Tshibangidilu 2
2
1Ke muvua Mvidi Mukulu mujikije diulu, buloba ne bintu bionsu bidipu. 2Mvidi Mukulu mumane kujikija mudimu uvuaye muenze, kuikishaye dituku dia muanda muteketa. 3Dituku dia muanda muteketa kushala diende dia tshijila, bualu ndituku divuaye muikishe kunyima kua midimu yende ya Mufuki.#2.3 Tangila Tshim 20.11; Ebr 4.4, 10. 4Ke muvua Mvidi Mukulu mujikije mudimu wa kufuka diulu ne buloba nanku.
Lupangu lua Edene
Dituku divua Maweja-Nangila Mvidi Mukulu mufuke diulu ne buloba, 5mitshi ne bisosa kabivua bianji kutoloka to. Bualu Maweja-Nangila Mvidi Mukulu kavua muanji kulokesha mvula, kabidi muntu kavuapu bua kudima buloba. 6Mayi avua apatuka munda mua buloba ke avua abupesha tshitalela.
7Maweja-Nangila Mvidi Mukulu kuangata dima, kufuka nadi mulume, kumuela mueyelu wa muoyi mu mimpempe ya diulu, mulume kushala tshifukibua tshidi tshienda ne muoyi.#2.7 Tangila 1 Kor 15.45. 8Maweja-Nangila Mvidi Mukulu kuenza lupangu mu ditunga dia Edene luseke ludi diba dipatukila, kutekamu muntu uvuaye mufuke awu. 9Maweja-Nangila Mvidi Mukulu kumenesha mitshi ya mishindu yonsu pa buloba, mitshi milenga kumona ne mesu, mimpe kudia mukana. Munkatshi mua lupangu muvua mutshi wa muoyi ne mutshi wa kujingulula malu mimpe ne mabi.#2.9 mutshi wa muoyi: Didim 2.7; 22.2, 14. — kujingulula malu mimpe ne mabi: badi mua kuandamuna kabidi ne: kumanya bionsu (kabidi mu kan. 17 ne mu 3.5,22).
10Musulu wa mayi kupatuka mu Edene bua kufila tshitalela mu lupangu. Musulu awu uvua mupanduluke misapa inayi. 11Dina dia musapa wa kumpala didi Pishona; wowu udi munyingulule ditunga dijima dia Avila. Muaba awu mudi mpawungi, 12mpawungi muimpe mutambe, kamonya ka dipembu ka mbdeliyume ne mabue a mushinga mukole a onikse kabidi. 13Dina dia musapa muibidi didi Ngishone; wowu udi munyungulule ditunga dia Kushe.#2.13 ditunga dia Kushe: bamue badi bela meji ne: ditunga edi divua mu buloba bua Mezopotamiya. Bakuabu badi bamba ne: divua kuinshi kua ditunga dia Ejipitu (nanku nSudane nansha Etiyopiya). 14Musapa muisatu ke Tigre; wowu udi upita ku luseke ludi diba dipatukila lua tshimenga tshia Ashure. Musapa muinayi ke Perate.
15Maweja-Nangila Mvidi Mukulu kuteka muntu mu lupangu lua Edene bua kudimamu ne kulama bintu bionsu bivuamu. 16Maweja-Nangila Mvidi Mukulu kuelela muntu mukenji ne: “Udi mua kudia bimuma bia mitshi yonsu idi mu lupangu. 17Kadi kuena mua kudia bimuma bia mutshi wa kujingulula malu mempe ne malu mabi. Dituku divuadia bimuma bia mutshi awu, tshiebe ndufu.”
18Maweja-Nangila Mvidi Mukulu kuamba ne: “Ki mbimpe bua mulume ikale nkayende nansha. Ndi musue kumuenzela mukuende wa bu yeye udi mua kumuambuluisha.” 19Maweja-Nangila Mvidi Mukulu kuangata dima, kuenza nadi nyama yonsu ya pa buloba ne nyunyi yonsu ya mulu. Kuyifilaye kudi muntu bua amone mudi muntu uyinyika mena. Nyama yonsu uvua witaba dina divua muntu umuinyika. 20Muntu kuinyika nyama yonsu ne nyunyi yonsu ya mulu mena. Kadi ku luende luseke, kavua mupete mukuende wa bu yeye uvua mua kumuambuluisha. 21Nanku Maweja-Nangila Mvidi Mukulu kuladika muntu mulume tulu tukole. Kulamunaye lubala lumue mu lubadi luende, kupingajapu munyinyi. 22Maweja-Nangila kuangata lubala luvuaye mulamune alu, kuenza nalu mukaji, kumupesha mulume. 23Mulume umona mukaji, kuelaye diyi dikole wamba ne:
“Mpindiewu mbapetshi wa ku meme,
munyinyi wa ku munyinyi wanyi,
mufuba wa ku mifuba yanyi.
Nebamubikile ne: ‘Mmukaji’,
bualu mmufumine kudi mulume.#2.23 mukaji-mulume: mu muakulu wa bena ebrewu, muaku wa isha (mukaji) mmufuanangane ne muaku wa ish (mulume).”
24Ke padi mulume ushiya tatuende ne mamuende, ulamata mukajende, bua bonsu babidi bikale anu muntu umue.#2.24 Mat 19.5; Mar 10.7-8; 1 Kor 6.16; Ef 5.31.
25Bonsu babidi mulume ne mukaji bavua butaka, kadi kabayi bafua bundu.
Nu geselecteerd:
Tshibangidilu 2: TSH96
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Bible avec Livres Deutérocanoniques en Tshiluba © Société Biblique de la R. D. Congo, 1996