Markos 6
6
Awan Tinanggap ti Jesus ti Nazaret
(Mateo 13:53-58; Lukas 4:16-30)
1Limmakad ti Jesus ti Capernaum sakay simmole siya tu sadile na a banuwan kaguman u disepulus na hide. 2Káddemát nu Aldew nu Káimang ay immangay ti Jesus tu sinagoga sakay nagtoldu hod. Kakpalan tu nágsaneg nikuna ay nagtaka hide sakay nagtanungan hide, “Hádya na wád a inalap i karunungan na e? Sakay ánya iye a karunungan a neatád nikuna? Kodya siya a makagimet ti makataka-taka a bagay? 3Awan beman siya u karapintero a anak ni Maria, sakay wadi na di Santiago, Jose, Judas sakay ti Simon? Awan beman u wáwwadi na a bábbey ay hod he a mágyan?” Dipo ti itod ay umád de a maniwala nikuna sakay binadit-badit de siya.
4Dipo ti iye ay kinagi nide ni Jesus, “U essa a prupeta ay igalang maskin hádya, liban la tu kabanuwan na hide, u kapartidu na hide, sakay u kabilay na hide.” 5Itod u dahilan ni bakin awan siya nakagimet tu makataka-taka a bagay ti itod, liban la tu sasangan a te saket a pinatungan na tu kamát na sakay pinagpiyya. 6Nagtaka siya dipo umád de a maniwala nikuna.
Inutusan ni Jesus u Sapulo ay ti Duwwa a Disepulus
(Mateo 10:5-15; Lukas 9:1-6)
Linebut ni Jesus u babaryo tu palebut sakay tinolduwan na u tagahod hide. 7Dinulaw na u disepulus na hide a sapulo ay ti duwwa sakay inutusan na hide ti tágdaduwwa. Inatádden na hide ti kapangyariyan a magpalayas ti mágkadukás a ispirito, 8sakay binilinan na hide a, “Dyan kam magtawed ti maskin ánya man, liban la tu sahukod. Diyan kam magbilon, maski ni pággasákkan oni pilak. 9Maare kam a magsulot ti sinelas, pero diyan kam magtawed ti paglewasan moy.”
10Kinagi na be nide, “Ni pinatulos dikam tu essa a bilay ay mágyan kam hod mentras awan kam lumakad ti itod a banuwan. 11Ni umád dikam a tanggapán oni awan kam sanigán nu tolay hide tu essa a lugar ay lumakad kam hod sakay ipagpag moy u alikabuk tu tikád moy, tanda itod a parusaan hide nu Diyos tu awan de pánniwala nikam.”
12Kanya naglakad ngani u sapulo ay ti duwwa a disepulus sakay nagtoldu hide tu tolay hide, a dapat de a pagsisiyan u kasalanan de. 13Pinalakad de u mágkadukás hide a ispirito tu tolay hide a sináddáp ni mágkadukás a ispirito; pinahidan de be ti langis u makpal a te saket sakay nagpiyya hide.
U Kákkatay ni Juan a Mágbautismo
(Mateo 14:1-12; Lukas 9:7-9)
14Nadid ay nabaheta ni Hare a Herodes u tungkul ni Jesus, dipo kilala dán siya nu makpal a tolay. Tehhod be a magkagi a ti Juan a Mágbautismo ay nabiyag a huway kaya makagimet ti Jesus ti makataka-taka a bagay. 15U akala nu agum ay ti Elias siya. Sakay kinagi be nu iba, “Prupeta siya, a konna tu prupeta hide tu itod.”
16Nikuna masaneg iye ni Herodes ay kinagi na, “Siya ti Juan a pinaputol ko ti ulo. Nabiyag siya a huway.” 17Mismo a ti Herodes u nangpadakáp sakay nángpekulung ni Juan dipo tu kagustuwan ni Herodias. (I bábbiyan iye ay inagew ni Herodes sakay pinakasalan na maski kabanga siya nu kapatkákka na a ti Felipe) 18Dipo palagi a kákkagiyan tu itod ni Juan ti Herodes a, “Labag tu batas a kagumanán mo u kabanga nu kapatkákka mo!” 19Sakay dipo ti iye, nagkim-kim ti iyamut ti Herodias ni Juan sakay gusto na siya a ipabuno. Pero awan na itod magimet 20dipo tukoy na a manteng ti Herodes ni Juan. Kilalanán nu hare a malinis a tolay ti Juan, sakay pilitán na a awan siya mepahamak. Gugustu na a mágsaneg ni Juan maski ni makabalisa nikuna u itáttoldu ni Juan.
21Pero dimmemát labe u pagkakataun ni Herodias a pabuno ti Juan tu káddemát nu aldew nu kákkeenak ni Herodes. Naghanda ti Herodes ti makpal a makan sakay inimbitaan na u upisyales nu sundalo hide, sakay katoy bi hod u mágkayaman hide ti Galilea. 22Nikuna simmáddáp u anak a bábbey ni Herodias sakay nagsayaw ay nasaya a tahod ti Herodes sakay u bisita hide, kanya kinagi nu hare tu madiket a, “Agidán mo nikán u maski ánya a gusto mo ta iyatád ko.” 23Impananto na pa tu madiket a iyatád na maski u kalahate pa nu kahariyan na ni sa itod u agidán na.
24Pákkasaneg hod nu madiket ay limmuwas siya sakay tinanung na u ina na ni ánya u agidán na. Kanya kinagiyan siya nu ina na a agidán na u ulo ni Juan a Mágbawtismo.
25Kanya nagalalisto a simmole u madiket tu kán Hare a Herodes sakay kinagi na, “U gustu ko ay iyatád mo nikán nadid be u ulo ni Juan a Mágbawtismo a keddátton tu essa a penggan.” 26Tu pákkasaneg hod nu hare ay tunay u lungkut na, pero dipo nagpananto siya tu atubang nu bisita na hide ay awan siya maka-adi tu madiket. 27Kanya pagdaka a inutusan ni Herodes u essa a sundalo a iyangay na nikuna u ulo ni Juan. Simmunud ngani u sundalo sakay pinutolan na ti Juan tu disalad nu piresuwan. 28Sakay indátton na tu penggan u ulo ni Juan sakay inyatád na tu madiket. Sakay inyatád bi iye nu madiket tu ina na.
29Nikuna a mabaheta nu alagad hide ni Juan u nangyare ay inalap de u bangkay na sakay inlábbáng de.
U Págpakan tu Limma a Libu
(Mateo 14:13-21; Lukas 9:10-17; Juan 6:1-14)
30Nadid, simmole u disepulus hide a inutusan ni Jesus a nagtoldu, sakay ingkagi de nikuna u atanan a ginimet de sakay u intoldu de. 31Dipo tu kakpal nu tolay a magdemáttan sakay maglakaden ay awan dán hide ti panahun a kuman. Kanya kinagi ni Jesus tu disepulus na hide, “Umangay kitam tu tahimik a lugar para makaimang kam ti sabadit.” 32Kanya simmakay hide tu abang, sakay immangay hide tu tahimik a lugar.
33Pero makpal a naketa tu kállakad de sakay makatukoy ni hádya hide angayan. Kanya u tolay hide a gábwat tu iba-iba a banuwan ay nagginanan a patamo ti lugaran itod sakay nadipalonguwan dipa di Jesus. 34Káawas ni Jesus tu abang ay netan na u tunay ti káppal a tolay. Nahabag siya nide dipo kumán hide a tupa a awan ti pastol, kanya tinolduwan na hide ti makpal a bagay. 35Nikuna a apon dán ay immadene ni Jesus u disepulus na hide sakay kinagi de, “Parang i lugaran iye sakay adene dán a sumahám i aldiwe. 36Palakadán mo dán i tolaye hide para makaangay hide tu babaryo sakay tu banuwan hide para makabale hide ti makan de.”
37Pero kinagi nide ni Jesus, “Hikam u mangpakan nide.”
Timmábbeg u disepulus hide, “Kodya pangpakan miyay nide?” Awan kami ti sapat a pilak a pamale, duwadatos a dinaryu#6:37 U dinaryo ay ngahan nu pilak de tu panahun ni Jesus, u essa a dinaryo ay sapat a suweldu nu essa a aldew a tarabaho tu itod. i kailanganay para mapakan hide a atanan.
38Tinanung hide ni Jesus, “Sangan u tawed moy a tinapay? Sigi ilingán moy ped.”
Inileng de, sakay kinagi de ni Jesus, “Tehhod kitam he a limma a tinapay, sakay ti duwwa a ikan.”
39Sakay inyutus ni Jesus tu disepulus na hide a pággetnudán tu kalamonan ti guru-gurupo u katolayan. 40Kanya nággetnod u tolay hide ti tággi datos sakay ti tággi limma pulo tu kada gurupo. 41Inalap ni Jesus u limma a tinapay sakay tu duwwa a ikan; tummangad siya ti langet sakay nagpasalamat tu Diyos. Káttapos ay hinati-hate na u tinapay sakay inyatád na tu disepulus na hide para iyatád di be tu tolay hide. Konna bi hod u ginimet na tu ikan sakay intagtag dibe. 42Nakakan hide a atanan sakay nabássog, 43sakay nikuna ipunán nu disepulus na hide u nabuhay a tinapay ay ti ikan ay nakaputat pa hide ti sapulo ay ti duwwa a lákba. 44U bilang nu lállake a kinuman ay limma a libu.
Naglakad ti Jesus tu Dibbew nu Dinom
(Mateo 14:22-33; Juan 6:15-21)
45Káttapos ay pinasakay a agad ni Jesus tu abang u disepulus na hide. Pinágdipalongo na hide tu banuwan ni Betsaida, tu dibilew nu minalno, mentaras a pasoliyán na be u tolay hide. 46Nikuna a makalakad dán u tolay hide ay simmangkay siya tu essa a bumábbuked para magdasal.
47Nikuna gibi dán ay hod dán ditaw u abang, sakay mággeessa be ti Jesus tu buked. 48Netan na a mahirapan dán u disepulus na hide tu págbusay, dipo tagbu nide u pahás. Nikuna a magamulaldew dán ay timmagubet nide ti Jesus a maglakad tu dibbew nu dinom. Nikuna a masalinan na u disepulus na hide, 49ay netan di siya a maglakad tu dibbew nu dinom. Tulos hide a pinumákhaw ta akala de ni multo siya, 50Atanan de ay neántingan a tahod, pero agad a kinagi ni Jesus nide, “Diyan kam manteng, Hikán iye! Pabegsákkán moy i isip moye!” 51Simmakay siya tu abang sakay bigla a timmahan u mabegsák a pahás. Sakay nagtaka hide ti husto, 52dipo awan di palla naintendiyan maskin netan di dán u makataka-taka a ginimet ni Jesus tu tinapay; Umád de a maniwala dipo maigát u pusu de.#6:52 Basaán tu Markos 8:17.
Pinagpiyya ni Jesus u te Saket hide ti Genesaret
(Mateo 14:34-36)
53Ummahabes hide ti dibilew sakay káddemát de ti Genesaret ay dummung hide. 54Tu káawas de ay agad a natengge nu taga-hod hide ti Jesus. 55Tunay hide ti bilis a nángbaheta ti iye tu kadatig na hide a banuwan. Inyangay nu tolay hide tu kán Jesus u atanan a te saket a hod tu abák, maskin hadya u páppágyanan na a pakabahetaan de. 56Maskin hádya siya a umangay, tu babaryo, tu banu-banuwan, oni tu buki-buked ay iyangay di nikuna u te saket hide, tu lugar a pagipun-ipunan nu tolay hide. Nákkekagbi hide ni Jesus ani maare ay pakahapán na u kessaket hide maskin u garayan nu damit na. Sakay u atanan nu makakahap ay magpiyya.
अहिले सेलेक्ट गरिएको:
Markos 6: MBJC
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Pahanan Agta New Testament © Philippine Bible Society and Wycliffe Bible Translators, Inc., 2017.
Markos 6
6
Awan Tinanggap ti Jesus ti Nazaret
(Mateo 13:53-58; Lukas 4:16-30)
1Limmakad ti Jesus ti Capernaum sakay simmole siya tu sadile na a banuwan kaguman u disepulus na hide. 2Káddemát nu Aldew nu Káimang ay immangay ti Jesus tu sinagoga sakay nagtoldu hod. Kakpalan tu nágsaneg nikuna ay nagtaka hide sakay nagtanungan hide, “Hádya na wád a inalap i karunungan na e? Sakay ánya iye a karunungan a neatád nikuna? Kodya siya a makagimet ti makataka-taka a bagay? 3Awan beman siya u karapintero a anak ni Maria, sakay wadi na di Santiago, Jose, Judas sakay ti Simon? Awan beman u wáwwadi na a bábbey ay hod he a mágyan?” Dipo ti itod ay umád de a maniwala nikuna sakay binadit-badit de siya.
4Dipo ti iye ay kinagi nide ni Jesus, “U essa a prupeta ay igalang maskin hádya, liban la tu kabanuwan na hide, u kapartidu na hide, sakay u kabilay na hide.” 5Itod u dahilan ni bakin awan siya nakagimet tu makataka-taka a bagay ti itod, liban la tu sasangan a te saket a pinatungan na tu kamát na sakay pinagpiyya. 6Nagtaka siya dipo umád de a maniwala nikuna.
Inutusan ni Jesus u Sapulo ay ti Duwwa a Disepulus
(Mateo 10:5-15; Lukas 9:1-6)
Linebut ni Jesus u babaryo tu palebut sakay tinolduwan na u tagahod hide. 7Dinulaw na u disepulus na hide a sapulo ay ti duwwa sakay inutusan na hide ti tágdaduwwa. Inatádden na hide ti kapangyariyan a magpalayas ti mágkadukás a ispirito, 8sakay binilinan na hide a, “Dyan kam magtawed ti maskin ánya man, liban la tu sahukod. Diyan kam magbilon, maski ni pággasákkan oni pilak. 9Maare kam a magsulot ti sinelas, pero diyan kam magtawed ti paglewasan moy.”
10Kinagi na be nide, “Ni pinatulos dikam tu essa a bilay ay mágyan kam hod mentras awan kam lumakad ti itod a banuwan. 11Ni umád dikam a tanggapán oni awan kam sanigán nu tolay hide tu essa a lugar ay lumakad kam hod sakay ipagpag moy u alikabuk tu tikád moy, tanda itod a parusaan hide nu Diyos tu awan de pánniwala nikam.”
12Kanya naglakad ngani u sapulo ay ti duwwa a disepulus sakay nagtoldu hide tu tolay hide, a dapat de a pagsisiyan u kasalanan de. 13Pinalakad de u mágkadukás hide a ispirito tu tolay hide a sináddáp ni mágkadukás a ispirito; pinahidan de be ti langis u makpal a te saket sakay nagpiyya hide.
U Kákkatay ni Juan a Mágbautismo
(Mateo 14:1-12; Lukas 9:7-9)
14Nadid ay nabaheta ni Hare a Herodes u tungkul ni Jesus, dipo kilala dán siya nu makpal a tolay. Tehhod be a magkagi a ti Juan a Mágbautismo ay nabiyag a huway kaya makagimet ti Jesus ti makataka-taka a bagay. 15U akala nu agum ay ti Elias siya. Sakay kinagi be nu iba, “Prupeta siya, a konna tu prupeta hide tu itod.”
16Nikuna masaneg iye ni Herodes ay kinagi na, “Siya ti Juan a pinaputol ko ti ulo. Nabiyag siya a huway.” 17Mismo a ti Herodes u nangpadakáp sakay nángpekulung ni Juan dipo tu kagustuwan ni Herodias. (I bábbiyan iye ay inagew ni Herodes sakay pinakasalan na maski kabanga siya nu kapatkákka na a ti Felipe) 18Dipo palagi a kákkagiyan tu itod ni Juan ti Herodes a, “Labag tu batas a kagumanán mo u kabanga nu kapatkákka mo!” 19Sakay dipo ti iye, nagkim-kim ti iyamut ti Herodias ni Juan sakay gusto na siya a ipabuno. Pero awan na itod magimet 20dipo tukoy na a manteng ti Herodes ni Juan. Kilalanán nu hare a malinis a tolay ti Juan, sakay pilitán na a awan siya mepahamak. Gugustu na a mágsaneg ni Juan maski ni makabalisa nikuna u itáttoldu ni Juan.
21Pero dimmemát labe u pagkakataun ni Herodias a pabuno ti Juan tu káddemát nu aldew nu kákkeenak ni Herodes. Naghanda ti Herodes ti makpal a makan sakay inimbitaan na u upisyales nu sundalo hide, sakay katoy bi hod u mágkayaman hide ti Galilea. 22Nikuna simmáddáp u anak a bábbey ni Herodias sakay nagsayaw ay nasaya a tahod ti Herodes sakay u bisita hide, kanya kinagi nu hare tu madiket a, “Agidán mo nikán u maski ánya a gusto mo ta iyatád ko.” 23Impananto na pa tu madiket a iyatád na maski u kalahate pa nu kahariyan na ni sa itod u agidán na.
24Pákkasaneg hod nu madiket ay limmuwas siya sakay tinanung na u ina na ni ánya u agidán na. Kanya kinagiyan siya nu ina na a agidán na u ulo ni Juan a Mágbawtismo.
25Kanya nagalalisto a simmole u madiket tu kán Hare a Herodes sakay kinagi na, “U gustu ko ay iyatád mo nikán nadid be u ulo ni Juan a Mágbawtismo a keddátton tu essa a penggan.” 26Tu pákkasaneg hod nu hare ay tunay u lungkut na, pero dipo nagpananto siya tu atubang nu bisita na hide ay awan siya maka-adi tu madiket. 27Kanya pagdaka a inutusan ni Herodes u essa a sundalo a iyangay na nikuna u ulo ni Juan. Simmunud ngani u sundalo sakay pinutolan na ti Juan tu disalad nu piresuwan. 28Sakay indátton na tu penggan u ulo ni Juan sakay inyatád na tu madiket. Sakay inyatád bi iye nu madiket tu ina na.
29Nikuna a mabaheta nu alagad hide ni Juan u nangyare ay inalap de u bangkay na sakay inlábbáng de.
U Págpakan tu Limma a Libu
(Mateo 14:13-21; Lukas 9:10-17; Juan 6:1-14)
30Nadid, simmole u disepulus hide a inutusan ni Jesus a nagtoldu, sakay ingkagi de nikuna u atanan a ginimet de sakay u intoldu de. 31Dipo tu kakpal nu tolay a magdemáttan sakay maglakaden ay awan dán hide ti panahun a kuman. Kanya kinagi ni Jesus tu disepulus na hide, “Umangay kitam tu tahimik a lugar para makaimang kam ti sabadit.” 32Kanya simmakay hide tu abang, sakay immangay hide tu tahimik a lugar.
33Pero makpal a naketa tu kállakad de sakay makatukoy ni hádya hide angayan. Kanya u tolay hide a gábwat tu iba-iba a banuwan ay nagginanan a patamo ti lugaran itod sakay nadipalonguwan dipa di Jesus. 34Káawas ni Jesus tu abang ay netan na u tunay ti káppal a tolay. Nahabag siya nide dipo kumán hide a tupa a awan ti pastol, kanya tinolduwan na hide ti makpal a bagay. 35Nikuna a apon dán ay immadene ni Jesus u disepulus na hide sakay kinagi de, “Parang i lugaran iye sakay adene dán a sumahám i aldiwe. 36Palakadán mo dán i tolaye hide para makaangay hide tu babaryo sakay tu banuwan hide para makabale hide ti makan de.”
37Pero kinagi nide ni Jesus, “Hikam u mangpakan nide.”
Timmábbeg u disepulus hide, “Kodya pangpakan miyay nide?” Awan kami ti sapat a pilak a pamale, duwadatos a dinaryu#6:37 U dinaryo ay ngahan nu pilak de tu panahun ni Jesus, u essa a dinaryo ay sapat a suweldu nu essa a aldew a tarabaho tu itod. i kailanganay para mapakan hide a atanan.
38Tinanung hide ni Jesus, “Sangan u tawed moy a tinapay? Sigi ilingán moy ped.”
Inileng de, sakay kinagi de ni Jesus, “Tehhod kitam he a limma a tinapay, sakay ti duwwa a ikan.”
39Sakay inyutus ni Jesus tu disepulus na hide a pággetnudán tu kalamonan ti guru-gurupo u katolayan. 40Kanya nággetnod u tolay hide ti tággi datos sakay ti tággi limma pulo tu kada gurupo. 41Inalap ni Jesus u limma a tinapay sakay tu duwwa a ikan; tummangad siya ti langet sakay nagpasalamat tu Diyos. Káttapos ay hinati-hate na u tinapay sakay inyatád na tu disepulus na hide para iyatád di be tu tolay hide. Konna bi hod u ginimet na tu ikan sakay intagtag dibe. 42Nakakan hide a atanan sakay nabássog, 43sakay nikuna ipunán nu disepulus na hide u nabuhay a tinapay ay ti ikan ay nakaputat pa hide ti sapulo ay ti duwwa a lákba. 44U bilang nu lállake a kinuman ay limma a libu.
Naglakad ti Jesus tu Dibbew nu Dinom
(Mateo 14:22-33; Juan 6:15-21)
45Káttapos ay pinasakay a agad ni Jesus tu abang u disepulus na hide. Pinágdipalongo na hide tu banuwan ni Betsaida, tu dibilew nu minalno, mentaras a pasoliyán na be u tolay hide. 46Nikuna a makalakad dán u tolay hide ay simmangkay siya tu essa a bumábbuked para magdasal.
47Nikuna gibi dán ay hod dán ditaw u abang, sakay mággeessa be ti Jesus tu buked. 48Netan na a mahirapan dán u disepulus na hide tu págbusay, dipo tagbu nide u pahás. Nikuna a magamulaldew dán ay timmagubet nide ti Jesus a maglakad tu dibbew nu dinom. Nikuna a masalinan na u disepulus na hide, 49ay netan di siya a maglakad tu dibbew nu dinom. Tulos hide a pinumákhaw ta akala de ni multo siya, 50Atanan de ay neántingan a tahod, pero agad a kinagi ni Jesus nide, “Diyan kam manteng, Hikán iye! Pabegsákkán moy i isip moye!” 51Simmakay siya tu abang sakay bigla a timmahan u mabegsák a pahás. Sakay nagtaka hide ti husto, 52dipo awan di palla naintendiyan maskin netan di dán u makataka-taka a ginimet ni Jesus tu tinapay; Umád de a maniwala dipo maigát u pusu de.#6:52 Basaán tu Markos 8:17.
Pinagpiyya ni Jesus u te Saket hide ti Genesaret
(Mateo 14:34-36)
53Ummahabes hide ti dibilew sakay káddemát de ti Genesaret ay dummung hide. 54Tu káawas de ay agad a natengge nu taga-hod hide ti Jesus. 55Tunay hide ti bilis a nángbaheta ti iye tu kadatig na hide a banuwan. Inyangay nu tolay hide tu kán Jesus u atanan a te saket a hod tu abák, maskin hadya u páppágyanan na a pakabahetaan de. 56Maskin hádya siya a umangay, tu babaryo, tu banu-banuwan, oni tu buki-buked ay iyangay di nikuna u te saket hide, tu lugar a pagipun-ipunan nu tolay hide. Nákkekagbi hide ni Jesus ani maare ay pakahapán na u kessaket hide maskin u garayan nu damit na. Sakay u atanan nu makakahap ay magpiyya.
अहिले सेलेक्ट गरिएको:
:
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
Pahanan Agta New Testament © Philippine Bible Society and Wycliffe Bible Translators, Inc., 2017.