 If you would like a copy of this version please contact info@davaraudiobibles.org

Adamawa Fulfulde Bible

Fulfulde Bible Ajamiya © Bible Society of Cameroon, 2016.

ندٜ عِيسَى طٛنْ سَالٛ، عٛيِعِ غٛطّٛ بُمْطٛ دِغَ دَࢩٜىٰکِ مُمْ؞ ݠُکَرَعٜنْ مَاکٛ ࢨَمِمٛ‏: «مٛودِبّٛ، نغَمْ طُمٜ غٛرْکٛ عٛو عٛدَࢩَ عٛ بُمْطٛ؟ نغَمْ دَلِيلَ حَکّٜ مَاکٛ نَ؟ مَلَّ نغَمْ حَکّٜ سَارٛعٜنْ مَاکٛ؟» عِيسَى جَابِ‏: «نَا نغَمْ حَکّٜ مَاکٛ، نَا نغَمْ حَکّٜ سَارٛعٜنْ مَاکٛ بٛو عٛدَࢩَ عٛ بُمْطٛ؞ طُمْ وَطِ نغَمْ حَا بَاوْطٜ اَللَّه مبَنغَ حَا مَاکٛ؞ ندٜ ࢩَلَوْمَ طٛنْ تَوٛنْ، سٜيْ عٜنْ کُووَ کُوطٜ نٜلْطٛ يَمْ؞ جٜمَّ ࢡَدَکٜ، وَکَّتِ مَنْ وَلَا مٛ وَاوَتَ حُووُغٛ؞ يَاکٜ مِطٛنْ ندٜرْ دُنِيَارُ، مِ أَلنّٛورَ مَارُ؞» ندٜ عِيسَى وٛلْوِ بٛلّٜ طٜعٜ، عٛتُوتِ تُوطٜ حَا لٜسْدِ، عٛجِيࢡِ لٛوݠٜ سٜطَّ بٜى مَاجٜ، عٛتَکِّ طُمْ حَا غِتٜ بُمْطٛ، ندٜنْ عٛوِعِمٛ‏: «يَحْ، سُلْمٛيَ حَا وٜىٰندُ سِلٛوَمْ؞» سِلٛوَمْ يِطِ وِعْغٛ‏: نٜلَامَ؞ بُمْطٛ يٜحِ تٛنْ، سُلْمِ؞ ندٜ عٛلٛرِ، عٛطٛنْ يِعَ؞
حٜىٰدِّطِّرَاࢡٜ مَاکٛ عٜ يِعْنٛوࢡٜ مٛ عٛطٛنّٛ رٛوکٛ، مبِعِ‏: «نَا غٛرْکٛ عٛو طٛنّٛ جٛوطِ، رٛوکٛ؟» وٛطْࢡٜ مبِعِ‏: «طُمْ کَنغْکٛ؞» وٛطْࢡٜ بٛو مبِعِ‏: «عَاعَ، طُمْ نَنْدُطٛ بٜى مَاکٛ؞» عَمَّا کَنغْکٛ عٛوِعِ‏: «طُمْ مِنْ؞» ࢡٜمبِعِمٛ‏: «نٛيْ غِتٜ مَاطَ مبُمْتِرِ؟» عٛجَابِ ࢡٜ‏: «غٛطّٛ بِعٜتٜىٰطٛ عِيسَى جِيࢡِ لٛوݠٜ، تَکِّ حَا غِتٜ عَمْ، وِعِ يَمْ‏: يَحْ، سُلْمٛيَ حَا وٜىٰندُ سِلٛوَمْ؞ مِيٜحِ تٛنْ، مِسُلْمِ، مِوُمْتِ؞» ࢡٜمبِعِمٛ‏: «تٛيْ غٛطّٛ مَنْ وٛنِ؟» عٛجَابِ ࢡٜ‏: «مِعَنْدَا؞»

ࢡٜنجَحْرِ بُمْتُطٛ مَنْ حَا ڢَرِسَعٜنْ؞ طُمْ ࢩَلَادٜ سِوْتٛرْدٜ عِيسَى جِيࢡِ لٛوݠٜ، تَکِّ حَا غِتٜ بُمْطٛ، وُمْتِنِمٛ؞ نغَمْ مَاجُمْ، ڢَرِسَعٜنْ ࢨَمِ بُمْتُطٛ‏: «نٛيْ طُمْ لَاتٛرِ، عَطٛنْ يِعَ جٛنْتَ؟» عٛوِعِ ࢡٜ‏: «عٛتَکِّ لٛوݠٜ حَا غِتٜ عَمْ، مِسُلْمِ، مِوُمْتِ؞» وٛطْࢡٜ ندٜرْ ڢَرِسَعٜنْ مبِعِ‏: «غٛرْکٛ عٛو عِوَايْ دِغَ اَللَّه، نغَمْ عٛحَکِّلَنَايْ ࢩَلَادٜ سِوْتٛرْدٜ؞» عَمَّا وٛطْࢡٜ مبِعِ‏: «نٛيْ غٛطّٛ وَاوْرَتَ وَطُغٛ عِرِنْ کَايٜىٰڢِيجِ طِعِ تٛ عٛحَکّٜىٰجٛ؟» شٜنْدٛلْ وَطِ حَکُّندٜ مَࢡّٜ؞
ڢَرِسَعٜنْ ࢨَمِ بُمْتُطٛ ڢَحِنْ‏: «عَوِعِ عٛوُمْتِنِ مَ، کَدِ طُمٜ عَوِعَتَ دٛوْ مَاکٛ؟» عٛجَابِ‏: «عٛ اَلنَّبِيجٛ؞» عَمَّا مَوْࢡٜ يَحُودُعٜنْ نجَࢡَايْ عٛ بُمْطٛنٛ، عٛوُمْتِ جٛنْتَ، حَا ࢡٜعٜوْنِ سَارٛعٜنْ مَاکٛ؞ ࢡٜࢨَمِ ࢡٜ‏: «عٛو عٛ ࢡِطّٛ مٛوطٛنْ نَ؟ عٛنْ طٛنْ تَبِتِنِ عٛ دَࢩَاطٛ عٛ بُمْطٛ نَ؟ کَدِ نٛيْ عٛيِعْرِ جٛنْتَ؟» سَارٛعٜنْ مَاکٛ نجَابِ‏: «مِنْ عَنْدِ عٛ ࢡِطّٛ عَمِنْ، عٛدَࢩَ عٛ بُمْطٛ؞ عَمَّا مِنْ عَنْدَا نٛيْ عٛوُمْتِرِ، مِنْ عَنْدَا بٛو مٛيْ وُمْتِنِمٛ؞ ࢨَمٜ مٛ، کَنغْکٛ بٛو عٛمَوْنِ، عٛجَابَنٛ حٛورٜ مَاکٛ؞» سَارٛعٜنْ مَاکٛ مبٛلْوِ بَنَ نٛنْ نغَمْ ࢡٜطٛنْ کُلَ مَوْࢡٜ يَحُودُعٜنْ؞ نغَمْ مَوْࢡٜ يَحُودُعٜنْ نَرِّنٛ، تٛ غٛطّٛ سٜىٰدَکٜ عِيسَى وٛنِ اَلْمَسِيحُ، ࢡٜنغُرْتِنَنْ مٛ دِغَ سُودُ دٜوَلْ يَحُودُعٜنْ؞ نغَمْ مَاجُمْ سَارٛعٜنْ مَاکٛ مبِعِ‏: «عٛمَوْنِ؞ ࢨَمٜ مٛ‏!»
ڢَرِسَعٜنْ عٜوْنِتِ بُمْتُطٛ غٛ، مبِعِمٛ‏: «اَللَّه طٛنْ نَنٜ، وِعْ غٛونغَ‏! مِنِنْ مِنْ عَنْدِ غٛرْکٛ عٛو عٛحَکّٜىٰجٛ؞» عٛجَابِ‏: «تٛ عٛحَکّٜىٰجٛ مَلَّ نَا نٛنْ، مِنْ مِعَنْدَا؞ عَمَّا حُوندٜ وٛورٜ عَنْدُمِ‏: مِ بُمْطٛنٛ، جٛنْتَ مِطٛنْ يِعَ؞» ࢡٜمبِعِمٛ‏: «طُمٜ عٛوَطَنِ مَ؟ نٛيْ عٛوُمْتِنِرِ غِتٜ مَ؟» عٛجَابِ‏: «مِ بِيطٛ عٛنْ طُمْ دِغَ نَانٜ، عَمَّا عٛنْ نَنَايْ يَمْ؞ نغَمْ طُمٜ عٛنْ نغِطِ نَنُغٛ طُمْ ڢَحِنْ؟ مَلَّ عٛنٛنْ بٛو، عٛنْ نغِطِ لَاتَاغٛ ݠُکَرَعٜنْ مَاکٛ؟» ࢡٜکُطِمٛ، ࢡٜمبِعِ‏: «عَنْ وٛنِ ݠُکَرَاجٛ مَاکٛ، مِنِنْ کَمْ مِنْ ݠُکَرَعٜنْ مُوسَى؞ مِنْ عَنْدِ اَللَّه وٛلْوَنِ مُوسَى، عَمَّا غٛطّٛ عٛو کَمْ، مِنْ عَنْدَا حَا تٛيْ عٛعِوِ‏!» عٛجَابِ ࢡٜ‏: «عَسٜى، طُمْ کَايٜىٰڢِ‏! عٛنْ عَنْدَا حَا تٛيْ عٛعِوِ، ندَا بٛو عٛوُمْتِنِ غِتٜ عَمْ؞ عٜنْ عَنْدِ اَللَّه نَنَنْتَا حَکّٜىٰجٛ، عَمَّا عٛطٛنْ جَࢡَنَ حُلْࢡٜ مٛ، وَطٛوࢡٜ مُويٛ مَاکٛ؞ دِغَ ݠُطُّکِ دُنِيَارُ، وَلَا مٜىٰطّٛ نَنُغٛ غٛطّٛ وُمْتِنِ غِتٜ دَࢩَاطٛ بٜى مبُمْندَمْ؞ تٛ غٛرْکٛ عٛو عِوَايْنٛ دِغَ اَللَّه، عٛوَاوَتَانٛ وَطُغٛ کٛو طُمٜ؞» ࢡٜمبِعِمٛ‏: «عَطٛنْ ندٜرْ حَکّٜ تُمْ دِغَ عَدَࢩَ‏! عَنْ عٜکِّتِنْتَ مِنْ نَ؟» ندٜنْ ࢡٜنغُدِنِمٛ يَاسِ؞

عِيسَى نَنِ ࢡٜنغُرْتِنِمٛ، عٛتٜڢِمٛ، عٛࢨَمِمٛ‏: «عَنُطِّنِ ࢡِي-نٜطّٛ نَ؟» عٛجَابِ‏: «جَوْمِرَاوٛ، وِعَمْ، طُمْ مٛيْ نغَمْ حَا مِنُطِّنَ مٛ؞» عِيسَى وِعِمٛ‏: «عَ غِيطٛ مٛ، مٛ طٛنْ وٛلْوَنَ مَ جٛنْتَ، طُمْ کَنغْکٛ؞» عٛوِعِ‏: «جَوْمِرَاوٛ، مِنُطِّنِ؞» عٛتُغَّنِ عِيسَى کٛݠِّ؞
ندٜنْ عِيسَى وِعِ‏: «مِوَرِ ندٜرْ دُنِيَارُ ندُ نغَمْ وَطُغٛ کِيتَ، نغَمْ حَا وُمْࢡٜ نغِعَ، يِعَنْࢡٜ بٛو مبُمَ؞» وٛطْࢡٜ ندٜرْ ڢَرِسَعٜنْ وٛنْدُࢡٜ بٜى مَاکٛ تٛنْ مبِعِمٛ‏: «مِنِنْ بٛو مِنْ وُمْࢡٜ نَ؟» عِيسَى جَابِ ࢡٜ‏: «تٛ عٛنْ لَاتِنٛ وُمْࢡٜ، ندٜنْ کَمْ عٛنْ مَرَايْنٛ عَيْبٜ؞ عَمَّا جٛنْتَ عٛنْ طٛنْ مبِعَ‏: مِنْ طٛنْ نغِعَ؞ نغَمْ مَاجُمْ عَيْبٜ مٛنْ طٛنْ تَبِتِ؞»

Hør på يُحَنَّ 9