Kabavelamu 1
1
Iave abama wete pwayapwaya ivalabubunidi
1Velamu kunu naqeneye Yaubada pwayapwaya wete abama ivalabubunidi. 2Pwayapwaya naqekavana we vaitoma bwaigina malaveta ivuyoi imiamia. We Yaubada Vaitabuna malaveteye idoedoeni.
3We kaiata tamoqana waineye Yaubada ivona ivo, “Maqeta kusauyemu.” Beqa maqeta isauyeni imaqetai. 4Yaubada maqetanina ikiseni ikawagiagiamaieni. Yaubada maqeta iketovegeia vaitoma waineye'eqa, 5we maqeta iqoleni kaiata. We vaitoma iqoleni lovana.
We no gunabeida lavilavi wete kawakawai kaiata tamoqana.
6Wete kaiata kanaveluqa waineye Yaubada ivona ivo, “Kawasasa kusauyemu bwasi gamwaneye, bwasi we bwasi iketovegeia.” 7Yaubada kawasasa ivalabubuni we bwasi iketovegeia, bwasi ilaga kawayavata tabwaneye, we bwasi iobu kawayavata dibuneye. We kaia kanamwaqitana mesaida isauyeni. 8Beqa Yaubada kawayavatanina iqoleni abamaligelige.
We no gunabeida lavilavi wete kawakawai kaiata kanaveluqa.
9Kaiata kanavetonu waineye Yaubada ivona ivo, “Bwasi kawasasa dibuneye kwaluvetaubama tamoqana waineye. We pwayapwaya sayasayana inalausimatala.” Kaia kanamwaqitana mesaida isauyeni. 10We Yaubada pwayapwaya sayasayana iqoleni pwayapwaya, we bwasi luvetaubamina iqoleni ligwagwa. We Yaubada ikiseni ikawagiagiamaieni.
11Wete Yaubada ivona ivo, “Pwayepwayeye yoqoyoqo kwavekalatabwatabwa, welavi mevuadi wete tupwaidiavo ge mevuadi, bulava mevuadi wete ge mevuadi mesaida dituaina. Kaia kanamwaqitana mesaida isauyeni.” 12We pwayepwayeye yoqoyoqo ivekalatabwatabwa, welavi mevuadi we ge mevuadi mesaida dituaina, we bulava mevuadi wete ge mevuadi mesaida dituaina. Yaubada ikiseni ikawagiagiamaieni.
13No gunabeida lavilavi wete kawakawai kaiata kanavetonu.
14Kaiata kanavepuli waineye Yaubada ivona ivo, “Abamaligelige tabwaneye maqetanimiavo kwasauyemi tutuya kwaketovegeia kaiata wete lovana waidie'eqa; kwavekiakiaya kaiata, diqaba wete tutuya paipaidi; 15we maqetanimiavo abama waineye kwagabu pwayepwayeye.” Kaia kanamwaqitana mesaida isauyeni. 16Yaubada maqeta kailuqa bwaigidi igiavelausimatalidi. Maqeta bwaigina kaiata iekisabodebodeni, we maqeta siaina lovana iekisabodebodeni. Wete mwatuia igiavelausimatalidi. 17We Yaubada maqetanidiavo abame iyatodi igabugabu pwayapwaya waineye, 18kaiata wete lovana waidie iekisabodaboda, we maqeta wete vaitoma waidie'eqa iketovegeia. We Yaubada ikiseni ikawagiagiamaieni.
19No gunabeida lavilavi wete kawakawai kaiata kanavepuli.
20Kaiata kanavedimana waineye Yaubada ivona ivo, “Kaisaya yawayawaimi matatabumi ligwagwa kwaveadaqi, we manuqa kawasaseye kwayaveyaveqa.” 21We Yaubada kaisaya tageyoidi ligwagweye imiamia ivalabubunidi, wete tupwaidiavo kaisaya yawayawaidi ligwagweye ivalabubunidi mesaida dituaina, wete manuqa sulidi sulidi yaveyaveqidi ivalabubunidi mesaida dituaina. We Yaubada ikiseni ikawagiagiamaieni. 22Yaubada sakunidiavo ivonavenapwayewedi ivona ivo, “Iqana kwavenatuna ligwagwa kwaveadaqi wete mesaida manuqa kwavenatuna natumiavo pwayapwaya waineye inavepue-otoqa.”
23No gunabeida lavilavi wete kawakawai kaiata kanavedimana.
24Kaiata kanavesikisi waineye Yaubada ivona ivo, “Pwayapwaya kuvuaqa kaisaya yawayawaidi matatabudi medituaina, kaisaya tauvanuqa, kaisaya walawalakai, kaisaya daledaledi medituaina.” We kaia kanamwaqitana mesaida isauyeni. 25Beqa Yaubada dede kaisaya yawayawaidi matatabudi medituaina ivalabubunidi kaisaya tauvanuqa, kaisaya walawalakai, kaisaya daledaledi kaisaya siaidi wete kaisaya bwaigidi. We taunidi dituainae'eqa ienatuna yavuyavula we natudiavo kaia taunidi kadikisa mesaida. Beqa Yaubada ikiseniqa ikawagiagiamaieni.
26Matautauda Yaubada ivona ivo, “Deqoina tomo'otoqa taivalabubunidi. Taivalabubunidi mesaida kida. Inavetokisavekavina iqana ligwagweye, manuqa kawasaseye, kaisaya tauvanuqa, kaisaya walawalakai we kaisaya puena daledaledi pwayapwaya tabwaneye.”
27 #
Mak 10:6
We tomo'otoqa ivalabubunidi,
taunina kanakisa mesaida.
Ivalabubunidi lamoqina wete vavinena.
28Yaubada ivonavenapwayewedi ivonedi ivo, “Kwavenatuna natumiavo inavepue-otoqa pwayapwaya inaveadaqi. Kwavetoloina yoqoyoqo puepuedi pwayapwaya waineye. Kwaivetokisavekavina iqana ligwagweye, manuqa kawasaseye wete kaisaya puena yawayawaidi isasasala pwayapwaya waineye.”
29We Yaubada ivo, “Komi kami avelemiqa mosomoso puepuedi vuadi mewaipeidi pwayapwaya matatabuna tabwaneye wete kaivuavuaqa puepuedi vuadi mewaipeidi. Gumanidiavo kwaikanikani. 30We kaisaya puena yawayawaidi matatabudi, manuqa kawasaseye wete kaisaya puena yawayawaidi isasasala pwayapwaya waineye, we kadi avelediqa mosomoso kalakalawidi waidie inakanikani.” We kaia kanamwaqitana mesaida isauyeni.
31Beqa Yaubada navalabubuna matatabuna vakai ivalabubunidiqa ikisedi we no kaia giamaiotoqina. Beqa no gunabeida lavilavi wete kawakawai kaiata kanavesikisi.
Nu geselecteerd:
Kabavelamu 1: mzz
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
© 2023 (Active), Wycliffe Bible Translators, Inc. All rights reserved.