Mattĕo 19

Dèphîcu Adèlaphra

(Mărko 10.1-12)

1Kîd́ò̆ dèphî̆htagè htè b́ĕ Jezŭ d́ò̆sa hwă dèjî̄b́è ajo tòcò nu, Zè hèhtagè Galilĕage kî lenīgè d́ŏ Judĕage alākho htè aò Jòrdăno gòllò̄ alewe dòkhòwō nu. 2Kîd́ò̆ bija aboahò lôkô Ze le, kî Zè mèhmage tèpwè lōwa d́ŏ nu.

3Kîd́ò̆ Pharizè̆pho tòcò lehtî Cè, co b́otha lōwa kî cè d́è̆ lōwa gōjo, “Dè arră akhoacè̆ amikhŏ bāphlòmĭ zabò̄ ahmè̆ ā?”

4Cò d́òge lōwa gōjo, “Hlĕ akăhtî nu, ab́òla bija dèbwè b́òlagè amikhŏ dèbwè kî amihmu dèbwè 5kî Cò d́ò, ‘Ajo akhoacè̆ amikhŏ gè̄ hèbākò̆ amo apa kî cò kò̄ òplokò̆ zè hmè̆, kîd́ò̆ cè gībwè gī phî̆htakò̆ dèphedèhî dèdè̆ lò nu,’ thĭ da phab́è Cè bu hnî̆ńò ā? 6Dè mè ane gōnu d́ō, zi di ḿîbe gībwè ńò, ḿî dèphedèhî dèdè̆ lò. Ajo acè̆ dè htè Kib́ĭcè lè̄plo nu, bija dè mèbā d́ò̆è ńò,” Cò d́ò lōwa d́o.

7Bija d́è̆ cè, “Mègōnu, Mŏzè hmèla ma amikhŏ ki i hwă amihmu dèlaphra acè, za hna hè za lōwa nè̄?”

8Cò d́òge lōwa tòcò, “Awîakè̆ ḿî thĭ thosathasa akhoacè̆ Mŏzè igè thĭ bāphlòmĭ thĭ hmè̆; barasă hlĕ akăhtî nu dè di ḿîgè gōnu ńò. 9Ḿî Jò d́ò thĭ, htè bija arră, gī tî ḿî dèlakèḿè akhoacè̆ ńò, za gā bāphlòmĭ zè hmè̆, kî zi gī phî alewe dèbwè d́ō, ḿî za lakèḿè lò. Kîd́ò̆ amikhŏ htè agī phîge amihmu ab́èbāphlòḿĭ dèbwè nu, za lakèḿè bija hmè̆ lò lò.”

10Zo bōhmubicè tòcò d́ò Cè, “Amikhŏ kî zè hmè̆ azo dè kî ḿî gōnu d́ō, dî phîpho phîhmè̆ ńò è d́okhlŏ dòkhò̆.”

11Cò d́òge lōwa tòcò, “Bija dî phîkèhta dèjî̄b́è ajo gŏ abwè ńò; aphî kèhta ḿî dèila tòcò lò. 12Manè̄ kò̄ d́òdo dō, bija aòla sò̆tid́i amo aphŭbu bu ò tòcò; asò̆tid́i htè bija mèphî̆hta nu ò tòcò, kîd́ò̆ bija amèphî̆hta ane asò̆tid́i Mò̄kho ahtĭage anikhĭ ò tòcò. Bija aphî kèhta dè ajo dèbwè, gī phî d́ò̆è.”

Jezŭ Hôwî Abĭsèpho tòcò

(Mărko 10.13-16; Lŭka 18.15-17)

13B́ĕnu bija lei abĭsèpho Cò ò, cab́ô̆htè Zè gè̄ htèla Cu cukhò lōwa tòcò akho kî Cè thèb́è̆bò̄ nu. Ḿî bōhmubicè tòcò hò̆gè bija. 14Barasă Jezŭ d́ò cè tòcò, “Khòthad́ò̆bò̄ abĭsèpho tòcò kî mèd́îd́ăbò̄ ze lehtî Jè ḿè; manè̄ kòd́òdo dō, Mò̄kho Ahtĭage ḿî cè tòcò anikhĭ.”

15Kîd́ò̆ Zè htèla hwă Zu cukhò lōwa tòcò akho d́ō, Zè hèhtagè d́ŏnu.

Dèniò̆jòa Adèb́èhjŏ

(Mărko 10.17-31; Lŭka 18.18-30)

16Kîd́ò̆ tcabò̄, bija dèbwè le d́ò cè gōjo, “Sara aè, cab́ô̆htè ji gī nib́è dèòthôḿô̆ lahtŭlablo nu, jè gè̄ mèb́è da awîaè nè̄?”

17Cò d́ò lōwa, “Nè d́è̆ ma Jè dè ab́èkja awîaè nè̄? Dè awîaè ò dèdè̆ lò, htè Kib́ĭcè nu. Barasă na thaè lenī dèòthôḿô̆ lahtŭlablo abu d́ō, òibò̄ dèhmèla tòcò nu.”

18Cè d́è̆ lōwa, “D́òlè̄ tòcò cò?”

Kîd́ò̆ Jezŭ d́ò, “Nè dè mèthĭb́è bija ńò. Na da lakèḿè b́è ńò. Na ta ahub́è dè ńò. Na da khab́è thè̆thî dèhlòdèṕlè abu ńò. 19D́ŏb́èj́ab́èbò̄ no mo kî na pa. Kîd́ò̆, nè b́èlò̄b́è nò khò̆ acab́ô̆ ne ne nu.”

20Ab́òĺòpho dò Cè, “Jò òilŏhtŏ dèhmèla ajo lŏcăcè hlĕ ji bĭsèpho we nu. B́èwe ji nikhĭ danè̄?”

21Jezŭ d́ò cè, “Na thaèni lēdū d́ō, ge sè̆kè̆bò̄ nè dèlŏcăcè, kî ibò̄ assègnè̆pho tòcò, kîd́ò̆ nè dèlīdobwîthè̆ kò òkò̆ d́ŏ Mò̄kho nu. Hwă d́ō, geb́a, lôkôbò̄ Je le.”

22Ab́òĺòpho thîhè̆b́è dèjî̄b́è ajo d́ō, ze ge othoothagè, manè̄ kò̄ d́òdo dō, cu ŭcalèkhjă òèòògè.

23B́ĕnu Jezŭ d́ògè abōhmubicè tòcò gōjo, “Jò d́ò̆sa thĭ adî̄ahma, bija ajèdā dèbwè gē lenī Mò̄kho Ahtĭage bu nu abazî̄gè lò. 24Kîd́ò̆ Jò d́ò̆sa thĭ tapla be; gòlaŭ gē lenī hnăd́è akazè̆ abu d́ō agō hjŏ lĭ bija ajèdā dèbwè gē lenī Mò̄kho Ahtĭage bu dòkhò̆.”

25Bōhmubicè tòcò thîhè̆b́è hwă ajo d́ō, zè htèdômô̄dahmăgè azî̄azô̄ kî cò d́ò, “Mègōnu, bò̄bwè gī nib́è za d́ò̆ dèhlô̆htageza bwè?”

26Jezŭ tcawè̄ cè tòcò kî Cò d́ò lōwa, “Bija anikhĭ ajo di phî̆hta za ńò; barasă Kib́ĭcè anikhĭ dèphî̆hta za gŏmimi lò.”

27B́ĕnu Petru d́òhtagè gōjo, “Tcabò̄, wa lè̄ladakè̆ hwă dèlŏcăcè, wô lôkô htŏ Ne le; mègōnu, wi gī nib́èbò̄ danè̄?”

28Kîd́ò̆ Jezŭ d́ò cè tòcò, “Jò d́ò̆sa thĭ adî̄ahma, d́ŏ dèòla athè̆ abu, b́ĕ Bija Apho gā sańăò adòathe ana bu nu, thĭ htè alôkô je le tòcò nu, thĭ gā sańăòb́èkò̆ kătò scigīd́ŏ akho kî thĭ gī cirra b́èkò̆ Israè̆lpho scigīkhwĭ. 29Kîd́ò̆ bija arră alè̄dakè̆ ahiaphă ḿîwî, abuawe ḿîwî, amo apa ḿîwî, aphoahmè̆ ḿîwî, lākhod́oklè̆ ḿîwî, Ji mi akhoacè̆ dèbwè, gī nib́ègekò̆ alī apla dègèjè, kî zi gi nib́èkò̆ dèòthôḿô̆ lahtŭlablo. 30Kîd́ò̆ bija òè̆bwè htè aḿîgè aŭsu, kî̄ ḿîkò̆ agudulă, kî agudulă kî̄ ḿîkò̆ aŭsu.”

Nu geselecteerd:

Mattĕo 19: GRNT21

Markering

Deel

Kopiëren

Wil je jouw markerkingen op al je apparaten opslaan? Meld je aan of log in

Geba Roman New Testament © Bible Society of Myanmar, 2021.

Meer informatie over Geba Roman New Testament