Jon 6
6
Jises edeu nyamon i niri lau ma lamawa (5,000)
(Metiu 14:13-21; Mak 6:30-44; Luk 9:10-17)
1Hamon ta len sabe ano le badeh, Jises hawe oro lau tan sandroh a ndron ra-ei au ala kapa gwa li Galili bilisiu. (Iri ale aloh Gwa Li Taiberiyas.) 2Eme ma iri lau solo-an labai an hamon toro ala bilisiu ale. Tasah iri ndranyolom iy ndramekes iri lahou tinan ma kalem i tiri lau abo sik asahan amwenen. 3Ano Jises edek ili loken kabede mandrei ari. Iy eme manyah udu andri hawe oro lau tan. 4Nyamon tinan ta Pasoba tiri Juwis mirihik anya kasahan.
5Jises suri batun i loken, iy anyolom lau solo-an labai adek amwenen ame hawe oro. Iy eme ndremenya Pilip, “To kasih jabi ramen niri lau marakon ame dah kameh kala heh handru?” 6Iy ndremenya doh ta none ndrine Pilip. Tasah, lakou marakon badeh, iy ndrabwetenei ndrano ta iy kameh amekes.
7Pilip asehek i ta Jises i buku doh: “Sihinek ta bun ma ndru la-uh badeh, winiyan basihinei jabi ramen winiyan bala boho ndramak ari, ari are kede-eh bwe!”
8Lau tan ari ja badeh, Enduru nadu tine Saimon Pita, iy asehek anya, 9“Nah ari doh ni tan ma la-uh ma hawe bali ma limeh iri ndrabwidiy le. Arile, barala winiya lau marakon deh?”
10Jises tiye i toro lau tan i buku doh, “Ado katiye kili tiri lau marakon kamanyah ka-en andri.” Bwidiu solo-an udu kon doh. Eme ma iri lau marakon manyah an andri bwele-e bwidiu. Kane iri mwan marakon i se badeh, asahan ma lamawa (5,000). 11Ano Jises andrei jabi ramen, iy edeu wurah i ta Kindrei ta aliy. Iy atehei ili mine oro lau tan, oro adeu i niri lau marakon nane manyah an bwele-e bwidiu. Ano iy andrei ni ja, iy amekes i buku le aliy. Iri aimon ili ili winiya le so-ok tiri ano.
12Ma ndrine iri marakon badeh, idih. Jises eme tiye oro lau tan anya, “Ya ado katukumwi tikibwah tiri nyamon erah, marakon ki le se, sakeh laleyah.” 13Oro lau tan ame tukumwi tikibwah tiri ili le se, oro anyuhiy ili bwak ma ronoh la-uh.
14Iri lau marakon nane dah anyolom lahou tinan ma hawe kalem Jises amekes. Iri ame asehek i buku doh, “Aliy le ai, iy propet mene anya keme bolo kon munyak.” 15Arile, Jises ndratanan budon tiri, iri anya kasehek sahou ki se na boto-on tiri, ma iri anya katehei Jises kasahan kabin tiri. Arile, Jises eme ruwani iri, iy le ari iu ili bwele-e mandrei.
Jises edek bwele-e gwa
(Metiu 14:22-33; Mak 6:45-52)
16Kon ndra beyeh ai, oro lau ta Jises adek ame andri kapa gwa li ja. 17Oro ala bolo ndron ra-ei, ma oro abahau ala loboho bilisiu Kapena-um. Kon ndraben ai, Jises bala hawe oro bwe le. 18Jor atohou boto-on eme bwidi bayau a tinan. 19Oro abahau luluwen sese, i buku kilomita limeh ala len. Mada oro ili anyolom Jises edek bwele-e gwa ili mirihik toro. Eme ma bwidi oro anoh labai. 20Arile, iy eme tiye ili toro, “Jo, jo, ado sanoh!” 21Eme bwidi ndrine oro sekesek. Oro ame suni iy i ndron hawe oro. Sese luwen bwe oro ndrasos babi bilisiu nane oro anya kala aliy.
Iri lau asilah Jises
22Kon aleu len ari ja. Lau ra-on ado kapa gwa bilisiu nane bwena, oro tanan buku Jises badeh, bala ndron hawe oro lau tan bwe. Oro lau tan le badeh, ala. 23Ano, ndron ra-on badu Taiberiyas ame asos bilisiu, mirihik ta kon iri lau mene ado aliy, aimon jabi ramen Jises edeu wurah i ta aliy. 24Iri lau marakon banyolom Jises ma hawe oro lau tan bwe. Eme ma iri ala bolo iri ndron ra-on ja, abahau ala bilisiu ala Kapena-um asilah Jises.
Jises i buku jabi ramen kohan udu aliy
25Iri ame ala ndruni iy udu kapa gwa li bilisiu. Iri ame ndremenyani iy, “Ndramak ta leheya, saba len handru ou asahan dah?”
26Jises asumon sahou toro i buku doh, “Handru labai jo katiye taha. Aha babwetenei iri lahou tinan ma kalem mene aha anyolom jo amekes, bwe, eme aha ame asilah jo ja. Arile, aha ndrani jabi ramen ma bwidi ndrine aha irek. Ta idoh le, aha abo gok ta asilah jo. 27Aha sabo gok ta nyamon ale kameh andra-i, ano abola. Aha kabo gok ta nyamon udu luluwen ma udu mwasin, ma nyamon kameh edeu kohan handru ewek taha ma ta udu le buku doh. Nadu Ndramak Awas kameh edeu naha nyamon doh. Taman Kindrei suni nadun eme, ma iy atehei boto-on i tan ta atondrok iri lakou marakon.”
28Iri ame ndremenya iy ja, “Ahi kamekes saba gok handru, ta ahi winiyan amekes lahou ta Kindrei?”
29Jises asehek sahou ja i toro i buku doh, “Gok ta Kindrei i buku doh: Aha katehei budon taha kili ta iy ndramak nane Kindrei ndrasuni iy ndrame.”
30Iri ndremenya iy ja, “Saba kalem ja kameh ou amekes ta ahi kanyolom ma ahi katehei budon tahi ki le tam? Ou amekes sah handru? 31Tubu ahi iri mene aimon nyamon ari, iri aloh mana i buku jabi ramen, udu bolo kon lomale an. Buku iri ndratorowenei,
‘Iy edeu niri jabi ramen ta aimon badu kandrah.’ ” Eksodus 16:4; Nehemaya 9:15; Wari 78:24-25
32Jises asehek i tiri i buku doh, “Handru labai jo tiye taha, Moses badeu naha jabi ramen badu kandrah bwe. Badeh, tama edeu naha jabi ramen handru badu kandrah. 33Jabi ramen ta Kindrei nane iy udu kandrah eme andri ta edeu kohan handru eme ta kon munyak.”
34Iri anya, “Ndramak tinan, na le dan ou adeu nahi jabi ramen baden!”
35Jises tiye i tiri i buku doh, “Jo le, jo jabi ramen handru kohan udu aliy. Are lau iy eme hawek, iy winiyan bamak son bwe, ma are lau iy atehei budon tan eme tek, balen kameh winiyan bamar ta gwa ja bwe. 36Buku jo ndrasehek taha, aha ndranyolom jo, arile aha batehei budon taha handru bame tek bwe le. 37Iri lau, tama abudon ta edeu iri ame tek, idah kameh iri ame hawek handru. Buku are lau iy anya keme hawek, jo kameh winiyan batikahei iy ba-au bwe. 38Jo udu kandrah ndrame andri. Jo eme ta amekes lahou na budon tek le bwe. Jo eme ta amekes iri lahou na budon ta tama, iy nane suni jo eme. 39Idah badeh, budon tan, iy suni jo eme ta jo samani iri lau nane iy ndraleheyani iri ndrame tek. Buku len hamon, jo kameh kamete-ei iri ja. 40Budon ta tama badeh, iy aso-ok lau marakon kanyolom kili le ta nadun, ma iri katehei budon tiri kili le ta nadun. Idah kameh koha iri winiyan bano bwe, ta udu le buku doh. Jo eme kameh mete-ei iri lau amak, ame loken ja na len hamon.”
41Udu ja badeh, iri Juwis abolosen i tan ta iri sahou iy asehek i buku doh, “Jo badeh, jo jabi ramen handru udu kandrah eme andri.” 42Iri ame nunu-uh i buku doh, “Kede-eh Jises, taha tanan taman uru tinen. Iy le ai, iy nadu Josep. Buku sah ja iy asehek, ‘Jo udu kandrah eme andri’?”
43Jises eme asehek sahou i tiri i buku doh, “Aha ka-iy nunu-uh. 44Tama suni jo eme andri. Ari ndramak winiyan bame hawek le manyah bwe, winiya le tama andrei iy eme hawek, ma jo kameh mete-ei iy ili loken na len hamon. 45Sahou iri ndratorowenei in bolo buk tiri propet tiye i buku doh,
‘Kindrei kameh leheya iri.’ Aisaya 54:13
Are lau anuhun tama, ma iy in hamon ta tanan tan, badeh, iri kame hawek. 46Ari ndramak banyolom tama bwe le. Iy le ari nane udu hawe Kindrei, iy le badeh, ndranyolom tama. 47Handru labai jo tiye taha. Are lau iy atehei budon tan eme tek, idah kameh kohan handru winiyan bano bwe ta udu le buku doh. 48Jo badeh, jabi ramen handru ta edeu kohan handru ili tiri lau. 49Tubu aha iri bwena mene aimon jabi ramen udu kon lomale an, arile iri ndramak. 50Jabi ramen dah badeh, badu kandrah amwenen eme andri. Buku are lau iy aimon, iy winiyan bamak bwe. 51Jo jabi ramen kohan handru udu aliy, iy udu kandrah eme andri. Buku are lau iy aimon jabi ramen dah, kohan handru kameh udu le buku doh. Jabi ramen dah i buku odak, ta jo edeu ta koha iri lau badu kon munyak.”
52Eme ma bwidi losen udu ndrokowa iri Juwis amwenen. Iri anya, “I buku sah handru iy ndramak kede-eh edeu na taha odan?”
53Jises asehek ili tiri i buku doh, “Handru labai, jo tiye taha. Aha badeh, kaimon oda Nadu Ndramak Awas ma aha ka-un ndrayen. Buku aha bamekes bwe, idah kameh kohan handru doh aha winiyan bakohok bwe. 54Are lau iy aimon odak, ma iy a-un ndrayek, idah kameh kohan handru udu tan udu le buku doh, ma jo kameh mete-ei iy amak ja na len hamon. 55Tasah odak badeh, nyamon awas handru ma ndrayek badeh, gwa simidin handru. 56Are lau iy aimon odak ma iy a-un ndrayek, iy badeh, in hawek ma jo in hawen. 57Tama badeh awas, ma na boto-on ta tama le jo asahan eme awas. Iy suni jo eme. Buku are lau iy aimon jo, iy winiyan bamak bwe tasah iy aimon jo. 58Jabi ramen dah badeh, udu kandrah amwenen eme andri. Iy bala buku jabi ramen mene tubu taha iri aimon ado kon lomale an bwe. Iri aimon, arile iri amak. Are lau iy aimon jabi ramen dah badeh, iy winiyan bamak bwe. Kohan handru kameh udu le buku doh.” 59Jises asehek iri sahou marakon doh, ma iy leheya iri udu bolo asiu ta atukum tiri Juwis udu Kapena-um.
Sahou kohan handru winiyan bano bwe kameh udu le buku doh
60Eme oro lau tan anuhun, ma oro solo-an asehek, “Leheya tan doh badeh, baleu se bwe. To kakohok bolo sahou tan barala buku sah handru?”
61Jises ndratanan oro lau tan badeh, nunu-uh ta sahou nane. Iy eme asehek ili toro i buku doh, “Sahou nane tono-ei ndrine ado deh? 62Budon tado i buku sah handru, buku ado anyolom Nadu Ndramak Awas iu ili hamon ili kon mene iy udu aliy eme? 63Oda ndramak winiyan badeu kohan handru bala ta ndramak bwe. Idoh badeh Malawin Ndrabun edeu kohan handru. Sahou jo asehek ewek taha badeh, ta Malawin Ndrabun, ma iri sahou doh edeu koha iri ewek taha. 64Arile aha rayah badeh, batehei budon taha bwe.” Jises ndratanan are lau iy batehei budon ba-en tan bwe. Iy i tanan udu ndra bada katin ta are lau handru kameh amekes sa-oh tan. 65Jises asehek ili le i buku doh, “Jo katiye taha: Ari ndramak winiya bame hawek bwe, buku tama badeu boto-on bala tan bwe.”
Lau rayah ta Jises ruwani iy
66Udu bada len doh, oro lau tan rayah atobwak. Oro ba-en hamon tan ja bwe.
67Jises eme ndremenyani oro lau tan ma ronoh la-uh, “Ado anya ka-au ale?”
68Saimon Pita eme asehek ili tan i buku doh, “Laban, are handru kameh aso kala hawen? Sahou ou asehek badeh, kohan handru udu aliy iy winiyan bano bwe, iy kameh ta udu le buku doh. 69Ahi ndratehei budon tahi marakon ndrawek tam, ma ahi ndratanan, ou badeh, Nadu Kindrei ndrabun ari le.” 70Ano Jises asehek sahou i toro i buku doh, “Jo andrei ado ma ronoh la-uh badeh, an hamon tek. Arile, iy ari in bolo ado badeh, iy balik.” ( 71Jises asehek Judas nadu Saimon Iskariyot. Judas iy ari badu hawe oro ma ronoh la-uh. Arile, udu hamon ja badeh, iy amekes sa-oh ta adai Jises.)
Nu geselecteerd:
Jon 6: lidNTpo
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2001, Wycliffe Bible Translators, Inc. All rights reserved.
