Mattĕo 10

Jezŭ Rôhta Bōhmubicè Scigībwè

(Mărko 3.13-19; Lŭka 6.12-16)

1Jezŭ joplo hwă Zo bōhmubicè scigībwè kî Ci i lōwa dèphlŭdèthere cab́ô̆htè agā hna hèhtakè̆ dèscidèhnè tòcò, kîd́ò̆ cab́ô̆htè Zè gè̄ mèhlè̆mè̄ dèscwidèsè̆ kî mèhmagebò̄ bija adô mô̄ da hma ńò tòcò nu. 2Bōhmubicè scigībwè ami ḿî ajo; aŭsu dèbwè ḿî Simŏnè, htè bija jo Petru nu kî zè mè̄ Andrĕa, Zăkomo, htè Zebedi apho kî zî pîkò̆ Zowănnī, 3Philĭpo kî Bartolomĕo, Tomăzo kî adadèhmŭ Mattĕo, Zăkomo htè Alphĕu apho kî Thadĕo, 4Simŏnè htè Kananĕopho kî Jŭdas Iskariŏta htè ahô̆lă Jezŭ dèbwè nu.

Jezŭ Thè̆le Bōhmubicè Scigībwè

(Mărko 6.7-13; Lŭka 9.1-6)

5Jezŭ hna hègè ajo scigībwè, Zu htulahmèla lōwa, cò d́ò, “Lenī ḿè bwèthŭkupho tòcò aklèbu ḿè, kîd́ò̆ lenī ḿè Samarĭapho au tòcò abu ḿè. 6Ḿî lehtîbò̄ thŏ ahlè̆mè̄, htè aḿî Israè̆l ahiaphă tòcò nu dòkhò̆. 7Kîd́ò̆ hè kî d́ò̆htôbò̄ dè, ‘Mò̄kho ahtĭage b́ôhtî htŏ!’ d́òbò̄ do. 8Mèhmagebò̄ ascwiasè̆ tòcò, mèhtaboge athĭ tòcò, mè tcăgebò̄ akaĺaki tòcò, hnahèhtakè̆bò̄ dèhnè tòcò. Thĭ nib́è hnahnăgè d́ō, i hnahnăbò̄. 9Òi ḿè htè̆ ḿîwî, hô̆ ḿîwî, pĭd́ŏpĭsa ḿîwî d́ŏ thĭ hlŭthikĭ abu nu ḿè. 10Lei ḿè dèpôllô klè anikhĭ hlŭthikĭ ḿîwî, scid́ŏ gīb́è ḿîwî, khatòkò ḿîwî, hnèhtò ḿîwî ḿè. Manè̄ kò̄ d́òdo dō, amèdè dèbwè mò nib́è zè dèa.

11“Kîd́ò̆ b́ĕ thĭ lenī u bu ḿîwî, d́ŏphă bu ḿîwî nu, d́è̆tcabò̄ bija aò d́ŏnu, htè atani thĭ òkô akă ḿî bò̄bwè nu kî òbò̄ d́ŏnu htô̆ thĭgè hèhta nu. 12Kîd́ò̆ b́ĕ thĭ lenī hibu nu, sŏwîbò̄ cè kî d́òbò̄ cè, ‘Dècodèmò gā lab́è d́ò̆è hi ajo dawa jo.’ 13Kîd́ò̆ hi anu dawa gā tani d́ō, thĭ dèjīdèd́wă gā lab́èkò̆ akho. Barasă agā da tani ńò d́ō, thĭ dèjīdèd́wă gē gehtîkò̆ thĭ. 14Kîd́ò̆ bija dèbwèbwè arră gī ti igetcage thĭ ńò, kî gò̄ dò sòkhĕńe thĭ dèjî̄b́è ńò d́ō, hèhtakè̆bò̄ hi anu dawa, ḿî̆dîḿî ńò u anu tu u abu, kî blab́ăkè̆bò̄ haphĭhmu d́ŏ thĭ khakhò lò nu. 15Jò d́ò thĭ adî̄ahma thĭ, b́ĕ dècirra amuni nu, Sò̆doma kî Gòmò̆rra alākho gā da khab́èkò̆ pwĕ u anu tu u ńò.

Dèd́ò̆sadòlò Dèhtakhokă Jezŭ

(Mărko 13.9-13; Lŭka 21.12-17)

16“Tcabò̄, Jo thodŏ thĭ acab́ô̆ thŏ d́ŏ khajab́ô aklè̆ nu. Mègōnu, blabò̄ acab́ô̆ wu tòcò nu, kî b́îjūbò̄ acab́ô̆ thokŏdru tòcò nu. 17Barasă sòibò̄ thĭ ne. Manè̄ kòd́òdo dō, ci ki ilaphlòḿĭkò̆ thĭ d́ŏ acirradè tòcò acukhòbu, kî zî gî̄ hlî gè̄ plè̆kò̆ thĭ d́ŏ ci sinagŏgā tòcò abu nu. 18Kîd́ò̆ Jo kho Jè cè̆ thĭ kèb́è cwilekò̆ u acomā tòcò kî Saphra tòcò ahlò̆mò̄ cab́ô̆htè thĭ gā kha thè̆thî jò hlò̆mò̄ kî bwèthŭkupho tòcò ahlò̆mò̄ nu. 19Barasă b́ĕ bija ki ilaphlòḿĭ thĭ nu, gomo ḿè thĭ gî̄ jî̄b́è cadè̄, ḿî̆dîḿî ńò danè̄ nu ḿè. Manè̄ kòd́òdo dō, b́ĕnu akhî thĭ kò̄ d́òb́è danè̄ danè̄ nu dè kī ilakò̆ thĭ. 20Manè̄ kò̄ d́òdo d́ō, ajî̄b́è tî ḿî thĭ ńò, ḿî thĭ Pa Aspirito htè ajî̄b́è thĭ hîklè̆ dèbwè nu.

21“Thè̆buwe ki ilaphlòḿĭkò̆ athè̆buwe, kî dè pa ki ilaphlòḿĭkò̆ apho; kîd́ò̆ aphoali gè̄ wè̄hto htad́ĕd́òkò̆ amo apa, kî gè̄ mènikò̆ lōwa dèthĭ. 22Kîd́ò̆ Ji mi akhoacè̆ bija lŏcăcè gè̄ dè wè̄kò̆ thĭ ńò. Barasă bija htè akhòthad́ò̆ htô̆ agudulă dèbwè gô̄ hlô̆htakò̆. 23B́ĕ bija gô̄ lô mèssègnè̆ thĭ u tu u abu nu, sèphlòḿĭbò̄ d́ŏ alewe tu u. Jò d́ò̆sa thĭ adî̄ahma, htô̆do Bija Apho gā la nu, thĭ gè̄ dè hèkhwè ni lŏkò̆ Israè̆l u tòcò nu ńò.

24“Khò̆ bĭsèpho to dokhlŏlĭ asara ńò, zôpho to dokhlŏlĭ ab́icè ńò ńò. 25Akhò̆bĭsèpho gî̄ ḿî ma acab́ô̆ za sara nu, kîd́ò̆ zôpho gî̄ ḿî ma acab́ô̆ ci b́icè nu d́ō, ab́èni htŏ tèpwè. Bija jogè hib́icè Bilzabŭba d́ō, zo gō jo d́okhlŏkò̆ ahiphophăpho tòcò nu.

Bija Amòscisă

(Lŭka 12.2-7)

26“Mègōnu scisăni ḿè cè tòcò ale ḿè. Manè̄ kò̄ d́òdo dō, dè aòb́i nu gî̄ lî̄htakò̆, kî dè ahuazò nu bija kî thîhè̆kò̆. 27Dè htè jò d́ò̆sa thĭ dèkhiklè̆ nu, d́ò̆sabò̄ dèhlî̆ aklè̆, kîd́ò̆ dè htè thĭ thîhè̆b́è kî thĭ nigu nu, d́ò̆htôbò̄ d́ŏ thĭ hikhotòcò̆ akho nu. 28Kîd́ò̆ scisănibò̄ ḿè bija amèthĭ gi neb́î̆cè, ḿî adè mèthĭkèhta thotha ńò, tòcò ale ḿè. Barasă scisănibò̄ amèkè̆ kèhta thotha kî ge neb́î̆cè d́ŏ Larrā bu dèbwè ale dòkhò̆. 29Bija dèsè̆ htŏphomo gīb́è kî krelî tèb́e ńò ā? Barasă thĭ Pa adèthaèni kò tò ò ma ńò d́ō, agā da ladēkò̆ lākho tè B́è ńò. 30Khulŭ aò thĭ kolò tòcò hnò̆nu, ab́èd́ôca gŏ ab́ò̆ lò. 31Mègōnu, scisăbò̄ ḿè; thĭ khlŏlĭbò̄d́ò̆ htŏphomo ab́è pwĕdimi.

Dèd́òphlò̆hta kî Dèjab́i

(Lŭka 12.8,9)

32“Mègōnu d́ō, gajă bija ad́òphlò̆hta Jè bija ahlò̆mò̄ dèbwèbwè nu, Jò kò̄ d́òphlò̆hta lŏ cè d́ŏ Apa aò d́ŏ Mò̄kho dèbwè ahlò̆mò̄ nu nu. 33Barasă bija ajab́i Jè bija ahlò̆mò̄ dèbwè nu, Ja gā jab́ikò̆ cè d́ŏ Apa aò d́ŏ Mò̄kho nu dèbwè ahlò̆mò̄mò̄.

Ḿî D́asĕ, tè b́è Dècodèkhli ńò

(Lŭka 12.51-53; 14.26,27)

34“Gomo ḿè Ja la b́è̆lă dèjīdèd́wă lākho akho ḿè. Ja da la bè̆lă dèjīdèd́wă ńò, ḿî d́asĕ dòkhò̆. 35Manè̄ kòd́òdo dō, Ja la bēbā phokhŏ kî pa, phomu kî mo, d́è kî mubwē. 36Kîd́ò̆ bija ad́ĕd́òròkhè gî̄ ḿîkò̆ khwĭkhò̆ aòplo cè hibu tòcò nu.

37“Bija htè ab́èlò̄ apa ḿîwî amo ḿîwî d́olĭ Jè dèbwè nu, da tani kî Jè ńò. Kîd́ò̆ bija htè ab́èlò̄ aphokhŏ ḿîwî, aphohmu ḿîwî d́olĭ Jè dèbwè nu da tani kî Jè ńò. 38Bija htè ada j́ahta aKrusu kî de lekô Je le ńò nu, da tani kî Jè ńò. 39Bija htè anib́è athathôḿô̆ dèbwè gū sub́èkò̆ aè̆, kîd́ò̆ bija asub́è athathôḿô̆ dèbwè nu gī nib́èkò̆ aè̆.

Dèsôdèhlè̆

(Mărko 9.41)

40“Bija aŏlă thĭ dèbwè ŏlă Jè, kî bija aŏlă Jè dèbwè nu ŏlă athodŏ Jè dèbwè nu. 41Bija htè aŏlă Prò̆fèt acab́ô̆ Prò̆fèt nu dèbwè, gī nib́èkò̆ Prò̆fèt asôahlè̆. Kîd́ò̆ bija htè aŏlă bija adî̄ahma acab́ô̆ bija adî̄ahma nu dèbwè gī nib́èkò̆ bija adî̄ahma asôahlè̆. 42Kîd́ò̆ gajă bija aiò̆ ajo tòcò aklè̆ asciphogudu dèbwè htĭco dahmă lò hnò̆nu, d́ŏ Zî ḿî jo bōhmubicè acè̆ lò nu d́ō, Jò d́ò thĭ adî̄ahma, zu gū du sub́èkò̆ zô sô zè hlè̆ ńò.”

Nu geselecteerd:

Mattĕo 10: GRNT21

Markering

Deel

Kopiëren

Wil je jouw markerkingen op al je apparaten opslaan? Meld je aan of log in

Geba Roman New Testament © Bible Society of Myanmar, 2021.

Meer informatie over Geba Roman New Testament