St. Lawrence Island Yupik - WBT - (NT) Drama

St. Lawrence Island Yupik - WBT - (NT) Non Drama

Пӣнлиӷьюхўа̄лъыӷмың Акузин таўантыкақ, Акузин Кияӷныӷмыткақ, Акузин Кияӷныӷулӷӣ. Лъңа Кияӷныӷмыткақ пӣнлиӷьюха̄лъыӷмың има. Кияӷныӷым лъңакун сяңўа̄ қамахтыңъўа̄ӷлюку улимака̄, талўа сяңўа̄ ата̄сиҳақ улимамаңита̄ Акузитңунани. Акузитмытуқ уңувалъық, та̄на уңувалъық ниӷугӯқ югнун. Та̄на ниӷук кӯкхутңӯқ мамлыгми, мамлыгым кая̄лъқумаңита̄.
Та̄ўаңуқ ю̄к Кияӷныӷым каяхтыка̄, а̄тҳа Иоанн. Иоанным апыӷьяҳтуқа̄ ниӷук қамахлъюки югыт ухпыӷысқылъюки уңипақилъыӷмикун. Лъңа ниӷугунӷитуқ, иўырңа апыӷьяҳтӯўа̄ ниӷук. Та̄на ниӷупӣгӯқ тагикақ нунамун, ниӷугулъҳӣ тамаҳа̄нун югнун.
Та̄на Акузин нунамыткақ. Қайўа нуна улимака̄яӷңа̄н лъңакун, таўалъӣма нунам югита налъюкыхка̄т. Тагика̄ялӷӣ лъми катам югминун, иўырңа тугуклъӣмаңилъкаңат. Иўырңа қамахлъюки тугуклъиӷилӷӣтлъю, ухпылӷӣтлъю лъминың, авақуталӣсяҳқа̄ҳтыстыкақӣ Кияӷныӷмун. Авақуталӣсимаңитӣ юхкун алъхыӷақылӷӣстун, талўа югым пиюкылъҳакун налиӷмың накмикылъҳакун. Кияӷныӷым лъминың катам авақуталӣткақӣ.
Акузин кымгуҳлъюни акулымнъиткақ. Лъңакун Кияӷнық лӣтыстыңъўа̄қа̄гуқ, лӣтыстыңъўа̄қақа̄лъю пиниқылъыни хўаңкунъун. Ысҳақақаҳпут та̄ўа сыӷлыҳлъягуфтуқ. Сыӷлыҳлъягуфтуқ қаюҳлъяк та̄наңинаҳа̄лӷӣ Иӷныӷа Атам.
Иоанным Крестителым а̄пқақа̄, акилӷӯткыхкақа̄ хўатын: «Та̄наңӯқ а̄пқақа лъпысинун хўатын пӣқңама: “Киңумның тагияҳқақ а̄ңыҳлъяхтуқ хўаңамның, қаюҳлъяк кияҳтыңъулӷӣ талўа алъхылъҳилъюңа”».
Пиниқиңаҳлъягутминың қуястақӣлъю утыҳпахтӣнақ. Кияӷныӷым тӯныхкақӣ Лӣлиҳтӯсят Моисейкун, иўырңа пиниқылъықлъю, ипалъықлъю лӣтыстыкақа̄к Иисус Христосыкун. Китум алңунак ысҳӣгата̄ Кияӷнық. Та̄наңинаҳа̄м Иӷныӷым қантаӷантылъыҳпига̄м Атамун, лӣтыстыка̄ югнун.

Иерусалимымың Иудеит иглыӷутистыңит каяхтикат свящеңигныңлъю, Левитыныңлъю а̄птысқылъюку Иоанн хўатын: «Кинаңузин?» А̄псятни кӣмсиӷаҳтыкӣ хўатыҳлъюўа̄қ: «Хўаңа Христосыңунӷитуңа».
Ынка̄м а̄птыка̄т: «Кинаңузинми? Илияңузӣн?» Иоанным кӣмсиқӣ: «Нака̄». А̄плъя̄тақа̄т: «Ӯкналиқистыңузӣн?» Кӣмсиқӣ: «Нака̄». Пика̄т: «Уңипа̄тикут кинаңузин, қаюҳлъяк уңипа̄сяҳтупыста̄ӷнақапут каяхтикат хўаңкунъың. А̄пҳӣ кинаңузин». Иоанным пикӣ: «Ӯкналиқиста Исаия пика̄гуқ:
“Ма акилӷӯгақуқ килга̄ни хўатын:
Таклъяҳтыху тӯмкаҳқа̄ Атанӷым”.
Та̄на ю̄к акилӷӯлӷӣ хўаңаңӯқ».
Фарисеит та̄кут каяхтыкақыхкаңит Иоаннымун. А̄птыка̄т: «Христосыңунӷилъкувык, Илияңунӷилъкувык, ӯкналиқистыңунӷилъкувык, сяңавык крестиӷаӷӣқсин?» Иоанным кӣмсиқӣ: «Крестиӷӣқуңа мыҳқун. Акулыхпысинитуқ кина налъюкыхкаҳси. Та̄наңӯқ тагияҳқақ киңумның, сыӷлыҳлъягӯқ рыпалъ хўаңа пининӷитуңа итымсяҳқа̄люки сиңӣ».
Қамахлъютың тама̄кут пика̄гут Вифаниями иңлюңанилңуӷми Кӣўыгни Иорданыгни. Та̄кўани Иоанн крестиӷиңулӷӣ югның.

Уна̄миңани Иоанным ысҳаӷлюку Иисус тагилӷӣ лъминун югыт пикӣ: «Ӣи, та̄ната Пынъӣӷаӷа̄ Кияӷныӷым иқитияҳқақ сыӷлыҳқылъҳаның нунам юган. Та̄наңӯқ а̄пқақа хўатын: “Ю̄к тагинақңӯқ киңумның, иўырңа а̄ңўа̄ӷӯқ хўаңамның, қаюҳлъяк кияҳтыңъӯқ талўа алъхылъҳилъюңа”. Хўаңалъю налъюксяӷақа кинаңутаңа, иўырңа крестиӷияҳтӯгуңа мыҳқун лӣтысқылъюку кинаңутаңа Израилыӷмӣнун».
Та̄хкын Иоанным уңипақыхкақа̄: «Кияӷныӷым каяхтыкақа̄ңа крестиӷисқылъюңа мыҳқун. Паниның налъюкңулюку кинаңутаңа, Кияӷныӷым уңипа̄ткақа̄ңа: “Ысҳаҳлъықахкын Таӷныӷак укилӷӣк югмун. Та̄на ю̄к крестиӷияҳқа̄гуқ Аглыӷналӷӣгныкун Таӷныӷагныкун”. Ынка̄м ысҳаӷахка қилягмың Таӷныӷак укилӷӣк сюңаӷьюкыхталютык Иисусымун, лъңаниткаклъю» Та̄хкын Иоанным пикӣ: «Таўатылъюку ысҳақақақа, уңипа̄тамси, та̄на Иӷнықа̄ Кияӷныӷым».

Уна̄миңани Иоанн таўанлъя̄тақақ, ма̄лӷуклъю малихся̄ҳтыкык. Иоанным ысҳаӷлюку Иисус наӷуҳлъыҳӣ пикақ: «Ысҳа та̄ната Пынъӣӷаӷа̄ Кияӷныӷым!» Та̄кук малихся̄ҳтык нагалъюку Иоанн, малихтыка̄к Иисус. Иисусым қӣвлюни ысҳаӷлюкык малигулъҳӣк лъңанун а̄птыкакык: «Сяңўа̄ пӣқыстыху?» Кӣмсиқа̄к: «Равви, на̄нтақсин?» («Равви» хўатын писӣгуқ: «Апыҳтуӷиста».) Пики: «Малихлъюңа ысҳаӷьяҳтуҳтыху». Ынка̄м малихтыка̄к кияҳфиганун, таўантыкак стаматкылъя̄гмың кынляңа унулъыӷмун.
Югым а̄лъҳа нагаткақ Иоаннымың акузилӷӣмың, малихтикақ Иисусымың Андрейеңуфтуқ, Симон Петырым аңлыгутаңа. Таўаниңинақ Андрей аңлыгутминун Симонымун агляӷлюни пика̄: «На̄лъкума̄ҳпут Мессия». («Мессия» хўатын писӣгуқ: «Христос».) Та̄хкын Симон агля̄тка̄ Иисусымун. Иисусым ысҳаӷлюку пика̄: «Лъпык Симоныңӯтын иӷныӷа Иоанным. А̄тҳын Кифаңулъықуқ, хўатын писиқ, Петр».

Уна̄миңани Иисус Галилеянъақумалӷӣ. Налъяӷлюку ю̄к а̄тҳа Филипп, пика̄: «Малихтиңа». (Филипп Вифсаидаӷмӣңулӷӣ, Андрейенкугытун, Петырытун.) Та̄хкын Филиппым иваӷьяҳтуӷлюку Нафанаил уңипа̄тка̄: «Налъя̄ма̄ҳпут ю̄к Моисейем игақыхка̄ игӣтхун Лӣлиҳтӯсят, ӯкналиқистытлъю игақыхкақа̄т игамыхтыхун. Иисусыңӯқ Назаретыӷмӣ, иӷныӷа Иосифым». Нафанаилым а̄птыка̄: «Сяңўа̄ңам пинилӷӣ Назаретымың алъхыҳлъықыфта?» Филиппым кӣмсиқа̄: «Ысҳаӷьяҳтуқаҳуқун».
Иисусым ысҳаӷьямигу Нафанаил тагилӷӣ лъңанун пика̄: «Та̄ната Израилыӷмӣпик, тымңитхўаңилңуқ». Нафанаилым а̄птыка̄: «Натын лӣсимаксиңа?» Иисусым кӣмсиқа̄: «Ысҳақақамкын асиңанилъютын смоквам уқфиган, талўа сялин Филиппым апылъҳилъюңа лъпынун». Нафанаилым пика̄: «Апыҳтуӷиста, лъпык Иӷнықа̄тын Кияӷныӷым! Лъпык Умӣлъка̄тын Израилым!» Иисусым пика̄: «Ухпыҳсӣн қаюҳлъяк уңипа̄скымкын ысҳа̄манилютын асиңани смоквам уқфиган? Сяңўа̄т а̄ңатаӷалӷӣт тама̄куның ысҳаҳлъықатын». Та̄хкын пикӣ: «Ипа уңипа̄тамси, ысҳаҳлъықаҳси қиляк қылъпылӷӣ, Кияӷныӷымлъю яқулги маюлӷӣт, укилӷӣт Иӷныӷакун Югым».

Luisteren От Иоанна 1