Luk 13
13
Yanga nekpen si nasang ɔkpɔghɔkpɔ
1Ka ngara yi anɛ bantingi ajɔ fa ba atɔ Jisɔs ateb anɛ ba Galilian ba Falet ayon ka ngara yi ajɔ ajɔ Ɔsɔwɔ. 2Jisɔs akpɛ, “ɛkana si Galili ba ayonyon ane abibi afɛ aga Galilian baga ateb niyiri na ayɛ? 3Ntɔ war, nasang! Ka erina yanga nekpen, war wɔɔ ɛtam ɛkpɔ nuku nkankan. 4Ɛkana si anɛ bafa noko na asa ka Siloam#13:4 siloam nebe alab ni ere ka nkɔ ɛfaba Jɛrusalɛm. ba nyar nju agbɔ ayon mbɔ abeb aga anɛ ba are ka Jɛrusalɛm? 5Ntɔ war, nasang! Ka erina yanga nekpen, war wɔɔ ɛtam ɛkpɔ nuku nkankan.”
6Ka Jisɔs atuu ɛbɛɛ jifa: “Munnu wiwi afɔ nasan ekokonadu ni ɛram ka ɛgbɛ ɛjɛ, ka amo ama bri nkab yayi ariyɛ. 7Ka atɔ nkɔgha ɛgbɛ ‘Ka nnya ɛsa yi mbagha ma mbri nkab ka ete ji ka yayi ndam yɛ. Kɛbɛ tob! Jɛɛsɛrɛ ka ɛkɔghɔ ekpeghe nsisi jifa?’
8“Nkɔgha ɛgbɛ akpɛ, ‘Ntaa, nɔngɔ ɛkpɛjɔ ka nnya yiyi, sɔng nsam nsisi nsibi nkag fɛtalaja. 9Ɛkab na nkab nnya ɛwɔ, ɛnɔnɔb! Erina kab, ka kɛbɛ tob.’ ”
Jisɔs atab mbɛnnɛ a manka ka ofo esiayɔ
10Ka ofo esiayɔ, Jisɔs ajɔ akpene ka nju a mfa Jus yiyi, 11ka manka wiwi ajɔ fa yi ebibi etughu ɛbɛnnɛ ka nnya noko na ɛsa. Njam ɛyɛ agrɛ arijɔ ama ayimi ntinnintinni. 12Ngara si Jisɔs ayiɛ, abengɛ ba ka atɔɛ, “Manka ɔmɔsɔ ka ɔya ɛba.” 13Ka Jisɔs akonɛ abɔ, naosunosu atinni akag Ɔsɔwɔ.
14Ka nnɛ isi ka nju a mfa Jus, asag nete yi Jisɔs atab nnɛ ka ofo esiayɔ, ka atɔ mbɔ, “Are afo asaghasa ya noto. Ma ba ka afo ya ɛmɛ kɔ nanagha, ofo esiayɔ sang.”
15Ntaa akpɛɛ, “War anɛ a njam ɛba! Ɛrɛmɛ fɔngngɔ ɔnya ɛbrɛ ka ebru eru ka ofo esiayɔ ɛmɛ kɛ mbɔ alab? 16Ka manka yɔfa mmɔ a Abraam sang, yi nnam amɛ kɛ niyiri ka nnya noko na ɛsa erem yi ɛnaghɛ ka ofo esiayɔ?”
17Si Jisɔs arag mbe bi, asɛnɛ anɛ baujing ɛbɛ wɔɔ, ka anɛ baga wɔɔ ayighi ka ajɛnambe bi ajɔ ane.
Ɛbɛɛ mmog a mɔsta na yist
(Mat 13:31,32; Mak 4:30-32)
18Ka Jisɔs abɔmmɔ, “Oton Ɔsɔwɔ erenasi jɛ? Ngara na jɛ? 19Erenasi mmog a mɔsta yi nnɛ akɔ abɔm ka ɛgbɛ ɛjɛ. Ɛram ɛjɔ ete, ka ososok ekomo ka aja ɛyɛ.”
20Akpɛ bɔmmɔ, “Ngara oton Ɔsɔwɔ na jɛ? 21Erenasi, manka akɔ yist asɔmɔ ka nsang agu ya agɔggɔ ɛsa tɛtɛ eto.”
Jisɔs arag ateb Nfiba mbu
(Mat 7:13,14,21-23)
22Ka Jisɔs amo ka atakpa baka na akokomo bɛjɛbɛ, akpene sa ajɔ amo ya Jɛrusalɛm. 23Nnɛ abɔmmɛ, “Ntaa, anɛ kɛm ba nanting ba asɔ?”
Atɔ mbɔ, 24“Balɔg ka etingitingi esing ka nfiba mbu ɛnam, nɔngɔ ntɔ war, ateb ebe, alɔglɔg sa anam ka amam anam. 25Ngara yi mfɔna nju atam a agbanga mbu, eyimi kifi ɛkar, ɛgɔrɔ, ‘Ntaa, ribi warr mbu.’
“Ka yɛ akpɛ, ‘Mmɛ war nyim ka mgbɛrɛ mfo bi eru.’
26“Ka war ɛragsi, ‘Warr ɛjɔ ɛnɛ ɛwɔ nana, okpene ka aba ɛyɛrɛ.’
27“Ka yɛ akpɛ, ‘mmɛ war nyim ka mgbɛrɛ mfo bi eru. Ba kɛm ɛyagha, war ba ene abibi afɛ!’
28“Ka banan na ɛkɛghɛ aman ɛjɔjɔ, ngara yi ɛyɛ Abraam, Asik na Jɛkɔb na abono Ɔsɔwɔ wɔɔ ka etek Ɔsɔwɔ, ka warafɔnɔ kanna ɛjɔm. 29Anɛ aru ka bɔsɔmfa na nɛsɛrɛmfa, ɔbɔ ɔka na ɔbɔ bunu, ama jɔ nji ayighi ka etek Ɔsɔwɔ. 30Kɛdɛdɛghɛ anɛ arere bantingi ba akannjam agbɔghɔmba, ka ba agbɔmba akannjam.”
Jisɔs akagha Jɛrusalɛm
(Mat 23:37-39)
31Ka ngara yi Bafarisi bantingi amo akɔrɔ Jisɔs atɔɛ “Tam fa sɔng mfo bintingi. Ɛrɔd asɛb sa ayonna.”
32Jisɔs akpɛ, “Sɔng tɔ nnɛ ɔwa yɔ, ‘Nkama abibi atughu, ntab anɛ ɛnɛji na ɛwana, ka afo asa nkan na noto ɛnaa.’ 33Nsɛrɛnsɛrɛ sɛ ɛjɔ, ngɔm nomogho ɛnɛji na ɛwana na ɛtɔɔngɔ ofo, kɛdɛdɛghɛ abono Ɔsɔwɔ wɔɔ akpɔghɔ ka Jɛrusalɛm.
34“O war anɛ ba Jɛrusalɛm, war etobbo abono Ɔsɔwɔ ba ato akɛ war atan eyon, ebe ngara nlɔg si mbono war nasi nkana nkɔk akongo abɔ a nkɔk ka akpɔngkpɔng ɛyɛ, ka war eritama! 35Yɛ, Ɔsɔwɔ atɛn war na ɛjɛbɛ ɛjɛrɛ. Nɔngɔ mmɛ ntɔ war, mɛkpɛmmɛ yɛ tɛtɛ ɛragsi, ‘Ɛnara ɛjɔ ɛkɛ nnɛ ya aba ka mbeng a Ntaa.’ ”
अहिले सेलेक्ट गरिएको:
Luk 13: NDD Nta
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
©️2022 Luke Initiative for Scripture Translation