လက် 20

လွင် ပွုန် ဇဝ် ယေဆူ

1န့ ယီ ဇမ် အူ ဆီငဲ၊ ဇဝ် ယေဆူ မာနုဝ် ဂေ ဒူအီ ခဲင် ဟုဝ် ဇဝ်ဖြာ၊ ကာလာင် လွင် အီ ဒီ တဲး နဝ်း ဒူအီ ဒါခိုယ်။ ဒေါ အန် တီ ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ ဘော ဂေ ဒါ ဆာရာ အီ မာနုဝ် ဒါရာ ယူဒါ ဘော ဂေ ဒါ တာင် အီ အိုပ် မိူင်၊ ဂေ ဟဲ့ တး တဝ်း ဒီ အန်၊ 2“တဲး မဲ ကာလာင် ဒီ ယေ၊ ပွုန် အာဆေ မဲ ဒိုဝ်း၊ ဘူင် ပီ ဘူင် မဲ ဒွန် မျုဝ်။း အာဆေ ဟဲ့ ခ့ဝါင် မဲ ဘူင် ပါယ် တီ။း ကာလာင်၊ တဲး ယေ နပ် လွင် အန် တီ။”

3ဇဝ် ယေဆူ ဝျီ့ ဂြုဝ်း ဂေ တဝ်း၊ “ဘော အုဝ် ဒီ ဝီ ဒီမွှတ် ဘေ အူ မျုဝ်၊ တဲး ဘေ ဝီ ကာလာင် ဒီ အုဝ်။ 4ပီ ဘူင် ဒါ ဆာရာ အာယောဟာန် အီ စိုပ် ဒူအီ ခဲင် အိုမ်၊ န့ မုး ဇဝ်ဖြာ အီ တဲး အန် ပွိုန် ဒီ ဘူင် ပါယ် တီ။း ဆေ အာဝ် ပါယ် တီ၊ န့ မုး ဒူအီ၊ အီ စ်ု အန် ဘူင်။း”

5ပန် တီ ဂေ ဒူအီ တွိုန် ဝီ လာယ် ဆင်ချာင် ကာတဲ ဂေ။ ဂေ တဝ်း၊ “အေ ဒီ ဝီ တဝ်း ဒီ အန် မာဆေ။း ဆေ အေ တဝ်း၊ န့ မုး ဇဝ်ဖြာ အီ တဲး အန် ပွိုန် ဒီ ဘူင် ပါယ် တီ၊ အန် ဘော နပ် ဒီ ဒီမွှတ် အေ၊ ‘မှဝ် န့ ပါယ် ပီ တူ ညှိုမ် ဘေ အာယောဟာန် တွိုန်။း’ 6ဆေ အေ ယီ တဝ်း၊ ဒူအီ ဟဲ့ တဲး အန် ပွိုန် ဘူင်၊ ဂေ ဒူအီ အီ ကွယ် ဒီ နီ ဒွန် အီ၊ ဂေ ဒီ ဘော ဒိုဝ်း မာဝ် ဝိုန့် ယမ် အေ။ ခုဝ်၊ ဂေ ဟဲ့ ညှိုမ် ဆီချာ၊ ဒါ ဆာရာ အာယောဟာန် မုး ဒူအီ အီ ဘျာန် ဂြုဝ်း ဇဝ်ဖြာ။”

7ပန် တီ ဂေ ဝီ တဝ်း ဒီ ဇဝ် ယေဆူ၊ “ယေ တူ နပ် အာဆေ ဒွါ ပွုန် ဒီ ဒါ ဆာရာ တွိုန်။”

8ဇဝ် ယေဆူ ဝီ တဝ်း ဒီ ဂေ၊ “ဆေ န့ ပါယ် တီ၊ ဘော အုဝ် တူ ကာလာင် ဒီ ဘေ၊ အာဆေ ဟဲ့ ဒွါ ပွုန် ဒီ အုဝ်၊ တဲး အုဝ် ဘူင် ဂါန် အုဝ်။”

လွင် ဒူအီ ခါတ် ဒီ ရန့် မာန် မာငုန်

9ဝါယ် အန် တီ ဇဝ် ယေဆူ ကာလာင် အူဖာမာ ဒီ ဒူအီ။ အန် တဝ်း၊ “န့ ဒွိုမ် မိုဝ်း ဒူအီ အူ ဝီ၊ အန် ဟဲ့ ဘူင် မာန် မာငုန်။ ဟဲ့ ဟွတ့်၊ အန် တဲး ဒူအီ ဟဝ် ခါတ် ဒီ ရန့်။ ဝါယ် အန် တီ အန် လေး ဟာဝ် မိူင် ဟဝ်၊ ကွယ် လှေန့် ခဲင် မိူင် တီ။ 10ဒေါ ဟဲ့ ဇမ် အာခြာဝ် ဘ့လေ မာငုန် ဒီ ဆိန်၊ အန် တိုယ် မှာယ် အန် အူ ဝီ၊ တဲး အန် ဟာဝ် ဇမ် ဒူင် ကွယ် ဒူအီ အီ ခါတ် ဒီ ရန့် မာန် အန် တွိုန်၊ တဲး အန် ဒိုဝ်း ဘ့လေ အန် မင် ကာလဝ့်။ ဒူအီ ရန့် မာန် အန် တွိုန်၊ ဂေ ယီ ဝီ မး မှာယ် အန် တွိုန်၊ တဲး အန် ဝေန့်၊ တူ မိုဝ်း ဒီ ဒွါ မာဆေ ဒီ အန်။ 11ပန် တီ အန် ဘော တိုယ် မှာယ် အန် ပေါ အူ ဝီ၊ တဲး အန် ဟာဝ် ဇမ် ဒူင် ကွယ် မာန် အန်။ ဂေ ဒူအီ ရန့် မာန် တွိုန် ဝီ မး ဒူအီ တီ၊ ဘူင် တဲး အန် စှိုမ် ဆာရေ။ ဟဲ့ ဟွတ့် ဂေ တိုယ် အန် ဝီ ဝိဝ်၊ တူ မိုဝ်း ဒီ ဂူင့် မာဆေ။ 12ဟဲ့ ဝီ ဇမ် ဒူင် ကွယ် အန်၊ ဒါ ကာညာ တွိုန် ဝီ တိုယ် မှာယ် အန် ပေါ အူ ဝီ၊ တဲး အန် ဟာဝ် ဇမ် ဒူင် ကွယ် မာန် အန်။ ဂေ ဒူအီ ခဲင် မာန် တွိုန် ဝီ ဘူင် တဲး ဘော ဝီ တီ ဇမ် ဒုက်။ ဂေ ဘော ဆုတ့် အန် လေး ခဲင် မာန်။

13ဝါယ် အန် တီ ဒါ ကာညာ မာန် တွိုန် တဝ်း၊ ‘မာဆေ ပီ လုဝ် အုဝ် ဘူင် ဒေါ တီ နီ။း အုဝ် ဒီ ဘူင် ပါယ် နီ။ အုဝ် ဒီ တိုယ် ဂွန် ပီ ရွက့် အုဝ်၊ တဲး အန် ဟာဝ် ဇမ် ဒူင် ကွယ် ဂေ။ ဂေ ဒီ ဘော ရုဝ်ဆေ အန်။’

14အန် ဟဲ့ ဟွတ့် ဘူင် ပါယ် တီ၊ ဂေ ဒူအီ ရန့် မာန် တွိုန်၊ ဂေ ယိုဝ် ဂွန် ဒါ ကာညာ တွိုန် တး ကာတတ် ဒူင် ကွယ် ဂေ၊ ဂေ ဝီ လာယ် ဆင်ချာင်။ ဂေ တဝ်း၊ ‘နီ၊ ဒူအီ တီ၊ အန် ဒီ ပ့လု ဂုန့် အန်။ တဲး အေ ငဝ်း ဝဲန် အန်။ ဟဲ့ ဟွတ့်၊ အေ ဒီ ပွိုန် ခါဂုန် အန်။’ ဂေ ဟဲ့ ဟွတ့် လာယ် ဆင်ချာင် ပါယ် တီ၊ 15ဂေ ဘော ဆုတ့် ကာတဝ် ဒူအီ တွိုန် လေး ခဲင် မာန်၊ ငဝ်း ဝဲန် အန်။”

ပန် တီ ဇဝ် ယေဆူ ဝီ တဝ်း၊ “မာဆေ ပီ ထာင် ဘေ၊ ဒူအီ အီ မုး ဒါ ကာညာ မာန် တွိုန်၊ မာဆေ ပီ ဒီ ဘူင် အန် ဒီ ဒူအီ အီ ရန့် မာန် အန် တွိုန်။း 16အန် ဒီ တး ဇမ် ဒူင် ကွယ် မာန် အန်၊ ငဝ်း ဝဲန် ဂေ ဒူအီ ရန့် မာန် အန် တီ။ ဟဲ့ ဟွတ့်၊ အန် ဘော ဒဲ့ ဒူအီ ဟဝ်၊ တဲး ဂေ ဝီ ရန့် မာန် အန် တီ၊” ဂေ ဒူအီ ထူမ် ဂြုဝ်း ဇဝ် ယေဆူ တီ၊ ဂေ ဝီ တဝ်း၊ “ကွဲ့ တဲး န့ ဘဲန် ပါယ် တီ ဒေါ မှဝ်။”

17ဇဝ် ယေဆူ ယီ ယွတ် ဂေ။ အန် ဘော တဝ်း ဒီ ဂေ၊ “မှဝ် န့ ပါယ် ပီ ဒဲမ် အုန် ခဲင် ဘပ် ဇဝ်ဖြာ၊

‘မာဝ် ပီ ဝဲန် ဂေ ဒူအီ ဆမ် ကာင်၊ အန် ဟဲ့ ဘဲန် စေန့် ရွင့်။’

18အာဆေ ကာပုဝ့် မာဝ် တီ၊ အန် ဒီ ကေး၊ ဒီ ကာဘက် လိုဝ်။ ဆေ မာဝ် တီ စုဝ်း ဒဲင် ဒူအီ၊ ဒူအီ တီ ဒီ ကာမုန် လိုဝ်၊ ဘဲန် ပီ ကာပုး။”

19ဂေ ဒါ ဆာရာ အီ မာနုဝ် ဒါရာ ယူဒါ ဘော ဂေ ဒါ တာင် အီ ယဲတ့် ဂေ ဒူအီ အီ လှူ ဒီ ဇဝ်ဖြာ၊ ဂေ ဆီ မှေတ့် ဇဝ် ယေဆူ ဒေါ ကာလာင် အန် ဂြုဝ်း တီ။ ဂေ နပ်၊ အန် ကာလာင် အူဖာမာ တီ လွင် ဂေ။ ဂေ ယီ တူ ယ မှေတ့် အန် ကူပ် ယုဝ် ဂေ ဒူအီ ကိူန်။

လွင် ရွိုန် စိုင်

20ဂေ ယီ ဘ်ု ဒီ ယွတ် ဇဝ် ယေဆူ၊ တဲး ဂေ ပွိုန် ဒီ မှေတ့် အန်။ ဂေ မိူဝ် ဇာင် ဒူအီ၊ တဲး ဂေ ညိုင်ရာင် ဒီ ဘဲန် ဒူအီ ဘွတ်၊ တဲး ဂေ တး ဒီမွှတ် ဒွန် မျုဝ် ဒီ ဇဝ် ယေဆူ၊ တဲး ဂေ နပ် ဒီ ကာယွင့် အန်၊ ပွိုန် ဒီ အာပ် အန် ဒီ ဒါ တာင် အီ အိုပ် မိူင်၊ တဲး အန် ဆုင်ဖျာတ် ဒါရာ ဒီ ဇဝ် ယေဆူ။ 21ဂေ ဒူအီ တွိုန် ညိုင်ရာင် ဒီမွှတ် ဇဝ် ယေဆူ။ ဂေ တဝ်း၊ “အိုယ် ဒါ ဆာရာ၊ ယေ ဟဲ့ နပ်၊ မဲ ကာလာင် ဂြုဝ်း ဆိူဝ်။ မဲ ဘော မာနုဝ် ဒူအီ၊ တဲး န့ မှာန်။ မဲ တူ ရွက့် တူ ဇွင့် အာဆေ။ မဲ မာနုဝ် ဒွန် အီ လွင် ဇဝ်ဖြာ၊ တဲး န့ ဆိူဝ် တဲး န့ မှာန်။ 22တဲး မဲ ကာလာင် ဒီ ယေ၊ ဆေ ယေ ဒွါ ရွိုန် စိုင် ဒီ ခုန်ဒီခမ် အာကဲဆာ၊ န့ ဒူပ် တူ ဒူပ် ဒါရာ ဇဝ်ဖြာ။း”

23ဇဝ် ယေဆူ ဟဲ့ နပ်၊ ဂေ ဟဲ့ ညိုင်ရာင် ဒီ ဒီမွှတ် ဂြုဝ်း တီ။ 24အန် ဝီ တဝ်း ဒီ ဂေ၊ “တဲး ဘေ ဘျ ဒီ အုဝ် ရွိုန် အူ ဘူင့်၊ တဲး အုဝ် ယွတ် ဆီချာ။ အာရိုပ် အာဆေ န့ မုး ဒဲင် ရွိုန် နီ။း စိူဝ် အာဆေ ဟဲ့ ဒဲမ် အုန် နာ ဒဲင်။း”

25ဂေ ဒူအီ တွိုန် ဝီ တဝ်း ဒီ အန်၊ “န့ မုး အာရိုပ် ဘော စိူဝ် အာကဲဆာ တွိုန်။” ပန် တီ ဇဝ် ယေဆူ ဝီ တဝ်း ဒီ ဂေ၊ “ခဲ့ ပီ လုဝ် ဘေ ဒွါ ဒီ အာကဲဆာ၊ တဲး ဘေ ဒွါ။ ခဲ့ ပီ လုဝ် ဘေ ဒွါ ဒီ ဇဝ်ဖြာ၊ တဲး ဘေ ဘော ဒွါ ဒီ အန်။”

26အန် ဟဲ့ ဟွတ့် ကာလာင် ပါယ် တီ၊ ဂေ ဒူအီ တွိုန် ယီ အာမ် လွင် ပီ ကာလာင် အန် ဒီ ဂေ။ ဂေ မိူဝ် တူ ပွိုန် ဒီ ကာယွင့် အန် ဒီ အာတ့် ဂေ ဒူအီ ကိူန် တွိုန်။ ဟဲ့ ဟွတ့်၊ ဂေ တူ ဝီ တဝ်း မာဆေ။

လွင် ဒူအီ ယမ် ဝီ ယိတ့် ဝီ အိမ်

27ဝါယ် အန် တီ ဂေ ဒူအီ ခဲင် ဖိုင် ဆာဒူခဲ၊ ဂေ တး ဇမ် ဒူင် ကွယ် ဇဝ် ယေဆူ။ ဂေ မုး ဖိုင် ဒူအီ အီ တဝ်း၊ ဆေ ဒူအီ ဟဲ့ ဟွတ့် ယမ်၊ ဂေ တူ ပွိုန် ဝီ ယိတ့် ဝီ အိမ်။ ဂေ ဒူအီ ဇိုဝ် တီ၊ ဂေ တး ဒီမွှတ် အန် တဝ်း၊ 28“အိုယ် ဒါ ဆာရာ၊ ဒါ အာမုဝ်ဆဲ ဟဲ့ ဒဲမ် အုန် ဒါရာ ဇဝ်ဖြာ တဝ်း၊ ‘ဆေ အီမာယ် အူ ဝီ ယမ် အာတ့် ယမ် အီဘိုန့် အန်၊ ဆေ အန် ညှမ် မိုဝ်း ဂွန်၊ ဝါ အန် ဘော လုဝ် လာယ် ယာ ဆီပြး တီ၊ တဲး အန် ဒွါ လှုက်လှာန် ဒီ အီကတ် အန်။’ 29ခါ အာတ့် န့ ယီ ဒွိုမ် မိုဝ်း ဂေ အူကတ် အူဝါ ဘူ ဝီ။ ဝီ တာင်၊ အန် ဟဲ့ ခတ် ဒိုဝ်း အီဘိုန့်။ အန် ယီ ယမ် ဒေါ ညှမ် မိုဝ်း အန် ဂွန်။ 30ပန် တီ ဝါ အန် ဘော ခတ် ဒိုဝ်း အီဘိုန့် တွိုန်။ ဘော အန် ဝီ ယမ် ဒေါ ညှမ် မိုဝ်း အန် ဂွန်။ 31ဟဲ့ ဟွတ့် ဝါ ပေါ အူ ဝီ ဝီ ခတ် ဒိုဝ်း အီဘိုန့် တွိုန်။ ဘော ဒွန် အီ ဟဲ့ ဘဲန် ပါယ် တီ။ ဂေ အူကတ် အူဝါ ဘော ဘူ ဝီ၊ ဒွန် ဝီ ခတ် ဒိုဝ်း အီဘိုန့် အူ ဝီ တီ။ ဟဲ့ ဟွတ့်၊ ဂေ ယမ် ဒေါ တူ မိုဝ်း ဂေ ဂွန်။ 32ဝါယ် အန် တီ အီဘိုန့် တွိုန် ဘော ယမ်။ 33ဆေ ဟီ ဇမ် ဆီငဲ ဒီ ဝီ ယိတ့် ဝီ အိမ် ဂေ ဒူအီ ယမ်၊ အီဘိုန့် တွိုန် ဒီ ဘဲန် အီဘိုန့် အာဆေ ခဲင် ဂေ ဒူအီ ဘူ ဝီ တွိုန်၊ အီ ဟဲ့ ဒွိုမ် ဘဲန် အီမာယ် အန်။း”

34ဂေ ဟဲ့ ဟွတ့် ကာလာင် ပါယ် တီ၊ ဇဝ် ယေဆူ ဝီ တဝ်း ဒီ ဂေ၊ “ဒူအီ ဇာတ် နီ ဂေ ဒီ လာယ် လာယ်၊ လာယ် ဘူင် ခတ်။ 35ဂေ ဒူအီ၊ ဝါယ် ဟဲ့ ဝီ ယိတ့် ဝီ အိမ်၊ ဂေ အီ ပွိုန် ဒီ ကွယ် ဇာတ် ဒီ တး၊ ဂေ အာဝ် ဟူ မုး အာမျုဝ် ဒူအီ အီ လာယ် လာယ်။ ဂေ ဟူ လာယ် ခတ်။ 36ဂေ မိူဝ် အာဝ် ဟူ ယမ်။ ဂေ ဒီ ပီ အာမူ အာမာတ် ဇဝ်ဖြာ။ ဂေ ဘော မုး ဂွန် ဇဝ်ဖြာ အီ ဟဲ့ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ်။ 37လွင် ဂေ ဒူအီ ဒီ ဝီ ယိတ့် ဝီ အိမ် ဝါယ် ဟဲ့ ဟွတ့် ယမ်၊ န့ ဘော ဟဲ့ ကာလာင် ဆီချာ ခဲင် ဘပ် ဇဝ်ဖြာ ပီ ဒဲမ် ဒါ အာမုဝ်ဆဲ။ ဒေါ လေး ငဝ် ခဲင် ယွုန် တွိုန်၊ ဒါ အာမုဝ်ဆဲ ဟဲ့ တဝ်း လွင် ဇဝ်ဖြာ၊ အန် မုး ဇဝ်ဖြာ ပီ ကြိုပ် အာဘြာဟမ် ဘော အာဆဲက် ဘော အာကူပ်။ 38ဒေါ တဝ်း အန် ပါယ် တီ၊ န့ ပီ အန် ဟဲ့ တဝ်း၊ ဇဝ်ဖြာ မုး ဇဝ်ဖြာ ပီ ကြိုပ် ဒူအီ အိမ်။ အန် ဇဝ် တူ မုး ဇဝ်ဖြာ ပီ ကြိုပ် ဒူအီ ယမ်။ န့ မိုဝ်း မီ ဂေ ဒူအီ အိမ် အီ ပွိုန် ကြိုပ် ဇဝ်ဖြာ။ ဂေ ဒူအီ ဇိုဝ် တီ ဒွန် အီ၊ ဂေ ဘောကာဂ့လျီတ် ဟဲ့ ဝီ ယိတ့် ဝီ အိမ်၊ ကွယ် ဒီ အာတ့် ဇဝ်ဖြာ။”

39ဂေ ဒါ ဆာရာ အီ မာနုဝ် ဒါရာ ဇဝ်ဖြာ မင် အီ၊ ဂေ ယီ တဝ်း၊ “အိုယ်၊ မဲ ဒါ ဆာရာ၊ မဲ ဟဲ့ ကာလာင် ဂြုဝ်း မှာန် လွင် အန် တီ။” 40ဂေ တဝ်း ပါယ် တီ၊ ကူပ် တူ ယ ဒီမွှတ် ဂေ ဇဝ် ယေဆူ ပေါ န့ ပွါ။

လွင် အန် ဇဝ် အီ ချွတ် ဒူအီ

41ဇဝ် ယေဆူ ဝီ တဝ်း ဒီ ဂေ၊ “မှဝ် န့ ပါယ် ပီ တဝ်း ဂေ ဒူအီ၊ အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ အန် မုး လှုက်လှာန် ခုန်ဒီခမ် အာဒါဝိတ် တွိုန်။း 42ခဲင် ဘပ် ဇဝ်ဖြာ၊ န့ မုး အာဒါဝိတ် တွိုန်၊ အန် ဟဲ့ ဒွိုမ် ကာလာင် လွင် အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ အန် တဝ်း၊

‘ဇဝ်ဖြာ ဟဲ့ ဒွိုမ် ကာလာင် ဒီ ဒါ ကာညာ အုဝ်၊ တဲး မဲ တုတ့် ဒီ ခူပ် အုဝ်၊ ဘ့လာက် အာအး အုဝ်၊

43တဲး န့ ကော ဇမ် အာခြာဝ် ဒီ တဲး အုဝ် မဲ ညဲတ့် တူတ့် ရန်ဆူ မဲ။’ 44ခုန်ဒီခမ် အာဒါဝိတ် ဟဲ့ တဝ်း လွင် အန် ဇဝ် ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ၊ အန် မုး ဒါ ကာညာ အီ အိုပ် အာဒါဝိတ်။ ခုဝ်၊ အာဝ် ပွိုန် တဝ်း၊ အန် မုး လှုက်လှာန် အာဒါဝိတ်။”

45ဒေါ ထူမ် ဂေ ဒူအီ ဒွန် အီ ဂြုဝ်း တီ၊ ဇဝ် ယေဆူ ဝီ တဝ်း ဒီ ဒီဘဲ အန်၊ 46“ဘေ လုဝ် ဆာဒိက် ဂေ ဒါ ဆာရာ အီ မာနုဝ် ဒါရာ ဇဝ်ဖြာ။ ဂေ အိုင် ဒီ စှိုပ် ခြိုင် စှိတ်။ ဂေ ဘော အွန် ဒီ ဝိန် ဒီလဲ၊ တဲး ဒူအီ ခဲင် ကာလး ကြိုပ် ဂေ။ ဆေ ဂေ လိုပ် ခဲင် ဇူင် ကြိုပ် ဂေ ဒူအီ အာယူဒါ ဇဝ်ဖြာ၊ ဆေ ဒူအီ ဟဝ် ဘော ဘာင် ဂေ ဟူမ် ခဲင် ကာင် ဂေ၊ ဂေ အိုင် ဒီ ကွယ် ဒူင် စာ။ 47ဂေ ဘော လွှက့် ဒီ ကာလာင် ဂြုဝ်း တဲး ဂေ ပွိုန် ကာင် ဂေ ယာ ဆီပြး။ ဂေ ဘော ညိုင်ရာင် ဆာခိုဝ် လှေန့်၊ တဲး ဒူအီ ယိုဝ် ဂေ။ ဂေ အီ ဘူင် ပါယ် တီ၊ ဂေ ဒီ လုဝ် ခမ် မှာပ် ဂေ လွှိုမ် ဒူအီ ဟဝ်။”

अहिले सेलेक्ट गरिएको:

လက် 20: pce

हाइलाइट

शेयर गर्नुहोस्

कपी गर्नुहोस्