សារ អន់តគ់ រ៉ះ
វគ័ យូហាន ឃឺ អុះ យ៉ាកុប គន វគ័ សេបេដេ។ អ៊ែ អូ ត្រគ់ វគ័ យូហាន ឡាក់ ប៉ាំងហុំ ប៉ាណូស ណោះ អុះ។ បក់ អន់ដា ឃឹត ផា អ៊ែ ច្រាគ់ សារ ពឹង ផាប់ អា រ៉ាំងវ៉ាង សាណាំ ៨០-៩៥ គ.ស. បក់ អន់ដា ណាវ្គ ឃឹត ផា អ៊ែ ច្រាគ់ អន់ទ្រួល ឡឹង សាណាំ ៧០ គ.ស.។ កាណុង ផាប់ អា យូហាន អូ ទី រ៉ះ សិច អ៊ែ ទៅ អុះ អ៊ែ ក្រាន័ កា ផា «សឹះ ឡាក់ យីស៊ូ ប៉ិច ចៃ»។
សារ ដាគ់ អា ឡាម៉គ់ អាន ហះកា ទី ណី ជ្រុ ក្វា ឡឹង ពូ។ ត្រគ់ អាន ម៉ោញៗ អៀង ទង ទឹប ឃឹត ចាជ្រែប កាខាក់ អ៊ែ ត្រគ់ ឡោម ប៉រ់ ប៉ាង៉ាត័ ប៉ាលឹង ប‌៉្រ័ះ ប៉្រគ័ អន់ ពុត ពៀក អ្លុ ហ្លង់។
សារ យូហាន ប៉ិច កា ពូ អ្លុ ហ្លង់
យូហាន ប៉ិច រ៉ះ ឡឹង ណី ជ្រុ ឡឹង សារ ឡាក់ យីស៊ូ ប៉្រគ័ ទិណោ័ះ ភឿ អន់ មួត បក់ សឿ ប‌៉្រ័ះ អន់ អន់ឌែ សឿ ហ៊ែង ខាក់។ អ៊ែ រ៉ះ ដឹង សារ អន់ដា ឡាក់ ប៉្រគ័ អន់ អន់ហ្នាល់ តាំបាង ផា យីស៊ូ ឡាក់ បក់ ប‌៉្រ័ះ ប៉្រើ ជឹរ តង័ ប៉ាណូស អ៊ែ កា គន ប‌៉្រ័ះ ប៊កកាតយ័។
ប៉ានឹរ យូហាន កាប
ផះ យូហាន រ៉ះ ប៉ាឡាក់ អន់ ពូ ហ្លង់ ឡឹង ណី សារ យីស៊ូ អ្វៃ កោប អ៊ែ កាប ពួយ សារ ពឹង ផាប់ ប៉ានឹរ ប‌៉្រ័ះ សាញ៉ា សាន់ដាប់ កាប ឡឹង សារ សាញ៉ា រែវ ពុត លូ ពួយ ខំឃឹត ហៃ ប៉ប័ គុន សុនសាត ក្រិក ពឹង រ៉ាំងហាវ ណោះ។ កាប ប៉ាន់ដឹប ផា «ប៉ានឹរ ប‌៉្រ័ះ» ឃឺ យីស៊ូ។ អ៊ែ ឡាក់ គន ប‌៉្រ័ះ ពឹ អ៊ែ ប៉ាំងកើត កាណាគ័ ញ៉ា ទិណោ័ះ ញន អ៊ែ។ អ៊ែ អ្លុ ឡឹង ពុត ពៀក ពឹ អ៊ែ គ្រឹប នែវ លូ អ៊ែ កើត ប៉ាណូស ភឿ តាំបាង អន់ ប៉ាណូស ពិន អន់ហ្នាល់ ប‌៉្រ័ះ ឡាក់ ពឹ អ៊ែ។
«ដារ់ កាំឡត់» (ពៀគ គុល «មង») ឃឺ ដារ់ ឡាក់ យីស៊ូ តាំបាង សារ ដាគ់ កេង ឃឺ ដារ់ អ៊ែ តោ័ ពឹង អ៊្លង គឹង។
«អាញុ រ៉ីស» លើ «អាញុ រ៉ីស លើយ» ឃឺ អាញុ រ៉ីស ម៉ះ ប‌៉្រ័ះ ប៊កកាតយ័ ទៅ ឡាក់ យីស៊ូ អន់ កា មួត បក់ សឿ ម៉ឹង អ៊ែ។ យូហាន កាប ផា «អាញុ រ៉ីស» ទី ណី វ៉ឹច លូ «សារ រ៉ាំងហៃ រ៉ាំងខ្យា ម៉ះ ប‌៉្រ័ះ» ឡាក់ ម៉ាថាយ ម៉ាកុះ លូ លូកា ឌុ កាប។
«សារ តាទឹច» ឃឺ យីស៊ូ តាំបាង សារ តាទឹច អន់ ប៉ាណូស អន់ហ្នាល់ ឃឺ អ៊ែ តាំបាង អន់ ពូ អន់ហ្នាល់ ប‌៉្រ័ះ ពឹ។ កាប៉ាច់ ទិ សារ ឡាក់ ប៉្រគ័ អន់ ប៉ាណូស ក្លះ ឡាច់ ឡឹង ប‌៉្រ័ះ ប៊កកាតយ័ យូហាន ផា «សារ ព្លូង»។ ទឹល នីណោ័ះ ប‌៉្រ័ះ បឺគ សាតាំង ឡាក់ ម៉ៃគ ព្លូង លើ បក់ ប៉ាន់តោ័ ប៉ាណូស ខង អ៊ែ ប៉ាណាំ ប៉ាណូស អន់ ឡាច់ ចាំងហាយ្គ ឡឹង ប‌៉្រ័ះ ប៊កកាតយ័ ឡាក់ តាំងឡា អាញុ រ៉ីស លូ តាំងឡា សារ តាទឹច។
«តាតារ» ឃឺ អាញុ រ៉ីស ម៉ះ ប‌៉្រ័ះ ប៊កកាតយ័ ទៅ លូ ម៉ះ យីស៊ូ ឡាក់ បក់ តង័។ កាប៉ាច់ «សារ ម៉ាម៉ាំង» ប៉ិច កាប ឡឹង សារ យច លើ ពុត អ៊ក បឺគ ឡាក់ ប៉្រគ័ អន់ ប៉ាណូស អ្វៃ ចាំងហាយ្គ ឡឹង ប‌៉្រ័ះ ប៊កកាតយ័ លូ អូ អ្លុ ចឹង ទី អាញុ រ៉ីស ឡឹង ប‌៉្រ័ះ។
«អង់កក់ តេះ» លើ «ប៉ាណូស» ប៉ានឹរ កាប នីអៀ ទី ណី តាងៗ អន់ដា ទី ណី ផា ប៉ាណូស ឡាក់ អ្វៃ ពឹង អង់កក់ តេះ អា អន់ដា ប៉ិច កាប ឡឹង សារ អូ ដាគ់ គ្រឹប នែវ ឡាក់ អ្វៃ កាណុង ពុត ពៀក ប៉ាណូស កាខាក់ អ៊ែ សារ កាង័ កល់ ម៉ះ ប៉ាណូស បក់ អូ ចៃ អន់ហ្នាល់ យីស៊ូ។
ផិនកាន កាណុង សារ វគ័ យូហាន ច្រាគ់
សារ ប៉ានឹរ ប‌៉្រ័ះ កើត ប៉ាណូស ( ១:១-១៨ )
សារ យូហាន ឡាក់ ប៉ាំងហុំ ពូ លូ សារ សឹះ យីស៊ូ ឡាក់ អន់ទ្រួល ឡឹង ពូ ( ១:១៩-៥១ )
យីស៊ូ ប៉្រគ័ សារ អំរ៉ាញ អឺញ កេង ខាក់ ពឹង កាំឡាំង មួត ប៉ាសុន ( ២:១-១២:៥០ )
យីស៊ូ ប៉ាំងហៀន សឹះ អ៊ែ អ្វៃ ពឹង មឿង យេរូសាឡឹម ( ១៣:១-១៧:២៦ )
យីស៊ូ តោ័ លូ រ៉ីស សឹត លូ តាំបាង ឡាកោ អន់ មួត សឹះ អ៊ែ ប៉ប័ ( ១៨:១-២០:៣១ )
យីស៊ូ ឡាំ តាកាន មួត សឹះ ប៉ាគ់ ខេត កាលីឡេ ( ២១:១-២៥ ) ។

Luisteren យូហាន សារ អន់តគ់ រ៉ះ