If you would like a copy of this version please contact info@davaraudiobibles.org

Ladakhi New Testament, CC-BY-SA-4.0, The Love Fellowship. Ladakhi New Testament Audio Bible, CC-BY-SA-4.0, Davar Partners International, The Love Fellowship, 2022.

Ladakhi New Testament

Ladakhi Bible by The Love Fellowship is licensed under Creative Commons Attribution-ShareAlike 4.0 License.

میتشوگس چھینمو دزوماین زیگسّاچیگ، حضرت عیسیٰ مسیح ریکا کیینلا سکیودتے جوگسا زادس۔ تینے کھونگی لوبٹوگسگون کھونگ یودسا یونگس۔ حضرت عیسیٰ سی کھونگونلا لابجا سالچیس گوزوگ زادتے مولس،
خُدانے روگس ژالکھانگون برکت چان این،
چیازیرنا کھونگونلا نامکھے گیالثید نورسکالّا تھوبین۔
سیمسّی نانّگا ردوگپو یودکھانگون برکت چان این
چیازیرنا خُدے کھونگونلا سیمسّو سالّا زادِین۔
پاسمو یودکھانگون برکت چان این
چیازیرنا کھونگونلا دُنیا گانگپو نورسکالّا تھوبین۔
ٹانگپو تھیا زادچیسلا ستوگساین سکومساین یودکھانگون برکت چان این
چیازیرنا کھونگون تشیمشوگّا زادِین۔
جانما سنینگرجے ستانکھان گُون برکت چان این
چیازیرنا کھونگونلا سنینگرجے ستانّا زادِین۔
سیمس لاگمو یودکھانگون برکت چان این
چیازیرنا کھونگونی خُدے جالین۔
تھونڈیل کھیونگکھانگون برکت چان این
چیازیرنا کھونگونلا خُدے ٹھوگو مولین۔
لام ٹانگپویکا ڈولچیسپوے ردوگنگال تھونگکھان گُون برکت چان این
چیازیرنا کھونگونلا نامکھے گیالثید نورسکالّا تھوبین۔
نگا ایمان چوچیسپوے، جانماگونّی ٹھیل چوگستے ناگھسباردو یانگ زون تامنگان سناتسوگس پھوگکھانگون برکت چان این۔ گامو تانگ تھادپو چوشیگ، چیازیرنا نامکھے نانّگا کھیوجا شزدے ٹاگپو یود، کھونگونی کھیوجے سانگ سنگونلا یونگسکھان خُدے پیغمبر گونلا تینّا ژوگس ناگھسباردو ستانتے اِنپین۔

حضرت عیسیٰ مسیح مولس، ”دُنیائی می گونّی پھیا کھیوجاگون تشا این۔ اِین نانگ کالتیس تشی ٹوت پو یولنا تیبو کازوگی لوگستے کھیونگین؟ تیبو پھیلوگا پھانگستے میگونّی کانگپے یوگا نانچیس مانے یانگ چانگ پھانتھوگس میدکیاگ۔“
”دُنیائی می گونّی پھیا کھیوجا اوت اینوگ، ریکا یودکھانّی گیالسا کاب مینیانچیس ژوگس۔ میگونّی اوت توگستے گورموے یوگا مابورّا نانّگا یودکھان تشانگما تھونگچیسلا ود ستاگس سیکا بورین۔ تینّا تسوگسلا کھیوجے لاس زانگپوگون تھونگتے میگونّی کھیوجے نامکھا جوگسکھانّی یاب خُدا ستودپا پھولچیسّی پھیا کھیوجے اودّی لتانگسپو کھونگّونّیکا پھوگچوگشیگ۔“

حضرت عیسیٰ مسیح مولس، ”نگا حضرت مُوسیٰؔ سی شریعت یا پیغمبر گونّی لابجاگون میدکھان چوا یونگتے اینوگ ماسام۔ تیگون میدکھان ماچوا ڈوب چوگّالا یونگسپین۔ نگے لدینبا زیرّاد نامکھا تانگسا نیسکو ستورّی سانگ سنگونلا خُدے شریعتی ایگے یا تشیگچیگّانگ ماستورّا تے تشانگما ڈانڈا ڈوبین۔ کالتیس سوجیکّی خُدے حُکم تشانگمیسانگ چھونگونجیکّانگ چاگنا یانگ تینّا ژوگس جانماگونلا لابّادنا تے میبوا نامکھے گیالثیدّی نانّگا تشانگمیسانگ رینمید سیاین۔ اِین نانگ کالتیس سوجیکّی کا ثونگستے جانما تیتسوگس چوچیس لابّادنا تے میبوا نامکھے گیالثیدّی نانّگا رینچان سیاین۔
تا نگے زیرّاد، کالتیس شریعتی عالِم تانگ فریسی پا گُونی میتشے ٹانگپوجیک پھودکھانبوے سانگ کھیوجے میتشے پھودکھانبو مانّگا ٹانگپوجیک میدنا نامکھے گیالثیدّی نانّگا کھیوجاگون مانے جوگس مینیان۔“

حضرت عیسیٰ مسیح مولس، ”خُدے نگاتانگی اتا اپو گونلا مولکھانبو کھیوجے تشورتے اینوگ۔ می ماساد، می سادکھانگونلا ٹھیمسچاد پھوگین۔ اِین نانگ نگے زیرّاد رانگی فونو ثو چونا کھوانگ ٹھیمسچاد پھوگین۔ یانگ رانگی فونو سمادرا تانگکھانبوانگ ٹھیمسکھونّگا کھیونگین۔ کالتیس کھیرانگی فونو جیکّا بونگبو اینوگ زیرنا کھیورانّگا نیالوے میے چھادپا پھوگچیسّی جیگسپا اینوگ۔
تیبویپھیا قُربان تانگسایکا چھودپا پھولّی توس، کالتیس رانگی فونو جیکّی گیابگالّا نگانپا چوسکھانبو کھیورانّگا ایدتو یونگنا، قُربان تانگسای لدُونلا چھودپا بورتے گوما رانگی فونو نیامپو تھونڈیل چوس، تینے سونگتے چھودپا پھول۔
کھیورانّگا نیادکالتے ٹھیمسکھونّگا کھیرکھانبو نیامپو تیرو لیبّی سانگ سنگونلا لامّا گیوگسپا نانگڈیگ چوس۔ تے مانّا کھوے کھیرانگ شخ چوکان گونلا ستادثیدچیس اینوگ، یانگ شخ چوکانی ٹھیمسکھونگی ماگسپونلا ستادتے کھیرانگ تسونکھانّگا کاگاین۔ نگے کھیوجا لدینبا زیرّاد، کھیرانگ تسونکھانگنے تےتےتشوگپا میپھود نامتشوگپا کھیرانگی چھادپے پینے تشانگما میشال۔“

حضرت عیسیٰ مسیح مولس، ”خُدے مولکھانبو کھیوجے تشورتے اینوگ، رانگی جیدماد مانپا جانما نیامپو لوسڈیل ماچو۔ اِین نانگ نگے کھیوجا زیرّاد، بوموا لوسڈیلّی دودپا نیامپو ستاکھانبوے، کھورانگی سنینگی نانّگا کھورانگی جیدماد مانکھانّی تے بومو نیامپو لوسڈیل چوستے اینوگ۔ کالتیس کھیرانگی میگ یاسپے کھیورانّگا دِیگپا چوچوگّادنا، تے میگپو ڈوستے پھانگستونگ، لوس گانگپو نیالوے نانّگا پھانگی سانگ لوسّی کھاگچیگ میدکھان چھانا گیال۔ یانگ کالتیس کھیرانگی لاگپا یاسپے کھیورانّگا دِیگپا چوچوگّادنا، تے لاگپا چادتے پھانگستونگ، لوس گانگپو نیالوے نانّگا پھانگی سانگ لوسّی کھاگچیگ میدکھان چھانا گیال۔“

حضرت عیسیٰ مسیح مولس، ”کھیوجے ایبو تشورتے اینوگ، ’ناما چادکھانّی بوتشے کھورانگی ناما چادکھانبوا چادکھانّی ایگے تانگوس۔‘ اِین نانگ نگے کھیوجاگونلا زیرّاد، رانگی جیدماد مانکھان نیامپو لوسڈیل چوچیسّی ناسلوگ ماستوگس، سوجیکّی کھورانگی ناما چادنا، کھوے تے بوموبوا لوگییم چوچوگستے اینوگ۔ یانگ تے بومو نیامپو ناما چوکھانبوینگ لوگییم چوستے اینوگ “

حضرت عیسیٰ مسیح مولس، ”نگاتانگی اتا اپو گونلا ای زیرکھانبوانگ کھیوجاگونّی تشورتے اینوگ۔ ناکھورکھانبو ماچاگ، اِین نانگ کھیوجے مسیح نیامپو ناکھورکھانبو ڈوبچوگ۔ اِین نانگ نگے کھیوجا زیرّاد، نامانے ماکھورشیگ، نامکھے ناماکھور چیازیرنا نامکھا نی خُدے ژوگسٹھیس این، یا دُنیائی ناماکھور چیازیرنا دُنیائیکا خُدے کانگما بورّا زادّانوگ، یا یروشالیمّی ناماکھور چیازیرنا یروشالیم نی ٹاگپو گیالپوے گیالسا این۔ رانگی گوی ناماکھور چیازیرنا کھیوجا کھیوجے ثا چیگّانگ کارپو یا ناگپو چونیانّا مانوگ۔ کھیوجے لانبو اینّا این یا مانّا مان زیر چیازیرنا ایگونّی سانگ تھالتے چیجیک زیرنانگ شیطان نگانپانے چونّگانوگ۔“

حضرت عیسیٰ مسیح مولس، ”کھیوجے ایبوانگ تشورتے اینوگ، چھادپا سکیونبونانگ زوبگوس، ’میگی لانلا میگ، سوی لانلا سو‘ اِین نانگ نگے کھیوجا زیرّاد، کھیوجا نگانپا چوکھانبوا تینّا ژوگس لان ماتانگشیگ۔ کالتیس سوجیکّی ڈامبا یاسپا ڈاملچاگس تانگنا، ڈامبا یومانگ ڈاملچاگس لینّالا ستانتونگ۔ کالتیس سوجیکّی کھیورانّگا سکیون کالتے ٹھیمسکھونّگا کھیرتے چھادپے تشولّا کھیرانگی کامیسپو تونگ زیرنا، کامیسپو ماتشاد رانگی کوسپوانگ تانگستونگ۔ کالتیس سوجیکّی کھیوجا کیلومیٹار چیگ وانگ تانگستے ڈولچوگنا، کھو نیامپو کیلومیٹار نیس ڈولتونگ۔ تونگ زیرکھانبوا تانگستونگ، کھیوجیکا سکییا یونگکھانبوا لاگستونّگا لامّاچوگ۔“

حضرت عیسیٰ مسیح مولس، ”کھیوجاگونّی ایبو تشورتے اینوگ، کھییمتشیسپا چیسپا یانگ ڈاو گونلا ناپھراد چوس۔ اِین نانگ نگے کھیوجا زیرّاد، ڈاو گونلا چامسپا چوس یانگ کھیوجا ناگھسباردو ستانکھانگونّی پھیا دُعا چھوس، تیزوگ چونا کھیوجا، نامکھا جوگسکھانّی یابّی لامیکا ڈولّانوگ۔ نییمے اوت تانگ چھارپا گُون خُدے زانّگان ماپھیا میتشانگمالا سالّانوگ۔ کالتیس کھیوجا چامسپا چوکھانگونلا کھیوجے چامسپا چونا، کھیوجا شزدے چیا تھوبین؟ گوبسکور تانگکھانّی ٹھالنینکھانگونّیانگ تیزوگ چوانوگ۔ کالتیس کھیوجے فونو چیگپوا لون ثولنا، جانماگونّی سانگ کھیوجے مانّگاجیک چی چوستے این؟ جان چھوسلوگی میگونّیانگ تیزوگ چوا مانوگا؟ تیبویپھیا کھیوجے نامکھے یاب، دزومسپو جوگسکھان تسوگسلا کھیوجانگ دزومسپو یونگّوس۔“

Luister naar مادتھا 5