Mataayo 6
6
Okusakira bhatobhu
1“Mwangarire! Mwasiga okukora amangʼana amajomu mu-meeso ga abhaanu, insonga bhabharore, kwa okubha mukakora kutyo, mutakunyoora muyeero okusooka kw-Isomwana unu ari mu-rwire.
2“Mmbe, awe ukasoosha omugabho, okusakira abhatobhu, waasiga okubhuma ekombi nuuraashaga kinu waakora, rwa kutyo bhanu abhaaika ganu bhatakukora, abhakora mu-masunagoogi, na ku-njira, insonga abhaanu bhabhakumangye. 3Kimari enibhabhwira ati, bhaamarire okunyoora omuyeero gwebhwe ku-bhaanu. Nawe awe ukasakira omutobhu, okubhoko kwawo kwa ebhumosi kwasiga okumenya kinu okubhoko okuryo okusoosha, 4insonga obhusakisi bhwawo ubhumenye awe era. Ukakora kutyo, Esomwana unu kaarora ganu geeyibhisire kaakwongesisha.”
Okusaasaama Nyamuwanga
(Ruuka 11:2-4)
5“Na mwasiga okusaasaama Nyamuwanga rwa abhaanu bhanu abhakora ku-nsonga ya abhaanu era. Abheene bheendere okusaasaama bhayambaaye mu-masunagoogi na ku-njira gya amakaaka insonga abhaanu bhabharore na bhabhakumangye. Kimari enibhabhwira ati, bhaamarire okunyoora omuyeero gwebhwe. 6Tari awe ukeenda okusaasaama, ingira mu-kyumba kyawo wiigare orwigi, ukamara okwigara orwigi rwawo, usaasaame kw-Isomwana unu atakurorwa. Ukakora kutyo, Esomwana unu kaarora ganu geeyibhisire kaakwongesisha.
7“Mwasiga okusaasaama mwaikaga kinu mutakumenya musubhiirishaga gayogayo era, rwa abhaanu bhanu bhatakwikirisha Nyamuwanga, kwa okubha abheene abhatoga ati abhaaja okunyoora kinu abhasabha okuturira ku-bhwafu bhwa amangʼana geebhwe. 8Mwasiga okusaasaama rwa bhayo, kwa okubha Esomwana amenyere ganu omukena, mukyari na kumusabha. 9Mmbe woori, mukabha musaasaama, museetega ekirengekanyo kinu ati,
‘Raata unu uri mu-rwire,
riisiina ryawo rigungibhwe.
Na obhukama bhwawo bhuuje.
10Ganu oweenda, gakuumishwe mu-kyaro anu,
rwa kutyo agakuumira mu-rwire.
11Ukiyaane ebhyokurya bhyeswe ku-nsiku.
12Ukyabhire ebhikayo bhyeswe,
rwa kutyo eswe kyone ekyabhira bhanu abhakikayira.
13Kweki Raata, waasiga okukingisha mu-masakyo.
Nawe ukyerushe okusooka ku-mukayi.
[Kwa okubha, obhukama, amanaga na obhugungyo ni bhyawo, akajaanende koone kutyo.
Amina!]’”
14Yeesu ˆnaagenderera okwaika ati, “Raabhe mukaabhira abhaanu ebhikayo bhwebhwe, Esomwana unu ari mu-rwire, kaaja okubhaabhira emwe mwone. 15Nawe raabhe omurema okwabhira abhaanu ebhikayo bhyebhwe, Esomwana unu ari mu-rwire woone ataribhaabhira ebhyemwe.”
Okwiyima ebhyokurya
16“Na mukeeyima ebhyokurya, mwasiga okusurumbara rwa abhaanu bhanu abheeyima ebhyokurya, ku-nsonga ya abhaanu era. Abheene abhasurumbara kutyo insonga abhaanu bhabharore ati bheeyimire ebhyokurya. Kimari enibhabhwira ati, bhaamarire okunyoora omuyeero gwebhwe. 17Nawe awe ukeeyima ebhyokurya, iiyosha obhusu bhwawo kujomu, wiiyake na amafuta mu-mutwe, 18insonga abhaanu bhaasiga kumenya ati wiiyimire ebhyokurya. Tari Esomwana unu atakurorwa, niwe amenye era. Esomwana uyo kaarora ganu abhaanu abhakora bhwiyibhise, uyo niwe kaaja okukwongesisha.”
Obhuniibhi
(Ruuka 12:33-34, 11:34-36, 16:13)
19“Mwasiga okwibhiikira ebhiinu mu-kyaro anu, anu amasiribhi na obhukerebheeye obhubhinyamura, na bheefi abheengira mu-nyumba anu bhituuywe, insonga bhabhiibhe. 20Tari mwibhiikire ebhiinu bhyemwe mu-rwire enu amasiribhi na obhukerebheeye bhitakubhinyamura na abheefi bhatakwingira-yo okubhiibha. 21Mukore kutyo, kwa okubha anu owubhiika ebhiinu bhyawo, niwe na omutima gwawo guribha.
22“Eriiso niryo intara ya omubhiri. Raabhe eriiso ryawo erirora kujomu, omubhiri gwawo gwone kutyo ogubha na obhweru. 23Nawe, ameeso gaawo gakabha mawofu, omubhiri gwawo gwone ogubha guweereeye mu-kisuute. Mmbe raabhe omubhiri gwawo gukabha kisuute, ekisuute kiyo ni kinene muno!
24“Atariwo muunu unu kaatura okukorera bheesebhugenyi bhabhiri emirimu kw-ibhaga rimwi. Akakora kutyo, kaatura okubhiiyirirwa owumwi ˆneenda owundi, amwi ati kaagwatana na owumwi ˆnaajeera owundi. Mutakutura okukorera Nyamuwanga emirimu, muringiiyega na ebhiinu bhyemwe kw-ibhaga rimwi riyoriyo!”
Mwasiga okunyankirira obhwagasi bhwa ebhiinu
(Ruuka 12:22-31)
25“Mmbe woori, enibhabhwira ati, mwasiga okunyankirira obhurame bhwemwe ati omuuja okuryaki, amwi ati omuuja okunywaki. Na emibhiri gyemwe ati omuuja okufwaraki. Angu obhurame bhutakukira ebhyokurya, na omubhiri gutakukira gingibho? 26Muringire giinyonyi. Gitakuyamba, gitakugesa, na gitari na kitara ati egibhiika-mo ebhyokurya. Nawe, Esomwana wa mu-rwire, kaagigabhisha. Angu emwe, mutari na kibharo kinene kukira giinyonyi giyo? 27Kw-imwe ni wuuya kaatura okwinyankirira ˆneeyongesha nsa yimwi era, eya okurama kwaye mu-kyaro anu?#6:27 ˆNeeyongesha nsa yimwi era, eya okurama kwaye mu-kyaro anu. Insonga eyindi eyitura okubha ati, obhureera bhwaye amwi ati kubhoko kumwi.
28“Kubhaki omunyankirira obhufwafi bhwa gingibho? Muringire kutyo amawuuwa ga iibhara agamera. Gatakukora mirimu gyonegyone, na gatakwibhariirira. 29Enibhabhwira ati, omukama Seremaani ku-bhugungyo bhwaye bhwone kutyo, ꞉ataafwaye kujomu rwa amawuuwa gayo! 30Mmbe, raabhe Nyamuwanga kaafwafya kutya amanyansi ga iibhara, ganu gariwo reero era, katondo ngeeswa mu-muriro, angu, atakutura okubhafwafya, emwe abhaanu bha obhwikirisha obhutooto?
31“Mmbe woori, mwasiga okunyankirira ati omuryaki, omunywaki amwi ati omufwaraki. 32Amangʼana gayo, nigo aganyansha abhaanu bhanu bhatakwikirisha Nyamuwanga. Mwasiga okuganyankirira kwa okubha Esomwana unu ari mu-rwire amenyere ati omugakena. 33Tari mwagare okwamba obhukama bhwa Nyamuwanga na okukora amarengeresi rwa kutyo omwene keenda. Agandi gayo goone kutyo, omwene aribhoongesisha. 34Mwasiga okunyankirira aga katondo, kwa okubha giinyanko gya katondo ni gya katondo eyeene. Ginsiku gyone kutyo giisirwe na iinyanko yaagyo eya orusuku.”
अहिले सेलेक्ट गरिएको:
Mataayo 6: kya
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2023, Wycliffe Bible Translators, Inc. All rights reserved