If you have would like a copy of this version please contact info@davarpartners.org

Text: Sirmouri New Testament, CC-BY-SA-4.0, The Love Fellowship. Audio: Sirmouri New Testament Audio Bible, CC-BY-SA-4.0, Davar Partners International, The Love Fellowship, 2022

Sirmouri New Testament

Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.

जोबै हेरोदेस राजा यहूदिया प्रदेश दा राज कौरौ थिया तोबै बैतलहम गांव दा यीशु का जन्म हौआ, तोबै पूरब दै कैई ज्योतिषी यरूशलेम शहर दै आयौ पूछदै लागै, “यहूदियों का राजा जैसका जन्म हौए रौआ, कुकै औसौ? औरौ आमुए पूरब दिशा दा तैसकै जन्म कै बारै मुंजी बोताणौ वाल़ा तारा दैखै राए औरौ तैसीखै ढाल़ कौरदै आए रौवै।”
तैसकै जन्म कै बारै मुंजी शोणेयो हेरोदेस राजा औरौ तैसकै साथौ कै यरूशलेम शहर कै बौहितै सारै लोग डौरे गौवै। तैणै यहूदी लोगौ कै सौबी मुख्य यहूदी पुरोहितो औरौ यहूदी शास्त्रीयों खै कौठै कौरेयौ तिनु कैईंदु पूछु, “मसीह कुकै पौयदा हौंदा?” तिनुऐ हेरोदेस राजा खै बौल़ौ, “कै यहूदिया प्रदेश कै बैतलहम गांव दा हौंदा जिथुकै मीका पौरमेशवर कै बातौ बौताणौवाल़ै ऐशै लैखै राए:
‘ओए रै यहूदिया प्रदेश कै बैतलहम गांव, तू कोसी बै बौजैह शै यहूदा कै ओधिपतियो मुंजीदा सौबिदा नानड़ा ना आथी, इथकारिए तांव पौरैशा ऐक ओधिपति निकल़दा, जू मैरै प्रजा इस्राएल देश कै लोगौ का चौराईया बोणदा।’”
तोबै हेरोदेस राजाए ठिकड़ै बैटै कै उमर का पौता लाणौ कारिए ज्योतिषियों खै चुपी बौएदैयौ तिनु कैईंदु पूछु कै तारा ठीक कोसी सौमय दैखिया थिया। औरौ हेरोदेस राजाए ऐजौ बौलेयौ तिनुखै बैतलहम गांव खै भैजै, “कै जांव औरौ तैसी बैटै कै बारै मुंजी ठीक-ठीक पौता कौरौ, औरौ जोबै सै भैटी जांव तौ मुखै शुजा दैया तोबै हांव बै आयौ तैसीखै झोकैयौ ढाल़ कौरु।”
सैजै राजा कै बात शोणेयो हौटै गौवै, औरौ बाटो पुंडा तिनुऐ सैजाई तारा दैखा जू तिनुऐ पूरब दा दैखै राए थिया औरौ तैसी दैखैयो सैजै बैजाए खुश हौवे ऐजा तारा तिनकै आगै-आगै चालदा रौआ; औरौ जिथै सैजा बैटा थिया तैसी घोरो पांदी जाएयो रौकै गौआ। औरौ तिनुऐ तैसी घोरो दै जाएयो तैसी बैटै खै तैसकै माँ मरियम कै साथै दैखा, औरौ तिनुऐ झोकैयौ तैसी बैटै खै ढाल़ कौरे, औरौ आपणा-आपणा झोल़ा खौलेयौ तैसीखै सूनु, लोबान औरौ गन्‍धरस कै भैंट चौढ़ाए। तोबै सुईणै दै ऐजै चैतावणी पायौ कै हेरोदेस राजा कै धोरे हौजौ नै जाया, औरौ सै ओकी बाटो बाटी आपणै देशो खै हौटै गौवै।

तिनकै जाणौ कै बाद, स्‍वर्गदूतै सुईणै दौ आयौ यूसुफ कै बौल़ौ, “ऊबा बिज़! तैसी भैईया औरौ तैसकी माँ खै नियौ मिस्र देशो कै दौड़ै जा; औरौ जांव तौड़ी मोऐं ताखै नै बुली, तांव तौड़ी तिथी रौया, जिथुखै हेरोदेस राजा ऐसी भैईया खै जोंदा लागै रौआ, कै तैसीखै मरवाऐ दैंव।”
तोबै सै रातै कै ही ऊबा बिज़ा औरौ भैईया औरौ तैसकै माँ खै नियौ मिस्र देश खै भागै गौआ। औरौ हेरोदेस राजा कै मौरणौ तौड़ी तिथी रौआ, इथकारिए जू वचन पौरमेशवर कै बातौ बौताणौवाल़ै होशे कै दवारा प्रभुए बौल़ै राए थिया, सैजा पूरा हौंव, “मोऐं आपणा बैटा मिस्र देश दा बौईदा।”

हेरोदेस राजा गुस्से दा भोरै गौआ जोबै तैसी ऐजा पौता लागा कै ज्योतिषिये तैसीआरी धौखा राए कौरे। औरौ तैणै सैनिकौ खै छाड़ै कै बैतलहम गांव दै जाया औरौ आंडे-पांढे कै जौगैह कै सौबी भैईया खै मोरवाए दैंव जिनकै उमर दो सालो कै या तिदै कम औसौ। ऐजौ इथकारिए हौ कै पौरमेशवर कै बातौ बौताणौवाल़ै यिर्मयाह कै दवारा पवित्र शास्त्र दो जू बौल़ै राए थियु सैजौ पूरु हौंव।
“लोगै कोसी कै रूणो कै आवाज़ रामाह नोगरो दै शौणै, रुणु औरौ बौड़ा मातम होआ।
राहेल आपणै नानड़िया कारिए रुए रौए थै,
औरौ शान्त नी हौणौ चांव थै, जिथु सै मौरे गौवै थिए।”

यूसुफ, मरियम औरौ नानड़ा भैईया इबी तौड़ी मिस्र देश दै ही थिए। हेरोदेस राजा कै मौरणौ कै बाद स्‍वर्गदूतै मिस्र देश दौ यूसुफ खै सुईणै दौ आयौ बौल़ौ। “ऊबा बिज़यो औरौ भैईया औरौ तैसकै माँ कै नियौ इस्राएल देश दा हौटै जा, जिथु हेरोदेस राजा औरौ तैसकै लोग मौरे गौवै जू भैईया कै मारणा चांव थिए।”
औरौ सै ऊबा बिज़यो औरौ भैईया औरौ तैसकै माँ खै आपणै साथै नियौ मिस्र देश कै छोड़ेयौ इस्राएल देश खै हौटै गौआ। पौरौ जोबै यूसुफे ऐजौ शुणु कै अरखिलाउस आपणै पिता हेरोदेस राजा कै जौगैह यहूदिया प्रदेश पांदी राज कौरे लौआ, औरौ सै तिथै जाणौ खै डौरे गौआ, औरौ सुईणै दै पौरमेशवर कैईंदी चैतावणी पायौ गलील जिले खै हौटै गौआ। औरौ नासरत नांव कै गांव दा बौसै गौआ, कै सैजा वचन पूरा हौंव, जू पौरमेशवर कै बातौ बौताणौवाल़ै यीशु कै बारै मुंजी बौल़ै राए थिया: “तैसीकै नासरत वाल़ा यीशु बौलल़ै।”

Luisteren मत्ती 2