Joni 17
17
Kukomba kwa Jesu masiku ngaakaabwa
1Naakamana kwaamba majwi aaya Jesu wakalungumana kujulu akuti, “Taata, ciindi casika lino, aboobo kolemya Mwanaako kutegwa awalo akulemye. 2Mbuli mbomupede bulelo bwabantu boonse bwakupa buumi butamani kuli baabo boonse mbookamupa. 3Buumi butamani, nkuti bakuzibe yebo O Leza olikke buyo, a Jesu Kilisito ngookatuma. 4Ndakakulemya ansi aano nindakalondola mulimo ooyo ngookandipa kuti ngucite. 5Aboobo kondilemya ono Taata mbwindaboola kulinduwe, kondilemya abulemu oobo mbundakajisi nindakali ayebo nyika kiitanalengwa.
6“Aabo mbookazandula kuzwa mubantu boonse akubapa kulindime, ndabaiisya kuti bakuzibe. Bakali bako, pele wakabapa ndime, eelyo bakaziba njiisyo zyako. 7Lino balizi kuti zyoonse nzyondipede zizwa kulinduwe, 8nkaambo ndabaiisya majwi aayo ngookandilailila. Bakaatambula, lino balizi cakasimpe kuti ndakazwa kulinduwe alimwi balasyoma kuti nduwe wakandituma. 9Aaba mbambabo mbenkombela. Nsikombeli bamunyika pe. Nkombela aabo mbookandipa, nkaambo mbabako. 10Boonse bangu mbabako, abako mbabangu, nkabela ndilalemezegwa mulimbabo. 11Lino ndilaza kulinduwe, nsikkalilili ansi aano, pele balo bacili ansi aano. Taata oosalala, kobakwabilila azina lyako aabo mbookandipa, kuti babe omwe, mbubonya aswebo mbotuli omwe. 12Mebo nindali ambabo, ndali kubalela muzina lyako aabo mbookandipa. Ndali kubakwabilila, aboobo taakwe naba omwe wabo wakasweeka, ccita buyo ooyo wakeelede kunyonyooka mbubwaamba Malembe. 13Pele ono ndaza kulinduwe, nikuba boobo zintu eezi ndazikanana nkencili ansi kutegwa bakondwe kapati mbuli mbwekondedwe. 14Ndabaiisya majwi aako nkabela bamunyika balibasulaikide nkaambo tabali bamwi babo, mbubonya ambebo mbwentali wabo pe. 15Nsibakombeli kuti ubagwisye munyika, pele kuti ubakwabilile kuzwa kumubi. 16Tabali banyika eeyi mbubonya ambebo mbwentali wanjiyo. 17Basalazye amajwi aako, nkaambo majwi aako ngamasimpe. 18Mbubonya mbookandituma muluundu, ambebo ndabatuma muluundu. 19Nkaambo kabo ndalipa kulinduwe, kuti mbubonya abalo balipe kulinduwe mukasimpe.
20“Tandikombeli bali waano balikke aaba pe, ndakombela abaabo basyoma mulindime kwiindila mumajwi aabaaba. 21Ndibakombela kuti boonse babe omwe, mbubonya yebo Taata mboli mulindime, ambebo ndili mulinduwe, abalo mbubonya babe mulindiswe kutegwa luundu loonse luzumine kuti nduwe wakandituma. 22Mbubonya mbookandilemeka ambebo ndabalemeka kutegwa babe omwe mbubonya aswe mbotuli omwe. 23Mebo mulimbabo, ayebo mulindime, kuti abalo bakamantane ncobeni, kutegwa luundu luzibe kuti nduwe wakandituma alimwi akuti wakabayanda mbubonya mbookandiyanda ambebo. 24Taata, ndilayandisya kapati kuti aabo mbookandipa bakabe andime ooko nkweenjooba. Kuti bakabubone bulemu bwangu oobo mbookandipa mukundiyanda kwako ciindi nyika kiitanalengwa. 25Taata ooluleme, bamunyika tabakuzi pe, pele mebo ndilikuzi, abalo aaba balizi kuti nduwe wakandituma. 26Ndabaiisya kuti bakuzibe alimwi nsitileke pe, kutegwa luyando oolu ndookandiyanda lube mulimbabo, ambebo ndibe mulimbabo.”
Nu geselecteerd:
Joni 17: Tonga96
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Tonga Bible © United Bible Societies, 1994.
