MATIUS 10
10
E atakam botaw batewosom ow dua belas ajiwar
(Mrk. 3:13-19; Luk. 6:12-16)
1Bare. Yesus e amamkawi ow dua belas ajiwar ajateef. Ar masirin, dat botewerisim fakas, e ow atetamef. Aram cīncīn damasam, cīncīn dam kumitasam, inim dam baworomtaw fakas, e ow atatamef. 2Bare, e atakam botaw batewosom ow dua belas ajiwar ara: Simonam, arewec Andreasam, ara. (E Simon awun juwas ara masirin, Petrus.) Yakobusam, arewec Yohanesam, ara. (Ar Sebedeus atiperes ara.) 3Filipusam, Bartolomeusam, ara. Tomasam, Matiusam, ara. (E Matius e pemerintah uang batewanimtam kerja ipic ara.) E Alfeus itiw juwas Yakobusam, Tadeusam, ara. 4E Selot ipic juwas Simonam, Yudas Iskariotam, ara. (E Yudas e Yesus e jokmen ow botasimemtam ipic ara.) Bare, inim ow ara.
E atakam botaw batewosom ow tugas
(Mrk. 6:7-13; Luk. 9:1-6)
5Bare, Yesus e ow dua belas ajiwar atewosomef. Aram jirmec ajirimef. “Car e Yahudi opok ow acapinmi baysos arapok. Caram e Samaria ow akota bafiw arapok. 6Ca nat, e Israel owpu mamjisosey. Ar ajajemfes domba inim cimin ara. 7Ajisoscokom, inim atakam mamcacapiomey. ‘E Onam Op Pemerintah aenawcow jofay, bare sotopnakap asisienawma.’ Inim mameey. 8Caram e dam ow mamjaworomtawey. E damir owam mamjaworomsumutumey. Dam akat e penyakit kusta owam mamtetamey. E ow jak aman datam mamotewerisimey. Dor eras bwem fakas car mami atatamamin. Inimas car asan akat e ow mami mamomey. 9Caram ese uang epcom batowomos arapok. 10Ajisoscokom ara, pok ese batowomos arapok. Baju jamnukam, sandalam, onok pokam, batowomos arapok. Bare, ow e kerja a bwemtam ow amos batetamces.
11Car kawey kota afiwcokomnew, kawey samat cemsan afiwcokomnew, erasan car e acem batowomiwji ow epen, jonow mamtowporey. Car masirin, e cem inim mamemapey— e capinmi bakan ajisoscokom jofay ajiwara. 12Car cem afiwcokom, ‘Allah asan akat car batetamcan,’ inim mameey. 13E cem ow, asan akat car atowomiwcannew, Allah, asan akat e ow baamcow— e janim aanimcokomas jipua. E nat, e ow ca batowomiw opok aemcannew, caram, ‘Allah asan akat car botetam arapok,’ inim mameey. 14Ow e acemnew e akotanew car batowomiw opok aporcokomnew, ar caratakam ji bwe opok aporcokomnew, caram e ow bakan mamjiosey, wunam atakam e ow mamotawey. ‘Car daratakam ji bwe opok aemamokom. Inimas dosa aemamokom,’ Inim mameey. 15Atakamnak ara, e Allah, ow siksa bwem jofay aenawcow, ar e Sodomin Gomora capinmi ow siksa kanim inim aemcema. Ar nat, e car batowomiw opok kota ow siksa awutut aemcema.”
Ow ajurusemcesas atakam
(Mrk. 13:9-13; Luk. 21:12-17)
16“Jakaperey. Car domba inim cimin ara. Dor ara wasan juwur asanpu inim cimin atewosomamin. Inimas car amer cimin pires mamemey. Caram pari cimin binaw mamemey. 17Ca nat, ow pimicima. Ar car e salah atakam mamsakam ow aotasimemtamceman. Aram e asembahyang cem aman omop car aafceman. 18Ar car do mamkawi ow aporceman. Inimas ar car gubernur ow bipuam raja ow bipuam, ajijimtawceman. Ca nat, car e Atakam Akat e owam, e ajowowam, aotawcomokom. 19Ar car e ow aotasimemtamcan, car e atakam aotawcokomas, bi binip jirow arapok. E jofay ara, Allah, e atakam bi binip car atetamceman. 20E atakam aotawcokomas, bare carma opok. E caricipic aRoh, e atakam, car atetamceman.
21Wun owam, arepcewesnew, arewcewesnew, kawey ow aotasimemtamcemes. E kawey ow masirin, e ow acatiwcemes. Wun ducur owam e ajiwi kawey ow aotasimemtamcemes. E kawey ow masirin, e jiwiam acatiwcemes. E wun atiperesam, e arisepes afakaysomitcemes, wunam acatiwcemes. 22Ow car do mamkawi aporcan, ar takas bifan car afayomceman. E nat, ow e asepnak jofay ajiwar do mamkawi bakorompim opok aemces, aram ajoremcemes. 23Ow, kota cowok car ajurusumcannew, bare wun kota omar mamjisosey. Atakamnak ara, car e Israel kota takas bajaremkurum opok aemcomokom. E Asmat Anakat Ajaworemef Ipic bap aenawcema.
24Mamemem ipic, awut ara, wunam e amamememtam ipic, kanim ara, bare inimas opok. E kerja bwemtam ipic, ow awut ara, wunam kerja aramat ipic, ow kanim ara, bare, inimasam opok. 25E mamemem ipic e amamememtam ipic awcawor aememcow, bare er ajiwar baememerec. Wunam kerja bwemtam ipic, e akerja aramat ipic awcawor aememcow, er ajiwar baememerec. Ow atakam e cem aramat ipic aotawces, ‘Or Beelsebul ara,’ inim aeces, bare ar cemew kanim inim aatcemes. E nat, e ow, e cem ow, cemew awutut aatcemes.”
Dar ucim ow omar aecom?
(Luk. 12:2-7)
26“Inimas ara, car ow omar arapok. Ow e bapwirimtiwas takas, umuton aoporcemes. Owam e curuw atakam takas, jen ajikurumcemes. 27E jiwic aman atakam car aotawminas, jokam atakam mamotawey. E curuw atakam jen ajimokomas, e ajarewsiapmes ow bipu, atakam mamfakaytawey. 28Asmat ow, ow acatiwcemes. E nat, ar e anakat bwemcatiw asan opok. Bare, car asmat ow omar arapok. Allah nat, ow e adamam, e aranakatam, neraka aman daniwis bwemtiw fakas emcom. Bare, car Allah omar mameey. 29Ow, sok kanim jamnuk, uang sen cowoknakap ajititcemes. E nat, e sok cowoknakapam cenes bwemjuney asan opok— e caricipic inimas pwicak aporcor ara. 30Caram ara. Allah e cakus fin aporsipor amsom. 31Inimas omar arapok. Car penting ara. E sok arke nat, penting opok.”
“A ow doras ara”
(Luk. 12:8-9)
32“Ow e wun ow bipu atakam atawcesnew, ‘Dor Yesus mamkawi,’ inim aecesnew, doram e onam op doricipic bipu, ‘A ow doras ara,’ inim aecimin. 33Ow nat, e wun ow bipu atakam aotawcesnew, ‘E Yesus nomsom opok,’ inim aecesnew, doram e onam op doricipic bipu, ‘A ow doras opok,’ inim aecimin.”
Yesus mamkawinak
(Luk. 12:51-53, 14:26-27)
34“Ca nat, ‘E Yesus a capinmi, ow damos mamjiom capinmi bemapom aneyef,’ inim bi binip bacecerem arapok. Dor a capinmi, damos mamjiom capinmi bemapom baney opok. Dor a capinmi owec capinmi bemapom aenawof. 35Dor, atiw atakamin aricipic bom aneyof. Dor, apores atakamin arosowoc bomam, anin atakamin asok bomam, inimas aneyof. 36Ow acem ow, bare ajewew ow aememcemes.
37Ow damos e arisepes awut inim ajiomces, wunam damos dor kanim inim ajiomcenes, bare ar dorow memem awcawor opok ara. Ow damos e atiperes awut inim ajiomces, wunam damos dor kanim inim ajiomcenes, aram dorow memem awcawor opok ara. 38Ow arop salib batawtotor opok aemcesam, dor mamkawi opok aemcesam, bare ar dorow memem awcawor opok ara. 39Ow, bajorem jec awut awuces, aram bajorem opok aemcemes. Wun ow nat, kerja dor aemtamcemenes. E ow inim tugas aman damir aafces, aram ajoremcemes.”
Allah asan akat ucim ow tetamcow?
(Mrk. 9:41)
40“E ca atowomiwcan ow, aram dor e cem atowomiwcemenes. E cem atowomiwcenes ow, e atewenamfan ipicam cem atowomiwcemes. 41Ow, Allah atakam botaw ipic aporces, wunam ar e ipic e acem atowomiwces, bare, Allah, asan akat e owam atetamcema. Ar asan akat e aratakam botaw ipic inim atetamcowas, e owam atetamcema. Wunam, ow, jipic tarowat aporces, wunam ar e ipic e acem atowomiwces, bare, Allah asan akat e ow atetamcema. Ar asan akat e jipic tarowat inim atetamcowas, e owam atetamcema. 42Atakamnak ara, ow awapes mami ow domamkawi ow aporces, wunam e ow jufu bwinakas atetamces, bare Allah e ow asan akat atetamcema araman.” Yesus inim aeef.
Nu geselecteerd:
MATIUS 10: LAICNS
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
LAI 1985