MATIUS 10
10
Etope-tai Wija ma Gaati Ewitokita
1Okaija etope-tai wija ma gaati manaa-tijake enija maida make bida boko jaduwajawii, jaemigimake-tijake, daana me ka didi tuma tumaija ma, okeija debuu agijo utoma beu jaawetijake maija.
2Okei eti-awita bagee wija ma gaati kede eka kei ke: edoga kidi, Simon kidi, kii ke Peterus eebatita kidi, daana kenekame Andereas; daana Zabdi jokame Jakub ma, kenekame Jahja ma;
3Pilipus ma Bartolomius ma; Tomas ma, mege kotuu te-tai me Matius kidi ma; Alpius jokame Jakub ma, Tadius ma;
4Kanani ka me Simon ma, Judas Iskariot ma, Jesus eekegajawita me kidi.
Etope-tai Wija ma Gaati Ebadikumita
5Kei me wija ma gaati kede Jesus ebadikumii, etimakeete mana, „Ojaa bageepa te uwii, daana Samaria maki okogo ena ma wadoujo te kai;
6kodeja Israil uguwo ka igata dombaidoopa uwii.
7Uweetigo mana wudii, kii dani eteete mana, ’Epaawado ka jakimakita makiida kapa keega.’
8Didi bagee beu jaawii; bokata bagee ija eewii; tomo jago dani bagee jaojawii; enija jaemigimakai. Ikii ojaa kodo motita agijo ikiija na ojaa kodo menii.
9Mas mege juwa, perak juwa, tembaga juwa potò duba te watakijawii.
10Ita maida agija juwa, kagaba kakade wija juwa, bado awii juwa, bado kopa juwa te dokii. Kei te-tai me kidi naija agijo domakija kouja.
11Ikii maki katouda juwa, maki okogo juwa wadoujo kipa, enaa bagee epeepite eubai; kouda tojake kouda kodaa make uwii.
12Ikii me ka owaa wadoujo kipa kojáá mana tiga etii.
13Kou uguwo enaa keetigo ko, ikiija kojáá dimi jamejawii enaa; kodeja peu keetigo ko, ikiija kojáá dimi ikeepa joko mei enaa.
14Daana meija ti kijakimakipi, daana mana ti kijuwipi, kou owaapa ma, kou makijo ma podomija gaa kodo, bado maida ka maki puugee kigi atidokii.
15Beu maa kou ani kitii, boko petai putu naago kodo, kou makijo ka peu kai kodo ma ko, Sodom ma Gomora ma peu kai ko egaida.
16Dodowei! Ego jago jina jupi domba dani bukaa kibadikumii. Okai kouja ikii go-mote ga-mote ugenija bukaa kai, daana ikiija kegepa maija doodoo wonou bukaa kai.
17Me maida make ikii akaato munii. Okei pika-tai kotuuda keekegajawiitai kojoka, daana okeija sembahjang owaa duba godijai kitaitai;
18Gubernur jumaapa ma, maki jakimake-tai bagee jumaapa ma ani maida make ganeuto kigoutai; okei jumaapa ma, ojaa bagee jumaapa ma mana naawega-tita tijake.
19Kodeja okei keekegajawipai ko, ikii kawe dani wegaja juwa, daana má mana etija juwa, gaagaa te tai; ikiija etiita mana kodo kou gaa kodo ikeepa kaita kojoka.
20Ikii kede to wegai ko beu kojoka, kodeja Ikiitaija Roh ikii duba make wegai.
21Me ka kenekame boka-tijake eekegajawiitagi, daana nakame ka jokame maija; daana jokaane ka ukame nakame akaije ootijake boka-tijake eekegajawiitai.
22Daana utoma bagee aneeka maida make be kigaitai. Kodeja meija wiwitiida to bida peu tomakipi ko, ajii taitagi.
23Maki katouda make me ka peepu kitipai, maki enakaatoopa okii. Beu maa kou ani kitii, ikii Israil ka maki okogo utoma dubaiga uwina teete muumai beu gaa kodaa me Joka meitagi.
24Etope-tai me idaana okaija kuduu ma ko ibo ko beu, daana jakei te-tai me maija okaija etimake-tai ma ko ibo ko beu.
25Etope-tai me okaija kuduu ma ena dani ki-toojogo ko tiki, daana kei te-tai me okaija etimake-tai okai kou dani. Okei owaa ipuwe me Baalzebul eebatipai, okaija uguwo maija umina ewidogaitai.
26Okai kouja okei ke ikii weda te egai. Apumita agijo ena ma beu, ewaida te kaita mana kodo; daana boonita mana ena ma beu, epi te kija mana kodo.
27Ani bunita tapa make kitita mana awe tapa wegai. Gapa duba kitigi kitita mana owaimouda make pitokai.
28Daana má jato wagimake bagee, dimi mana te wagimakija kodaa, weda te egai. Kodeja dimi mana ma, má jato ma, wija kadaga bodija duba wagimakija me to weda egai.
29Beu, mee? piipaa ida wija mijo mege ena age kaa tija. Kodeja Ikiitaija gata dimi beuda idaana ma makiida te gootai.
30Kodeja ikiija migouda ka ijo epa gakimakita.
31Okai kouja ikii weda te gai. Piipaa wedaba ma ko ikii ke ibo age kojoka.
32Okai kouja me jumaapa naawega-tai me gakita ani maija Naitai jumaapa epaawado mana jawegaita.
33Daana meija me jumaapa beu puga natipi, ani maija Naitai jumaapa epaawado beu puga etaita.
34Ani muka-muka makiida mejawe-tijake meta dimi te nagai. Ani muka-muka mejawe-tijake mei ko beu, kodeja kataana mejawii.
35Me ka nakame ma akaije ootijawe-tijake ani mei kouja, daana jagamo joka ka ukame maija, daana jagamo akabaakaija maija;
36daana owaa enaida uguwo be akaga taitai.
37Meija ani ma ko nakame ma ukame ma euga ei egapi, okai aneepa edou peu; daana meija ani ma ko jokame euga ei egapi, okai aneepa edou peu.
38Daana meija pija boko te dokijake te naapepi okai aneepa edou peu.
39Meija okai akaato munipi, okai akaato igajawiitagi, daana meija ani maida make okai akaato igajawipi, okai akaato domakaitagi.
40Meija kijakimakipi, okai ani maija najakimakai; daana meija najakimakipi, nabadikumita me maija ejakimakai.
41Meija gokobaki tijawiidaiga wega-tai me, eka ko gokobaki tijawiidaiga wega-tai me kouja ejakimakipi, petege go-motiitagi, gokobaki tijawiidaiga wega-tai me danite; daana meija maakodo me idaana, eka maakodo me kouja ejakimakipi, petege go-motiitagi, maakodo me danite.
42Daana meija kei mijo bagee jupi ka me idaanaapa etopetai eka duba gemoo uwo no-tijake menipi, beu maa kou ani kitii, okaija petege umina te igaita.”
Nu geselecteerd:
MATIUS 10: EKG
Markering
Deel
Kopiëren
Wil je jouw markerkingen op al je apparaten opslaan? Meld je aan of log in