تكوين 18
18
رجال تلاتة جوا زيارة
1وَ بَعَدْ دَا، اللّٰهْ بَانْ لِإِبْرَاهِيمْ قَرِيبْ لِلشَّدَرْ الْكُبَارْ هَنَا مَمْرَا. وَ فِي الْوَكِتْ دَاكْ، الْحَرَّايْ حَامِيَةْ وَ إِبْرَاهِيمْ قَاعِدْ فِي خَشُمْ بَابْ خَيْمِتَهْ. 2وَكِتْ رَفَعْ رَاسَهْ، شَافْ تَلَاتَةْ رُجَالْ وَاقْفِينْ قَرِيبْ لَيَّهْ. وَ قَمَّ عَجَلَةْ مِنْ بَابْ خَيْمِتَهْ جَرَى لَاقَاهُمْ وَ سَجَدْ قِدَّامْهُمْ وَ قَالْ لَيْهُمْ: 3«مَرْحَبْ بَيْكُو، كَنْ تَرْضَوْا بَيِّ، مَا تُفُوتُوا. أَلْفَضَّلَوْا فِي بَيْت عَبْدُكُو. 4خَلِّي نِجِيبْ لَيْكُو أَلْمِي أَشَانْ تِغَسُّلُوا رِجْلَيْكُو وَ تِنْجَمَّوْا فِي ضُلّ الشَّدَرَةْ دِي. 5وَ نِجِيبْ لَيْكُو خُبْزَةْ تَاكُلُوا وَ تَشْبَعَوْا وَ بَعَدْ دَا كَمَانْ، تَمْشُوا. أَشَانْ جِيتُوا لَيِّ أَنَا عَبْدُكُو.» وَ هُمَّنْ رَدَّوْا لَيَّهْ: «تَمَامْ! سَوِّي مِثِلْ قُلْتَهْ.»
6خَلَاصْ، إِبْرَاهِيمْ مَشَى عَجَلَةْ لِسَارَةْ فِي الْخَيْمَةْ وَ قَالْ لَيْهَا: «قُمِّي عَجَلَةْ، شِيلِي 10 كَوْرَوْ هَنَا دَقِيقْ السَّمَحْ. عَجِّنِيهْ وَ سَوِّي لَيْنَا خُبْزَةْ.» 7وَ بَعَدْ دَا، إِبْرَاهِيمْ مَشَى عَجَلَةْ فِي الزَّرِيبَةْ وَ عَزَلْ عِجِلْ رَخَصْ وَ سَمِينْ وَ أَنْطَاهْ لِعَبْدَهْ أَشَانْ يِجَهِّزَهْ لَيْهُمْ عَجَلَةْ. 8وَكِتْ اللَّحَمْ نِجِضْ خَلَاصْ، إِبْرَاهِيمْ شَالْ اللَّحَمْ وَ زِبْدَةْ وَ لَبَنْ وَ قَدَّمَهْ لِضِيفَانَهْ. وَ وَكِتْ قَاعِدِينْ يَاكُلُوا، إِبْرَاهِيمْ وَاقِفْ جَنْبُهُمْ فِي قَعَرْ الشَّدَرَةْ.
اللّه قال سَارَة العاقْرة تلْد
9وَ بَعَدْ دَا، سَأَلَوْه لِإِبْرَاهِيمْ: «وَيْن مَرْتَكْ سَارَةْ؟» وَ هُو رَدَّ لَيْهُمْ وَ قَالْ: «هِي قَاعِدَةْ فِي الْخَيْمَةْ.» 10وَ وَاحِدْ مِنْهُمْ قَالْ: «أَكِيدْ أَنَا نِقَبِّلْ لَيْك فِي السَّنَةْ الْجَايَةْ فِي نَفْس الْوَكِتْ وَ نَجِي نَلْقَى مَرْتَكْ سَارَةْ وِلْدَتْ لَيْك وِلَيْد.»
وَ سَارَةْ قَاعِدَةْ وَرَايَهْ فِي خَشُمْ بَابْ الْخَيْمَةْ وَ هِي قَاعِدَةْ تَسْمَعْ فِي كَلَامْهُمْ. 11وَ لَاكِنْ إِبْرَاهِيمْ بِقِي شَايِبْ خَلَاصْ وَ سَارَةْ كُلَ بِقَتْ عَجُوزْ. وَ هِي مَا تَقْدَرْ تَلْدَ. 12وَ مِنْ سِمْعَتْ الْكَلَامْ دَا، قَمَّتْ ضِحْكَتْ وَ قَالَتْ فِي قَلِبْهَا: «أَنَا بِقِيتْ عَجُوزْ وَ سِيدِي كُلَ بِقِي شَايِبْ، هَلْ بَتَّانْ عِنْدِي شَهْوَةْ وَلَّا؟»
13وَ اللّٰهْ قَالْ لِإِبْرَاهِيمْ: «مَالَا سَارَةْ ضِحْكَتْ وَ قَالَتْ: ‹أَنَا الْبِقِيتْ عَجُوزْ مِثِلْ كَيْ، بَتَّانْ نَقْدَرْ نَلْدَ وَلَّا؟› 14فِي شَيّءْ قَاسِي لَيِّ أَنَا اللّٰهْ وَلَّا؟ فِي السَّنَةْ الْجَايَةْ، فِي الْوَكِتْ الْمُحَدَّدْ، أَنَا نَجِي وَ نَلْقَى مَرْتَكْ سَارَةْ وِلْدَتْ لَيْك وِلَيْد.» 15لَاكِنْ سَارَةْ غَالَطَتْ وَ قَالَتْ: «أَنَا مَا ضِحِكْت» أَشَانْ هِي خَافَتْ. وَ هُو قَالْ: «لَا! إِنْتِ ضِحِكْتِ!»
إِبْرَاهِيم سأل اللّه لناس سَدُوم
16خَلَاصْ الرُّجَالْ دَوْل قَمَّوْا وَ وَجَّهَوْا عَلَيْ سَدُومْ وَ إِبْرَاهِيمْ قَمَّ يِعَدِّيهُمْ. 17وَ اللّٰهْ قَالْ: «هَلْ نِلَبِّدْ لِإِبْرَاهِيمْ الشَّيّءْ النِّدَوْر نِسَوِّيهْ وَلَّا؟ 18أَكِيدْ، إِبْرَاهِيمْ يَبْقَى جِدّ هَنَا أُمَّةْ كَبِيرَةْ وَ شَدِيدَةْ وَ نِبَارِكْ كُلَّ أُمَمْ الْأَرْض بِسَبَبْ إِبْرَاهِيمْ. 19أَنَا عَزَلْتَهْ لِيِوَصِّي عِيَالَهْ وَ ذُرِّيّتَهْ لِيِتَابُعُوا دَرِبْ اللّٰهْ وَ يِسَوُّوا الْحَقّ وَ الْعَدَالَةْ. وَ بِمِثِلْ دَا، أَنَا اللّٰهْ نِحَقِّقْ الشَّيّءْ الْقُلْت نِسَوِّيهْ لِإِبْرَاهِيمْ.»
20وَ اللّٰهْ قَالْ لِإِبْرَاهِيمْ: «الشَّكْوَةْ السِّمِعْتَهَا فِي نَاسْ عَمُورَةْ وَ سَدُومْ فَسْلَةْ بِلْحَيْن وَ ذُنُوبْهُمْ بِقَوْا كَتِيرِينْ. 21نِدَلِّي وَ نِشِيفْ كَنْ عَمَلْهُمْ سَوَا سَوَا مَعَ الشَّكْوَةْ الْأَنَا سِمِعْتَهَا فَوْقهُمْ. وَ كَنْ الشَّكْوَةْ مَا صَحِيحْ كُلَ، نَعَرْفَهْ.»
22وَ إِتْنَيْن مِنْ الرُّجَالْ دَوْل قَمَّوْا وَ مَشَوْا عَلَيْ سَدُومْ وَ إِبْرَاهِيمْ قَاعِدْ وَاقِفْ قِدَّامْ اللّٰهْ. 23وَ إِبْرَاهِيمْ قَرَّبْ لِلّٰهْ وَ قَالْ: «يَا رَبِّي، هَلْ تِدَمِّرْ نَاسْ الْفَسْلِينْ مَعَ الصَّالِحِينْ سَوَا وَلَّا؟ 24أَكُونْ فِي 50 نَاسْ صَالِحِينْ قَاعِدِينْ فِي سَدُومْ. هَلْ تِدَمِّرْ الْحِلَّةْ دِي وَلَّا؟ هَلْ مَا تِسَامِحْهَا فِي شَانْ النَّاسْ الْخَمْسِينْ الصَّالِحِينْ دَوْل وَلَّا؟ 25أَبَداً مَا تَقْدَرْ تِسَوِّيهْ، يَا رَبّ! إِنْتَ مَا تِدَمِّرْ الْعَدِيلِينْ مَعَ الْفَسْلِينْ! أَشَانْ النَّاسْ الْعَدِيلِينْ مَا مِثِلْ النَّاسْ الْفَسْلِينْ! هَلْ الْحَاكِمْ هَنَا كُلَّ الْأَرْض مَا يِسَوِّي الْعَدَالَةْ وَلَّا؟» 26وَ اللّٰهْ قَالْ: «تَمَامْ! كَنْ أَنَا لِقِيتْ فِي سَدُومْ 50 نَاسْ صَالِحِينْ، نِسَامِحْ كُلَّ نَاسْ الْحِلَّةْ دِي فِي شَانْ الْخَمْسِينْ دَوْل.»
27وَ إِبْرَاهِيمْ رَدَّ لَيَّهْ وَ قَالْ: «سَامِحْنِي، يَا رَبّ، أَنَا مِنْ التُّرَابْ وَ الرُّمَادْ، قِدِرْت حَجَّيْت لَيْك. 28أَكُونْ تَلْقَى 45 نَاسْ صَالِحِينْ. هَلْ تِدَمِّرْ الْحِلَّةْ دِي أَشَانْ الْخَمْسَةْ نَاسْ الْقَصَّرَوْا مِنْ الْخَمْسِينْ وَلَّا؟» وَ اللّٰهْ قَالْ: «أَنَا مَا نِدَمِّرْهَا حَتَّى كَانْ لِقِيتْ فَوْقهَا 45 نَاسْ صَالِحِينْ كُلَ.»
29وَ إِبْرَاهِيمْ قَالْ بَتَّانْ: «أَكُونْ فِيهَا 40 بَسْ نَاسْ صَالِحِينْ!» وَ اللّٰهْ قَالْ: «تَمَامْ! مَا نِدَمِّرْهَا حَتَّى كَانْ لِقِيتْ فَوْقهَا 40 نَاسْ صَالِحِينْ كُلَ.»
30وَ إِبْرَاهِيمْ قَالْ: «يَا رَبّ، مَا تَزْعَلْ كَنْ أَنَا نِحَجِّي لَيْك بَتَّانْ. أَكُونْ فِيهَا 30 بَسْ نَاسْ صَالِحِينْ!» وَ اللّٰهْ قَالْ: «أَنَا مَا نِدَمِّرْهَا حَتَّى كَانْ لِقِيتْ فَوْقهَا 30 نَاسْ صَالِحِينْ كُلَ.»
31وَ لَاكِنْ إِبْرَاهِيمْ قَالْ بَتَّانْ: «يَا رَبّ، سَامِحْنِي. كَلَامِي بِقِي لَيْك كَتِيرْ. أَكُونْ فِيهَا 20 بَسْ نَاسْ صَالِحِينْ!» وَ اللّٰهْ قَالْ: «أَنَا مَا نِدَمِّرْهَا حَتَّى كَانْ لِقِيتْ فَوْقهَا 20 نَاسْ صَالِحِينْ كُلَ.»
32وَ إِبْرَاهِيمْ قَالْ بَتَّانْ: «يَا رَبّ، مَا تَزْعَلْ، خَلِّي نِحَجِّي لَيْك آخِرْ مَرَّةْ. أَكُونْ فِيهَا 10 نَاسْ صَالِحِينْ!» وَ اللّٰهْ قَالْ: «أَنَا مَا نِدَمِّرْهَا حَتَّى كَانْ لِقِيتْ فَوْقهَا 10 نَاسْ صَالِحِينْ كُلَ.»
33وَكِتْ اللّٰهْ كَمَّلْ كَلَامَهْ مَعَ إِبْرَاهِيمْ، هُو خَلَّاهْ. وَ إِبْرَاهِيمْ قَبَّلْ بَيْتَهْ.
अहिले सेलेक्ट गरिएको:
تكوين 18: ع.د.ت19
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
La Bible en arabe tchadien © Alliance biblique du Tchad, 2019