Northern Katang: ປັຣນາຍ ເຢືາງ ເຈົາຣາຊີ

ປັຣນາຍ ເຢືາງ ເຈົາຣາຊີ  ປັຣຄັນ ຕາໄມ ປັຣນາຍ ກາຕາງ (ພາສາກາຕາງ)

ອຶງເຄາະ ຊາງັດ! ປັຣນາຍ ຣາໄງ່ອ໌ ຣາລັ່ງ ບັອງ ຊາບາວ ອາຕີ;
ປັຣນາຍ ກັອຍ ກູອ໌ ໂອນ ຊາອຶ່ຍ ນະ ກວາຍ ເບີນ ຊັອງ ຊຽງ ອັນ.
ປັຣນາຍ ຣາໄງ່ອ໌ ຣາລັ່ງ ແອີດ ຕຶ່ງ ອານວລ ກົຮ
ກະ ຕຶ່ງ ຣານາ ປັຣແວັຮ.
ປັຣນາຍ ຣາໄງ່ອ໌ ຣາລັ່ງ ແອີດ ແຈ່ະ ປັຣລັອຮ ເມືອງ,
ກະ ຊາບາວ ປາຍ:
“ເອີ ມັຮ ກວາຍ ເອີຍ! ເກົາ ກູອ໌ ເຍືາ!
ຊຽງ ເກົາ ຊາບາວ ຮັບ ແຕີ່ອ໌ ປໍ ກູ່ ນະ ກວາຍ ຕຶ່ງ ກຣວາງ ກູແຕອ໌ ໄນ່.
ມັຮ ເຍືາ ກາ ຕະ ນ່ະ ກັຣແນນ ເອີຍ! ອຶງເຄາະ ເຍືາ ຣຍານ ໂອນ ດັງ ເງ່ ຣາໄງ່ອ໌ ຣາລັ່ງ.
ມັຮ ກວາຍ ຊາກູລ ເອີຍ! ອຶງເຄາະ ເຍືາ ຣຍານ ໂອນ ແຄວ໌.
ອຶງເຄາະ ເຍືາ ຊາງັດ ມັຮ ປັຣນາຍ ເກົາ ປາຍ, ຍ່ອນ ປັຣນາຍ ກັອຍ ເບີນ ເກືາ ລາລື່;
ກູ່ ຣາມຶ່ຮ ເກົາ ປາຍ ລາ ແອີງ ປຍາຍ໌.
ປັຣໄລຮ ປັຣນາຍ ເກົາ ແອີງ ໄກຣ ອຶນແຍ່ະ;
ເກົາ ຊາອັຣ ກູ່ ປັຣນາຍ ອາໂລກ.
ກູ່ ປັຣນາຍ ເກົາ ປາຍ ລາ ແອີງ ຕານັ່ອງ,
ຕາ ເບີນ ປັຣນາຍ ອຶນເຕົ່າ ມາ ໂກ່ະ ແຕີລາ ອາໂລກ.
ມັຮ ກວາຍ ຣາໄງ່ອ໌ ເຕ່ອ໌ ດັງ ແຈງ ແຕ ປັຣນາຍ ເກົາ ປາຍ;
ມັຮ ກວາຍ ກາ ດັງ, ເຕ່ອ໌ ໄລ່ ຊາປຸ່ຮ ປາຍ ປັຣນາຍ ເກົາ ລາ ປຍາຍ໌ ອຶນແຍ່ະ.
ຄາອ໌ ໄມ່ ຣຽຮ ປັຣນາຍ ເກົາ ຕຽຮ ໄນ່ ແຕ ໄມ່ ຣຽຮ ປຣະ;
ຄາອ໌ ໄມ່ ຣຽຮ ໂອນ ດັງ ແຈງ ແຕ ໄມ່ ຈໍ່ອ໌ ແຢງ.
ຍ່ອນ ຣາໄງ່ອ໌ ຣາລັ່ງ ເບີນ ເກືາ ກາເລີຍ ແຕ ຕາເມົາ ເປ່ງ;
ອຶນເຕົ່າ ໄມ່ ຢໍອ໌ ອີ ເບີນ, ລາ ຕາ ເຕ່ອ໌ ຕາລີ ກະ ຣາໄງ່ອ໌ ຣາລັ່ງ.
ເກົາ ໄນ່ ແຕິ່ ລາ ຣາໄງ່ອ໌ ຣາລັ່ງ; ເກົາ ເຕ່ອ໌ ຕາຕ່ອຍ໌ ຣາໄລ່ຮ;
ເກົາ ເບີນ ເງ່ ດັງ ກະ ເງ່ ຕະ ກຣັ່ກ ອໍ.
ຄັນ ເຍືາ ຢຳນັ່ບ ເຢືາງ ເຈົາຣາຊີ ປຍາຍ໌ ລາລື່, ລາ ເຍືາ ຊາອັຣ ຣານະ ຕາ ອໍ;
ເກົາ ຊາອັຣ ຣານະ ໂອດ, ແຣັ່ງ,
ຣານະ ຕາ ອໍ, ກະ ປັຣນາຍ ອາແປັດ.
ເກົາ ອາລັ່ອຮ ເງ່, ເຈີ່ ເກົາ ຕະ ຕາປູ່ນ ເງ່ ກັອຍ;
ເກົາ ເບີນ ຊາປຸ່ຮ ກະ ເກົາ ເບີນ ອຳນາດ.
ຍ່ອນ ເກົາ ຈ່ອຍ, ມັຮ ເຕືາວ ປັຣເຍືາ ເຕ່ອ໌ ແກີດ ຊົດ,
ກະ ມັຮ ກວາຍ ຊົດ ເຕ່ອ໌ ອາລັ່ອຮ ຄານອດ ຕານັ່ອງ ຕາປຶ່ງ.
ຍ່ອນ ແຕ ເກົາ, ມັຮ ກວາຍ ຊົດ ຕຶ່ງ ກຣວາງ ກູແຕອ໌ ໄນ່ ເບີນ ອຳນາດ,
ກະ ເກົາ ຈ່ອຍ ໂອນ ໄລ່ ຕຳເປຣ່ອ໌ ປັຣນາຍ, ຕາ ເບີນ ຮັກບັງ ຊັງບຍາງ.
ເກົາ ອາໂຢ່ະ ອາແລ່ະ ກາ ອາໂຢ່ະ ເກົາ;
ອາແລ່ະ ກາ ຈໍ່ອ໌ ເກົາ, ອັນ ຣາມົຮ ເກົາ.
ເກົາ ເບີນ ຊະເຢືາງ ປັຣເລືາງ ປາເນົາ ດໍອ໌ ໂອນ ເຍືາ,
ດິ່ຮ ຊຸ ເບີນ ເຕີນ ປໍອ໌ ກະ ປຣຽດ ອໍ ທຣໍ ບອງ.
ມັຮ ຣາມຶ່ຮ ເກົາ ໂອນ ເຍືາ ລາ ອໍ ກາເລີຍ ແຕ ແຢງ;
ເປ່ງ ກາເລີຍ ແຕ ປຣະ.
ເກົາ ຕະ ເປາະ ຕຶ່ງ ຣານາ ຕານັ່ອງ ອໍ,
ກະ ຕຶ່ງ ຣານາ ປຍາຍ໌ ອໍ.
ເກົາ ໂອນ ກວາຍ ກາ ອາໂຢ່ະ ເກົາ ເບີນ ຕຽນ ວັ່ນ ຊາປັ່ນ ປຣະ,
ກະ ເກົາ ຕະ ໂອນ ດຸງ ໄລ່ ເບີນ ໂດຍ ຕາ ຣາລໍ່ ທຣໍ ຕາ ຣາລິ່ຮ.

“ເຢືາງ ເຈົາຣາຊີ ແຕງ ເກົາ ອຶນໂຍ່ງ, ເຈີ່ ອັນ ແຕງ ມັຮ ຣາມຶ່ຮ ການໍ່ອ໌;
ຕາແບິ ລາລື່ ລາ ອັນ ແຕງ ເກົາ.
ອັນ ແຕງ ເກົາ ແຕ ແດີຍ ອຶມແບິ ອາໄຣ່,
ອຶນໂຍ່ງ ແຕ ອັນ ແຕງ ກຣວາງ ກູແຕອ໌ ໄນ່.
ເບີນ ເກົາ ອຶນໂຍ່ງ ເວືາຍ, ແວັດ ກັອຍ ແຕ ເບີນ ທາເລ,
ກະ ເບີນ ປັຣໂລ່ຍ໌ ແດີອ໌.
ອຶນໂຍ່ງ ອັນ ອາຈຸຮ ມັຮ ກົຮ ກີ່ງ,
ກະ ອຶນໂຍ່ງ ແຕ ອັນ ແຕງ ມັຮ ກົຮ ກ່ອຣ ຈອຣ ຕູມ, ລາ ເກົາ ເບີນ ເຈີ່.
ອຶນໂຍ່ງ ເຢືາງ ເຈົາຣາຊີ ແຕງ ກຣວາງ, ແຕງ ເນືາ ໄທຣ,
ແຕີລາ ແຕງ ກູແຕອ໌ ເຮີບ ຕາແບິ.
ເກົາ ເບີນ ແອີດ ຕຶ່ງ ອຶນຕຸ ກັອຍ ບັອງ ອັນ ອາຈຸຮ ມັນລັ່ອງ;
ບັອງ ອັນ ກັຣຢັ່ຮ ເປິບ ມັນລັ່ອງ ກະ ທາເລ;
ບັອງ ອັນ ອາຈຸຮ ມັຮ ຣາມິ່ລ ຕຶ່ງ ມັນລັ່ອງ,
ກະ ບັອງ ອັນ ຕະ ປັຣໂລ່ຍ໌ ແດີອ໌ ລັ່ອຮ ອາຊັອຮ;
ບັອງ ອັນ ຕະ ຣາລັ່ນ ໂອນ ທາເລ ແອີດ,
ຕາ ໂອນ ທາເລ ເປຼີຍ ແຕ ຣາລັ່ນ ກາ ອັນ ນັ່ດ ດໍອ໌;
ບັອງ ອັນ ອາຈຸຮ ຕານາງ ກຣວາງ ກູແຕອ໌ ໄນ່, ບັອງ ກັອຍ ເກົາ ເບີນ ເຈີ່.
ບັອງ ກັອຍ ເກົາ ແອີດ ກະ ອັນ, ນ່ະ ກວາຍ ເຈືາງ ອຶມປຣ່ອມ ຕະ ດຸງ ເຕ່.
ເກົາ ຕະ ໂອນ ອັນ ຊັອງ ຣໍ່ອ໌ ບູຍ ກູ່ ຣາໄງ;
ກະ ເກົາ ຊັອງ ຣໍ່ອ໌ ເລືອຍໆ ແອີດ ຢັ່ຮ ເມືາງ ອັນ.
ເກົາ ຊັອງ ບູຍ ແຮີຣ ລາລື່ ຍ່ອນ ອັນ ແຕງ ກຣວາງ ກູແຕອ໌ ໄນ່,
ກະ ເກົາ ຊັອງ ຣໍ່ອ໌ ຣາງຶ່ຮ ອັນ ແຕງ ກູ່ ນະ ກວາຍ.

“ມັຮ ກວາຍ ນຸ່ມ ເອີຍ! ອຶງເຄາະ ເຍືາ ຊາງັດ ເກົາ ນໍ!
ອຶງເຄາະ ເຍືາ ຕະ ຕາປູ່ນ ນ່ະ ເກົາ ປາຍ; ນ່ະກັອຍ ຣາງຶ່ຮ ເຍືາ ແກີດ ຣໍ່ອ໌.
ອຶງເຄາະ ເຍືາ ຕະ ຕາປູ່ນ ມັຮ ປັຣນາຍ ເກົາ ຕຽຮ.
ອຶງເຄາະ ເຍືາ ແກີດ ຣາໄງ່ອ໌ ຣາລັ່ງ; ອຶນໂຈຍ ກູເຕືາງ ຕັຮ ມັຮ ປັຣນາຍ ເກົາ ຕຽຮ.
ກວາຍ ອາແລ່ະ ຊາງັດ ເກົາ, ກວາຍ ກັອຍ ເບີນ ບຸ່ນ;
ອັນ ກັອຍ ແອີດ ອາກັ່ນ ເລືອຍໆ ຕຶ່ງ ງັ່ຮ ຕົ່ງ ດຸງ ເກົາ ໄງ ຣາໄງ.
ກວາຍ ອາແລ່ະ ກາ ຣາມົຮ ເກົາ, ອັນ ເບີນ ອາມົ່ງ,
ກະ ເຢືາງ ເຈົາຣາຊີ ຊັອງ ຣໍ່ອ໌ ກະ ອັນ.
ກວາຍ ອາແລ່ະ ມາ ຕາ ເບີນ ຣາມົຮ ເກົາ, ລາ ອັນ ຕະ ໂອນ ຈະ ອັນ ເບີມ ຊາແຣັຮ ຊາຣວຍ;
ກວາຍ ອາແລ່ະ ມາ ຊາອັຣ ເກົາ, ລາ ອັນ ຢໍອ໌ ອາກັນ ກູຈີດ ແດັດ ດຽລ.”

Hør på ປັຣນາຍ ປາລີ່ ພາຍາ 8