JENESIS 17
17
Ka rukom ka jingotsher
1Te u Abram u la long khyndaiphew khyndai snem, bad U Trai u la paw ha u Abram, bad u la ong ha u, “Nga long U Blei U Badonbor Baroh; to ïaid ha khmat jong nga, bad to long me uba janai. 2Bad nga ruh ngan pynlong ïa la ka jutang hapdeng jong nga bad me, bad ngan pynroi ïa me shikatdei eh.” 3Ynda kumta, u Abram u la nguh ngon haduh khyndew: U Blei te u la kren bad u, u da ong, 4“Shaphang jong nga, ha khmih, ka jutang jong nga ka long bad me, bad me men long u kpa ïa ki jaid bynriew babun byllien. 5#Rom. 4:17.Bad yn ym khot kyrteng shuh ‘u Abram’ ïa me; hynrei, ka kyrteng jong me kan long ‘u Abraham’; naba nga la pynlong ïa me u kpa ïa ki jaid bynriew babun byllien. 6Bad ngan pynlong ïa me uba kharoi shikatdei eh, bad ngan pynlong ïa ki jaid bynriew na me, bad ki syiem ruh de kin mih noh na me. 7#Luk. 1:55; Gal. 3:16.Bad ngan pynskhem ïa la ka jutang hapdeng jong nga bad me bad u symbai jong me hadien jong me ruh, ha ki pateng la pateng bynriew jong ki, ban long ka jutang ka baïaineh junom, ban long U Blei ïa me, bad ïa u symbai jong me hadien jong me. 8#Ki Kam. 7:5.Bad ngan ai ha me, bad ha u symbai jong me hadien jong me, ïa ka ri ha kaba me shong nongwei, ïa ka ri Kanaan baroh kawei keiñ, ïa ka ban long ka bynta trai ba-neh junom; bad ngan long U Blei jong ki.”
9Bad U Blei u la ong ruh ha u Abraham, “Ma me, hynrei, to men rakhe ïa ka jutang jong nga; ma me bad u symbai jong me hadien jong me keiñ, ha ki pateng la pateng bynriew jong ki. 10#Ki Kam. 7:8; Rom. 4:11.Kane ka long ka jutang jong nga ïa kaba phin rakhe, hapdeng jong nga bad phi bad u symbai jong me hadien jong me, kaba long: Ban otsher ïa u shynrang baroh hapdeng jong phi. 11#Jen. 17:24; 21:4.Bad phin otsher ïa ka doh sher jong phi; bad kata kan long ka dak jong kata ka jutang hapdeng jong nga bad phi. 12Ïa u khun shynrang baroh, haba u dang phra sngi ka rta, yn sa otsher hapdeng jong phi ha ki jingkha pateng la pateng jong phi, ïa uta keiñ ïa u ba'n kha ha ïing, bad ïa u ba'n thied da ki sbai na uno uno u nongwei, u bymlong na u symbai jong me. 13Ka dei ban otsher keiñ ïa uta ïa u ba'n kha ha ïing jong me, bad ïa uta ïa u ba'n thied da ki sbai jong me: bad ka jutang jong nga kan long ka jutang baïaineh junom ha ka doh jong phi. 14Bad uta u khun shynrang baroh ïa u bym-otsher, ïa u bym shym la otsher ïa ka doh ka jingbym-otsher jong u, yn sa ot noh ïa kata ka mynsiem na u paidlang jong u; u la pynkheiñ ïa ka jutang jong nga.”
15U Blei u la ong ruh ha u Abraham, “Ïa ka Sarai ka tnga jong me, men ym khot kyrteng shuh ‘ka Sarai’ ïa ka, hynrei, ‘ka Sara’ kan long ka kyrteng jong ka. 16Ngan kyrkhu ïa ka ruh, bad ngan ai ha me ïa u khun ruh na ka: ho-oid keiñ ngan kyrkhu ïa ka, ba kan man long ka kmie ki jaid bynriew; bad ki syiem ki paidlang bynriew kin mih na ka.” 17Ynda kumta, u Abraham u la nguh ngon haduh khyndew, bad u la rkhie, bad u la ong ha la ka dohnud, “Shisha yn sa kha ïa u khun ïa u briew uba la shispah snem ka rta? bad ka Sara shisha kan ïoh kha khun, haba ka long kaba khyndaiphew snem ka rta?” 18Te u Abraham u la ong ha U Blei, “A tang ba un da ïoh im u Ishmael ha khmat jong me!” 19Bad U Blei u la ong, “Shisha keiñ ka Sara ka tnga jong me kan kha ïa u khun ïa me; bad men khot kyrteng ‘u Isaak’ ïa u: bad nga ngan pynskhem ïa ka jutang jong nga bad u, ïa ka ban long ka jutang ka baïaineh junom, bad u symbai jong u hadien jong u. 20Bad shaphang u Ishmael ruh, nga la shahshkor ïa me; ha khmih, nga la kyrkhu ïa u, bad ngan pynlong ïa u, u ban kharoi, bad ngan pynroi ïa u shikatdei eh; ïa ki khat-ar ngut ki syiem un pynkha, bad ngan pynlong ïa u ka jaid bynriew ka bakhraw. 21Hynrei, ïa la ka jutang ngan pynskhem bad u Isaak, ïa uba ka Sara kan sa kha ïa me kum ha kane ka Ïa hi ha ka snem ka ban sa mih.”
22Ynda kumta, U Blei u la wai noh ban kren ha u, bad U Blei u la leit kiew noh na u Abraham. 23Te u Abraham u la shim ïa u Ishmael u khun jong u bad ïa ki baroh kat kiba la kha ha ka ïing jong u, bad ïa ki baroh ruh kat kiba la thied da ki sbai jong u, ïa u shynrang baroh keiñ na ki rangbah ka ïing u Abraham; bad u la otsher ïa ka doh ka jingbym-otsher jong ki ha kata ka sngi hi, kumba U Blei u la lah kren ha u. 24Bad u Abraham u la long khyndaiphew khyndai snem ka rta mynba la otsher ïa ka doh ka jingbym-otsher jong u. 25Bad u Ishmael ruh u khun jong u, u la long uba khatlai snem ka rta, mynba la otsher ïa ka doh ka jingbym-otsher jong u. 26Ha kata ka sngi hi, la otsher ïa u Abraham, bad ïa u Ishmael u khun jong u. 27Bad ïa ki rangbah baroh na ka ïing jong u, ïa kiba la kha ha ka ïing jong u, bad ïa kiba la thied ruh da ki sbai na u nongwei, la otsher lem bad u.
Nu geselecteerd:
JENESIS 17: KHB
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
The Bible Society of India