Populaire Bijbelverzen uit Yohanis 10

Deel

Naꞌo manu-meor kada tao mue-anggik a mesan, huu ara mai fo ramanaꞌo, rakanisa, ma rakalulutu heni hatahorir masodan. Tehuu Au uni masodak lolen lenak, huu Au mai, mita fo hatahorir bisa leo-laꞌo no lino-lendek, ma raena masodak tetebes.

Au oo sama leo mana lolo malole esa boe. Mana lolo malole sadia ena fo loo lima aon losa maten, mita fo ndia bibi lombon nara bisa rasoda.

Au bibi lombo tetebeng nggara ralela Au harang. Ara oo tungga Au boe. Au oo alela sara boe.

Au fee sara masodak tetebes ta mana ketuk, ma sira oo ta lenggo feꞌe numa Manetualain mai boe. Ta hambu hatahori esa boe na bisa fonda nala sara numa Au mai.

Boe ma Au sama leo lelesu naa. Mete ma hambu mana nau maso nesik Au, na, Manetualain nau tao nasoi-nasodan numa ndia sala-singgon nara mai. Naa, sama leo ana maso neni Manetualain mamanan neu, nesik Au fo mana dadi ndia lelesun. Ma hatahori mana maso nesik Au, ana laꞌok no nekemboꞌik neni bee neu a mesan, ma hambu nanaꞌa-nininu tetebes.

Tebe! Au sama leo mana lolo malole. Au alela Au bibi lombong nggara. Ma ara oo ralela Au boe.

Au Amang manai nusa tetuk do inggu temak ndia loo lima sara neu Au. Ndia ta neni babanggak lena heni basa-basan. Huu naa de ta hambu esa boe na bisa fonda nala sara numa Ndia liman mai. Ai manea sara, nahuu Au Amang no Au ia, esa.”

Naa, sama leo Amak manai nusa tetuk do inggu temak nalela Au, ma Au oo alela Ndia boe. Au oo sadia loo lima Au ao-inang ena boe losa mate, mita fo Au bibi lombong nggara bisa rasoda.

Ta hambu hatahori nakasetik Au fo mate, tehuu Au mesa ngga ndia sadia loo lima Au ao-inang losa mate. Au aena haak fo loo lima Au ao-inang. Au oo, aena haak fo haꞌi falik kana boe. Parenda ia, Au simbon numa Au Amang manai nusa tetuk do inggu temak mai ena.”

Boe ma Yesus nafada tamba neu sara nae, “Hata fo Au afada neu ei ia, tetebes. Au sama leo lelesu nai bibi lombo lalaen.

Tehuu mana lolo neni sebak, mete ma ana mete-nita hambu busa fui esa mai, ana nalai tetebe, de laꞌo ela bibi lombor raa reu naa. Basa de busa fui kiki nala bibi lombo, boe ma bibi lombo laen nara ralai ratanggela.

Yesus kokolak pake lololek esa nae, “Hata fo Au afada neu ei ia, tetebes. Bibi lombo naena lalae. Mete ma hambu hatahori ta maso nesik lelesu, tehuu hene maso tungga mbaꞌa, na, manggaledok ena, ndia naa, naꞌo manu-meo.