Matai 6
6
Nanxin Kunlade Ogiku
1"Ta gouni giekude xioxin giezhi kunlai melie uzheghane giezhi bu gie. Qingiezhi giese asiman jieredu tai Adase yama jianli jienlie dane. 2Chi nanxin kunlade ogikude jiazhon giesan kunla mutun bu gie. Hhela goyane kuaighane giezhi huitan, geidoude fugiede tunguliene. Bi tande shuhua kielieye, hhelade jianli ijin ogiwo. 3Chi nanxin kunlade ogikude borun kha giesei soghei khade bu mejiegha. 4Chi ogisanne kunlade bu mejiegha. Beichazide uzhesan Adachii tande jianli ogine."
Onxian Gieku
5"Ta onxian giekude jiazhon giesan kunla mutun bu gie. Hhela kunlade uzheghane giezhi huitan, shizilukoude beidene onxian giekude xiqi wo. Bi tande shuhua kielieye, hhelade jianli ijin ogiwo. 6Ta onxian giekude giedera orodene wijienyi khadene beichazide bisan Adasene onxian gie. Beichazide uzhesan Adachii jianli ogine. 7Ta onxian giekude niman kunla mutun touchan erchanji yama isi witu kielienyi bu kielie. Hhela sumulase ologhan kieliese chenliemu giezho. 8Ta hhela mutun bu gie. Ta xiahua gieku melie ta yan keresei Adatai mejiene."
Ezhan Sughasan Onxian
(Luj 11:2-4)
9"Ingiese ta ingiezhi onxian gie,
'Asiman jieredu mai Ada,
chi nierene zhiguishigha.
10Chii gojiai iregha.
Chi isine asiman jiere mutun
zemin jiere chenjigha.
11Niudunieku ijiuni enedu bijiende ogi.
12Bijiende codasan kunlai bijien rouliesan mutun
bijien codasei roulie.
13Bijienyi shiikude bu echighazhi
Ibilisii khase khizhegha.
Gojia, qienli, famashi chanqi chinughun wo. Amine!'
14Kunla codasei ta rouliese asiman jieredu Adataiye tai rouliene. 15Kunla codasei ta ulie rouliese asiman jieredu Adataiye tai ulie rouliene."
Orozo Bareiku
16"Ta orozo bareikude jiazhon giesan kunla mutun uxinne bu bougha. Hhela orozo bareisei kunlade mejieghane giezhi guyide ghuniraku yanzi khizheghane. Bi tande shuhua kielieye, hhelade jianli ijin ogiwo. 17Chi orozo bareikude qiorunne sanlazhi nune waghadene 18orozo bareisei kunlade bu chujiegheghazhi beichazide bisan Adadene uzhegha. Ingiese beichazide uzhesan Adachii chade jianli ogine."
Boubeini Asiman Jiere Sunji
(Luj 12:33-34)
19"Goyadene oluzhi boubeini zemin jiere bu sunji. Zemin jiere ghughei ghazhazhi xiuqirane. Ghughei nudurun waizhi ghulane. 20Boubeini asiman jiere sunji. Asiman jiere ghughei ghazha dane, ulie xiuqirane. Ghughei nudurun waizhi ghula dane. 21Chii boubei khalashi zhughechiiye khala wo."
Beyeni Zhula
(Luj 11:34-36)
22"Nudunchiishi beyeni zhula wo. Nudunchii goushi beyechii man gieghan wo. 23Nudunchii gou wise beyechii man khara wo. Chii sudorodu gon kharashi hhe kharani zhengiejia fugie wo. 24Kienliuzhe ghua ezhanni shunji dane. Ene niede henjise hhe niede orene. Ene niede gundushi hhe niede gongien wo. Ta Huda baer ghualai hhantu shunji dane."
Munan Bu Gie
(Luj 12:22-31)
25"Ingiese bi tande kielieye, ta amindene oluzhi yan ijiene, ochine giezhi munan bu gie. Beyedene oluzhi yan musine giezhi munan bu gie. Amin ijiekuse zhunyo uwonu? Beye musikuse zhunyo uwonu? 26Ta asiman jieredu bunzhulai nie sumula, hhela ulie tareine, ulie ghurane, cankude ulie sunjine, tai asiman jieredu ada hhelai qiezhene. Ta bunzhulase zhunyo uwonu? 27Tani dunda kien zhughe chilakughala aminne niecha fududagha shidane? 28Musikude yangiezhi munan giezho? Ta banche jieredu baihe chizhe matugie osisei nie sumula, hhela ulie khishilane, bosiye ulie giene. 29Bi tande kielieye, Sulumane honshan zui henni xienzide musisanla ene nie chizhede ulie kurune. 30Ta goude xianxin ulie giechen kunla, banche jieredu osun enedu wine, maghashijie luzide teiliuzhe Huda dou ingiezhi dabalaghazho. Tai qingie ulie gienu? 31Ingiese, 'Ta yan ijiene? Yan ochine? Yan musine?' giezhi zhughe bu chila. 32Enelashi man niman kunla xiahua giekuni wo. Asiman jieredu Adatai tande enezighan chaisanlai man mejiene. 33Ta xien Hudai gojia, hhei gundanni xiahua gie, ingiese enelai man tande ogine. 34Ingiese ta maghashijiekude munan bu gie. Maghashijiekude maghashijie munan giekui wine. Niuduku chijiani niudushi kuruzho."
अहिले सेलेक्ट गरिएको:
Matai 6: sce
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
© 2020-2024 River Street Publishing.