ယဟ 5

လွင် ဒူအီ ဆဝ် ကွယ် ဘာင် အိုမ် ဒိုင်

1ဝါယ် အန် တီ ဇဝ် ယေဆူ ဟာဝ် ဟုဝ့် မိူင် ယေရူဆာလဲမ်၊ တဲး အန် လိုပ် ဘ့လွယ် ပီ ဘူင် ဂေ ဒူအီ အာယူဒါ။ 2ခဲင် မိူင် ယေရူဆာလဲမ် ယီ မိုဝ်း အိုမ် ဒိုင် ပီ ဘူင် ဒူအီ။ န့ ကွယ် ကာတတ် မာလုဝ်း အီ စိူဝ် မာလုဝ်း မာဘူ။ ခဲင် ဂြုဝ်း ဟဲဘြဲ အိုမ် ဒိုင် တီ၊ အန် စိူဝ် ဘေတ်ဆေဒါ။ ဒီ ခူပ် အိုမ် ဒိုင် တီ န့ မိုဝ်း ဇေရူပ် ဖန် ကာတု။ 3-4ခဲင် ဇေရူပ် တီ န့ မိုဝ်း ဒူအီ ဆဝ် ကိူန် ကာဆဝ်။ ဘော မုး ဒူအီ ငါယ် အပ်၊ ဒူအီ အီ တူ ပွိုန် ဟာဝ် ဘော ဒူအီ ယမ် ဘ့လာက်၊ ဂေ ကိူန် ကွယ် ဒီ ခူပ် အိုမ် တီ။ မင် ဇေန့် မင် ဇေန့်၊ န့ မိုဝ်း အာမူ အာမာတ် ဇဝ်ဖြာ တး လိုပ် ခဲင် အိုမ်၊ ဘူင် တဲး အိုမ် ရ်ု။ ဒေါ အန် တီ အာဆေ ပွိုန် ဒီ လိုပ် ဒီ အာတ့် အီ ဟဝ်၊ အန် ဝီ ကဲန် အူ ဇေန့်။ အန် ဘော မိုဝ်း ဆဝ် မျုဝ် မှဝ်၊ န့ ဒီ ဟြာယ်။ ခုဝ်၊ ဂေ ဒူအီ ဆဝ် ကိူန် ကွယ် ဒီ ခူပ် အိုမ် တွိုန်၊ နှဝ့် တဲး န့ ရ်ု။ 5န့ ယီ မိုဝ်း ဒူအီ ဆဝ် အူ ဝီ၊ အန် အိတ် ဒီ ခူပ် အိုမ် တွိုန် အာဒါ အူယ် ဂိုဝ် ဒီ ဒါ ဆီနမ်။ 6ဒေါ ယိုဝ် ဇဝ် ယေဆူ ဒူအီ တီ၊ အန် ဟဲ့ နပ် လွင် ဒူအီ တီ ဟဲ့ ကွယ် လှေန့်။ အန် ဝီ ဒီမွှတ် တဝ်း၊ “မဲ ဆီ တဲး မဲ ကဲန်။း”

7ဒူအီ ဆဝ် တီ ဝီ တဝ်း၊ “အိုယ် ဆာရာ၊ အာဝ် မိုဝ်း အာဆေ အီ စွယ် အုဝ် လိုပ် ခဲင် အိုမ် ဒေါ ရ်ု အိုမ်။ ဒွန် ဇေန့် ဒွန် ဇေန့် ဒေါ ဇမ် အုဝ် ခဲင် အိုမ်၊ ဟဲ့ ဟွတ့် မိုဝ်း အီ ဒန် လိုပ် ဒီ အာတ့် အုဝ်။”

8ဇဝ် ယေဆူ ဝီ တဝ်း ဒီ အန်၊ “မဲ ယိတ့်၊ ဒိုဝ်း ဂူင့် မ့ဘေ၀် မဲ၊ ဝီ ဟာဝ်။” 9ပန် တီ ဒူအီ ဆဝ် တီ ဟဲ့ ကဲန် အူ ဇေန့်။ အန် ဝီ ဒိုဝ်း ဂူင့် မ့ဘေ၀် အန်၊ ဝီ ဟာဝ်။

ဆီငဲ တီ ယီ မုး ဆီငဲ ဒီလှဝ်။ 10ခုဝ်၊ ဂေ ဒါ တာင် ယူဒါ၊ ဂေ ဝီ တဝ်း ဒီ ဒူအီ အီ ဟဲ့ ကဲန် တွိုန်၊ “အာတိုဝ် မုး ဆီငဲ ဒီလှဝ်။ ဒါရာ တူ တဲး မဲ ဂူင့် မ့ဘေ၀်။”

11အန် ဝီ တဝ်း ဒီ ဂေ၊ “ဒူအီ တွိုန်၊ အီ ဟဲ့ ပီကဲန် အုဝ်၊ အန် ဟဲ့ တဝ်း ဒီ အုဝ်၊ ‘ဒိုဝ်း ဂူင့် မ့ဘေ၀် မဲ၊ ဝီ ဟာဝ်။’”

12ဂေ ဝီ ဒီမွှတ် တဝ်း၊ “အာဆေ ဟဲ့ စ်ု မဲ တဝ်း၊ ‘ဒိုဝ်း ဂူင့် မ့ဘေ၀် မဲ၊ ဝီ ဟာဝ်။း’”

13အီ ဟဲ့ ဝီ ကဲန် တွိုန်၊ အန် ယီ တူ နပ်၊ အာဆေ ဟဲ့ ပီကဲန် အန်။ ဒေါ တူ ယိုဝ် ဂေ၊ ဇဝ် ယေဆူ ဟဲ့ ဟာဝ် ပေါ ပ့လုဝ့် ကူပ် မိုဝ်း ဒူအီ ကိူန် ဒူင် ကွယ် ဂေ တွိုန်။

14ဝါယ် အန် တီ ဇဝ် ယေဆူ ဝီ ဟာဝ် ခဲင် ဟုဝ် ဇဝ်ဖြာ၊ ဝီ ကာတုန့် ဒူအီ အီ ဟဲ့ ကဲန်။ ဘော အန် ဟဲ့ တး ကွယ် ခဲင် ဟုဝ် ဇဝ်ဖြာ။ ဇဝ် ယေဆူ ဝီ တဝ်း ဒီ အန်၊ “မဲ ဟဲ့ ကဲန်။ ဆိန့် ဒေါ တီ နီ၊ ကွဲ့ ဟူ ဘူင် မှာပ်၊ ကွဲ့ တဲး မဲ ဇမ် ဒုက် အီ တာင် လွှိုမ် ခါ အာတ့်။” 15ပန် တီ ဒူအီ တွိုန် ဝီ လေး ခဲင် ဟုဝ် ဇဝ်ဖြာ၊ ဝီ ခဲ ဒီ ဂေ ဒါ တာင် ယူဒါ တွိုန်၊ န့ မုး ဇဝ် ယေဆူ၊ အီ ဟဲ့ ဘူင် တဲး ဆဝ် အန် ဟြာယ်။

လွင် အာဆာက် ကာမာယ်

16ကူပ် ဘူင် ဇဝ် ယေဆူ ဇိုဝ် တီ ဒေါ မုး ဆီငဲ ဒီလှဝ်၊ ဂေ ဒါ တာင် ယူဒါ ဝီ ဘဲန် ရန်ဆူ အန်။ ဂေ တဝ်း ဒီ ငဝ်း အာဆာက် အန်။ 17ဇဝ် ယေဆူ ယီ တဝ်း ဒီ ဂေ၊ “ကော ဇမ် အာတိုဝ်၊ ဂုန့် အုဝ် ဟဲ့ ဘူင် ဂါန် အန် ဆေဆေ။ ပါယ် တီ ဘော အုဝ် ဘူင် ဂါန် ပီ လုဝ် အုဝ် ဘူင်။” 18ကူပ် ကာလာင် အန် ဂြုဝ်း တီ၊ ဂေ ဒါ တာင် ဒူအီ အာယူဒါ ဝီ ဝဲ ဆီ ငဝ်း ဝဲန် ဇဝ် ယေဆူ။ ခုဝ်၊ အန် ဟဲ့ ဘူင် ဂါန် ပီ တူ ကာအာပ် ဘူင် ဆီငဲ ဒီလှဝ်။ ဒဲင် တီ အန် မိူဝ် ဟဲ့ တဝ်း၊ ဇဝ်ဖြာ မုး ဂုန့် အန်။ န့ ပီ၊ အန် ဟဲ့ တဝ်း၊ ဘော အန် မုး ဇဝ်ဖြာ။

19ခုဝ် အန် တီ ဇဝ် ယေဆူ ဝီ တဝ်း ဒီ ဂေ၊ “အုဝ် တဝ်း အာခ်ု ဒီ ဘေ။ ဆေ န့ မုး ဂွန်၊ အန် တူ ပဲ ဒီ ဘူင် မာဆေ ရာင် အန်။ အန် လုဝ် ယွတ် ဂုန့် အန်။ ခဲ့ ယိုဝ် အန် ပီ ဘူင် ဂုန့် အန်၊ ဘော ဂွန် အန် နပ် ဒီ ဘူင်။ 20န့ ပါယ် တီ၊ ကူပ် ရွက့် ဂုန့် ဒီ ဂွန် အန်၊ အန် မိူဝ် ဘျ ဒီ ဂွန် အန် ဒွန် မျုဝ် ခဲ့ ပီ ဘူင် အန်။ ဘေ ယီ ဒီ အာမ် ကူပ် ဟဲ့ တဲး ဇဝ်ဖြာ အုဝ် ဘူင် နာ မွှိုမ် အာမ် လွှိုမ် ပဲ့ ဟဲ့ ယိုဝ် ဘေ။ 21ဇဝ်ဖြာ နပ် ဒီ ဘူင် တဲး ဒူအီ ယမ် ဝီ ယိတ့် ဝီ အိမ်။ ပါယ် တီ ဘော ဂွန် ဇဝ်ဖြာ ဒီ တဲး ဒူအီ ယမ် ဝီ အိမ်။ အာဆာက် ကာမာယ် တီ၊ အန် မိူဝ် ဒီ ဒွါ ဒီ ဒူအီ ပီ ဆီ ဒွါ အန်။ 22ဒဲင် တီ၊ ဇဝ်ဖြာ တူ ဒမ် မှာပ် ဒီ အာဆေ။ အန် ဟဲ့ တဲး ဂွန် အန် ဝီ ဒမ် မှာပ် ဒီ ဒွန် အီ။ 23ဇဝ်ဖြာ ဟဲ့ ဘူင် ပါယ် တီ၊ တဲး ဒွန် အီ ရုဝ်ဆေ ဘော ဂွန် အန်၊ တဲး န့ ပီ ဂေ ရုဝ်ဆေ ဇဝ်ဖြာ၊ အီ ဟဲ့ စ်ု ဂွန် အန် လူင် ဒဲင် ကာဒါယ်။ အာဆေ တူ ရုဝ်ဆေ ဂွန် ဇဝ်ဖြာ၊ အန် မိူဝ် တူ ရုဝ်ဆေ ဂုန့် အန်။

24အုဝ် တဝ်း အာခ်ု ဒီ ဘေ။ အာဆေ ထူမ် ဂြုဝ်း အုဝ် ဘော ညှိုမ် ဇဝ်ဖြာ အီ ဟဲ့ တိုယ် အုဝ် တဲး အုဝ် တး ဒူင် ကွယ် ဘေ၊ ဒူအီ တီ ဟဲ့ ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။ အန် မိူဝ် တူ လုဝ် ခမ် မှာပ် အန်။ အန် အာဝ် ဟူ လုဝ် ယမ်။ အန် ဟဲ့ ဟွတ့် ပွိုန် အာဆာက် ကာမာယ်။ 25အုဝ် ဘော တဝ်း အာခ်ု ဒီ ဘေ။ န့ ဒီ မိုဝ်း အာခြာဝ် ဒီ တး။ မာလဲ၊ ဒေါ တီ နီ ဟဲ့ ဟွတ့် တး။ ဂေ ဒူအီ အီ ပီ ဒူအီ ယမ်၊ ဂေ ဒီ ထူမ် ဂြုဝ်း ပီ ကာလာင် ဂွန် ဇဝ်ဖြာ။ အာဆေ ယီ ထူမ် ဂြုဝ်း တီ၊ အန် ဒီ မိုဝ်း အာဆာက် ကာမာယ်။ 26ကူပ် မိုဝ်း ဇဝ်ဖြာ အာဆာက်၊ အန် ဟဲ့ ဝီ ဒွါ အာဆာက် အန် ဒီ ဂွန် အန်၊ တဲး ဘော ဂွန် အန် မိုဝ်း အာဆာက် ပီ ဒွါ ဇဝ်ဖြာ။ 27ဇဝ်ဖြာ ဘော တဲး ဂွန် အန် ပွိုန် ဒီ ဒမ် မှာပ် ဒီ အီ ကူပ် ဟဲ့ ဘဲန် အန် ဂွန် ဒူအီ။

28ကွဲ့ တဲး ဘေ အာမ် ဂြုဝ်း အုဝ် တီ။ န့ ဒီ ဇမ် အာခြာဝ် ဒီ ထူမ် ဂေ ဒူအီ အီ ကွယ် ခဲင် ဘာရေဝ် ဒီ ဂြုဝ်း အုဝ်။ 29ပန် တီ ဂေ ဒီ ဘော လေး ခဲင် ဘာရေဝ်။ အာဆေ ဟဲ့ ဒွိုမ် ဘူင် နာ ဘွတ်၊ အန် ဒီ ဝီ ယိတ့် ဝီ အိမ်၊ ဝီ မိုဝ်း အာဆာက် ကာမာယ်။ အာဆေ ယဲ့ ဟဲ့ ဒွိုမ် ဘူင် နာ တူ မွှိုမ်၊ အန် ဒီ ဝီ ယိတ့် ဝီ အိမ်၊ တဲး အန် ခမ် မှာပ် အန်။ 30အုဝ် အူ ဝီ တူ ပွိုန် ဘူင် မာဆေ။ အုဝ် မိူဝ် ထူမ် ခဲ့ ပီ ကာလာင် ဇဝ်ဖြာ ဒီ အုဝ်။ ဟဲ့ ဟွတ့်၊ အုဝ် ဝီ ဒမ် မှာပ် ဒီ အီ ခဲ့ တီ။ ပီ ဒမ် အုဝ် ဟဲ့ ကာငျာ ကူပ် တူ ဒူပ် အုဝ် နဝ်း အုဝ်။ အုဝ် ဒူပ် ပီ အိုင် ဇဝ်ဖြာ၊ အီ တိုယ် အုဝ် တး ဒီ နီ။”

လွင် အီ ဘဲန် ဆက်ဆေ ဇဝ် ယေဆူ

31ဇဝ် ယေဆူ ဝီ တဝ်း၊ “ဆေ အုဝ် ကာလာင် လွင် အုဝ်၊ အာဝ် မိုဝ်း ဒီခုဝ်။ 32န့ မိုဝ်း ပေါ အူ ဝီ အီ ဘဲန် ဆက်ဆေ လွင် အုဝ်။ အုဝ် မိူဝ် နပ်၊ ပီ တဝ်း အန် ဟဲ့ မှာန်၊ ဟဲ့ မုး။ 33ဘေ ဟဲ့ ဒီမွှတ် ဒါ ဆာရာ အာယောဟာန် တွိုန်၊ တဲး အန် ကာလာင် ဒီ ဘေ လွင် အုဝ်။ ပီ ကာလာင် အန် ဟဲ့ မှာန်။

34မာလဲ၊ အုဝ် တူ လုဝ် အာဆေ ဘဲန် ဆက်ဆေ လွင် အုဝ်။ အုဝ် ယီ ကာလာင် လွင် အီ ဘဲန် ဆက်ဆေ တီ ဒီ ဘေ၊ တဲး န့ ချွတ် ဘေ။ 35ဒါ ဆာရာ အာယောဟာန် တွိုန်၊ အန် ပီ ဘ့လာင် ငဝ် အွမ် အီ တဲး န့ ဘ့လာင် ဒီ ဘေ။ ဘေ မိူဝ် ဟဲ့ အိုင် ဘ့လာင် တီ အာဒါ အူ ကာစန်။

36န့ ယီ မိုဝ်း အီ ဘဲန် ဆက်ဆေ လွင် အုဝ် အီ ဆီ တာင် လွှိုမ် ဒါ ဆာရာ အာယောဟာန် တီ။ န့ မုး ပီ ဘူင် အုဝ်။ န့ မုး ဂါန် ဒွန် မျုဝ် ပီ တဲး ဇဝ်ဖြာ အုဝ် ဘူင် ဟွတ့်။ ဒွန် မျုဝ် ပီ ဘူင် အုဝ် တီ၊ န့ ဘျ ဒီ ဘေ လွင် အုဝ်။ န့ မုး ဂါန် ပီ ဘူင် အုဝ် အီ တဲး ဘေ နပ် ဆီချာ လွင် ဇဝ်ဖြာ ဟဲ့ တိုယ် အုဝ် တး ဇမ် ဒူင် ကွယ် ဘေ။ 37ဘော ဇဝ်ဖြာ အီ ဟဲ့ တိုယ် အုဝ် တး ဇမ် ဒူင် ကွယ် ဘေ၊ အန် ဟဲ့ ကာလာင် လွင် အုဝ်။ ဘေ ယီ တူ ဒွိုမ် ယိုဝ် ဂြုဝ်း အန်၊ တူ ဒွိုမ် ယိုဝ် အာရိုပ် အန်။ 38ဘော ဂြုဝ်း ဇဝ်ဖြာ တူ ကွယ် ခဲင် နဝ်း ဘေ။ ခုဝ်၊ ဘေ တူ ညှိုမ် ဝီ ပီ တိုယ် ဇဝ်ဖြာ တး ဇမ် ဒူင် ကွယ် ဘေ။ 39ဘေ အွန် ဒီ ဟေန် ဘပ် ဇဝ်ဖြာ ကူပ် ထာင် ဘေ ဂြုဝ်း ပီ ဒဲမ် အုန် ခဲင် ဘပ် ဇဝ်ဖြာ ဒီ စွယ် ဘေ တဲး ဘေ ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။ န့ ယီ မုး ဘပ် ဇဝ်ဖြာ တီ၊ အီ တဲး ဘေ နပ် လွင် အုဝ်။ 40ဘေ ယီ တူ ဆီ ညှိုမ် အုဝ်။ ဘေ တူ ဆီ တဲး အုဝ် ပွိုန် ဒီ ဒွါ အာဆာက် ကာမာယ် ဒီ ဘေ။

41အုဝ် တူ လုဝ် အီ ဟဝ် အိူပ် အုဝ်။ 42အုဝ် ယီ နပ် နဝ်း ဘေ။ ဘေ တူ ရွက့် ဇဝ်ဖြာ ခဲင် နဝ်း ဘေ။ 43အုဝ် ဟဲ့ တး ဇမ် ဒူင် ကွယ် ဘေ ကူပ် စ်ု ဇဝ်ဖြာ အုဝ် တး။ ဘေ ယီ တူ ညှိုမ် အုဝ်။ ဆေ န့ ယီ မိုဝ်း ဒူအီ ပေါ အူ ဝီ အီ တး ဇမ် ဒူင် ကွယ် ဘေ ရာင် အန်၊ ဘေ ဒီ ဘော ညှိုမ် အန်၊ ရွုး အန်။ 44ဆေ ဘေ အိုင် ဒီ လာယ် အိူပ် ကာတဲ ဘေ၊ ယီ တူ လုဝ် ဇဝ်ဖြာ အူ ကာဒင် အိူပ် ဘေ၊ ဘေ တူ ပွိုန် ညှိုမ် ဇဝ်ဖြာ ဒေါ မှဝ်။

45ဘေ ကွဲ့ ထာင် အုဝ် ဒီ ဖျာက် ဘေ၊ တဝ်း ဒီ ဇဝ်ဖြာ လွင် တူ မွှိုမ် ဘေ။ န့ မုး ဒါ ဆာရာ အာမုဝ်ဆဲ တွိုန်၊ အန် နပ် ဒီ ဖျာက် ဘေ၊ တဝ်း ဘေ မိုဝ်း မှာပ်။ ဘေ ယီ ဘိုင် အန်။ 46ဆေ ဟဲ့ မှာန် ညှိုမ် ဘေ ဂြုဝ်း ပီ ဒဲမ် အုန် ဒါ ဆာရာ အာမုဝ်ဆဲ၊ ဘေ ဒီ ဘော ညှိုမ် အုဝ်။ ခုဝ်၊ အန် ဟဲ့ ဒဲမ် လွင် အုဝ် ခဲင် ဘပ် အန်။ 47ဘေ ယီ တူ ညှိုမ် ပီ ဒဲမ် အုန် အန်။ ခုဝ်၊ ဘေ မိူဝ် တူ ပွိုန် ညှိုမ် ဂြုဝ်း ပီ ကာလာင် အုဝ် ဒီ ဘေ။”

अहिले सेलेक्ट गरिएको:

ယဟ 5: pce

हाइलाइट

शेयर गर्नुहोस्

कपी गर्नुहोस्

तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्

Palaung, Ruching Bible बारे थप जान्नुहोस्