لُوقا 4
4
إِبْلِيس جرّب المسيح
1وَ عِيسَى قَبَّلْ مِنْ بَحَرْ الْأُرْدُنْ مَلَانْ بِالرُّوحْ الْقُدُّوسْ. وَ الرُّوحْ الْقُدُّوسْ قَاعِدْ يُقُودَهْ وَ وَدَّاهْ فِي الْخَلَاءْ. 2وَ فِي مُدَّةْ 40 يَوْم، إِبْلِيسْ قَاعِدْ يِجَرِّبَهْ. وَ فِي كُلَّ الْمُدَّةْ دِي، عِيسَى مَا أَكَلْ شَيّءْ. وَ فِي الأَخِيرْ هُو بِقِي جِيعَانْ.
3وَ إِبْلِيسْ حَجَّى لَيَّهْ وَ قَالْ: «كَنْ صَحِيحْ إِنْتَ إِبْن اللّٰهْ، شِيلْ حَجَرْ مِنْ الْحُجَارْ دَوْل وَ قُولْ لَيَّهْ يَبْقَى لَيْك أَكِلْ.» 4وَ عِيسَى رَدَّ لَيَّهْ وَ قَالْ: «مَكْتُوبْ فِي كِتَابْ اللّٰهْ: <الْإِنْسَانْ مَا يِعِيشْ بِالْأَكِلْ وِحَيْدَهْ.>»#4:4 الكلام دا تلقوه في تَثْنِية 8:3.
5وَ إِبْلِيسْ وَدَّاهْ فِي بَكَانْ عَالِي وَ فِي وَكِتْ قِصَيِّرْ بَسْ وَصَّفْ لَيَّهْ كُلَّ مَمَالِكْ الدُّنْيَا. 6وَ قَالْ لَيَّهْ: «نَجْعَلَكْ حَاكِمْ فَوْقهُمْ كُلُّهُمْ وَ نَنْطِيكْ كُلَّ السُّلْطَةْ وَ الدَّرَجَةْ هَنَا الْمَمَالِكْ دَوْل. أَشَانْ عِنْدِي سُلْطَةْ فَوْقهُمْ وَ نَقْدَرْ نَنْطِيهَا لِأَيِّ نَادُمْ النِّدَوْرَهْ. 7كَنْ تَسْجُدْ لَيِّ بَسْ، دَا كُلَّ كَيْ يَبْقَى هَنَاكْ.» 8وَ عِيسَى رَدَّ لَيَّهْ وَ قَالْ: «مَكْتُوبْ فِي الْكِتَابْ: <لِلّٰهْ إِلٰـهَكْ بَسْ تَسْجُدْ وَ لَيَّهْ هُو وِحَيْدَهْ بَسْ تَعَبُدَهْ.>»#4:8 الكلام دا تلقوه في تَثْنِية 6:13.
9وَ إِبْلِيسْ وَدَّاهْ فِي مَدِينَةْ الْقُدُسْ وَ خَطَّاهْ فَوْق فِي رَاسْ بَيْت اللّٰهْ. وَ قَالْ لَيَّهْ: «كَنْ صَحِيحْ إِنْتَ إِبْن اللّٰهْ، نُطّ مِنْ هِنِي وَ أَقَعْ تِحِتْ 10أَشَانْ فِي الْكِتَابْ مَكْتُوبْ:
<اللّٰهْ يَامُرْ مَلَائِكَتَهْ
أَشَانْ يَحْفَضَوْك.
11يِشِيلُوكْ فِي إِيدَيْهُمْ
أَشَانْ رِجِلَيْنَكْ مَا يِنْطَقَّوْا فِي حَجَرْ.>»#4:11 الكلام دا تلقوه في زَبُور 91:11-12.
12وَ عِيسَى رَدَّ لَيَّهْ وَ قَالْ: «وَ الْكِتَابْ يُقُولْ: <مَا تِجَرِّبْ اللّٰهْ إِلٰـهَكْ.>»#4:12 الكلام دا تلقوه في تَثْنِية 6:16.
13وَ إِبْلِيسْ كَمَّلْ مِنْ جَرِّبِينْ عِيسَى، هُو فَاتْ خَلَّاهْ أَشَانْ لَحَدِّي يَلْقَى فُرْصَةْ آخَرَةْ.
14وَ عِيسَى قَبَّلْ فِي دَارْ الْجَلِيلْ مَلَانْ بِقُدْرَةْ الرُّوحْ الْقُدُّوسْ. وَ خَبَرَهْ أَنْسَمَعْ فِي كُلَّ الْبَلَدْ. 15وَ عِيسَى قَاعِدْ يِعَلِّمْ النَّاسْ فِي بُيُوتْ الصَّلَاةْ وَ كُلُّهُمْ شَكَرَوْه.
المسيح أبوه في حِلِّته
16وَ عِيسَى جَاءْ فِي حِلِّتَهْ النَّاصِرَةْ الرَّبَّوْه فَوْقهَا. وَ مَشَى فِي بَيْت الصَّلَاةْ يَوْم السَّبْت مِثِلْ فِي عَادْتَهْ. وَ قَمَّ فَوْق أَشَانْ يَقْرِي لِلنَّاسْ. 17وَ أَنْطَوْه كِتَابْ النَّبِي إِشَعْيَا. وَ هُو فَتَحْ الْكِتَابْ وَ لِقِي الْبَكَانْ الْمَكْتُوبْ فَوْقَهْ الْكَلَامْ الْبُقُولْ:
18<رُوحْ اللّٰهْ قَاعِدْ فَوْقِي
أَشَانْ اللّٰهْ مَسَحَانِي وَ خَصَّصَانِي
لِنِبَشِّرْ الْمَسَاكِينْ.
هُو رَسَّلَانِي أَشَانْ نَعْلِنْ بِالْحُرِّيَّةْ لِلْمَسَاجِينْ
وَ نِفَتِّحْ عُيُونْ الْعَمْيَانِينْ
وَ نِحَرِّرْ الْمَظْلُومِينْ
19وَ نَعْلِنْ سَنِةْ نِعْمَةْ اللّٰهْ.>#4:19 الكلام دا تلقوه في إشَعْيا 61:1-2.
20وَ سَدَّ الْكِتَابْ وَ قَبَّلَهْ لِلْخَدَّامْ وَ قَعَدْ تِحِتْ قِدَّامْهُمْ. وَ كُلَّ النَّاسْ الْقَاعِدِينْ فِي بَيْت الصَّلَاةْ خَاطِّينْ بَالْهُمْ لَيَّهْ. 21وَ بَدَا يِعَلِّمْهُمْ وَ قَالْ: «الْيَوْم بَسْ، الْكَلَامْ الْمَكْتُوبْ دَا تَمَّ وَكِتْ إِنْتُو قَاعِدِينْ تَسْمَعَوْه.»
22وَ كُلُّهُمْ شَكَرَوْه وَ أَلْعَجَّبَوْا مِنْ كَلَامَهْ الْحَلُو. وَ قَالَوْا أَمْبَيْنَاتْهُمْ: «هَا، دَا مَا وِلَيْد يُوسُفْ وَلَّا؟» 23وَ بَتَّانْ حَجَّى لَيْهُمْ وَ قَالْ: «أَكِيدْ تُقُولُوا لَيِّ الْمَثَلْ الْمَعْرُوفْ الْبُقُولْ: ‹يَا دَكْتَوْر، دَاوِي نَفْسَكْ.› سِمِعْنَا بِكُلَّ الْخِدْمَةْ السَّوَّيْتهَا فِي حِلَّةْ كَفَرْ نَاحُومْ. سَوِّي نَفْس الشَّيّءْ هِنِي فِي حِلِّتَكْ!»
24وَ قَالْ لَيْهُمْ: «نُقُولْ لَيْكُو الْحَقّ، مَا فِي نَبِي الْيَقْبَلَوْه فِي حِلِّتَهْ حَلَالَهْ. 25لَاكِنْ بِالصَّحِيحْ نُقُولْ لَيْكُو، تَعَرْفُوا كَدَرْ فِي زَمَنْ النَّبِي إِلِيَاسْ،#4:25 فِي زَمَنْ النَّبِي إِلِيَاسْ: التاريخ دا تلقوه في 1 مُلوك 17. اللّٰهْ دَحَرْ الْمَطَرْ مَا يُصُبّ تَلَاتَةْ سَنَةْ وَ سِتَّةْ شَهَرْ وَ بِقِي جُوعْ شَدِيدْ فِي كُلَّ الْبَلَدْ. وَ فِي إِسْرَائِيلْ فِيَّهْ عَوِينْ كَتِيرَاتْ أَرَامِلْ 26وَ لَاكِنْ اللّٰهْ مَا رَسَّلْ إِلِيَاسْ لِأَيِّ وَاحِدَةْ مِنْ الْعَوِينْ دَيْل. اللّٰهْ رَسَّلَهْ فِي حِلَّةْ صَرَفَةْ فِي بَلَدْ صَيْدَا لِمَرَةْ آخَرَةْ أَرْمَلَةْ. 27وَ فِي زَمَنْ النَّبِي أَلْيَسَعْ، فِي نَاسْ كَتِيرِينْ فِي بَلَدْ إِسْرَائِيلْ الْعِنْدُهُمْ جِدَامْ وَ نَادُمْ وَاحِدْ مِنْهُمْ مَا لِقِي الْعَافَيْ، إِلَّا نَعَمَانْ السُّورِي#4:27 نَعَمَانْ السُّورِي: التاريخ دا تلقوه في 2 مُلوك 5:1-14. بَسْ لِقِي الْعَافَيْ.»
28وَ وَكِتْ سِمْعَوْا الْكَلَامْ دَا، كُلَّ النَّاسْ الْفِي بَيْت الصَّلَاةْ زِعِلَوْا زَعَلْ شَدِيدْ. 29وَ قَمَّوْا سَاقَوْه مِنْ الْحِلَّةْ وَ وَدَّوْه فِي طَرَفْ الْحَجَرْ الْحِلِّتْهُمْ مَبْنِيَّةْ فَوْقَهْ أَشَانْ يَرْمُوهْ وَ يَكْتُلُوهْ. 30وَ لَاكِنْ هُو شَقَّاهُمْ مِنْ أُسُطْهُمْ وَ فَاتْ.
المسيح طرد شَيْطان من نادم
31وَ عِيسَى مَشَى فِي كَفَرْ نَاحُومْ وَ هِي حِلَّةْ وَاحِدَةْ فِي دَارْ الْجَلِيلْ. وَ يَوْم السَّبْت، هُو قَاعِدْ يِعَلِّمْ النَّاسْ. 32وَ النَّاسْ أَلْعَجَّبَوْا بِلْحَيْن مِنْ تَعْلِيمَهْ أَشَانْ هُو قَاعِدْ يِحَجِّي بِالْقُدْرَةْ الْاللّٰهْ أَنْطَاهَا لَيَّهْ.
33وَ فِي بَيْت الصَّلَاةْ، نَادُمْ وَاحِدْ قَاعِدْ وَ هُو مُشَوْطِنْ. عِنْدَهْ شَيْطَانْ فَسِلْ. وَ هُو عَاطْ بِحِسّ عَالِي وَ قَالْ: 34«هَايْ! يَا عِيسَى مِنْ النَّاصِرَةْ، تِدَوْر مِنِّنَا شُنُو؟ جِيتْ هِنِي أَشَانْ تَهْلِكْنَا وَلَّا؟ أَنَا نَعَرْفَكْ. إِنْتَ بَسْ الْقُدُّوسْ الْاللّٰهْ رَسَّلَهْ.» 35لَاكِنْ عِيسَى كَشَّ لَيَّهْ وَ قَالْ: «أَسْكُتْ وَ أَمْرُقْ مِنَّهْ!» وَ الشَّيْطَانْ رَمَى النَّادُمْ فِي أُسْط النَّاسْ. وَ خَلَاصْ مَرَقْ مِنَّهْ. وَ النَّادُمْ دَا، مَا لِقِي أَيِّ وَجَعْ.
36وَ كُلَّ النَّاسْ أَلْعَجَّبَوْا بِلْحَيْن وَ قَالَوْا أَمْبَيْنَاتْهُمْ: «الْمُعَلِّمْ دَا كَلَامَهْ دَا كِكَّيْف؟ عِنْدَهْ سُلْطَةْ وَ قُدْرَةْ لَحَدِّي يَامُرْ الشَّوَاطِينْ وَ يَمُرْقُوا مِنْ الْمُشَوْطِنِينْ!» 37وَ خَبَرَهْ شَتَّتْ فِي كُلَّ الدَّارْ دِي.
المسيح في بيت سِمْعَان
38وَ عِيسَى مَرَقْ مِنْ بَيْت الصَّلَاةْ وَ مَشَى فِي بَيْت سِمْعَانْ. وَ نَسِيبْتَهْ لِسِمْعَانْ عِنْدَهَا وِرْدَةْ شَدِيدَةْ. وَ سَأَلَوْا عِيسَى لِيَشْفِيهَا. 39وَ هُو مَشَى وَقَفْ فِي جَنْب الْبَكَانْ الْهِي رَاقْدَةْ فَوْقَهْ وَ كَشَّ لِلْوِرْدَةْ وَ الْوِرْدَةْ خَلَّتْهَا. وَ طَوَّالِي هِي قَمَّتْ وَ ضَيَّفَتْهُمْ.
المسيح داوى ناس كتيرين
40وَ فِي الْمَغْرِبْ، كُلَّ النَّاسْ الْعِنْدُهُمْ نَادُمْ مَرْضَانْ كَنْ عِنْدَهْ أَيِّ مَرَضْ، جَابَوْه لِعِيسَى. وَ هُو خَطَّ إِيدَهْ فَوْق أَيِّ مَرْضَانْ وَ شَفَاهْ. 41وَ شَوَاطِينْ مَرَقَوْا مِنْ نَاسْ كَتِيرِينْ وَ عَاطَوْا وَ قَالَوْا: «إِنْتَ إِبْن اللّٰهْ.» لَاكِنْ هُو كَشَّ لَيْهُمْ وَ دَحَرَاهُمْ مَا يِحَجُّوا أَشَانْ هُمَّنْ يَعَرْفُوا كَدَرْ هُو الْمَسِيحْ.
42وَ وَكِتْ الْوَطَاةْ أَصْبَحَتْ، هُو مَرَقْ وَ مَشَى فِي بَكَانْ مَا عِنْدَهْ نَاسْ. وَ النَّاسْ فَتَّشَوْه وَ جَوْا لَيَّهْ وَ دَوَّرَوْا يَدْحَرَوْه مَا يَمْشِي يِخَلِّيهُمْ. 43لَاكِنْ هُو قَالْ لَيْهُمْ: «وَاجِبْ نِبَلِّغْ بِشَارَةْ مَمْلَكَةْ اللّٰهْ فِي حِلَّالْ آخَرِينْ كُلَ. فِي شَانْ دَا بَسْ اللّٰهْ رَسَّلَانِي.» 44وَ هُو رَايِغْ فِي دَارْ الْيَهُودِيَّةْ وَ قَاعِدْ يِبَشِّرْ النَّاسْ فِي بُيُوتْ الصَّلَاةْ.
अहिले सेलेक्ट गरिएको:
لُوقا 4: ع.د.ت19
हाइलाइट
शेयर गर्नुहोस्
कपी गर्नुहोस्
तपाईंका हाइलाइटहरू तपाईंका सबै यन्त्रहरूमा सुरक्षित गर्न चाहनुहुन्छ? साइन अप वा साइन इन गर्नुहोस्
La Bible en arabe tchadien © Alliance biblique du Tchad, 2019