YOHANES 1
1
Ebe Wene andi abat agaikhe wene
1Omanggum eroba nen, wene Ebe Wene welagaikhe. Ebe Wene andi re, Allah inomat logolik he, ebe Allah at welagaikhe. 2At andi omanggum eroba nen at Allah inomat logolik,
3Allah nen yi mene ti mene mondogat elalik wagaikhe andi ebe re, at Ebe Wene nenat elalhikhe. At ebe lek logoilepma re, misigat ekhe elalilep legat. 4Nineluget ninaferek mene ero arat welagarek andi nen he, nit afuni seleget ninabi wagaikhe. 5Nit o mum oba were'ma seleget ninabi wagaikhe mene ibilik were'ma, o mum andi nen nagulu elo'legen ibiligat welagarek.
6-7O seleget ninaferek mene andi elu mene nen abok yaganisoageluk he, Allah nen ap enu Yohanes andi ayonggo fuluk lakfei wagaikhe. Lakfei wagaikhemo wagaikhe andi re, seleget ninaferek mene andi, abok afuni mondogat yagaisugunem, inendawinggen eberogoat at oba himbiret fouwageluk wagaikhe andi.#Mat. 3:1; Mrk. 1:4; Luk. 3:1-2 8At Yohanes andi ebe re, selegerinaferek andi re fuk. We, at he selegerinaferek mene andi abok yaganisageluk wagaikhe. 9At selek mene andi, kweangma yoma waga logolik, nit afuni mondogat ninebe lombok ninendawimo seleget ninabi wagaikhe.
10Arenat pogot kweang eleahikhe meneat he, at ebe kweangma wagaikhesik were'ma re, it afuni kweangma mene yoma nen, at ebe futfigi'lek welagaukwa. 11At onggwarek awiba wagaikhe meneat he, at oe agoren ebe wanhi'lek herakfisasukwa. 12A'nogo herakfisasukwa meneat he, it afuni ekhe nen at ebe wanhukwasik he, inendawinggen at oba himbiret fesukwama, Allah nen at againafuri ebe mene asuageluk miginafikhe. 13Migininafikhemo, at againafuri agaukwa andi re, afuni inagainafuri takha inamolo nen taginafik mep mene andogorogo taginafarek andi hak fuk. We at Allah nenat taginafikhe o.
14Ebe wene a'nogo abat agaikhesik ninomat welagagu. Ninomat logolik he, at ebe andi Allah amlogo misigat tago andi nen he, fogeratarek mene nineilenggen hasugu o. At obabut fano nen, fanorogo hilingninafik, wene ebe wene yaganisigik, ugu mondok were'ma nineilenggen hasugu.
15Wene at ebe faget Yohanes nen mel yagaisasikhe: ”An nombo'ne hobuk ap ekhe wesigin, iluk abok yagahisigirek a'nogo re, ebe yi aro. At yi hobuk an nombo'ne waga meneat he, ebe an oan ta'lagi'lek werek kwelek, at attagat welagaikhe andi nen he, an nebe sebelek mene, noe Kain mene re, araro,” iluk ane hokhorogo yagaisikhi lagaikhe. 16Nen at obabut fano mondogen ninebe mondogat hobuk alep fanotninabi'logo. 17Wene Allah nen komotninafikhe wene a'nogo Musa bene nen yaganisasikhe meneat he, Allah obabut fano nen fanotninafik, eberogo wene yaganisigik uageluk, at amlogo Yesus Kristus lakfei wagaikhemo yaganisasikhe andi. 18Afuni ekhe nen Allah ebe ineilenggen mondok higi'lek meneat he, at amlogo misigat tago eisena era'lu emberek higit welagaikhe mene andi nenat Allah ebe furogo yaganisa wagaikhe andi.
At Yohanes onggwarek faget abok pilingisogo yagaisasikhe wene
(Mat. 3:1-12; Mrk. 1:1-8; Luk. 3:1-18)
19At Yohanes nen wene a'nogo yagaisikho were'ma, it ap Allah eisewerek mene inom, inunggulenu Lewi mene inomen, ”Yohanes. Hat hebe re sa nogo?” iluk, oba heinok wanuageluk, ap Yahudi mene o Yerusalem en lakfisa wagaukwama Yohanes oba wagaukwa. 20Wagaukwasik at oba heinok wanhukwama re, at Yohanes nen onggwarek abok labelogo yagaisigi'lek, we fakhogoat yagaisikhi logolik, mel yagaisasikhe: ”An nebe re, afuni telninafu mene Allah nen ayonggo fuluk lakfei wesigin isikhe a'nogo fuk. Lego,” iluk yagaisasikhe.
21A'nogo yagaisasikhemo iren he, mel isukwa: ”Halok he, hat he, hebe sa nogo. Hebe Elia he a?” iluk yagatukwama, aren he, ”An nebe at andi fuk, hunogoaro,” iluk, ikhi lagaikhemo, iren he, mel yagatukwa: ”Halok he, ap ekhe Allah ane yaganisikhi logouwageluk ayonggo fuluk lakfei wesigin isikhe a'nogo he a,” iluk yagatukwama, aren he, ”Andi lego,” iluk yagaisasikhe.#Ul. 18:15, 18; Mal. 4:5 22A'nogo yagaisasikhemo iren he, mel yagatukwa: ”Halok he, hat hebe re sa nogo? Nit wene furogo yaganisamo re, it ap nit lakninobagai wagaikha mene, niren wene ekhe yagaisa la mene re, hat honggwarek faget he, honggwarek hendawimo nen he ninggi'nogo anggikhi lagen? Ninelu asuagen, furogo yaganisan o,” iluk yagatukwa.
23A'nogo yagatukwama at Yohanes nen he mel yagaisasikhe: ”At Yesaya Allah ane yagaisikhi lagaikhe mene a'nogo nen, mel isikhe:
Ap ekhe o leimo afuni le'ma andoma ane hokhorogo ikhi logolik he,
Ninoe Enupogot wesigin kwe fanorogo yati logoni o, iluk, ikhi logogin, iluk isikhemo lisu palek werek a'nogo re, nebe anaro,” iluk yagaisasikhe.#Yes. 40:3
24It ap wagaukwa andi re, it ap Farisi mene nenat lakfisa wagaukwama wagaukwasik, ekhe mel yagatukwa: 25”Haren he, an nebe re, afuni telninafu mene, Allah nen ayonggo fuluk lakfei wesigin isikhe a'nogo lego. Nen, Elia legaro. Nen Allah ane yaganisikhi logouwageluk lakfei wesigin isikhe a'nogo legaro, egen meneat he, afuni ima pelaginafi lagen andi nenahalok?” iluk yagatukwama re, 26at Yohanes nen he, mel yagaisasikhe: ”An nen afuni we ima pelaginafi lagi meneat he, ap ekhe hiren ebe futfigi'lek mene hinanggele'ma mendek werego. 27At andi ebe hobuk an nombo'ne waga meneat he, at ebe kain, an nebe yenggerek andi nen he, at eisok sepatu kwelabek mene andi, an nen nonggoligin elo'lego,” iluk yagaisasikhe.
28Wene a'nogo isukwa andi re, at Yohanes nen afuni i Yordan aik elikwe, ima pelaginafi lagaikheba, o enu Betania logoligen isukwa.
Yohanes nen Yesus ebe faget yagaisasikhe wene
29Wene a'nogo isukwasik, nogo iluk, ohealekwe, at Yesus Yohanes oba wagunem eilenggen yet hasikhesik he, wene mel yagaisasikhe: ”Allah anggo domba mene nit afuni kweangma weak hilingitorek mene korogo herakfisagain mene a'nogo waga a'li hineilenggen yethani. 30Attagat wene an nen yagahisikhi logolik he, Ap ekhe nombo'ne wesigin meneat he, an oan ta'lagi'lek werek kwelek, at welagaikhe andi nen, an nebe yenggerek mene re, arenek he, ebe kain mene o, iluk, abok yagahisikhi lagi a'nogo re, ebe waga ari aro. 31An attagat, at ebe an nonggotma re, sa heat, futfigi'lek welagagi meneat he, afuni Israel mene at ebe inelu asuageluk ima pelaginafi logoigeluk wagagi andi,” iluk yagaisasikhe.
32Yohanes nen a'nogo yagaisasikhesik, hobuk at eilenggen hasikhe mene fakhogo mel yagaisasikhe: ”Allah Areagun sue pel hangge mene pogoroba nen pi wagasik Yesus oroba laboksek were'ma neilenggen higi o. 33And sambul he, at ebe sa heat nonggot welagi meneat he, Allah nen an afuni we ima pelaginafi logouwageluk lak nobagai wagaikhe mene a'nogo nen yaganeti logolik he, mel yaganetikhe: An Nareagun ap ekhe oroba labok i pi wagasik were'ma heilenggen hegen halok he, at andi nen afuni ima pelaginabu hak, Naregaun inoba pelabi waga logogin o, iluk, yaganetikhemo andi nen he, 34at ebe neilenggen furogo higiri'mo andi nen he, futfigi o. A'nogo futfigirik, at andi Allah amlogo eberogo aro, iluk, abok hit fakhogo yagahisikhi lagi yi,” iluk yagaisasikhe.
At Yesus agoromi attak ombo'ne lagaukwa wene
35At Yohanes nen a'nogo yagaisasikhesik, nogo iluk, ohealekwe re, at Yohanes ebe inom, agoromi ane wanhi lagaukwa mene inebe pire inom, andoma mendek welagaukwa. 36A'nogo were'ma, at Yesus kwe andi kwe lageluk wagunem Yohanes eilenggen yet hasikhesik he, mel yagaisasikhe: ”Allah anggo domba mene a'nogo waga a'li yet hani,” iluk yagaisasikhemo,
37agoromi inebe pire aremnogo wene ane yagaisasikhe mene inesanggo holhukwasik he, Yesus ombo'ne lagaukwa. 38A'nogo ombo'ne lagunem Yesus elokhe hebekhogo eilenggen yerisasikhesik he, mel yagaisasikhe: ”Nagoromi, hit nena mene herarik wagep?” iluk yagaisasikhemo, iren he, nit ninaneba, ”Wene yaganisikhi lagen mene noe,” iluk u hak, it inaneba, ”Rabi, noe. Hat hawi o koma welagen mene?” iluk yagatukwama, 39aren he, ”Hiren hineilenggen tomok hobagaigen we'ni o,” iluk yagaisasikhe. A'nogo yagaisasikhemo, it inomat lagaukwasik he, o mo kobok i lagu kwelek jam 4 sore hangge, at welagaikheba ineilenggen hasukwasik, inom welagaukwa. 40Nen, it ap inebe pire Yohanes ane ugunem inesanggo holhukwasik, Yesus ombo'ne lagaukwa mene andem ap ekhe enu re, Andreas, Simon Petrus a'nogo agot. 41Yesus ombo'ne lagaikhesik inom welagaukwasik he, at Andreas andi tak oe Simon a'nogo herarik lagaikhesik, emberek ambi agaukwasik he, mel yagatikhe. Nit ninaneba Kristus afuni telninafi logogin mene a'nogo Allah nen ayonggo fuluk lakfei wesigin isikhe a'nogo u hak he, it inaneba Mesias agarek a'nogo nen he, ”Mesias a'nogo nit arat ninom ambi ago,” iluk yagatikhe.
42A'nogo yagatikhesik he, Yesus oba waluk wagaikhemo, at Yesus eilenggen at yethasikhesik he, mel yagatikhe: ”Simon Yona amlogo yi, nagore. hat henu Kepas ikhi logouwageluk salhafi o,” iluk yagatikhe. A'nogo yagatikhe andi re, nit yoma ninaneba enu helep isa u hak, Yunani inaneba Petrus agarek hak, Ibrani inaneba enu Kepas iluk salhikhe andi.
Yesus nen Filipus Nataniel emberek inayonggo fesikhe wene
43Enu a'nogo salhikhesik, nogo iluk ohealekwe re, at Yesus o Galilea lagai wesigeluk anggasikhesik lagai wagaikhe hak he, ap enu Filipus emberek ambi agaukwasik he, mel yagatikhe: ”Nagore. An nombo'ne eme o,” iluk ayonggo fesikhemo, at ombo'ne lagaikhe.
44At Filipus andi re, Andreas inom, Petrus inomat inawi sili o Betsaida misi'mo mene. 45Ombo'ne laga logolik, at Filipus a'nogo hobuk ap Nataniel emberek ambi agaukwasik mel yagatikhe: ”Nataniel. At Musa nen wene Allah nen komotninafikhe wene a'nogoba, ap ekhe abok ikhi logolik lisu palhik, nen, it ap Allah ane yagaisikhi lagaukwa mene omanogo nen abok ikhi logolik lisu palhik, isukwa mene a'nogo nit arat ninom ambi ago. At ebe re, Yusuf amlogo o Nasaret mene, enu Yesus aro,” iluk yagatikhe meneat he, 46at Nataniel en he, mel yagatikhe: ”A! O Nasaret a'lima nen fano mene ekhe elogat wesu hak nogo? Elo'lego,” iluk isikhemo, at Filipus nen he: ”hat heilenggen tomok hanogen eme o,” iluk yagatikhe. 47A'nogo yagatikhemo, at Nataniel Yesus oba wesigeluk wagunem at Yesus nen eilenggen yethasikhesik at abok mel yagaisasikhe: ”Ap ari ebe Israel eberogo mene. Ane pire ikherek mondok lek mene ari yethani!” iluk yagaisasikhemo, 48At Nataniel en he, ”Eige! Noe. An hilingitirek mene nobabut ninggi'nogo nen helu agama,” iluk oba heinok wanhikhemo, at Yesus nen he, mel yagatikhe: ”Nagore. Filipus nen hat oan wolhiigi'lek werek kwelek, hat hebe e ara eroma hurek welagen a'naga, an tak neilenggen hiigi o,” iluk yagatikhemo. 49At Nataniel en he, mel yagatikhe: ”Noe. Allah amlogo nit Israel mene ninoe kain Henupogot he, harat hiigi o,” iluk yagatikhe.
50A'nogo yagatikhemo, at Yesus nen he mel yagatikhe: ”An nen hat e ara eroma hurek welagen a'naga an arat neilenggen hiigi o iluk, yagaheti andiba futnobagegen a? Andi re, we endebat hangge hilingitunem neegen meneat he, hobuk hokhorogo hilingitunem heilenggen neagain o,” iluk isikhesik, 51hobuk wene ekhe mel yagaisasikhe: ”Afuni e pelarek kwe lagagik, pigik, agarek andi hak, hobuk pogot healogo it malaikat Allah nen yonggo lakfisa wagarek mene omanogo, an abat ta'lasi wagagi a'nogo noba lagagik, pigik, ugunem hineilenggen nisikhi logogun o, iluk nane eberogoat yagahisigi,” iluk yagaisasikhe.#Kej. 28:12
Nu geselecteerd:
YOHANES 1: inohap
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
