If you would like a copy of this version please contact info@davaraudiobibles.org

Dogri New Testament, CC-BY-SA-4.0, The Love Fellowship. Dogri New Testament Audio Bible, CC-BY-SA-4.0, Davar Partners International, 2021.

Dogri New Testament

This work is licensed under Creative Commons Attribution-ShareAlike 4.0 License.

सारे थमां पैले वचन हा, ते वचन परमेसर दे कन्ने हा, ते वचन परमेसर हा। इयै शुरुआत च परमेसर दे कन्ने हा। सब केश ओदे कोलां गै पैदा ओया, ते जे केश पैदा ओया ऐ एस दे बिचा कोई बी चीज ओसदे बगैर पैदा नेई ओई। ओसदे बिच जांन ही; ते ओ जांन मनुक्खें दी लो ही। ते लो नेरे च चमकदी ऐ, पर न्हेरे ने उसी कबूल नेई कित्ता।
एक मनुक्ख परमेसर थमां पेजया जेसदा नां यूहन्ना हा। ओ ए गवाही देने गी आया के लो दी गवाही दियै, तां जे, सब ओस थमां बश्वास लेई औन। ओ अप्पुं ते, ओ लो नेई हा, पर ओस लोई दी गवाही देने आसतै आया हा।
सच्ची लो जेड़ी अर एक मनुक्खें गी लो करदी ऐ, दुनियां च औने आली ही। ओ दुनिया च हा, ते दुनियां ओदे थमां गै पैदा ओई, ते दुनियां ने उसी नेई पंछानया। ओ अपने कर आया ते ओस दें अपने उसी कबूल नेई कित्ता। लेकन जिनैं-जिनैं उसी कबूल कित्ता, ओसने उनेंगी परमेसर दे बच्चे ओनें दा आक्क दिता, मतलब उनेंगी जेड़े ओसदे नां उपर बश्वास करदे न ओ नां तां खूने कन्ने, नां गै जिंदु दी मर्जी कन्ने, नां गै मनुक्खें दी मर्जी कन्ने, लेकन परमेसर थमां पैदा ओये।
ते वचन देहतारी ओया; ते अनुग्रह ते सच्चाई कन्ने परपुर ओईयै साड़े बिच वास कित्ता, असैं ओसदी ऐसी मैमा दिखी, जियां पिता दे इको एक दी मैमा। यूहन्ना ने ओदे बारै च गुआई दिती, ते पकारीयै आखया, “ए उवै ऐ, जेसदे बारै च मैं तुसेंगी सनाया के जेड़ा मेरे बाद आवा करदा ऐ, ओ मेरे थमां बड़ा ऐ किके ओ मेरे कोलां पैलैं दा ऐ।” किके ओसदी परपुर्ता बिचा असैं सारें आसल कित्ता मतलब अनुग्रह दी परपुरी। एसकरी के कनून तां मूसा थमां दिता गीया, लेकन अनुग्रह ते सच्चाई यीशु मसीह थमां दसेया गीया। परमेसर गी कुसे कदें बी नेई दिखया, इकै एक पुत्तर जेड़ा पिता दी गोदी च ऐ, ओसने गै उसी परकट कित्ता।

यूहन्ना दी गुआई ए ऐ, के जेलै यहूदीयें यरूशलेम चा याजकें ते लेवीयें गी ओदे कोल ए पूछन आसतै पेजया, “तू कोन ऐं? तां ओसने मनी लेता ते मना नेई कित्ता, लेकन मनी लेता, आऊँ मसीह नेई ऐं” ओस बेलै उनै उसी पूछया, तां पी कोन ऐं? के तू एलिय्याह ऐं? ओसने आखया, आऊँ नेईयैं। तां के तू ओ पविखवक्ता ऐं? ओनें जबाब दिता, नेई। ओस बेलै उनै उसी पूछया, ते पी तू कुन्न ऐं? तां जे अस अपने पेजने आलें गी जबाब देचै। तू अपने बारै च के आखना ऐ? ओसने आखया, जियां यशायाह पविखवक्ता ने गलाया ऐ, आऊँ जंगलें च एक पकारने आले दी बाज ऐं के तोस प्रभु दा रस्ता त्यार करो।
ओ फरीसियें थमां भेजे गेदे हे। उनै उसी ए सुआल पूछया, “जेकर तू नां मसीह ऐं, ते नां एलिय्याह, ते नां गै ओ पविखवक्ता ऐं, ते पी पवित्रशनांन कि दिना ऐं?” यूहन्ना ने उनेंगी आखया, “आऊँ तां तुसेंगी पानी कन्ने पवित्रशनांन दिना ऐं, लेकन थुआड़े बेच मानु खडोते दा ऐ जिसी तोस नेई जांनदे। मतलब मेरे थमां बाद औने आला ऐ, जेसदी नोक्क दा तस्मा खोलने दे आऊँ काबल नेई।” ए गल्लां यरदन दे परली बक्खी बैतनिय्याह च ओईयां, जिथें यूहन्ना पवित्रशनांन दिंदा हा।

अगलै धयाडै ओनें यीशु गी अपनी बक्खी औंदे दिखियै आखया, “दिख्खो, ए परमेसर दा लेल्ला ऐ जेड़ा दुनियां दा पाप चुकी लेई जंदा ऐ। ए उवै जेसदे बारै च मैं गलाया हा, के एक मनुक्ख मेरे पिछें आवा करदा जेड़ा मेरे थमां आदरमान आला ऐ, किके ओ मेरे थमां पैलैं दा ऐ। ते आऊँ तां उसी पनछांनदा नेई हा, लेकन एस लेई आऊँ पानी कन्ने पवित्रशनांन दिंदा आया के ओ इस्राएल च परकट ओई जा।” ते यूहन्ना ने ए गुआई दिती “मैं आत्मा गी कबूतर दे रूप च सोर्गा चा उतरदे दिखया, ते ओ ओसदे उपर रुकी गीया। आऊँ तां उसी पनछांनदा नेई हा, लेकन जेस ने मिगी पानी कन्ने पवित्रशनांन देने गी पेजया, उसै मिगी आखया, जेसदे उपर तू आत्मा गी उतरदे ते ओदे उपर रुकदै दिखगा, ओ गै पवित्र आत्मा कन्ने पवित्रशनांन देने आला ऐ। ते मैं दिखया, ते गुआई दिती ऐ के इयै परमेसर दा पुत्तर ऐ।”

“अगलै धयाडै यूहन्ना ते ओदे चेलें बिचा दो मानु खड़ोते दे हे। ते ओसने यीशु उपर जेड़ा जा करदा हा दिखियै आख्या, दिख्खो ए परमेसर दा लेल्ला ऐ।” ओस बेलै ओ दमै चेलें ओदी सुनीयै यीशु दे पिछें आई गै। यीशु ने मुड़ीयै ते उनेंगी पिछें औंदे दिखया ते आखया, “तोस कुसी तुप्पा दे ओ?” उनै उसी आखया, “ए गुरु, तू कुत्थें रौना ऐं?” ओसने उनेंगी गी आखया, “चलो, ते दिखी लैगे।” ओस बेलै उनै आईयै ओदे रौने दी जगा दिखी, ते ओस धयाडै ओदे कन्ने गै रे। ते ए गल्ल दसमे कैंटे दे लग-भग ही।
उन्दे दौनी चा, जेड़े यूहन्ना दी गल्ल सुनीयै यीशु दे पिछें आए दे हे, एक शमौन पतरस दा प्रा अन्द्रियास हा। ओसने ऐसहां पैलैं अपने सक्के प्रा शमौन कन्ने मिलीयै उसी आखया, “असेंगी ख्रिस्तुस, मतलब मसीह, मिली गीया ऐ।” ओनें उसी यीशु दे कोल अन्दा। यीशु ने दिखियै आखया, “तू यूहत्रा दा पुत्तर शमौन ऐ, तू कैफा मतलब तुगी पतरस आख्या जाग।”

दूऐ धयाडै यीशु ने गलील जिले गी जाना चाया। ते फिलिप्पुस कन्ने मिलीयै आखया, “मेरे पिछें चली आ।” फिलिप्पुस, अन्द्रियास तां पतरस दे शैर बेतसैदा दा रौने आला हा। फिलिप्पुस नतनएल कन्ने मिलया ते उसी आखया, “जेसदे बारै च मूसा दे कनून च ते, पविखवक्तें आखे दा हा, ओ असेंगी मिली गीया; ओ युसूफ दा पुत्तर यीशु नासरत दा रौने आला ऐ।” नतनएल ने ओसदे कन्ने आखया, “के कोई छैल चीज बी नासरत बिचा निक्क्ली सकदी ऐ?” फिलिप्पुस ने उसी आखया, “चलीयै दिखी लै।” यीशु ने नतनएल गी अपनी बक्खी औंदे दिखियै ओदे बारै च आखया, “दिखखो, ए सच-मुच्च इस्राएली ऐ, एदे च कपट नेई।” नतनएल ने उसी आखया, “तू मिगी कियां जाननां ऐं?” यीशु ने उसी जबाब दिता, “एस थमां पैलैं के फिलिप्पुस ने तुगी बलाया, जेसलै तू अंजीर दे बूट्टे दे थल्लै हा, ओस बेलै मैं तुगी दिखया हा।” नतनएल ने उसी जबाब दिता, “ए, गुरु तू परमेसर दा पुत्तर ऐं तुं इस्राएल महाराजा ऐ।” यीशु ने उसी जबाब दिता, “मैं जेड़ा तेरे कन्ने गलाया के मैं तुगी अंजीर दे बूट्टे थल्लै दिखया, के तू एस लेई बश्वास करना ऐं? तू एदे कोलां बी बडे-बडे कम्म दिखगा।” पी ओदे कन्ने आखया, “आऊँ तेरे कन्ने सच-सच आखना के तू सोर्गे गी खुले दा, ते परमेसर दे सोर्गदूतें गी मनुक्ख दे पुत्तर दे उपर उतरदे ते उनेंगी उपर जंदे दिखगे।”

Hør på यूहन्ना 1