Markut 5
5
Yesu a̱ creng a̱ntyok a̱ka̱tuk tswa
(Matta 8:28-34; Luka 8:26-39)
1Yesu bu na̱won pfong nu na ba byyek a̱gba̱dang kei Galili nu, a̱ tat ka̱byen Garisawa ka. 2-3Bu wruk Yesu ka̱yat a kpongo ka a̱ mon ba̱ a̱yin nu a̱ shyi ba̱ a̱ka̱tuk tswa ni, na̱ wwut an ndyak. A̱ swat an ndyak. Ba a̱yin nu a̱n ku pyyem a̱ sak ka̱rek ka̱yring ni ba. 4Nkrang ba̱gingang ba zzop a̱tak nu na bu mbvak nu na di ndyik ntswam, ma na̱ na̱ tsseng a̱ sin kat. Cet nu na yi seyak ka̱bvwa ku pyyem sak. 5Bu ki naat nu na yemi ka̱yat ntsok bu na̱bvwa a̱byibyyi, di ka̱ta̱nom di ka̱tuk, a̱ tyei nkun ba̱ ntazwa, a̱ ya krang rwam a di kpang a̱n tyei nhyot.
6A̱ ryi Yesu na̱ hyok, na̱ ta ncyi a̱ nat di Yesu, a̱ si ta̱gbok a̱ta̱ssi nu ka. 7A̱ tyyi kun ntazwa, a̱ hywa, “Yesu, Ka̱won A̱gwam Tazwa! A̱nzan a̱ ba ba̱ nwan? N na̱ naai i diyrek Ka̱za a ryok yya da̱ nzuk ba.” 8A̱ yin dyat a̱mi, rot Yesu a̱ yin kam a̱ka̱tuk tswa nu na̱ yin byyi ni, a̱ hywa da̱ nu, “A̱ka̱tuk tswa! Wruk ba̱nyying ka i wwon a̱yin a̱ni.”
9Yesu a̱ ku zzim, “Ba na̱ yei a̱nyan?”
Na̱ hywa, “Ba n yei ‘Ka̱tswa’ rot zi titai ryi ba.” 10Na̱ naai Yesu ba̱t na̱ ryok nyying a̱ka̱tuk tswa nu a̱ wruk i i ka̱byen iya ba.
11Ba yin dyat ba̱ cicrak ka̱ram iya a̱tswa ba̱la̱de ba ma̱n shyi ba̱ya beyang ntsok ka. 12A̱ka̱tuk tswa nu a̱ naai Yesu, a̱ hywa, “Za ryok zi nat si nwa ba̱la̱de ba a̱ shyi ba̱ya yaan ni ni.” 13Yesu a̱ ba̱ shim mi, a̱ka̱tuk tswa nu a̱ wruk nyyai da̱ a̱ntyok a̱ywu a̱ si nwa i ba̱la̱de ba. Ba̱la̱de ba a̱ yi tat cyi kop nkrang ka̱hwa. Sa̱rei mba ba krok ncyi a̱ kyrek a̱gut u a̱ si kwei ka̱yat kei ka, a̱ kwi!
14Ba̱nyet ba a̱ shyi i tsaai ba̱la̱de ba ni a̱ tyong a̱ si tyyei a gba̱dang ka̱nkrang u bu di ma bvwa na a̱n hywot i. Ba̱nyet ba̱gingang a̱ wruk a̱ ba a̱ ryi kyang a ba ni. 15Ba nyyai a̱ bu ryi Yesu bu a̱yin nu na̱ tun a̱ka̱tuk tswa nu da̱ nu ni. Nu a̱yin a̱ywu na̱ shyi swat ba̱zizrak, a̱ kup a̱zizrak ba̱tro. Ba hok ka̱wun ba̱t. 16Ba̱nyet ba a̱ bu ku ryi ni a̱ kok kpikpit ba̱nyet a mi ka̱sak ka Yesu na̱n creng a̱ntyok a̱ka̱tuk tswa nu ni, bu kyang a tyyi ba̱la̱de ba ni.
17Ba naai Yesu na̱ drok i ka̱byen mba ka ahwa.
18Yesu na̱ drok a̱ ni nwa kpongo nu, a̱ntyok a̱ka̱tuk tswa nu na̱ creng ni a̱ ku naai, a̱ hywa, “N cat ba ba̱ nwan.”
19Ma Yesu a̱ rak, a̱ hywa da̱ nu, “Brek nat di ba̱nyet ka̱ryi nwan ba si ba̱ tyyei ka̱sak ka A̱gwam Ka̱za na̱n hok dizot nwan ni. Si ba̱ tyyei kyang a Ka̱za ka na̱ yya mi ni.”
20A̱ntyok a̱ywu a̱ ma̱ brak a̱ rot a̱ nwai na̱nkrang a ba̱ na swak, ban yei Dikafolit ni. A̱ ba̱ tyyei ka̱sak ka Yesu na̱n ku creng ni. Ba̱nyet ba a̱ ku ryi a̱ bo hok kyang a na̱ ryat i, a̱ ma pyyem bu na̱nu.
Ka̱won Yayirut ba̱ a̱mbyring u a̱ byram a̱tro Yesu nu ni
(Matta 9:18-26; Luka 8:40-56)
21Yesu a̱ bo byyek a̱ nat ka̱ma̱nyyi ka̱yring ka, ba̱nyet ba̱gingang a̱ bo tung ka̱ yemi. 22(Yayirut a̱ yin yet a̱ntyok cyang bat a̱duwa. A̱ nat di Yesu.) A̱ nyyai a̱ si ta̱gbok a̱ta̱ssi Yesu ka, 23a̱ nwa ku naai a̱ hwat mbvak, a̱ hywa, “N na̱ naai. Ba n san! Ka̱won ka̱neyang nzuk a̱ shyi ka̱nu dikwu. Ba zi nat a si ka̱ sak bvak ka ga creng.”
24Yesu a̱ drok a̱ naat ba̱ nu. Ba̱nyet ba̱gingang a̱ ku tssup ba̱ gbin-gban.
25A̱mbyring a̱yaan na̱ shyi ka̱yat mba. A̱ ka̱n bvwa za swak bu swa na̱ tyong ba̱sok. 26A̱ ka̱n cong di ba̱bvok ba̱gingang a̱ hywat sa̱rei kyang a na̱ byyi ni, hywu na ku mbrang-mbrang. 27A̱ ka̱n hok nkhang Yesu. Na̱ nwa wwai ba̱shinshwon ka̱yat ba̱nyet ka a̱ naat gak Yesu ka. 28A̱ hywa ka̱tak mpfwa nu ka, “Ko ba̱ a̱tro nu nu n byram n bvwo n ni creng.”
29Na̱ bu si ra a̱tro Yesu nu a̱ hok na̱ creng, ba̱sok ba a̱ sseng. 30Ka̱ram iya Yesu a̱ hok cet nu na ku wruk. A̱ brak ka̱yat ba̱nyet ka a̱ zzim, “A̱nyan a̱mi a̱ ra a̱tro nzuk u?”
31Na̱won pfong nu na a̱ hywa, “Malam, a ryi ka̱sak ka ba̱nyet ba ba na̱ hwam i baa, a bu zzim da̱ a̱nyan a̱ na̱ byram o?”
32Yesu a̱ ya bu ka̱son bu cat a̱yin nu a̱ ku byram ni. 33A̱mbyring u a̱ ku byram i a̱ hok na̱ creng, a̱ nyyai bu rwam ba̱trim a̱ si ta̱gbok a̱ta̱ssi Yesu, a̱ ku kok ka̱ryong ka. 34Yesu a̱ hywa da̱ nu, “Ka̱won nzuk, ta̱za n nat. Ka̱ryong nwan a̱ na̱ creng. Nat ka̱ryi, Ka̱za na̱ wwon nda, a bu ni hok hywu nani ba.”
35Nyyai na̱ ri shyi i ba̱ryat ba, ba̱yanyet a̱ ba nyyai a gbang a̱ntyok cyang bat a̱duwa na, a̱ bu hywa da̱ nu, “Ka̱won nwan ka a̱n srang. A̱nzan a̱ bo yet a̱nying wat Malam tun nu?”
36Ka̱ram ka Yesu na̱n hok kyang a ba tyyei a̱ntyok cyang bat a̱duwa na ni, na̱ hywa da̱ nu, “Ryok hok ka̱wun ba, n tyyi bu rya.” 37A̱ shim a̱yin a̱ ku tssup ba se Bitut bu Yakubu bu Yohana, a̱wumba Yakubu nu. 38Ka̱ram ka ban ba ka̱ryi a̱gba̱dang ka ni, na̱ bu shya ba tyyi ba̱tai a̱ shyi ka̱nak. 39Na̱ nwa ka̱ryi ka, a̱ hywa da̱ mba, “A̱nzan a̱n byyi yin tyyi ba̱tai shyi bu ka̱nak? Ka̱won ka kwu ba. Ka shyi nda.”
40Ba ku mai dimrang ryihywat. Na̱ tyyi ba wruk ba̱sa̱rei, wwon na̱ si yei a̱tyyi ka̱won nu ba̱ a̱naa nu, bu na̱won pfong nu na a̱ shyi ba̱ nu ni; ba nat ba̱ nu ka̱bvwa ka ka̱won ka ka shyi ni. 41Na̱ si ka̱ pyyem mbvak, a̱ hywa da̱ nka, “Talita kumi,” nu a̱ yet, “Ka̱baneyang, n hywa da̱ nwan, ta̱za!”
42Ka̱baneyang ka a̱ ta̱za ba ahwa a̱ cong, rot ka yet za swak bu swa. Ba̱nyet ba a̱ shyi ba̱ nu ni a̱ ma pyyem bu na̱nu. 43Na̱ hywa da̱ mba ki di ba tyyei a̱yin kyang a na̱ yya ni ba. Wwon a̱ tyyi ba nang ka̱baneyang ka kyangya.
अहिले सेलेक्ट गरिएको:
Markut 5: kaj
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2011, Wycliffe Bible Translators, Inc. All rights reserved.