyok nyreng u ni. 2Ba̱nyet ba̱pfon mba a̱ yin byyi a̱za̱ncyi, ba̱nyet ba̱pfon a̱ byyi a̱za̱ncyi ba. 3Na̱neyang na̱pfon na a̱ sang a̱za̱ncyi na ni a̱ sook fitila mba ji, di ba breng dihywu tiyaan a̱nta̱mak ba. 4Ba̱nyet a̱za̱ncyi ba a̱ breng dihywu tiyaan an shep ji a̱nta̱mak. 5To, nu a̱ntyok nyreng u a̱ ba ka̱ram ka ban ku cam ni ba. Na̱neyang a a̱ kpa nda.
6“A̱kang ka̱ram a̱ta̱tuk ba hok yei, ‘A̱ntyok nyreng u a̱ ba wo! Yi wruk i mon ba̱ nu.’ 7Sa̱rei na̱neyang iya ba̱na swak a̱ shyek a̱ nwa tyei ndong an fitila mba ji. 8Na̱neyang sang a̱za̱ncyi iya a̱ hywa di ba̱nyet a̱za̱ncyi ba, ‘Ki yi ni za shwang dihywu nyin ti, fitila njit ji kwi-kwi.’ 9Ba̱nyet a̱za̱ncyi iya a̱ hywa, ‘Ka̱t, kaai! Tin za maai ba̱ nyin ba. Kyang a myim ni, yi nat ka̱bvwa zzap ka si kwei ka̱sak ka ti nin ya maai ni.’ 10Na̱neyang na̱pfon sang a̱za̱ncyi iya ba drok a̱ naat kwei dihywu ti, a̱ntyok nyreng u a̱ nyyai a̱ bu nwa bu na̱neyang a̱za̱ncyi na̱pfon iya ka̱bvwa nyreng ka, ba hweyak ka̱bvwa ka.
11“Ka̱baram a̱ bvwa ba, kpikpit na̱neyang a a̱ brek a̱ bu hywa, ‘A̱ntyok Ka̱ryi, za yrang i, ho zi brek.’ 12A̱ntyok nyreng u a̱ hywa da̱ mba, ‘Ka̱ryong n ya tyyei, n ya bvwo ba.’ ”
13Yesu a̱ ba̱ zzwang i a̱ hywa, “Rot a̱mi yi swat cam, rot yi bvwo nom a ko ka̱ram ka ba.”
Misali tazwa ba̱kwwa ba̱tat
(Luka 19:11-27)
14Yesu a̱ bo hywa da̱ mba, “Ku ni ryi da̱ni di a̱ntyok a̱yaan nu a̱ yin jyam nat a̱gbang nkwwan ni. A̱ yei ba̱kwwa nu ba a̱ ba̱ ka zwa nu ji ba ku bvan ni. 15Koyan na̱ ku ryi a̱ maai ba̱cicrak bu cet nu na. A̱yanyet na̱ ku ryi krum pfong nza nswak a̱tiyring, a̱yanyet swak tat, a̱yanyet swak ba̱ pfun; a̱ wruk a̱ pyyem ryen ka̱cyet nu. 16A̱tuba nu ba ku ryi nswak a̱tiyring a ni a̱ brak a̱ rot a̱ si tyyi krum nu ji a nza, a̱ bon shya swak a̱tiyring tazwa. 17A̱tuba nu ba ku ryi swak tat a ni a̱ ma̱ si brak a̱n shya swak tat tazwa. 18Ma nu a̱tuba nu ba ku ryi swak ba̱ pfun iya ni a̱ nat a̱ si rung bvong a̱ nyat krum a̱ntyok ka̱ryi nu ji.
19“Ka̱ram a̱ bvwa ba̱t a̱ntyok ka̱ryi mba nu a̱ si brek a̱ bu ba̱ yei ba ku tyyei kyang a ba yya bu krum ji ni. 20A̱tuba nu ba yin ku ryi nswak a̱tiyring a ni, a̱ nyyai a̱ bu hywa da̱ a̱ntyok ka̱ryi nu, ‘A yi n dyi nswak a̱tiyring, n brak n shya nswak a̱tiyring tazwa. Dii zin jii nini.’ 21A̱ntyok ka̱ryi nu a̱ hywa, ‘Sa̱nnu! A yet a̱tsatsak a̱kwwa. Ka̱sak ka an tyyei ka̱ryong a cincong nkyang ji ni, n ni tyyi nkyang ba̱gingang an bvak nwan. Ba, swrang hok ansham a̱ntyok ka̱ryi nwan na.’ 22Nu a̱tuba nu ba yin ku ryi nswak tat a ni a̱ ma̱ nyyai a̱ bu hywa, ‘A̱ntyok Ka̱ryi, a yi n dyi nswak tat n si brak n shya nswak tat tazwa, dii zin jii nini.’ 23A̱ntyok ka̱ryi nu a̱ hywa, ‘A yet a̱tsatsak a̱kwwa. Ka̱sak ka an tyyei ka̱ryong a cincong nkyang ji ni, n ni tyyi nkyang ba̱gingang an bvak nwan. Ba, swrang hok ansham a̱ntyok ka̱ryi nwan na.’ 24Wwon a̱tuba nu ba ku ryi swak ba̱ pfun na ni a̱ ba a̱ bu hywa, ‘A̱ntyok ka̱ryi, nzuk n bvwo a bvwa dikwu ba̱t; a na si kprem yak a da̱ nwan ba tup ni ba, n si tung ka̱bvwa ka an wi nai ni. 25Rot a̱mi ka̱wun a̱ n pyyem n nat n si rung bvong n nyat krum nwan ji. Dii zin jii ni.’ 26A̱ntyok ka̱ryi nu a̱ hywa, ‘A yet a̱ka̱tuk a̱ta̱ran a̱kwwa. A wu bvwo ka̱sak ka n nin kprem i na̱bvwa na n ni wi ntup a ni, n tung i na̱bvwa na n ni nai ni ba, 27a̱nzan a̱ na̱ bvwo nat si tyyi krum nzuk ji a mbvak ba̱nyet nza ba ga brak, a̱ ni n shya ka̱ssok ka̱ram brek nzuk ka? 28Yi san krum iya da̱ nu wrak a̱tuba nu a̱ byyi krum pfong nza nswak a̱tiyring ni. 29A̱yin nu a̱ byyi a̱kpok u ni ba bo nin ku brang i, na̱ ga byyi ba̱gingang. A̱yin nu a̱ sang ni ba bo ni san ka̱bankyang ka na̱ hwa da̱ byyi ni a̱ ku wwon. 30Ma nu a̱kpam a̱kwwa a̱ni yi ku pyyem ta ka̱rek ndyin, ka̱ yemi na̱ kun a̱ rywei ka̱nu.’ ”
Shirya nom a̱ngbom ji
31A̱ si bo hywa da̱ mba, “Ka̱ram ka Ka̱won A̱neywu kan brek da̱ a̱gwam ni, sa̱rei bu ba̱pfong nka ba ni, a̱ ni swrang a a̱ntwam dityok Tazwa nu, 32ba si ku tung ba̱nyet ka̱sa ba sa̱rei, na̱ si ba̱ ghai a̱n yya a̱tswa a̱hwa, da̱ni di a̱ntyok a̱tsaai na̱ nan ghai bvon-tsaap bu bvon a̱tom ni. 33Bvon-tsaap ji na̱ tyyi nbvak yak, bvon a̱tom ji mbvak myin. 34Wwon A̱gwam u a̱ si hywa di ba̱nyet nbvak yak ba, ‘Yi ba i nwa, nyin ba̱nyet ba A̱tyyi nzuk na̱ hok ansham mba ni, i san dityok ti ba jyi a̱ ya sak i ni nyyai ka̱ram ka ba yin yya ka̱sa ka ni. 35N yin pfong cihywat, yi n dyi ya; n pfong na̱shyi, yi n bvwa ba̱shekwot sswa; n ba dicen, yi bu nwa ba̱ nzuk i na̱sa nyin; 36n cong ka̱gbyang, yi n kup a̱tro; n myyi hywu, yi n dyi dikan; n shyi a jaru, yi cong n byei.’ 37Wwon ba̱tsatsak ba̱nyet a̱ hywa, ‘A̱gwam, ke zi yi na̱ shya bu cihywat a i na̱ ryi kyangya. Ki ke zi yi na̱ shya bu na̱shyi na zi na̱ bvwa ba̱shekwot sswa? 38Ke zi yi na̱ shya a yet a̱yecen nu zi nwa ba̱ nwan i na̱sa njit a? Ki ke zi yi na̱ shya a cong ka̱gbyang ji zi na̱ san a̱tro nu? 39Ki ke zi yin na̱ ryi bu hywu na, ko a ma̱n shyi a jaru nu zi ba bu na̱ byyek?’ 40A̱gwam u a̱ ni hywa da̱ mba, ‘Ka̱ryong n ya tyyei: Ki yi n yya mi ba, i yya a̱neyring ka̱yat ba̱cwwang ba̱wumbeyang nzuk ka ni, nzuk a̱mi yi n yya mi.’ ”
41“Wwon a̱ si brak di ba̱nyet bvak myin ba, ‘Yi tyong kyi i n wwon, nyin ba̱nyet ba Ka̱za ka shyi ni. Yi nat i nwa rong ka̱u di tyak a ba yya a̱ wwon a̱gwam a̱ka̱tuk tswa mi bu ba̱pfong nu ba ni. 42N yin pfong cihywat, yi n yim kyangya; n pfong na̱shyi, da̱ nyin ba nang ba̱shekwot ba; 43n ba dicen, yi bu n wwon ba̱ a̱ta̱sa; n cong ka̱gbyang, da̱ nyin ba n kup a̱tro ba. Ka̱ram ka n nin myyi hywu ni n bo nshyi a jaru, a̱yin nyin a̱ ba a̱ n cyang ba.’ 44Wwon ba si ku zzim a̱ hywa, ‘A̱gwam njit, ke zin na̱ ryi bu cihywat i rak na̱ nang kyangya na? Ki ke zi na̱ ryi bu na̱shyi, di zi na̱ bvwa ba̱shekwot ba? Ki ke zi na̱ shya a yet a̱yecen, ko ka̱gbyang, ko bu hywu, ko a jaru, di zi na̱ brang ba?’ 45A̱gwam u a̱ si ba̱ brak i a̱ hywa, ‘Ka̱ryong n ya tyyei: Kozan ka̱ram yin shya a̱neyring ka̱yat ba̱cwwang ba̱wumbeyang nzuk ka, da̱ nyin ba ba̱ brang ni ba; nzuk a̱mi yi rak n yya na mi.’ 46Ba̱nyet iya a̱mi ba ni ra a̱ tyyi ka̱yat ka̱bvung ka a̱ byyi tyak ni ba. Ba̱tsatsak ba a̱ nat ka̱yat sucet wityak.”
अहिले सेलेक्ट गरिएको:
Matta 25: kaj
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2011, Wycliffe Bible Translators, Inc. All rights reserved.