ዮሀንስ 2
2
የሱስ ቃና ገሊላ እሰናር ክታ Ꮊፍርና
1ማክምስ ሰጨንካ፥ ገሊላ ፍጫር Ꮊፈርድን ቃና ጋይምድን ካተመናር እሳ ዶቅድንካ የሱሰታ እንደነረ ኮታር Ꮊቄ። 2የሱሰኬ ክታ ካርንካ ጎርስምድባብከስካ እሴናር ኤልምታ Ꮊቀኬ። 3እሳ እችምንዘን ዎጨርድንዳ ዎይንና በእሳንደትካ የሱሰታ እንደና የሱሰም፥ “ዎይን ዎጭምና ከደር በእቴ!” ና ጋይሴ። 4የሱሰረ “እስታ እንደኖ! የስካ ክክን Ꮊራ ሪ እስታ ዶቅዳ? እስታ ሰጨና አክ የላክዬ” ኮደረ ጋይሴ።
5ኮታይካ እንደና ዋር ዶቅድን ፍክስንባብከስም፥ “ክት የም ጋይድን ሙዳ ይከቴ” ከትም ና ጋይሴ።
6አይሁድንከስታ አርንንታ ዎጋ ከታ Ꮊቃንጎካ ላ ጎላ ዳሀ ኮታር Ꮊቀኬ፥ ዋልቃ ዋልቃ ጎላ ዳሄንከስ ቃስተን አነረ ማከን ዳሀካ ሎቃ የድንዳ Ꮊቄ። 7የሱስ ፍክስንባብከስም “ጎላ ዳሄንከስም ሎቃ ጮችከቴ” ከትም ጋይሴ፥ ከተረ ዳሄንከስካ ሙዳ ጮችሰኬ። 8ኮታ ቡር የሱስ ፍክስንባብከስም፥ “አልቀንባብከስም ይና ታ ዱቅሰቶ ኤሄንባብካንታ እምከቴ” ከደር ጋይሴ፥ ከተረ ክትካንታ እምሰኬ። 9አልቀንባብከስም ክድባብ ዎይን ዎጭምና ኦክምሳን ሎቀንም አፍሳንደትካ፥ Ꮊብርንካ Ꮊዳናንከረ ኤሳክዬ፥ ሎቀን ቆልእስባብ አልቀንባብከስ ማቼ ኤዝድ Ꮊቀኬ፥ ኮካንታ እችንባብከስታ ክተንባብ፥ እሰንባብም ኤልሶ፥ 10“ኤድ ሙደና እርምሶ እምድንዳ ኡርማ ዎይን ዎጭምኔ፥ ኤልምስባብከስ ዎጫንደታ ቡር ሎቅዳክንደትም እምዴ፥ የና ማቼ ኡርማ ዎይን ዎጭምን ታ የለልታ ዶቅሰዬ ጋይሴ።”
11የሱስ ኮም አታ ቃዉታ ሙደንታ እርንዳ ማቻን አታ ቃዉተን ገሊላ ፍጫ ቃና ካተመናር ይሴ፥ ኮግንደካ ይንታ ቦንቸንም መያ ማስሴ፥ ክታ ካርንካ ጎርስምድባብከሰረ ክትካ አመንሰኬ።
12ኮታ ቡር የሱስ ይንታ እንደንኬ ይንታ እስመንከስካ፥ ክታ ካርንካ ጎርስምድባብከስከረ ክክን ቅፍረናሆም ካተመናር Ꮊንቸርሴ፥ ኮታረረ ቶክም ሰጫ ዶቅሰኬ።#ማቶ. 4፡13።
የሱስ ሳብታ ጭል ኤሄናር ጋበን ጋብድባብከስም ዉችና
(ማቶ. 21፡12-13፤ ማር. 11፡15-17፤ ሉቃ. 19፡45-46)
13አይሁድንከስታ ፋስጋ ባአል የልሳንኦል የሱስ የሩሳሌማር አይሴ፥#ዉት. 12፡1-27። 14ሳብታ ጭል ኤሄናረረ ገዝምንከስም፥ ቆልንከስምኬ ዎለንከስም ሰንድባብከስምኬ ብረን ኦካኦንግድባብከስ ዶቅሶ ከት ጋበን ጋብድንካ Ꮊፍሴ። 15ኮታይᎺካ ዝራፍ ምርስንደትከ ኤድንከስም ሙዳ፥ ቆልንከስምኬ ገዝምንከስምካ ክክን ሳብታ ጭል ኤሄናርንካ ከትም ዉችሴ፥ ብረን ኦግድባብከስመረ ብረን ከታ ይጭሴ፥ ከታ ገበትንከስመረ ባልት ኦይቼ። 16ዎለን ሰንድን ኤድንከስመረ “ኮም ሙዳ ኦስ ተይከቴ! እስታ ባበንታ ኤሄን የንታ ዛለታ ኤሀ Ꮊይማሰቴ!” ከደር ጋይሴ። 17ኮታይካ ክታ ካርንካ ጎርስምድባብከስ “የስታ ኤሄንጎካ እስታ ዶቅድን ቀምስና እም አተርዝዴ” ጋይምሶ ጻፍምሳን ገቀርሰኬ።#የቺ 69፡9።
18ኮታ ቡር አይሁድንታ ገችንታ ኤረንባብከስ የሱሰም፥ “የና ኮም ይካንታ ገችታ ኤራ የስታ ዶቅድንደትም Ꮊረስ ቃዉታ ማድን አተን ዎካንታ ሰጅዳ?” ክደረ ጋይሰኬ።
19የሱሰረ “ኮም ሳብታ ጭል ኤሄንም የታ ዉልእከቴ፥ እታ ማከን ሰጨካ ማስት ዎድቴ” ኖ ከደር ጋይሴ።#ማቶ. 26፡61፤ ማቶ. 27፡40፤ ማር. 14፡58፤ ማር. 15፡29።
20ከተረ “ኮም ሳብታ ጭል ኤሄን ዎድካንታ ቃስተን ቦንደከ ላ ስላ በይስቴ፥ ይና የና ማከን ሰጨታ ዋር ዎትራ?” ክደረ ጋይሰኬ።
21የሱስ ማቼ “ሳብታ ጭል ኤሄን” ጋይሶ ክት ኬዛንዳ ይንታ ኤደትቸንጎኬ። 22ኮካንታ የሱስ ደእናርንካ ክት አምሳንደትᎺይካ ክታ ካርንካ ጎርስምድባብከስ ኮም ከዝድ ክት Ꮊቃንደትም ገቀርሰኬ፥ ኮጎካ ጭል ማጻፍናር ጻፍምሳንደትምኬ የሱስ ኬዛን ቃለን አመንሰኬ።
23የሱስ ፋስጋ ባአልንᎺይካ የሩሳሌማር ዶቅድዮ ክት ይያቃን ቃዉተንከስም ሰድንተንካ በድ ኤድንከስ ክትካ አመንሰኬ። 24የሱስ ማቼ ኤድንከስም ሙዳ ኤዝድ ይ Ꮊቃንኦል ከትም አመናክዬ፥ 25ኖ ኤታ ቡዳር ዶቅድንደትም ሙዳ ኤዝድ ይ Ꮊቃንኦል ኤድጎካ Ꮊየነረ ክትካንታ ኬዝድንግንዳ ዝክሳዬ።
Nu geselecteerd:
ዮሀንስ 2: GylNTEth
Markering
Deel
Kopiëren
Wil je jouw markerkingen op al je apparaten opslaan? Meld je aan of log in
The Word for the World Ethiopia
