LUKAS 21
21
It afuni inenggi werek mene inom, he sogwe enggi lek mene inom, inomen uang Allah faget fisasukwa wene
(Mrk. 12:41-44)
1At Yesus nen a'nogo yagaisasikhesik, elokhe hebekhogo eilenggen yerisasikhe hak he, it afuni inenggi werek mene ekhe nen Allah faget uang peti elema fisagarek oba kwelafunem eilenggen yerinarek welagaikhe. 2Yerinarek were'ma, at he sogwe enggi lek mene ekhe wagaikhesik he, uang sen mondok endebat mene pire mene kwelafunem eilenggen hasikhe. 3-4A'nogo kwelafunem eilenggen yerisasikhesik he, afuni mel yagaisasikhe: ”It afuni inarupiah hokhorogoat oba peterogo faga andi, endebat hagaro. Meneat he, at he sogwe enggi lek mene andi endebat amburu onggo palogo nagain mene mondogat fisikhe andi nek he, mondok hokho hagat fisikhe o, iluk eberogoat yagahisigi,” iluk yagaisasikhe.
”Allah awi wurik afuni nen mondok meisalugun o,” iluk yagaisasikhe wene
(Mat. 24:1-2; Mrk. 13:1-2)
5A'nogo yagaisasikhesik, Allah awi helep elokhonggen fano wutukwa mene inom, o eil fanorogo yi mene ti mene Allah faget fisasukwa mene inom, ineilenggen yerogo logolik fogeratunem, 6at Yesus nen he, mel yagaisasikhe: ”Hit o hineilenggen yethikhi lagep andoma, hobuk helep ekhe hebisigi'lek mondok meisalogo lakfisogoin oba werego,” iluk yagaisasikhe.
”Attagat yi'nogo weak hilinghinabugun,” iluk yagaisasikhe wene
(Mat. 24:3-14; Mrk. 13:3-13)
7Wene a'nogo yagaisasikhemo, Yesus agoromi ane wanhi lagaukwa mene omanogo nen, at Yesus oba heinok wokhikhi logolik he, mel yagatukwa: ”Noe! Wene yaganisegen a'nogo re, mera nen hilinglasigin. Ebe hilinglasigiluk ugu kwelek he, ki mene tak hilinglagunem ninendawinggen wenggelasigin,” iluk yagatukwama, 8at Yesus nen he, mel yagaisasikhe: ”Afuni nen lalhinabinogo nen he, hinobabut hebelogo logoino o. Afuni inebe hokhorogo nen, inenu an nenu mene salogo nen mel ilik wesugun: At wesigin isukwa a'nogo an nebe wagi yi aro, igik, hilinglasigin a'nogo arat horogasi waga o, igik, ilik wesugun a'naga, it andi inane hinesanggo holfuluk inombo'ne lagubo. 9It ekhe nen, weim yabi'lagwi, igik, inebe misigat mene nen folim hibirogo mugisogo wulakfisili'lagwi, igik, iluk ugu halok he, hina'manggen laluk hinendawinggen abolok ugubo. Attagat a'nogo hilinglasigin meneat he, o wurep oba hilinglasigin mene andi re, weak-weak hilinglasigin lego,” iluk yagaisasikhesik he, 10wene ekhe mel yagaisasikheat: ”Afuni inunggulenu lombok weim kagalhik, ap inenupogot inagoromi inawe a'ma mene lombok weim kagalhik, kagalfuluk yafu kwelek, 11lugul hokho inailo mene langethigik, o yi awi ti awi sumburu mondok ouwak agik, ou obabut weak mene inoba agik, yi mene ti mene inailo mene hilinglagik, pogoroba nen hilingisu lek mene elalagik, igin o. 12Mene re, andi mondogat oan hilinglagi'lek werek kwelek he, attak he, afuni nen hinebe fakhinobagambik yi enggin ti enggin hilinghinafik, o samban agarek oba wokhinarek lagik, hele warogo fisagarek oba kwelakhinobagagik ap inenupogot inom, ap kain gubernur lak inom inoba wokhinarek lagik, ugun andi re, iren he an nenu ikhi logolik, hit at agoromi, iluk a'nogo hilinghinabugun o. 13A'nogo hilinghinabugun andiba re, an hilingitunem hineilenggen niikhi lagep mene yi abok fakhogo yagaisoagelugat fanoat hilinglasigin o. 14-15Andi sambul he, hiren wene onggo yagaisogoin mene, an nen hinendawimo kagalogo yagahisamo re, it wene hinoba fogoin mene andi nen, hit hinane andi lego, iluk onggo ugun mene legasigin. Andi nen he, oan hilinghinafi'lek werek kwelek, hit hinendawimo nen, wene a'nogo mene noba fugu halok, nebe elele helageluk he, onggo ki mene yagaisagain, iluk hinendawinggen fiti'legat logoino.#Luk. 12:11-12 16Nen, hineisugwi hinagaisawi nen, hinogogwi hinagoromi nen, hinagaila'lagen, hit wokhinarek he, o wene inoba figik, kotik, agarek oba hinobagai lagik, hinebe ekhe mondok hinoatik, ugun o. 17Nen, it afuni mondogaren he, an nenu uluk, hit he, at agoromi, iluk hinebe inabit mondok asugun. Meneat he, 18hinebe nongasugun lek, u hak he, hinesi hinunggul oba andoma misik halok ekhe longgo igin mondok lego. 19Halok he, hinendawinggen hambuget fakhaluk he, hinafe morogoat logogun halok he, nabulal-habulal helogoin o,” iluk yagaisasikhe.
O Yerusalem afuni endakwe mene nen sebelugun isikhe wene
(Mat. 24:15-21; Mrk. 13:14-19)
20At Yesus nen a'nogo yagaisasikhesik, wene ekhe mel yagaisasikhe: ”It ap tentara mene nen o kota Yerusalem ari mondok walingisogo kwelafa halok he, O larogo wulil tagalogo ninoasugun a'nogo arat horok asi waga higi o, iluk, hinendawimo anggano. 21-22Andi sambul he, yi'nogo hilinglasigin, ti'nogo hilinglasigin, iluk, it ap Allah ane lisu palogo fesukwa mene omanogo nen isukwa andi emberek higit asuageluk he, afuni weak hilingiri'lagwi mene unggum yogondak yaba wogisagain andi nen, hit o Yudea tonggwe logogun mene halok, tom oba heise lagagik, o Yerusalem logogun mene halok, o kota herakfisaluk heise pugulhik, ini o. Nen, o endakwe igaiba logogun mene halok he, o kota kwi wagubo.#Hos. 9:7 23Andi sambul he, o yoma mondok wiik-weakhogo hilinginafik, Allah a'mage afuni yoma inoba figik, hilinglasigin andi nen he, it hemi omalik ina'ma mene inom, ineagwi ketago ineilak wogisili'lagwi mene inom, weak hogoin andi eigo! Nendawilage! 24Afuni fena re, karok oba inoatik, fena re, hele warogo o yi awi ti awi fisa lagik, ugun o. Nen, o kota Yerusalem ari, afuni endakwe mene ineisogen alperelogo fembik, o sebeli kwi wesimbik logogun meneat he, mondok sebelek logogun lego. We, Allah nen,
It afuni endakwe mene, o Yerusalem huli andi hulibaat sebelek logogun, iluk anggasikhe higithogoat logogun o,” iluk Yesus nen yagaisasikhe.
”An abat ta'lasi wagagi a'nogo hobuk wesigeluk ugu kwelek, yi'nogo hilinglasigin,” iluk yagaisasikhe wene
(Mat. 24:29-31; Mrk. 13:24-27)
25At Yesus nen a'nogo yagaisasikhesik he, hobuk ekhe mel yagaisasikhe: ”Hinendawinggen wenggelogo re, mo inom, tugi inom, hesagal inom, andi elokhe hunogoat mene hilinglagunem hogoin o. Nen, kweangma yoma i laut mogwe hokho yenggelek welagarek a'nogo ha'labu omamerogo waga logolik he, i eindep ane hokhorogo ikhi logoumo re, it afuni inunggulenu lombok inailo asimbik inendawinggen fisigin o.#Yes. 13:10; Yeh. 32:7; Yl. 2:31; Why. 6:12-13 26Nen, pogoroba inomame hokho mene inabologet hikhi logoumo, afuni o yi awi ti awi welagaikharek mene nen he:
Yi'nogo hilinglagik, ti'nogo hilinglagik, igin a'nogo arat hilinglasigin higi, iluk inailo nen inendawinggen mondok legasigin o. 27Andi sambul he, an abat ta'lasi wagagi a'nogo nomamerogo ohena anggele'ma pi wagunem, ineilenggen neambik hokhorogo fogetnabugun o.#Dan. 7:13; Why. 1:7 28Wene mondogat hilinglasigin igi andi, eroma hilinglaga halok he, hit hinendawimo nen he,
Telninabigin a'nogo arat horogasi waga o, iluk, hinebe menlasimbik hinot legeisogo logoino,” iluk yagaisasikhe.
Wene e ara oba lirogo yagaisasikhe wene
(Mat. 24:32-35; Mrk. 13:28-31)
29At Yesus nen a'nogo yagaisasikhesik he, wene ekhe oba lirogo mel yagaisasikhe: ”Yi e, ti e inom e ara inom, hilingiterek a'nogo futfeni! 30E andi engga lologo pikheresik hobuk sabelhu halok he,
Yogo. O yogondak hibi asigin higi, iluk hinamu hinendawimo nen futfikhi lagep anggigi. 31Andi hak he, an nen,
Yi'nogo hilinglasigin, ti'nogo hilinglasigin, iluk yagahisigi a'nogo ebe hilinglagunem hineilenggen hambik hinendawimo nen he,
Allah nen awe a'ma inobagagin a'nogo arat horogasi waga higi, iluk hinendawimo anggano. 32Yi'nogo hilinglasigin, ti'nogo hilinglasigin, iluk yagahisigi andi, afuni o yogondak werek mene inebe ekhe legagi'lek oan werek kwelegat, mondogat hilinglasigin o, iluk eberogoat yagahisigi. 33Pogot inom, kweang inom, legasigin meneat he, an nane andi legasigin lego, etok mondok logogin” iluk yagaisasikhe.
Inebe hebelogo logouwageluk komorinafikhe wene
34At Yesus nen wene a'nogo yagaisasikhesik he, ekhe mel yagaisasikhe: ”Yi mene ti mene isago werago hinalabut ninghogo ninggik, i lugulugwi paluogeluk nenggarek mene ninggik, yi mene ti mene kweangma mene faget menenei uan horok ebetik, a'nogo hilingirik nikhi logolik hinebe hebelek lek hesanggeat were'ma, 35paik sapna nen alperelogo waterek hak, an wene igi andi misigamat hilingiti logolik, afuni kweangma mene mondogat weagerinafi logolik, hit hinomat weaget hinabinogo iluk he, hinebe hebelogo logoino. 36Yi'nogo ti'nogo mondogat hilinglasigin igi a'nogo hilinglagu kwelek he, hinomamerogo hinafe morogo logolik, hinenggali legat nelokhoma mendek were'ma, an abat ta'lasi wagagi a'nogo hisa wesigen he, hundik-handik sambanat ikhi logolik he, hinebe hebelogo logoino o,” iluk yagaisasikhe. 37Wene a'nogo yagaisasikhesik he, hobuk, at Yesus o wei ugunem Allah awi wuri'mo, wene yagaisigik, o hubagunem tom Zaitun punuba samban i lagagik, ikhi lagaikhe.#Luk. 19:47 38A'nogo ugunem, afuni mondogat omanogo at ane holuogeluk he, Allah awi wuri'mo hup siakhogo andogosi waga lagaukwa.
Nu geselecteerd:
LUKAS 21: inohap
Markering
Deel
Kopiëren
Wil je jouw markerkingen op al je apparaten opslaan? Meld je aan of log in