Yone 14
14
Yesuea Naado neebea moholö idi, ne neawela säi
1Yesuea ado aso, sähamu neamu sähalea, Dilia yöia idogola säosäola namiabio. Godema asigi afädë negemalo. Amase, nemage asigi afädë negemalo. 2Nïe Naadoïe mosöa hogoli yafie dialea. Amoli maade galebeda, na dilima made sälabio. Dili namolö sege amo daiamolöïe, ne ami moholömelë. 3Awäla dili namolö sege amo daiala negesilahilä, sege ne namolöia ami dilige nebalä nihïlïgïla namolöïe, na dili bu bea obëgëmolömelë. 4Ne moholö idi amoda dilia dawadigi nebegomelëla säi. 5Amala säsebegi, Domasaea ema nabahalea, Dafidilo Geloi-e, sege di moholö amoda nilïa dawa made. Hä, di idi gowegi moholö neala nilïa abilia helësëmolöi gabula nabi. 6Amala nabasebegi, Yesuea ema säla obëgësalea, Idige, ado dofäge, amase, namolöge, nihïne neawe. Afädë Naado neebea moholö, ne neebea made maaseda, moholöi mademelë. 7Dilia ne dawa galëda, Naadoge dawadigi. Giso, dilia walio mi gäwila, e bealahilä dawadigisagomelëla säi. 8Amala säsebegi, Filibia ema sähalea, Dafidilo Geloi-e, Diado nilïma olemo. Oleseda, nilïa dofeala helësëmolömelëla säi. 9Amala säsebegi, Yesuea ema sähalea, Filibi, segeyo sedade ne dilibalä nelo amo, dia aso, ne dawa made neale. Afädëa ne melï neebe ameada Naadoge melï nea. Amala hamolo dibe amo, dia diado nilïma olemola säi amoda, abeahäladu. 10Ne Naadoma aligila, amase, Naadoge nema aligilala neebewegi, dia dofä gabula made helësësale. Na dilima ado säla ïaha neebeweda, nïe asigiamu säla ïaha made. Naado e nema neebe amea ïe hamoi amo hamosamelë. 11Ne Naadoma aligila, amase, Naadoge nema aligilala neamelëla säsewe nabalahilä, dofä gabula helësëmalo. Dofä gabula made helësësa galëda, hamoi hamosa neebewe beala dofä gabula helësëmalo.
12Na dilima dofä gelola sähago. Afädëa nema asigi afädë negei neebe amea na hamoi hamosa neebewe gadola hamomolömelë. Ne Naado neebea awäse ameada, nema asigi afädë negei neebe amea na hamosa nelo amo baagila awäla, hamoi edefade hamomolömelë. 13Malöea hamosebe amea Eedoïe ëi gauia adamäia, dilia nïe ëigi nea nelebo afädë ëdëgëseda, na hamomolömelë. 14Dilia nïe ëigi nea nelebo sulubadela ëdëgëseda, na hamomolömelëla säi.
Yesuea Eleloi Gesami moholömelëla säi
15Yesuea ado aso, sähamu neamu sähalea, Dilia ne boba hamoi nea galëda, na hamomalola säsebewe gadola bëgëla hamosa namolömelë. 16Dili Ugila Negela Gelolasilo elö, na Naadoma nabulömelë. Eada diligali ïmolömelë. E maalahilä, dilibalä namolöi namolömelë. 17Ugila Negela Gelolasilo amoda dofä sälo Gesamimelë. Nagadaia udia dolöea e made melëlo, dawa made amea, e nimolöi mademelë. Gasoda, e dilibalä neebe ameage, amase, dilima nogila digala namolö ameage, dilia e dawadigimelë.
18Na dili guluba gadoi namiäia dïgïla moholö mademelë. Neda dili neebea obëgëmolömelë. 19Holöfalï nelolahilä, nagadaia udia dolöea ne made bimolö. Gaso, diliamu bimolömelë. Ne neebe ameada, dilige namolömelë. 20Ne Naadoma neebe amoge, dili nema neebe amoge, amase, ne dilima neebe amoge, segeyo amo gala dilia dawadigisa maademolömelë. 21Afädëa na hamomalola säsebe amo nealahilä, bëgëla hamosa neebe ameada, ne boba hamoi nea. Afädëa ne boba hamoi neebe amoda, Naadoeage e boba hamoi namolömelë. Amase, nage e boba hamolahilä, nihïne ema ulufala olemolömelëla säi.
22Amala säi amo nabalahilä, Isagaliada made, Yudasa elöea ema nabahalea, Dafidilo Geloi-e, nilïmada di ulufala olesalea, oböla, nagadaia udia dolö nefolalebe amolimada, di made ulufala olemolömelëla säi amoda, mi edoïela nabi. 23Amala nabasebegi, Yesuea ema säla obëgësalea, Afädëa ne boba hamoi neebe ameada, nïe ado bëgëla hamosa namolömelë. Naadoea e boba hamoi nea, e neebea ami Naado alï halïgïla maalahilä, ebalä aligimolömelë. 24Afädëa ne boba made hamoi neebe ameada, nïe ado bëgëla made hamomolömelë. Dilia ado nabaha nebegoda, nïe ado made. Naado ne digamalala sälo amoïe adomelë.
25Ne made awäla, dilibalä neada, ado amo na dilima säla ïaha nelo amomelë. 26Gasoda, dili Ugila Negela Gelolasilo, Eleloi Gesami Naadoea nïe ëigila fisiga wemolö amo maalahilä, ea dilima nelebo sulubadela olelesa maademolömelë. Na dilima säla ïaha nelo amo sulubadela, ea dilima helësëlasimolömelë.
27Na dalulasilo dilibalä diamiäia dilima ïahagomelë. Nïe dalulasilo amo diligali ïahago. Na ïase amoda, nagadaia udia dolöea ïlo amo gadoi ïaha mademelë. Hä, dilia yöia idogola säosäolage, bedälage namiabio. 28Na dilima sähalea, Ne awälahilä, dili neebea bu obëgëmolömelëla säi amoda dilia nabi amomelë. Amo nabala nema boba hamoi galebeda, ne Naado neebea awäsewegi dilia obeägïlabio. Mida, Naado eda ne baagila, edefademalä nea. 29Nelebo amo made besela galala neebe amo gaalu, na dilima säla ïaha nelo amomelë. Säla ï amo gadola hamose beaseda, dilia asigi afädë negemäiaïemelë.
30Na dilibalä ado sedade säha namolö made gabumelë. Mida, nagadaiaïe busa neebe amo moholö ga made dialea. Ea nema nelebo afädë hamomolö made bimolömelë. 31Gasoda, nagadaia udia dolöea na nïe Naadoma boba hamoi neebe amo helësëmäia, na Naadoea hamomalola säse amo gadolamu hamolomelë.
Hä, nowemo. Afiadila säi.
Nu geselecteerd:
Yone 14: etr
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2022 (Active), Wycliffe Bible Translators, Inc. All rights reserved.
