Cdcmpc idodcm komirang itc:ma:pc pitang mola donamdc aninpc pvngangkang odokkc, okodcm Gvbo:la gvnam cmdoji odokkc dormo ager gernc kvdv:dok bottarya:nc kvdv:dc:lang agom adgabnc kvdv:dc Bvm kapc mokepcikc cmna mago:to; kapila:nc bulu tani:kvdv:dcm pcsodagai.


Odo Satan uidc Juda: cmnam Iskariotkolo angkang sc:kobv vyvngkolang anyidok akoa:ji; Bv gvpakkang odokkc dormo ager gernckvdv:dokkilang opisarkvdv:dokki ru:suto kapc bulukkolo Bvm sogabla bila:ycji cmna. Odo bulu mc:pokang, odokkc bvm murkongcm bipc cmna luscgto. Cdcmpila bv agomdcm tolvgto, odokkc Bvm sogabbipc cmna sogabpokoko mago:to yadkumsunc tani:kvdv:dok ka:ma:dowcm bulum sogabbipc cmna.


Odokkc komirang ilvgma:pc pitang donam longcdc pvngangkang okodo gvbo:la gvnamdok bera soben awodcm palvgpcnama:ji. Cdcmpila Jisubv Pitormclang Jo:nmc scmpc lula mclvgto: “Gvkang odokkc gvbo:la gvdodcm donamdcm mosv:ta:ka ngoluk lcga:pc, ngolujen cdcm dola:dopc.”
Bulu Bvm luto, “Okolo no mosv:ta:ka cmna ngolum mc:dang?”
Bv bulum luto, “Ka:tok, nolu cdvlo nogordo gva:ycnc, asi ki:lvngko jo:nc tani:ko nolu rvgsuyc; bv oko okumdo gva:ycnc bvk lcdulo gvmvnnangka, odokkc okum ru:tumdcm lulangka, ‘Luyirncdc nom ludag, mibo dungko okumdc okolon, okolo ngok lcddarkc donamdcm ngok agom tadjvgla gvmvnnc tani:kvdv:dokki dopcnammcn?’ Odo bv tayc:t bottcru:nc soyarko mosv:la lc:namko lcngkanycpc, odo mosv:langka.”
Odokkc bulu gvkang, odokkc Bvk lukampc bulu cdcm pa:to; odokkc bulu gvbo:la gvnamdok donamdcm mosv:to.


Odokkc cdvlo ayirdc angka:ji, Bv tcbuldo tedto, odokkc agom tadjvgla gvmvnnc tani:kvdv:dc:sin. Odokkc Bv bulum luto, “Ngo airu:pc sc gvbo:la gvdodok donamscm dopc mc:namko dungai ngok ipusire: pa:ma:dapc; kapila:nc ngo lubidung nolum Ru:ncpvnckc migomdokodo cdcm ipvt-gvpvtkuma:sisscm ngo cdcm doma:yc.”
Odokkc Bv bati: apvko la:sa:to, odokkc Bv cdvlo aipai bila kumtoji Bv luto, “Tv:toka scm, odokkc nolu cdcm orpansutoka; kapila:nc ngo nolum lubidung jc su:pakkolokkc ngo angur a:yclok alangcm tv:ma:ycbong Ru:ncpvnckc migom doko mo:pvd a:ma:siscm.”
Odokkc Bv pitangko la:to, odokkc Bv aipai bige:la Bv cdcm penporto odokkc bulum cdcm scmpc lula bito, “Sc ngok amvrc okodcm noluk lcgangc bitu:ji. Ngom mc:pa:la cdcm ilangka” odokkc cdcmv:pc bati:dcm dodag lcdudo, scmpc lula, “Sc bati:scm noluk lcgangc pvlennammc cdc ngok i:kokki anu lugodc. Cmpige:la ka:toka ngom miru alaglo tolvgpcnc alagdc ngok lcdulo tcbulsc dung. Kapila:nc tani:kc Awodc kapc lusutagaji cdcmpc gvdag; cmpige:la sckkokki miru alaglo tolvgycnc cdc tani:dc mc:dvrpcnamc!”
Odokkc bulu akoncm akonc agom tawuka:mvnsukang, bulukkolok sc:kobv cdcm iycsong cmna.

Sc:komc bulukkolok bottarya:nc cmna luycn cmna buluk ara:lo lukerluyermvnsunamko lenkang. Odo Bv bulum luto, “Ru:ncmc kinma:nc opvnkvdv:dc buluk tayc:lo ru:tumpc inamcm idag gvdag; odokkc buluk tayc:lo ilang gvla:nc kvdv:dcm igcsanggcnc kvdv:dc cmdag. Cmpige:la nolu:kkcpc cdcmpcmang; Cdcmpcyam noluk ara:lok bottarya:ncdcm adjiyarya:ncpc imotok, odokkc daggcboncdcm nolum ila:-sa:la binncmpc. Kapila:nc sc:kobv bottarya:ncdcn, tcbuldo tedncdc:yc, cdcmanggom ila:sa:la sc:kobv bincdc:yc? Cdc tcbuldo doncdc:ma:lang? Cmpige:la ngo noluk ara:lo ila:-sa:la binncmpc incko.
“Nolu ngok lcdulo du:mvnnc kvdv:dc sc:kobulu ngom ankang kangkolo du:tvmvnnc kvdv:dc; Odokkc ngo nolum agercm togclvgtung, ngok Ba:bubv ngom kapc agercm togclvgtoji, migom doko mo:pvko, okolo nolusin dola:-tv:la:ycpc ngok tcbuldo ngok doko mo:pvdo, odokkc Israeldok vyvngkolang anyi opvndcm kcbangcm ba:ycku migom dungkodo tedge:la.


“Simona Simona, ka:toka, Satan uidc pa:pc cmna madung, bv:jen nom gewu a:mcmpc gvyotbopckc, cmpige:la ngo nok lcgangc kumdung nok mc:jvgdc:jen yogma:pcka; odokkc cdvlo no gvlatyckunc nok bvrokvdv:dcm tormolangka.”
Odokkc bv Bvm luto, “Ru:tuma, ngo nok lcdulo makana:pclang sikolo:pc gvmvnpc mosv:sutak.”
Bv luto, “Ngo nom lubidung, Pitora, silok longcso porogc kogma:yc, no lcumkopc ngom kinmang cmna lupaksuma:sisscm.”

Odokkc Bv bulum luto, “Ngo cdvlo nolum sogcnc, murkong bomnanc paycgc cdcmanggom, sogcncmanggom lcyugcm gcmoge:la mclennvgto, nolu atvko pv:ramdaganci?”
Bulu luto, “Okoloksinmang.” Bv bulum luto, “Cmpige:la, su:pak, sckkc murkong paycgc du:nc bommotoka cdcm, odokkc cdcmv:pc sogcn ako. Odokkc sckkc madsvgc kama:ji bvk galukdcm koge:la cdcm asongko rcmotoka. Kapila:nc ngo nolum lubidung jc sc ‘Odokkc Bvm dormo kama:nc kvdv:dok ara:lo kvtc:lvgto cmnamdc’; Ru:ncpvnckc agom jvggabsc ngokkolo lukamdcmpc ipci iycrung, kapila:nc ngok agomcm okodcm adtu:nc cdcm ngokkolo ipa:do.”
Odokkc bulu luto “Ka:tok, Ru:tuma, sc:na madsvg so:nyiko.” Odo Bv bulum luto, “Cdc pv:sepv:yedag.”


Odokkc Bv gvlenge:kula gvkang, Bvk gvkamdcmpc Olib adi:do:pc; odokkc Bvk agom tadjvgla gvmvnnc tani:kvdv:dc Bvk lcdulo gvmvnkang. Odokkc Bvk bulum lubinam mo:takdo:pc gvpv:to odokkc luto, “kumtoka nolujen ankang kangkvnammcm pa:ma:ycpc.”
Odokkc vlvng apvko crnamkvddvko mo:tc:pc bulukodokkc Bv gc:rto, odokkc lcbvng tumangge:la kumto, “Abba, no sc bati:scm ngokkolokkcm la:paktei; ckvdaggom ngok mcngkampc imang, cmpige:la nok mcngkampc ika:langka.” Odokkc taycngamo:tokc taycng lutad luncko bvm lcngkangsuto, bvm tormola. Odokkc sinamcmpc du:la:ma:la Bv kvnggv:ya:pc kumto; odokkc angkirc i:ycmpc amo:bo abug abugpc bidledrobbomkang.
Odokkc Bv kumkodokkc darobto, bv agom tadla gvmvnnckvdv:do:pc gvlattoku odokkc bulum mc:dvrayam yubla du:dopc ka:begtoku, odo Bv bulum luto, “Kapila nolu yubdang? Darobtoka odokkc kumtoka nolujen ankang kangkvnamcm pa:ma:ycpc.”


Bv lula du:dodcmci, tani: kcrcngko gva:do, odokkc Juda cmnam tani:dc, vyvngkolang anyidok akonc, bulum gva:bodungai. Bv Jisukc kcra:do:pc gva:to odokkc Bvm dosukto; cmpige:la Jisubv bvm luto, “Judanga, no tani:kc Awodcm dosugge:la:yc miru alaglo tolvgycn?”
Odokkc cdvlo cdc bvk gvmvnnc kvdv:dc odokkc kapc iycji ka:to, bulu luto, “Ru:tuma, ngoluk madsvgkvdv:sokki tcgsotycnci?” Odokkc bulukkolok akonc dormo ager gernclok bottarya:nclok pagbokoncm tcgto odokkc bvk lagbvgkkc yeru:dcm tckpakto.
Cmpige:la Jisubv luto, “Cdcmpc ibaryobong!” Odokkc Bv bvk yeru:dcm riyitbige:la bvm aimotoku.
Odo Jisubv dormo ager gernclok bottarya:ncdcmlang kumko okumdok opisarkvdv:dcm odokkc abv:nc tani:kvdv:dcm luto, sc:kobulu Bvk agom tadma:pc ycngkapc gvdungaji, “Nolu rodkutnc tani:koyc ycnggapkapc gvdu:n, madsvgkokkilang danggi:kokki? Cdvlo ngo longgcm longgcm kumko okumdo dungaji, nolu ngom alagcm sutkvtomang, cmpige:la sc noluk ayirc, odokkc kcmokokki ilang gvlangc.”


Odokkc Bvm bulu ycnggabge:la gvbokangku, dormo ager gernckvdv:dok okumdo:pc. Pitorbv mo:tcngo:pc gvmvnto; odokkc bulu cdvlo pongkokdo vmvko parge:la appvng tedkumsutoji, Pitorbv buluk lcdulo teda:mvnkang. Odo ager gerya:nc ko:ncng akonc bvm pva:do teda:dopc ka:begla odokkc ka:mi:la bvm kangge:la:yam, luto, “Sc tani:sc:sin Bvk lcdulo dunggai,”
Cmpige:la bv cdcm scmpc lula lupaksuto, “C:i ambvra, ngo Bvm kinmang.”
Odokkc adjio:ko lcddo:pc akonc bvm ka:to odokkc luto, “No:sin bulukkodok akonc.” Cmpige:la Pitorbv luto, “C:i taniya, ngo:mang.”
Odokkc ayir gonta ako lcdupcsin akodanc lutv lutvla luto, scmpc lula, “Aroru:pc sc tani:sc:sin Bvk lcdulo dungai; kapila:nc Bv Galildokkc.”
Cmpige:la Pitorbv luto, “C:i taniya, no okkomci ludu:song ngo kinmang.” Odokkc oddar bv agom lula du:dodoi, porogdc kokkang. Odokkc Ru:tumbv nge:latsula Pitormc ka:to. Odokkc Pitorbv Ru:tumkc agomdcm mc:pa:toku, kapc bvm Bv lutungaji, “Silo porogc kogma:dapc, no ngom lcumkopc lupaksuycpc.” Odokkc bv gvlenna odokkc gvla kvnggv:pc kapkang.


Cdcmpidodcm sc:ko tani:kvdv:dc Jisumc sogabbomla dungaji Bvm moki:moatto odokkc Bvm dcmto; bulu Bvm amigcm ycngkapge:la Bvm tawuto, “Lungorkokki lutoka! Sc:kobv cdc dcmncdc:ji?” Odokkc bulu bojcrungkoda Bvk agom lupakla agomcm luto, Bvm luka:la lula.


Pvang pvla longcnammc, tani:kvdv:dok abv:nckvdv:dc kcba:mopc cmna gvkumsuto, dormo ager gernckvdv:dok bottarya:nckvdv:dc:lang agom adgabya:nckdv:dc; odokkc bulu Bvm buluk kcba: mokopc gva:boto. Odokkc bulu luto, “No Kristobv:mvlo, ngolum lutei.” Cmpige:la Bv bulum lubito, “Ngo nolum lubimvlo, nolu mc:jvgma:yc, odokkc ngo nolum tawuycmvlo, nolu lubimang. Cmpige:la su:pakkolokkc tani:kc Awodc Ru:ncpvnckc ilang gvla:namdok lagbvg alagdo tedyc.”
Odokkc bulu appv:dc luto, “Nov:yc Ru:ncpvnckc Awodcn, cmpcmvlo?”
Odo Bv bulum luto, “Nolumvn ludang ngo cmna.” Odo bulu luto, “Ngolu cddvko odokkc lukanbinamcm mapcnammcbo:n? Bvk nappa:dokkcm cdcm ngolu avyc tadsuto.”

Luisteren LU:KKC 22