Matta 2
2
Ji-lele dɨ basa fɨlatɨ fəre
1Beetɨ ite mye mwasa Yesu a vor Betalami a njiya Yawudiya, a nzata həmɨn Hiridus, ji-naa haa ka lele a nə tyekəli pwatə a dɨma dɨ basa fɨlatɨ fəre a shi vor Urshelima. 2Təna ɗi le atɨ, “A ndo haa gə nzaa mya mwasa? Sɨnə həme da Yawude, gəkɨlə hin naa tikɨlə pwatə dan a basa fɨlatɨ fəre, hina ɓə shi gə hina kalan-gbəətə.”
3Ite həmɨn Hiridus a kɨl ləngɨn, ləngɨn a hasən kɨr-kɨr kat ka myee a vor Urshelima. 4Nda waga kɨsehəmi kpan-kpanye kat ka ji-lee kəndə ɓashita Musa a ɗiyərən lə haa mye ɓa mwasa Ma Həmɨnpwa a Yaɓwarən də. 5Təna san atɨ, “A vor Betalami a njiya Yawudiya.” Gəkɨlə sə kpale a doro atɨ,
6“ ‘Hye Betalami a njiya Yawudiya,
hye aa vɨra swati
a haka mi kpan-kpani Yawudiya,
gə dɨ vorsa a makpanə
ɓa dɨma,
sɨnə ɓa gəə majinə
myee de a mi Israila.’#2.6 Naasə: Mika 5.2. ”
7Hiridus a waga ji-leləngɨn a haa ɓotə gə təna boyən ka haa ya tikɨləngɨn a dɨma. 8Nda lyentɨrən a Betalami a sarən atɨ, “Wudəm, ɨləm ɓuk-ɓuk haa nzəngɨn a gə də, hwun kana nan, hwuna mɨna asɨ boyi, gə hɨn mgban na wudə a kalan-gbəətə.”
9Tən ɓe kɨl la həmɨn a boyo, təna kɨt tɨfe a muɗə, tikɨla təna nan dɨ fɨlatɨ fəre mgban a luworən kwamətə baa a dɨ kangə pwatɨ nə haa nze a gə də. 10Ite təna naa tikɨləngɨn, təna ɗa hanɨngtə kɨr-kɨr. 11Tən ɓe pɨrə vor hwoɗye, təna naa nzəngɨn ka nuwogən Maryamu, təna gyerə a kalan-gbəətə. Təna wana gbɨre gɨnətɨ darən a vən həmtɨ dyamse ka tatute ka pom ɨ ɨhɨng-ɨhɨnge ka mɨni maara mya dɨ ɗərdən ka taa kpan mya wa atɨ mərtə. 12Mya gɨratɨrən a vor jiritə atɨ ɓe tənaa mɨnə dɨ haka Hiridus, sə mgban təna koɗə a tɨfə som a mɨnə njiya darən.
Yə sɨnggə Yesu a muɗə kan a Ijip
13Beetɨ ite ji-leləngɨn muɗə, malyene da Həmɨmiye a dɨma ka Yusufu a vor jiritə a san atɨ, “Maɗi nggur nze ka nuwogən, giɓi muɗə njiya Ijip. Hye nza də a zə fəra na səw atɨ ɗaka hangɨn də, gəkɨlə Hiridus nee ɓa ɨl nze gə nda ɓɨltən.” 14Yusufu a maɗə a nggur nze ka nuwogən ka tukotə a muɗə njiya Ijip, 15a hangɨn nda nza baa we da Hiridus. Angɨn a ɗaasə gə la Həmɨmiye a boyo dɨ kwaamɨ kpale a naa atɨ, “Dɨ vor njiya Ijip na wa nze de.”#2.15 Naasə: Hosaya 11.1.
16Ite Hiridus a leyə atɨ ji-leləngɨn bɨlən kuta muɗə, nda ɗa muune kɨr-kɨr, nda hiwa atɨ a mya ɓəl ji moryee kat a vor Betalami ka ji-vɨree takadə 'ye kyawasərən kpe janga. Nda kana kyawatɨ jingɨn kɨsatə dɨ fəra ji-leləngɨn a boyən lə tikɨla təna nan də. 17Də ləma mya boyo dɨ kwaamɨ kpale Jerimaya a naa mgban atɨ,
18“Mya kɨla korme
a vor vɨra Ramah,
kawatə ka kehee,
Rahila nə dɨ təwi kehee gəkɨlə jingrə,
nggaa mwa atɨ mya talarə
gəkɨlə jingrə 'ye yə tamdə.”
Mɨnatə a Nazarat
19Beetɨ we da Hiridus, malyene da Həmɨmiye a dɨma ka Yusufu a vor jiritə a njiya Ijip 20a san atɨ, “Maɗi, nggur nze ka nuwogən, mɨnə njiya Israila gəkɨlə myee dɨ ɨli atɨ təna ɓɨl nze mbərə.”
21Nda maɗə a nggur nze ka nuwogən təna mɨnə njiya Israila. 22Ite nda kɨlə atɨ Akilawus nə həme a njiya Yawudiya, a mbwayi baagən Hiridus, kala a gən ka zətə. Beetɨ ite malyene a gɨrarən a vor jiritə, nda ɗɨrə dɨ njiya Galili. 23A hangɨn nda nza vor vɨraa Nazarat gə la mya boyo dɨ kwaamɨ kpalye a naa atɨ, “Mye ɓa warən atɨ nzə-Nazaratə.”
अहिले सेलेक्ट गरिएको:
Matta 2: bcy
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.