Luk 23
23
Jises udu mada Pailat
(Metiu 27:1-2; Metiu 27:11-14; Mak 15:1-5; Jon 18:28-38)
1Ano iri lau mari nane suri iri are loken ma tiyani Jises ili hawe Pailat, 2Eme iri tebeya wasai anya, “Ahi badeh, ndratakalahei ndramak dah amekes bolo manyah tiri lau tahi, bamwenen bwe. Iy tandra-un tiri lau badeh, sakeh luk sala ta Sisa, ma tiye anya, iy badeh, Krais, ma iy kabin tiri Isra-el.”
3Ya eme Pailat ndremenya iy, “Ou kabin tiri Juwis neh?”
Eme Jises anya, “Ou ndrasehek badeh kabwai.”
4Ano, Pailat aloh i tiri tinan tiri pris, hawe iri lau mari dah, anya, “Jo batou ari lakou ndra-in iy ndramak dah, amekes bo-oh!”
5Arile, iri sarakau anya, “Iy mene leheya ma amekes ndrokowa iri lau badu loboho Judiya bado mwasin bwe. Iy mene amekes kandriyen doh, udu ndra Galili on, eme taku dah.”
6Eme Pailat anuhun sahou nane iri asehek ano iy ndremenya iri anya, “Iy badu Galili handru?” 7Ya eme Pailat akohok tanan amwenen ta kon ta Jises. Kon ta Jises badeh, udu baha tondrok ta Herot, eme iy suni Jises ili hawe Herot. Tasah, na len doh badeh, Herot udu Jerusalem ale.
8Eme Herot atou Jises badeh, iy sekesek handru, tasah iy ndra mwena mwena ndra-au badeh, aseken ta atou Jises labai. Iy mene anuhun le nyalan, eme na dah, iy anya kanyolom Jises kamekes kalem. 9Iy ndremenya Jises san solo-an solo-an, arile Jises andru-uk le. 10Eme iri lau tinan tiri pris, hawe iri lau ta leheya kandriyen tiri Juwis adek ame mirihik asehek sahou boto-on i bada Jises. 11Ano Herot hawe oro lau ta bahun tan bobose iy, ma atehei kolau moroyan i la-un, ma suni iy i hamon hawe Pailat ja. 12Na len bwena ndra-au, Herot uru Pailat badeh, ndrokowa uru udu aliy, arile na le len dah, badeh, uru ndra kawas ja.
Pailat atehei Jises iu ta kei tondreh
(Metiu 27:15-26; Mak 15:6-15; Jon 18:39–19:16)
13Ano Pailat luhi iri lau hawe iri tinan tiri pris, ma hawe iri lau ta atondrok, hawe iri mari, ame. 14Ya eme iy tiye i tiri anya, “Ado tiyani ndramak dah eme, ado anya iy badeh, amekes bolo ndrokowa iri lau andra-i. Udu mada ado nane ndra-au badeh, jo batakalahei ari lakou ndramak dah, amekes andra-i, i buku none ado mene asehek, bwe. 15Ma Herot ale batakalahei ari lakou iy amekes andra-i bwe le. Ya eme ado anyolom, iy suni iy eme hamon ja dah. Iy winiyan bamak laleyah bwe, tasah iy bamesekei ari lakou bandra-i bwe. 16-17Ya eme, idah kameh jo tiye iri lau ta bahun tek amekes isi i badan, ano iy bara-au.”
18Arile, iri mari sarakau i le rasan anya, “Kadai iy, kadai iy! Ya karuwani Barabas keme hawe ahi!” 19Barabas in bolo kou mene badeh, iy ta amekes bahun udu bolo kon tinan, ma hawe idi ndramak amak.
20Eme Pailat tiye i toro ja anya, “Katolowei Jises ki-iu ai?” 21Arile, iri aloh ma sarakau anya ja, “Katahi iy ki bada kei tondreh! Katahi iy ki bada kei tondreh!”
22Ano i san tulusin ja iy tiye: “Buku sah handru, saba lakou ndra-in handru iy mesekei? Ndramak dah bamesekei se ari lakou bandra-i bwe, ya iy kimek laleyah ai? Eme idah kameh oro lau ta bahun tek ubwi iy ano iy bara-au.”
23Arile, iri arah ma tiye sahou boto-on anya, “Katahi iy ki bada kei tondreh!” Eme ma abadok i tiri ai. 24Eme Pailat in hamon ta boho iri ma tiye ta Jises badeh, kadai iy. 25Ya eme iy ruwani Barabas mene amekes bahun udu kon tinan, ma idi ndramak badeh, udu bolo kou eme len. Ano iy atehei Jises ili mine iri, ma iri amekes sasah na seken tiri ai.
Iri tatahi Jises i bada kei tondreh
(Metiu 27:32-44; Mak 15:21-32; Jon 19:17-27)
26Eme iri lau ta bahun badu Rom sirini Jises ili le badeh, iri ndruni ndramak ari nyaran Saimon badu kon Sairini. Iy edek udu kon munyak tinan eme. Eme iri tawi iy, atehei kei tondreh i kasen ma iy bwese udu hamon ta Jises. 27Na bolo len doh badeh, iri lau mwan ma badih solo-an solo-an labai adek an hamon ta Jises. Ma hawe iri badih solo-an aden ma taya ndranye Jises. 28Eme Jises tubuni iy ma tiye i toro anya, “Ado badih badu Jerusalem, ado saden ndranyek; ado kaden ndranye ado le, hawe nadu ado oro. 29Tasah, udu bolo maha-an doh, eme kameh iri tiye anya, ‘Iri badih kis, hawe iri badih bato-ou nah bwe, hawe iri badih ta asus nah bwe kameh ado mwasin ja tiri ala nah udu aliy.’ 30Tasah, na bolo len hamon doh kameh iri lau badu Israel tiye i tiri mandrei anya,
‘Ado katohou kame bwele-e aso!’
Ma hawe tiye i ta bwilin ndrondro-ou anya,
‘Ado tubuluhi aso ma katone aso ta lakou ndra-in doh!’ Hoseya 10:8
31Iri kameh amekes lakou doh, eme badak. Ya jo kameh i buku kei nyamanyak. Ya i buku none len ndra-in handru keme kameh, ado kameh i buku kei sana-an.”#(23:31) Jises asehek sahou sokek ya moson badeh, i buku doh: Jises le amwenen i buku kei nyamanyak. Iy bamekes ari lakou bandra-i bwe ma bamekes ari kandriyen ndra-in bwe. Ya, iri lau badu Isra-el badeh, i buku kei sana-an, ma idoh leheya i buku iri ndradih ta kandriyen ndra-in. Eme ya, buku Jises nane bamekes ari kandriyen ndra-in bwe, arile iy akohok sisi-in tinan, ya, saba lakou ja kameh asahan tiri lau rayah ja buku iri ndradih ta kandriyen ndra-in? Iri kameh akohok sisi-in tinan labai ja!
32Eme uru lau la-uh ndra-in ta tebelese badeh, sariye uru ala ta adeu uru ala bada kei tondreh ale. 33Eme iri asos kon aloh, “Bwisi bar ta ndramak.” Eme iri atahi Jises i bada kei tondreh. Ma hawe atahi uru lau ma la-uh nane ale. Eme, iy ari udu loboho lim salin ta Jises, ya ari badeh, udu loboho lim kamweu. 34Eme Jises tiye anya, “Tama, ou mani kandriyen ndra-in toro, tasah oro bala tana oro sasah oro amekes dah bwe.” Eme oro lau ta bahun atehei kolau tan i andri, ma oro amekes laki ta aliy, ta andrei kolau tan i le winiya oro.
35Iri lau mari badeh, anyolom Jises, ya iri lau ta atondrok badu Juwis badeh, bobose iy anya, “Iy badeh, aseben iri lau rayah oh; ya abo, i buku none iy anya iy Krais handru, Kindrei suni iy; kanone iy kasebenei iy le amwenen se.”
36Eme ya iri lau ta bahun ame bobose iy ale. Ma iri adeu waen titi-in i tan, 37ma iri anya, “Buku none ou kabin tiri Juwis handru eh, ou none sebenei ou le se!”
38Ya sahou tanan ari badeh, torowenei udu bwele-e batu Jises tiye i buku doh: “Idah Kabin tiri Juwis”
39Eme ndramak ndra-in ari udu ta kei tondreh mirihik tan nane asehek sahou ndra-in i ta Jises anya, “Ou kede-eh Krais, bwe nadeh? Ou sebenei ou, ma hawe aru ah!”
40Arile, ndramak ari udu bilisiu badeh, ibolosen i tan anya, “Ou kede-eh, banoh Kindrei bwe nadeh? Ou badeh, bwese maha-an i le buku iy kede-eh! 41Talu bwese maha-an dah, amwenen ai, ta lakou talu amekes, arile iy badeh, bamekes se ari lakou bandra-i bwe.”
42Ano iy tiye i ta Jises anya, “Jises, i buku none ou ame hamon, ma boto-on tam atondrok kon mari, ou samani jo.”
43Eme Jises tiye i tan, “Jo katiye tam kamwenen handru en, na le dah kameh, ou ado hawek ado kon mwasin udu kandrah.”
Jises imek
(Metiu 27:45-56; Mak 15:33-41; Jon 19:28-30)
44Eme, an eme udu le alih badeh, lulik tubuluhi kon marakon udu gwek winiya mada an taloh na beyeh. 45Ma an banya bwe. Eme ma kolau ta aturuk madasan ta asiu tinan ta Kindrei badeh, atarah i le ma lusi. 46Eme Jises aloh bohon i loke, anya, “Tama! Jo atehei kohak handru ewek minem.” Iy tiye sahou doh ano le badeh, kohan ano ma iy imek.
47Eme ndramak ari tinan ta bahun anyolom lakou nane doh asahan badeh, iy atudun nyara Kindrei ma anya, “Handru labai, ndramak kede-eh, mwasin labai ta mada Kindrei.” 48Ya eme iri lau mari anyolom lakou marakon doh badeh, ndrine iri tikisiy andra-i labai, ma mine iri i ade iri, hawe kandru iri i andri, ma iri adek au. 49Arile, oro are tanan iy, hawe oro badih mene an hamon tan ado ndra Galili ame badeh, ales ado len anyolom lakou mari doh asahan.
Jises i lek
(Metiu 27:57-61; Mak 15:42-47; Jon 19:38-42)
50Ya eme ndramak ari badu hawe iri kansol nyaran, Josep badeh, ndramak ari mwasin handru ta mada Kindrei. Iy badeh, badu kon ari iri aloh Arimateya udu bolo kon loboho Judiya. 51Ya iy mene basekesek ta budon tiri mene amekes i bada Jises bwe. Ma hawe iy udu le, abe-en tondrok ta Kindrei kasahan. 52Eme iy ili hawe Pailat ta ndremenya bada kei. 53Ano iy eme kuhi bada kei eme andri, su-i iy na kolau ra-ei belen, ma atehei iy i munu bek ari, ndrasaniy bwena, ya lau bala aliy bwe le. 54Idoh badeh, asahan na len ta alokou len ta amunyau, anya kasahan ai.
55Eme oro badih mene ado hamon ta Jises ado ndra Galili ame badeh, an hamon ta Josep ala anyolom munu bek nane, hawe anyolom lowosa iy i bolon i andri i buku sah. 56Ano oro au ala kon anyas ndrelekei hawe suluw ta amekes ki badan. Arile, oro amunyau na len ta amunyau in hamon ta batanau ndratiye.
Nu geselecteerd:
Luk 23: lidNTpo
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2001, Wycliffe Bible Translators, Inc. All rights reserved.