Matoose 6
6
Jhi'ose inge gisha
1Yesuusani assi zeerisine <<Modhe hanta hantisine <Hagaa, axi taa beyye> hissine hi hante hanta garafa hinumba kakkuwayte. Yeenke maaqo'ayko afaa yese hinade garafa aba woomani degexuwaytako. 2Jhi'ose ingisine axi uddi eroronike matofita. Axi nashoronike Ayhuda Bhikkilo Zawaakani ogiyakani hanteesiti awshachitako! Aadeko hinuse ta ohe, be efashe wooma ettiko u yese. 3-4Nenimay jhi'ose ingo ne inge woggaaka ne ingoy ijhaanna e maaqorosa oshichi kuchena ne ingesa hadursi kuchey fetto erdoffe! Ijhaanna ne hantosa beene niyadey ne hanta woomako neese e inge>> yeydi e hido.
Wonto shi'e gisha
Luq 11:2-4
5Yesuusani assi <<Shi'isine hade awshachituke shidhofita! Usini shi'e u eehesi axi uso beyorosa hissine Ayhuda Bhikkilo Zawaakaara oge dagaakaara eedhiko u shi'e. Aadewoko hinuse ta ohe, be efashe wooma ettiko u yese. 6Nenimay shi'isine ne zawa gelli gasa ayti ijhaa yese bentuwa niyade shi'uwa. Ijhaanna ne hantosa beene niyadey ne hanta wooma neese ingako e inge.
7Wonto bidzi abako gisha shi'isine hinuni Wonto bade maaquwasituke galalsi shidhofita! Bidzi abako galalsi u shi'esuna Wontoy ususe siinesako uso e bishe. 8Hi shidho baanne hinumba worgusesa hinadey buronawo e ere gisha hinuni usuke maaddhofita.
9Yoonase ha esuke shi'uwayte: <Nuwadde afaa yeseyo, hayla ne sunxi kuxuttuwaye. 10Ne kaatetoy yoowaye, ne maxoy afaa be hantuttenike yeydiwo ha sahaani maaquwaye. 11Hanzose maaqe boora nuuse inguwa! 12Nuu miidhasituse <<Attuwaye>> hidi hiya nu yesenike nenini nu miidhosa <<Attuwaye>> hidi hiwwa. 13Ye iita garafa nuu maaruwa baaka naadhi beene abakowa nuu gelsofuna! [Kaatetey, osay, kuxay koolona neesuko, ameen.]>
14Axi hinumba miidhosa <Attuwaye> hidi hi hitta'ayko afaa yese hinadey hi miidhosa <Attuwaye> hidiko e hine. 15Hinuni axi miidha <Attuwaye> hidi hiye hi dheeddako hinadeni hi miidha <Attuwaye> hidi hiwasso>> yeydi e hido.
Xhooma gisha
16Sekke Yesuusay <<Wontomeysine hi xhoongeniya hade awshachiti hantenike higilse aafusha beyse axuke maaddhofita. Wontome hissine u xhoongesa axi erorosako be aafusha u iisse. Aadeko hinuse ta ohe, be efashe wooma ettiko u yese. 17Nenimay ne xhoongeniya ne aafusha shoti ne qino tishuwa. 18Ye esuke ne xhoongesa ijhaa yese niyadewo baaka ooneni feday eruwasso. Ijhaanna ne hantosa beene niyadey ne hanta wooma neese ingako e inge.
Afaa wodunte eeluse gisha
Luq 12:33-34
19Hinuse wodunte ha sahaaka qooqannanaara#6:19 qooqanna yeydi hiyuttasi fede googiyaka bidzi bidzi axiti <<Bile>> hidiko u hine. Taafo 20 garani yeydi hine katoko nu degexe. wuhanaara e baane godo kaysitini meyssi gelli kayse godo eelusofita! 20Maaqe baaka afaaka hi wodunte qooqannanaara wuhanaara bayese e danda'uwa godo kaysitini meyssi gelli kaysese danda'uwa godo eelusuwayte! 21Esume yeydi ta hinesi eellese hi woduntey yese godo hi maxoy yahaka yese gishako>> yeydi e hido.
Aafe modhete gisha
Luq 11:34-36
22Yesuusay <<Aafey garase hade faqeke yesesako. Ne aafey modhe yesesa e maaddhako ne garay kumenako fo'e e maaqe. 23Ne aafey harga'ayko ne garay kumenako cenchawo e maaqe. Hinne neeka yese fo'ey cencha e maaqo'ayko waakidini cenchay shanna cencha e maaquwaane?>> yeydi e hido.
Be yesose maddhume dheebe gisha
Luq 16:13; 12:22-31
24Yesuusay assi <<Bidzi axi lam'i laaxuse woosuttese danda'uwasso. Ha esa e inxha'e, se esa e eehe. Ha esuseni uddhi e woosutte, se esa e haasse. Miijhe hi wontokeysi hi mato geede Wontose woosuttese danda'uwaytako.
25Tanimay hinuse hinesi <Am nu miiye? Am nu usshe? Am nu maa''e?> hidi hissine hi yesose maddhundofita. Miyutte kaxame axi yesoy garuwaye? Maa'utte maa'ome axi garay garuwaye? 26Haaya mee, kafita beewayte. Ayluttuwasso, acuttuwasso, li'iyani gelsuttuwasso. Afaa yese Wontoko hinadey uso muussesa. Hine ye kafitume hinuni fetto garuwaytuwa? 27Hinukaafa be maxona maddhundi be bera gara fetto bidzi wonte kosese danda'esi ooneni?
28Maa'ose ame hine hi maddhunge? Haaya mee, gubba yese fiiriti waydi diciya u yesesa maxuwayte! Hantay uso gafusuwasso, beese zuquttuwasso. 29Iitana moddhese maa'o maadha kuxa fuula keengicha kaati Salamoneni fetto usaafa hade bidzikeysi maadho baasso. 30Hinuni Wonto hi gobbesi waakidi oddhe e maaddho! Wontoy gubba yese maata hanzo benti guta tamaa dafuttesa yeysi waarussi maysesa be maadho geede hinumba hine waani gardesesa e maysuwaane?
31Ha e gisha <Am nu miiye? Am nu usshe? Am nu maa''e?> hidi massi maddhundofita! 32Wonto bade maaquwasiti yeenke yesesa uddi degexesuko u kardutte. Uddi haanxho hinumba e worgusenike afaa yese hinadey erako ere. 33Burussi Wonto afa kaatetemiyara Wonto gizo hantamiyara karduttuwayte. Yeenkesesi uddiko hinuse e ingutte. 34Yoonase gutase maddhundofita, gutase yese maddhay gutase ellako e elle. Wontay be bidzina bidzina biya elle maddhako e keenge>> yeydi e hido.
Nu geselecteerd:
Matoose 6: KilleC
Markering
Deel
Kopiëren
Wil je jouw markerkingen op al je apparaten opslaan? Meld je aan of log in