KEJADIAN 3
3
Hataholi-a lena-la'ban Manetualain
1 #
Nin. 12:9, 20:2 Menge nde been-na, bana esa, malela keke'din-na seli, lena heni basa bana lala'en, fo Manetualain nakadada'dik-kala. Menge ndia, natane inak ndia nae, “Ade, te'e-te'e Manetualain kena-ka'i emi mi'a basa ai manai osi ia dalek lala'en-na, boan-nala hetu do?”
2Inak ndia nataa nae, “Ami bole mi'a basa ai manai osi ia dalek-ka, boan-nala, 3te ka'da ai fo manai osi-a tala'da heon-na, Manetualain kena-ka'i ami mi'a ai ndia boan-na, do koila'e fan; metema ami mi'an soona, neukose mate ami.”
4Menge ndia nataa nae, “Ndia ta la'e fan; neukose ta mate emi fa. 5Manetualain nafa'da nae leondia nanahu, Ana bubuluk, metema emi mi'a ai boak ndia soona, neukose emi dudu'a-aafim natahuka; fo neukose emi da'di sama leo Manetualain, fo emi bubuluk hata fo malole ma hata fo mangalauk-ka.”
6Inak ndia nita ai ndia manahiik, ma mete boan-na soona, mala'da hiik soaneu na'an. Ma ana dodoo, nae malole-na seli, metema ana da'di hataholi dodole maneu. Hu ndia de, ana seu-na ai ndia boan-na, boema na'a, ma ana fe saotoun fo sama-sama non nai ndia boe, de sao toun-na boeo na'a. 7La'a basa ai boak ndia tutika, dudu'a-aafin-nala latahuka, de lame'da, lae sila makaholak-kala. Hu ndia de, ala tututi-tatapa ai kaak-ka doon-na, de ala babaa ketu aon-nala.
8Le'donosok ndia, ala lamanene Manetualain la'o-la'o nai osi dale, boema duas leu ke'ke nai ai-la tala'da, fo ela Manetualain boso nitas. 9Tehu Manetualain naloo bou-bou neu touk ndia nae, “O nai bee?”
10Touk ndia nataa nae, “Au amanene O nai osi dale; de au bii, da'di au ke'ke, nanahu au makaholak.”
11Manetualain natane nae, “See nde nafa'da o, nae o makaholak? Ade, o mu'a ai, fo Au kena-ka'i o mu'an ndia so hetu?”
12Touk ndia nataa nae, “O fe au inak fo, ana da'di au tia-laing ndia, nde fe au ai ndia boan-na, boema au u'an so.”
13 #
2Kor. 11:3; 1Tim. 2:14 Manetualain natane inak ndia nae, “Tao le'e de, o tao dede'ak ndia?”
Boema nataa nae, “Menge ke'di-na au, nalosa au u'a ai ndia boan-na.”
Manetualain naketu huhukuk
14Basa ndia boema, Manetualain nafa'da menge ndia nae, “Neukose o nanahukuk, nanahu o tatao-nono'im ndia; neme basa bana lala'en-na mai, ka'da o mesam-ma nde muse lu'a-lepa soo-supak ia: Mulai besak ia, neukose o lo'do menik o teim-ma, ma o mu'a dae nai o fai maso'dam-ma dalek. 15#Nin. 12:17O ma inak ndia, neukose esa musu no esa, ma tititi-nonosin ma o tititi-nonosim, neukose esa musu no esa. Neukose tititi-nonosin, tutu lakabebelak o langam-ma, ma neukose, o kaan neu sila eitingan-nala.”
16Boema, Manetualain nafa'da inak ndia nae, “Neukose, Au popo-tama seluk o he'dim-ma, nai lelek o bei mailu, ma nai lelek o bongi. Tehu leomae leondiak boe, o nasa sasaom soaneu o saotoum-ma, bei nahele, tehu, neukose o makatele neun.”
17 #
Ibr. 6:8
Boema Manetualain nafa'da touk ndia nae, “O mamanene o saoinam-ma hala-kokolan, de o mu'a ai fo, Au kena-ka'ik ndia boan-na so. Hu kande o tatao-nono'im ndia, de dae-a nanasoo-supak. O muse maue-male'di no puse ti'tik, nai o fai maso'dam-ma dalek, fo ela dae ia, bisa fe buna-boa manadaik soaneu o nana'a-nininum. 18Neukose dae-a, moli makatemak ma dila-nggauk ba'eneu o, ma neukose na'u-aiana fuik-kala, ala da'di o nana'am. 19Neukose, o maue-male'di no sosota-mamanguk, ma o pusem ma ti'ti, soaneu ana taon-na dae ia nabuna-naboa hata esa, losa o fali leo dae-a muu, nana o da'di meme dae-a mai. O da'di meme dae-a mai, de neukose o fali leo dae-a muu boe.”
20Adam foi saoinan-na na'de Hawa, nanahu inak ndia, ana da'di inak neu basa hataholi daebafak-ka lala'en-na. 21Boema Manetualain tao fe Adam no saoinan-na, bua-lo'a papakek neme bana louk-ka mai, de Ana o'dun neu duas.
Adam ma Hawa nanausik neme osi Eden-na mai
22 #
Nin. 22:14
Manetualain nafa'da nae, “Besak ia, hataholi-a da'di sama leo Ita so, ma nanuu malelak la'eneu hata fo malole, ma hata fo mangalauk-ka so. Da'di paluu tapanggen, fo boso na'a ai fo, manafe maso'dak-ka boan-na, fo ela ana boso naso'da losa dodoon-na.” 23Boema, Manetualain usi heni hataholi ndia neme osi Eden-na dalek mai, de nadenun ana foi-fala dae fo ana da'di neme ndia mai. 24Basa boema, nai osi ndia boboan dulu, fo nai lelesu leo dalek neu-a, Manetualain pe'da kerub-kerub, lai ndia, ma tafaina esa, isin-na pila lo'a-lo'a, ana puta leo basa mamanak lala'en-na neu, fo nanea enok leo ai manafe maso'dak ndia neu. No enok ndia, ta hapu hataholi esa boen, bisa neu leo dalek neu, fo ana deka no ai ndia.
Nu geselecteerd:
KEJADIAN 3: twu
Markering
Deel
Kopiëren
Wil je jouw markerkingen op al je apparaten opslaan? Meld je aan of log in