Joni 4
4
Mukaintu Musamaliya
1Lino Bafalisi bakamvwa kuti Jesu wakali kusandula akubbapatizya basikwiiya banji kwiinda Joni. 2(Nikuba kuti Jesu lwakwe mwini taakali kubbapatizya, mbaasikwiiya bakwe buyo.) 3Eelyo Jesu naakaziba kuti Bafalisi bamvwa oobo, wakazwa mucisi ca Judiya akuunka kucisi ca Galilii. 4Mulweendo oolo wakainda mucisi ca Samaliya. 5Wakasika kumunzi umwi uutegwa Sikaa, uuli kumbali aamuunda ooyo Jakobo ngwaakapede mwanaakwe Josefa. 6Kubusena oobo kwakali mukalo wa Jakobo. Lino Jesu mbwaakakatede kweenda, wakakkala ambali aamukalo. Cakali ciindi casikati.
7Mpoonya kwakasika mukaintu umwi Musamaliya uza kukuteka maanzi. Jesu wakati kulinguwe, “Ndipa maanzi nnywe.” 8Ciindi eeco basikwiiya bakainkide mumunzi kuyooula zyakulya. 9Mukaintu wakati, “Ino inga yebo o Mujuda wandikumbila buti maanzi aakunywa nde Musamaliya?” (Nkaambo Bajuda tabalyatani a Basamaliya). 10Jesu wakaingula kuti, “Kuti noolizi cipego ca Leza, akuziba yooyo uukukumbila maanzi aakunywa, yebo noomukumbila maanzi aabuumi, nkabela naakupa.” 11Mukaintu wakati, “Omwami, tee tojisi cakutesya, alimwi mukalo ooyu mulamfu, ino maanzi aayo aabuumi inga waateka buti? 12Sena uli mupati kwiinda taata Jakobo wakatupa mukalo ngwaakali kunywa walo mwini, bana bakwe aŋombe zyakwe?” 13Jesu wakati kulinguwe, “Muntu woonse uunywa maanzi aaya ulafwa nyota alimwi. 14Pele muntu uunywa maanzi ngemupa mebo, takonzyi kufwa limbi nyota pe. Maanzi aayo aayooba mbuli kasensa kamaanzi aabuumi mulinguwe, katuntumukila kubuumi butamani.” 15Mukaintu wakati, “Omwami, ndipa maanzi aayo, kutegwa nkentacifwi limbi nyota, akuti nkentacinoobooli kuno kuteka alimwi.” 16Jesu wakati kulinguwe, “Koya ukaite mulumaako, ukaboole anguwe.” 17Mukaintu wakaingula kuti, “Nsijisi mulumi.” Mpoonya Jesu wakati, “Uliluzi noti nsijisi mulumi, 18nkaambo wakali kwetwe baalumi bosanwe, nkabela ooyo uukukwete sunu tali mulumaako pe. Aboobo waamba kasimpe.” 19Mukaintu wakaamba kuti, “Omwami, ndaziba ono kuti uli musinsimi. 20Bamataata bakali kukombela mudundu eeli, pele no Bajuda mwaamba kuti bantu beelede kukomba ku Jelusalemu.” 21Jesu wakati kulinguwe, “Baama, masimpe ciindi cilasika nimutakoyookomba Taata mudundu eeli nikuba ku Jelusalemu. 22Nywebo mukomba ncomutazi, pele swebo tukomba ncotuzi nkaambo lufutuko luzwa ku Bajuda. 23Pele ciindi cilasika, kwalo casika kale, aawo aabo bakomba cakasimpe bayookomba Taata mumuuya amubwini. Mbambabaabo Taata mbayanda, kuti kabamukomba. 24Leza Muuya, aboobo aabo bamukomba baleelede kumukomba mumuuya amubwini.” 25Mukaintu wakaamba kuti, “Ndilizi kuti Munanike wa Leza ulaboola, asika uzootutondezya zintu zyoonse.” 26Jesu wakati kulinguwe, “Mebo engambaula waano ndendime yooyo ngooamba.”
27Mpoonya abalo basikwiiya bakwe bakasika. Cakabagambya kujana kuti Jesu ulaambaula amukaintu. Nikuba boobo taakwe naba omwe wakabuzya mukaintu ooyo kuti, “Ino uyanda nzi?” Nikuba kubuzya Jesu kuti, “Ino waambaula nzi ayooyu?” 28Lino mukaintu ooyo wakasiya nongo yakwe wainka mumunzi kuyooambila bantu kuti, 29“Kamuboola, mukabone muntu wandaambila zintu zyoonse nzendakacita. Ambweni ngo Munanike wa Leza?” 30Bantu bakasiya munzi akuunka kuli Jesu.
31Ciindi eeco basikwiiya bakatalika kukombelezya Jesu kuti alye. 32Walo wakabaambila kuti, “Mebo ndilijisi cakulya ncomutazi.” 33Nkaako basikwiiya bakatalika kulyaambauzya muli cabo kuti, “Sena kuli muntu wamuletelede cakulya?” 34Pele Jesu wakati kulimbabo, “Cakulya cangu nkucita ziyanda yooyo wakandituma, akumanizya mulimo wakwe. 35Tee mwaamba kuti, ‘Kwasyaala myezi yone buyo kuti tutebule.’ Ndamwaambila kuti amubone myuunda, mulange maila mbwaayuma kale, alindila buyo kutebulwa. 36Sikutebula ulavola mumulimo wakwe, ulabungika micelo iitola kubuumi butamani kutegwa ooyo wakasyanga ayooyo uutebula batangale antoomwe. 37Kasimpi aaka kaamba bwini kati, ‘Umwi musyangi, umwi mutebuzi.’ 38Anywebo ndamutuma kuti mutebule nzimwatakalima. Bakalima mbambi, nywebo mwaabonena buyo mumilimo yabo.”
39Basamaliya banji bazwa mumunzi bakasyoma muli Jesu akaambo kamajwi aakaamba mukaintu kuti, “Wandaambila zyoonse nzindakacita mubuumi bwangu.” 40Nibakasika kuli Jesu, bakamukumbila kuti akkale ambabo mumunzi. Wakakkala ambabo kwamazuba obilo. 41Nkabela banji-banji bakasyoma akaambo kamajwi ngaakabaiisya. 42Bakaambila mukaintu ooyo kuti, “Twasyoma kutali buyo makani aako, pele nkaambo twalimvwida tobeni, aboobo twaziba kuti ncobeni ooyu ngo Mufutuli wanyika.”
Jesu mbwaakaponya mwana wa walupati-pati
43Naakamana mazuba obilo, Jesu wakazwa mumunzi akuya kucisi ca Galilii. 44Jesu mwini wakaambide kuti, “Taakwe musinsimi uulemekwa kwabo.” 45Naakasika mu Galilii, bantu bacisi eeci bakamutambula kabotu, nkaambo bakaliko ku Pobwe lya Kwiindilila akubona zintu zyoonse nzyaakacita mu Jelusalemu ciindi capobwe.
46Wakasika alimwi kumunzi wa Kana, ooko nkwaakasandula maanzi kuba waini. Kwakali umwi muntu walupati-pati wakali aamwana wakali kuciswa ku Kapenaumu. 47Naakamvwa kuti Jesu wazwa kucisi ca Judiya akuboola ku Galilii, wakaza kulinguwe akumukumbila kuti akamuponyezezye mwana, nkaambo wakali aafwiifwi akufwa. 48Jesu wakamwaambila kuti, “Mwatabona zitondezyo zyanguzu azigambya zimwi tamusyomi.” 49Muntu walupati-pati wakaambila Jesu kuti, “Omwami, koboola natanafwa mwanaangu.” 50Mpoonya Jesu wakati kulinguwe, “Koya buyo, mwanaako wapona.” Eelyo muntu ooyo wakasyoma majwi aakaamba Jesu, wakabweeda kumunzi wakwe. 51Naakacili munzila, bazike bakwe bakamucingauzya akumwaambila kuti, “Mwanaako wapona.” 52Wakababuzya naa nciindi nzi mwana naakatalika kulimvwa kabotu. Bakati, “Jilo ciindi casikati naakatalika kulimvwa kabotu.” 53Mpoonya wisi wakaziba kuti ncicakali ciindi Jesu naakamwaambila kuti “Mwanaako wapona.” Lino walo abaŋanda yakwe boonse bakasyoma. 54Eeci ncecitondezyo cabili Jesu ncaakacita naakazwa mucisi ca Judiya kuya mucisi ca Galilii.
Nu geselecteerd:
Joni 4: Tonga96
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
Tonga Bible © United Bible Societies, 1994.
